Hætta á að bloggari sæti pyndingum og konu nauðgað af löggunni í Mexíkó

Amnesty International vekur sérstaka athygli á þremur mannréttindamálum í apríl. Allir geta lagt lið og beðið stjórnvöld í viðkomandi löndum um að virða mannréttindi.

Bárbara Italia Méndez bíður enn eftir réttlæti, tveimur árum eftir að lögreglumenn nauðguðu henni. Hér er hægt að lesa um málið og prenta út bréf til að senda yfirvöldum í Mexíkó og fara fram á réttlæti.

Fouad Ahmad al-Farhan gagnrýndi stefnu stjórnvalda í Saudi Arabíu með friðsamlegum hætti, bloggaði þar á meðal um varðhaldsvist samviskufanga án ákæru eða réttarhalda. Hann var sjálfur tekin fastur í kjölfarið og hefur verið í einangrun. Hér er hægt að lesa meira um málið prenta út bréf og senda áfram.

Samviskufangarnir Ronak Safarzadeh og Hana Abdi eru enn í fangelsi vegna friðsamlegrar baráttu sinnar fyrir kvenréttindum í Íran. Hér er hægt að lesa meira um málið og prenta út bréf til að senda yfirvöldum í Íran.

Spekin kemur einnig að utan

Hér er ef til vill komin skýringin á því af hverju ráðherraliðið er allt í útlöndum. Allir að safna pening enda ekkert að gera á hinu strjálbýla Íslandi lengur. Fréttin af vísi.is af utanríkisráðherranum okkar smellpassar inn í það hvernig þar á bæ eigi að bjarga málunum:

"Segir bankana geta reiknað með stuðningi ríkisvaldsins

Ingibjörg Sólrún Gísladóttir utanríkisráðherra slær því föstu í samtali við danska blaðið Berlingske Tidende að allir bankar landsins geti reiknað með stuðning frá ríkisvaldinu ef þeir lenda í vandræðum.

Hún er tilbúin til þess að styðja þá beint með framlögum úr ríkissjóði og einnig til þess að auka gjaldeyrisvarasjóð landsins.

Á sama tíma hafnar hún því að bankarnir muni komast í þrot áður en að lausafjárkreppunni á alþjóðamarkaðinum lýkur. Ingibjörg segir að stjórnvöld muni ekki láta það líðast að bankarnir verði gjaldþrota eins og staðan er í dag."

Semsagt, einkavæða gróðann og þjóðnýta svo tapið! Ekki alveg það sem okkur vantaði núna.

Auðurinn kemur að utan

Missti af þessari keppni

...þó að hún hafi verið í næsta húsi, semsagt íþróttahöllinni. Við fórum á gjörning hjá Önnu Richards og félögum og þar var ansi gaman og hellingur af fólki. Svo ætlaði ég að sjá allavega úrslitin í söngkeppninni en þá var ég sendur út í búð að kaupa nammi. Ég held að ungmennin hafi verið til fyrirmyndar, þau sem voru í búðinni voru allavega stillt og prúð. Alltaf nóg að gera á henni Akureyri.

Verslósigur í söngkeppni

Rotnar nautakjöt í formaldehýði?

Það vantar nú eitthvað á þessa frétt af kúariðu og tollskoðunum. Síðast þegar ég vissi rotnaði kjöt ekki í formaldehýði. Það er reyndar einmitt ástæðan fyrir því að líkamspartar eru settir í þennan eitraða vökva, til þess að þeir rotni ekki. Varla hafa japönsku tollverðirnir fiskað kusuna og kálfinn hans Damiens Hirst upp úr formaldehýðbaðinu og eyðilagt þar með verkið? Tja, en annað eins hefur nú gerst.

"Kýr í formaldehýði, úr einu frægasta verki breska listamannsins Damiens Hirst, lenti í ógöngum nýverið á leið sinni á safn í Tókýó. Verkið heitir Mother and Child Divided, og sýnir hálfa kú og hálfan kálf. Fyrir verkið var hann tilnefndur til Turner-verðlaunanna árið 1995.

Japanir lögðu á sínum tíma blátt bann við innflutningi á bresku nautakjöti vegna hættu á útbreiðslu kúrariðu, og því var verk Hirst samviskusamlega stöðvað af japönskum tollvörðum. Það var talsverð þolraun fyrir safnstjóra Mori safnins að sannfæra tollverði um að jafnvel harðsvíruðustu matgæðingar myndu ekki leggja sér listaverkið til munns.

Þegar leyfið var fengið, kom upp annað vandamál, kýrin og kálfurinn voru farin að rotna eftir tollskoðunina, og á endanum þurftu Japanir að útvega „nýja gerð“ verksins."

Listkýr í vanda

Finanzkrise gefährdet ganz Island

Fyrirsögnin á grein í þýsku útgáfunni af Financial Times er ekki beint upplífgandi "Finanzkrise gefährdet ganz Island". Greinina er hægt að lesa hér og þar segir meðal annars að aðalástæðan fyrir þessari fjármálakreppu sem heltekið hefir Ísland sé gríðarlegar erlendar skuldir, einkum bankanna. Greinin er byggð á greininni sem var í bresku útgáfunni af Financial Times um daginn en tekur enn dýpra í árinni. Greinin í Financial Times Deutschland er skrifuð af David Ibison í Reykjavík og Yasmin Osman í Frankfurt.

Og áfram hækka vextirnir og hafa ekki verið hærri í meira en fjögur ár! Ég minni á fundi Vinstri grænna um lausnir vandans á Ísafirði og Reykjavík í kvöld. 

Seðlabankinn hækkar stýrivexti

Rosie gangandi hetja

Rosie Swale Pope er greinilega ekki af baki dottin þrátt fyrir að hafa brotið fjögur rifbein í hálku í Mývatnssveit. Og af því að læknirinn á Húsavík sagði henni að taka því rólega næstu vikurnar ætlar hún að hvíla sig í tjaldi í Mývatnssveitinni. Mér finnst að það eigi að gefa henni mánaðarkort í Jarðböðin svo hún geti haft það notalegt í vorkuldanum. Þessi kona er greinilega hetja og ekkert að pæla í því að leigja sér einkaþotu á kostnað almennings til að skreppa á milli staða, gengur bara í staðinn.

Reyndar þurfti Ingibjörg Sólrún einnig að fá sér göngutúr í gær því trukkarnir voru búnir að loka ráðherrabílinn hennar af þar sem hann stóð víst ólöglega við Hafnarhúsið. Þessi mótmæli trukkanna eru greinlega að taka breytingum til góðs. Knýja ráðherrana til að spara bensínið. Þetta lýst mér vel á. Bara verst hvað Geir H. Haarde er eitthvað úrillur þessa dagana, með allt á hornum sér í viðtali í útvarpinu í gær. Ætli flug með einkaþotum fari svona í skapið á manninum? Ég mæli með því að ganga.

Fall á Íslandi seinkaði heimshlaupi

Hitler, Göbbels og Ólympíueldurinn

Það var lögreglan sjálf sem slökkti víst á eldinum í París og hoppaði með hann upp í rútu. Það þurfti því ekki slökkvitæki til eins og tveir mótmælendur í London beittu í gær án árangurs. Þessi mótmæli eru að bera árangur því augu vesturlandabúa eru að opnast fyrir mannréttindabrotum í Kína og gagnvart íbúum Tíbets. Hér á landi hefur Birgitta Jónsdóttir verið í farabroddi andófs gegn ofbeldinu í Tíbet. Á sunnudaginn var hún kosinn formaður nýrra samtaka, Vina Tíbets.

Annars þótti mér fréttin í Ríkisútvarpinu um Ólympíueldinn athyglisverð. Þar kemur fram að þessi siður að hlaupa með eldinn um borgir hinna ýmsu landa var fundin upp af nasistum í áróðursskyni fyrir Ólympíuleikana í Berlín 1936. Það vori því þeir félagar Hitler og Göbbels sem komu þessari hefð af stað og það er kaldhæðnislegt að Kínverjar skuli vera að feta í fótspor þeirra. Hér er fréttin af ruv.is

Fólk fer fram á friðsamlega lausn í Tíbet og að kínversk stjórnvöld virði mannréttindi.

Slökkt á ólympíueldi í París

Eru sveitarfélögin að standa sig í jafnréttismálum?

Jafnréttisstofa stendur fyrir áhugaverðu málþingi um stöðu jafnréttismála hjá sveitarfélögum, miðvikudaginn 9. apríl kl. 12-13.15 á Hótel KEA. Þar verða kynntar íslenskar niðurstöður Jafnréttisvogarinnar, Evrópuverkefnis sem er nýlokið, en þar var staða jafnréttismála mæld hjá sveitarfélögum í fimm löndum. Á fundinum verður meðal annars skýrt frá því hvaða sveitarfélög eru að standa sig best í jafnréttismálum, miðað við mælikvarða verkefnisins.

Tæki til að mæla jafnrétti

Tilgangur verkefnisins var að gera stöðu jafnréttismála sýnilega og aðgengilega almenningi. Spurningar sem varða hlutfall kvenna og karla í stjórnunarstöðum, atvinnuþátttöku kynjanna og þátttöku kynjanna í ákvarðanatöku voru sendar til sveitarfélaga. Þátttakendur í verkefninu voru, auk Íslands, Búlgaría, Finnland, Grikkland og Noregur. Auk samanburðar á milli sveitarfélaga innanlands er því hægt að bera saman niðurstöður á milli landanna. Niðurstöðurnar eru birtar á myndrænan hátt á heimasíðu verkefnisins.

Dagskrá málþingsins

12:00 Kristín Ástgeirsdóttir, framkvæmdastýra Jafnréttisstofu, setur fundinn

12:05 Hvernig mælum við jafnrétti?

     Kjartan Ólafsson, lektor í félagsvísinda- og lagadeild Háskólans á Akureyri

12:20 Staða jafnréttismála í íslenskum sveitarfélögum. Kynntar helstu niðurstöður

     Svala Jónsdóttir, sviðsstjóri hjá Jafnréttisstofu

12:35 Jafnréttisvogin frá sjónarhóli sveitarfélags

     Halla Margrét Tryggvadóttir, starfsmannastjóri Akureyrarbæjar

12:50 Samantekt og umræður

 

Léttar hádegisveitingar í boði.

Málþingið er öllum opið og aðgangur er ókeypis.

 
http://www.jafnretti.is

http://www.tft.gender.is

Fundarröð Vinstri grænna: Tökumst á við efnahagsvandann

Það er gott ef kreppan er strax á undanhaldi. En er botninum náð eins og forsætisráðherrann sem flaug með einkaþotu úr landi vill halda fram? Sem betur fer eru ekki allir sem ætla að flýja eða standa hjá og horfa á heldur koma með jákvæðar og uppbyggilegra tillögur til lausnar vandans.

Í dag verður fundaröð Vinstri grænna um efnahagsmál hleypt af stokkunum á Akureyri. Yfirskrift fundaraðarinnar er „Tökumst á við efnahagsvandann –tillögur Vinstri grænna“ og er tilgangurinn að kynna og ræða þær tillögur sem Vinstri græn hafa lagt til á þingi til að taka á aðkallandi vanda í efnahagsmálum. Meginmarkmið tillagnanna er að endurheimta efnahagslegan stöðugleika, verja stöðu heimilanna og kaupmátt launa.

14.00 Blaðamannafundur þar sem fundaröðin og tillögur VG í efnahagsmálum verða kynntar.

15.00 –Fyrsti fundurinn í fundaröðinni „Tökumst á við efnahagsvandann, –tillögur Vinstri grænna“, frummælendur eru Steingrímur J. Sigfússon og Svandís Svavarsdóttir.

Allir að mæta! 

Íslensku bankarnir að koma inn úr kuldanum

Bæ bæ "Fagra Ísland"

Umhverfisráðherra hefur brugðist og "Fagra Ísland" Samfylkingarinnar er bara plat. Þetta er sorglegt en staðreynd. Að vísa frá kæru Landverndar er blaut bekkjartuska í andlit allra náttúruverndarsinna. Samfylkingin hefur heldur betur beðið álitshnekki og ég get ekki sé að fólki sem er umhugað um náttúru þessa lands geti kosið Samfylkinguna framar með góðri samvisku. Reyndar er Samfó einnig að klikka í heilbrigðismálum, efnahagsmálum, atvinnumálum, sjávarútvegsmálum, utanríkismálum... bíddu, væri ekki einfaldara að gera lista yfir það sem Samfylkingin hefur ekki klikkað á, hjálpið mér...eh... autt blað, tabúla rasa.

Telur Samfylkingu ekki hafa beðið álitshnekki

Rektor HÍ fellur á prófinu!

Það passar ekki alveg að HÍ birti stóra auglýsingu á baksíðu 24stunda í dag og slagorðið er: Háskóli Íslands varð langefstur á prófinu! En í gær féll Kristín Ingólfsdóttir rektor á prófinu! Að átelja vinnubrögð Hannesar er eitt en rétt hefði verið að ávíta manninn. Hvernig getur rektor ætlast til þess að 90% þjóðarinnar haldi áfram að treysta HÍ með prófessor innanborðs sem dæmdur er sekur í hæstarétti fyrir ritstuld og það eina sem sagt er við hann er, ekki gera svona aftur Hannes?

Ég virði HHG samt fyrir að viðurkenna mistök (tæknileg!) sín. Hann er maður af meiri. Einmitt, vanda sig betur næst.

„Ég hefði átt að vanda mig betur"

Ingibjörg og Geir langt yfir almenning hafin

Ingibjörg Sólrún og Geir H. Haarde eru greinilega laaaangt yfir almenning í þessu landi hafin. Á meðan pöpullinn á að herða sultarólina ganga þau í þotuliðið. Mega ekki minni menn vera en bankastjórarnir og nýríku forstjórarnir í þessu landi. Nei, þau geta ekki verið þekkt fyrir að mæta á NATO fund í Rúmeníu í venjulegri flugvél eins og almúginn, auðvitað í einkaþotu eins og Bússi og hinir alvörukallarnir.

"Hey Solla, viltu ekki far í nýju einkaþotunni minni!"

"Vá ertu að meina það Geiri, varstu að kaupa þessa?!"

"Nei, nei, leigði hana bara af vini mínum, hann lánaði mér hana eiginlega, fékk rosa góðan díl. Maður verður að spara á þessum krepputímum, he,he..."

Það er alveg rétt hjá Geir H. Haarde að þetta er ekki aðalfréttin við för þeirra á NATO fundinn því aðalfréttin er auðvitað að Ingibjörg Sólrún Gísladóttir hafði engan tíma (lesist "áhuga") á því að mæta á fund utanríkismálanefndar Alþingis til að ráðfæra sig við nefndina eða að minnsta kosti upplýsa fulltrúa kjósenda um hvaða boðskap þau skötuhjú bera hershöfðingjum og ráðherrum á þessum fundi hernaðarbandalagsins NATO!

Ráðamenn þessarar þjóðar eru greinilega á góðri leið með að verða veruleikafirrt, viðbrögð þeirra við gagnrýni almennings bera það með sér.

Munaði 100-200 þúsund krónum

Trukkabílstjórar að tapa sér

Þessi trukkamótmæli eru dálítið fyndin. Einhverjir jappakallar og 16 tonna treilera gaurar loka götum og flauta eins og vitlausir væru. Á hvern eru þeir að flauta? Hvern annan! Eða almenning sem er á leið í vinnu, skóla eða með handleggsbrotin börn á slysó? Og löggan býður þeim í nefið. Öðruvísi var nú tekið á skemmtilegum mótmælum Saving Iceland í sumar. Þar braut löggan bílrúður og handtók fólk með látum. Af því að það stofanði almannahgsmunum í hættu að ganga á Snorrabrautinni.

Og um hvað snýst málið. Hækkanir á heimsmarkaðsverði og gengisfall krónunnar! Bensínið hér er ódýrara en í Noregi, Danmörku, Bretlandi, Þýskalandi og víðar. Ég væri kátur ef það sama gilti um brauðið! Þessir trukkakallar eru brandarakallar með flautur. Hvernig væri að flytja þungavörur með skipum í stað þess að eyðileggja vegina með þessum trukkum sem menga andrúmsloftið með tonnum af útblæstri. Ég hef enga samúð með trukkunum, sorrý. Sif Friðleifs sem var að fatta að hún er komin í stjórnarandstöðu og má fara að mótmæla sagði að hún efaðist um að álögurnar á bensín færu allar í vegagerð. En ég er með fréttir fyrir Sif og trukkana: þær duga hvergi nærri fyrir allri vegagerðinni.

Ég myndi taka þátt í mótmælum ef það væri verið að mótmæla okurverði á nauðsynjum eins og brauði og annarri matvöru en ég er með ráð fyrir trukkana: Akið minna, á sparneytnari bílum! 

Mestu tafir hingað til

Steingrímur J. á YouTube

Ég veit ekki hvort það sé vegna áhrifa frá hinum hressa og duglega aðstoðarmanni Steingríms J., Finni Dellsén að það er verið að poppa upp hlutina hjá Vinstrihreyfingunni grænu framboði. Að minnsta kosti er Steingrímur J. Sigfússon kominn á YouTube og myndbandið er hér:

Þetta er góð leið til að koma skilaboðum til fólks. Myndbandið er að vísu ekkert rosalega poppað, svona frekar heimilislegt en á örugglega eftir að slá í gegn. En skilaboðin eru tímabær því ástandið í efnahagsmálum er ekki eins gott og Geir H. Haarde virðist halda og ég efast um að botninum sé náð, með þessari ríkisstjórn.

"Ástandið í efnahagsmálum er alvarlegt en ekki óyfirstíganlegt. Það kallar hins vegar á snarræði og öruggar aðgerðir af hálfu ríkisstjórnarinnar – að hún axli ábyrgð á ástandinu eins og það er orðið og beiti þeim tækjum sem hún ræður yfir. Fyrir nokkru var ljóst að stefndi í mikinn vanda sem kæmi fyrst og fremst niður á heimilunum í landinu. Í baráttunni við að verja lífskjör almennings lögðu Vinstri græn fram tillögur á þingi fyrir þremur vikum síðan um víðtækar ráðstafanir í efnahagsmálum. Til að kynna tillögurnar og fá umræður um þær höfum við útbúið myndskeið og hleypum af stokkunum fundaröð um allt land undir yfirskriftinni Tökum á efnahagsvandanum: Tillögur Vinstri grænna. Myndbandið má nálgast á heimasíðu VG."

Fundaröðin hefst í framhaldi af stjórnarfundi Vinstri grænna á Akureyri laugardaginn 5. apríl, á Hótel KEA klukkan 15.

Að öðru leyti verða fundir sem hér segir:

6. apríl – Neskaupstaður
6. apríl – Grindavík
7. apríl – Vík í Mýrdal
7. apríl – Akranes
8. apríl – Sauðárkrókur
8. apríl – Garðabær
10. apríl – Reykjavík
10. apríl – Ísafjörður

Tímabundið átak í verðlagseftirliti

Hreppsómagi og vindhanar

Guðmundur R Lúðvíksson hefur sett upp fjölmargar sýningar á síðustu árum og er nýkominn frá Rotterdam þar sem hann tók þátt í samsýningu. Hann segir um verkin sem hann sýnir á Café Karólínu:

"Verkið Hreppsómagi og vindhanar er unnið þannig að ég mun leggja af stað kl. 05.00 föstudags nótt frá Njarðvíkum til Akureyrar. Kílómetra mælir bílsins verður stilltur á núll við upphaf ferðar. Við hver hreppamörk alla leið til Akureyrar verður lofti blásið í poka, og lokað þétt fyrir þá. Hver poki  er merktur með km sem eftir eru á áfangastað. Ljósmynd er tekin af gjörningnum og tilheyrir hverjum poka. Núll pokinn verður stærri en allir hinir pokarnir.
Einnig verða þrjú verk sem unnin eru með girni og eru þrívíð."

Guðmundur R Lúðvíksson

Hreppsómagi og vindhanar

05.04.08 - 02.05.08   

Café Karólína // www.karolina.is

Kaupvangsstræti 23 // IS 600 Akureyri // 4612755

Laugardaginn 5. Apríl 2008, opnar Guðmundur R Lúðvíksson sýninguna "Hreppsómagi og vindhanar", á Café Karólínu á Akureyri.

Nánari upplýsingar um Guðmund R Lúðvíksson era ð finna á www.1og8.com og netfangið er 5775750(hjá)isl.is   Sýningin á Café Karólínu stendur til 2. maí, 2008.

Meðfylgjandi er ferilskrá Guðmundar R Lúðvíkssonar og tvær myndir, önnur af verkinu "Sumarið í Reykjavík 1999" sem hann sýndi einmitt á Café Karólínu árið 1999.

Sýning Jóns Laxdal “Úr formsmiðju” á Karólínu Restaurant stendur yfir til 5. september 2008.

Næstu sýningar á Café Karólínu: 

03.05.08-13.06.08    Kjartan Sigtryggsson
14.06.08-04.07.08    Arnar Ómarsson
05.07.08-01.08.08    Vilhelm Jónsson
02.08.08-05.09.08    Margeir Sigurðsson
06.09.08-03.10.08    Sigurlín M. Grétarsdóttir
04.10.08-31.10.08    Ingunn St. Svavarsdóttir Yst
01.11.08-05.12.08    Þorsteinn Gíslason

Umsjónarmaður sýninganna er Hlynur Hallsson

Skrár tengdar þessari bloggfærslu:

• cv_gudmundur_r_ludviksson.doc