Ég ætla að kaupa Moggann í dag

Ég var að fletta Mogganum á kaffistofunni áðan og hann er bara stútfullur af áhugaverðu efni. Strax á forsíðunni eru tvær frábærar fréttir, önnur af konu sem er til í að endurbyggja Laugarveg 4 og 6 á eigin kostnað, dæmi sem borgarstjórn getur ekki hafnað og hin af frábærum árangri í almenningssamgöngum hér á Akureyri. Inní í blaðinu er ítarleg og vel skrifuð fréttaskýring Skafta Hallgrímssonar um reynsluna af ókeypis strætó frá mörgum sjónarhornum og best finnst mér náttúrulega setning Ninju Rutar nema í VMA sem segir að það sé líka menning að nota strætó, þar hitti maður fólk á leið til vinnu og skóla og að margir félaga hennar skilji bílinn eftir heima og fari frítt í strætó í skólann. Þetta er snilld og nú þarf bara að bæta kerfið og auka tíðni ferða.

Auk þess er hellingur af áhugaverðum fréttum í Mogganum, til dæmis skemmtileg grein Einars Fals um "lista með listamönnum" þar sem hann fjallar um artfacts.net (að vísu smá galli að hann gleymir að benda á hvar ég er á þessum frábæra lista sæti, 6.040 af 180.000 og ofar en Georg Guðni og Hrafnkell sjónlistaverðlaunahafi!).

Svo er einnig áhugaverð grein um Obama og Hillary og meira og meira. Ég veit að þessi pistill minn hljómar eins og ömurleg auglýsing eða allavega kostun frá Mogganum en svo er nú ekki. Leiðararnir eru líka eins og venjulega svo ekki sé nú talað um Staksteina sem ég nenni ekki að lesa þó að hann hafi jafnvel líka litið skár út en venjulega.

Það er greinilegt að það er hellingur af færu fólki að vinna hjá Mogganum þó að topparnir (með undantekningum) séu úti að aka. Stundum kaupum við Moggann á laugardögum með Lesbókinni en nú ætla ég að koma við í Strax og kaupa þetta þriðjudagsblað og ekki bara hanga yfir mbl.is þó að það sé nú einnig ágætt.

Ósátt við rökstuðning ráðherra

Bankarnir finna leið til að smyrja á annað

Íslensku bankarnir sem hafa verið duglegir við að innheimta seðilgjöld, þjónustugjöld og aukagjöld ýmiskonar verða sennilega fljótir að finna leið til að smyrja á eitthvað annað svo neytendur þurfa alltaf að borga brúsann á endanum. Gamli allaballinn hann Björgvin viðskiptaráðherra fær samt prik fyrir að beita sér í þessu máli, já og banna seðilgjöldin illræmdu. Þetta uppgreiðslugjald er einnig glæpsamlegt og samkeppnishamlandi.

Íslenskir neytendur eru með þeim slöppustu í heimi og kominn tími til að við tökum okkur tak og gerum eitthvað í málunum, hættum að kaupa drasl sem verið er að okra á og skiptum um banka þegar okkur er nóg boðið. Ég fagna því til dæmis að þýskur sparisjóðabanki ætlar að bjóða upp á lán með lægri vöxtum hér á landi.

Það þarf að efla neytendavitund og stórefla neytendasamtökin svo þau virki hér eins og í öðrum löndum. Gott ef Björgvin Sigurðsson ætlar að fara í það.

Seðilgjöld heyri sögunni til

Frasarnir um fjölda glæpa útlendinga gerðir afturreka

Af umfjöllun úr fjölmiðlum að dæma eru pólverjar á Íslandi glæpamenn upp til hópa. Nú kemur hinsvegar í ljós að þetta er einn stór "misskilningur" því hið rétta er að pólverjarnir sem hér búa eru löghlýðnastir allra, mun löghlýðnari en íslendingar. Þetta er í raun í samræmi við niðurstöður úr rannsóknum frá öðrum löndum. Útlendingarnir eru í flestum tilfellum miklu löghlýðnari en innfæddir.

Það er hinsvegar vel þekkt að öfgahægriflokkar gera í því að fullyrða allt annað og ala þar með á fordómum. Við höfum nýleg dæmi um þetta frá Sviss, Hollandi, Þýskalandi og Danmörku. Í Þýskalandi var vinsælt slagorð hjá þessu þjóðernissinnuðu flokkum "Burt með útlendinga!". Þegar það var bannað þá breyttu þessir öfgahægriflokkar (nýnasistaflokkar eins og DVU) slagorðinu í "KRIMINELLE AUSLANDER RAUS" sem ef til vill er hægt að þýða "Afbrotaútlendingar burt". Þar er eiginlega farið úr öskunni í eldinn því það er einmitt látið að því liggja að útlendingarnir fremji fleiri glæpi en innlendir. Þetta hefur auðvitað verið hrakið með tölfræði en það dugar ekki til, verstu þjóðernissinnarnir halda áfram að bulla. Alveg eins og mér sýnist nokkrir nafnlausir bloggarar gera í tenginu við þessa frétt hér á moggablogginu.

Formaður samtaka Pólverja á Íslandi Witek Bogdanski bendir á í 24 stundum að í fréttum er gjarnan sagt frá því ef útlendingar séu þeir sem frömdu glæpinn en ekkert minnst á hvaðan maðurinn sé (til dæmis úr Kópavogi) ef hann er Íslendingur. Fjölmiðar þurfa að taka sér tak. Framtak Alþjóðahússins að verðlauna Ævar Kjartansson og Hjálmar Sveinsson fyrir afbragðs þætti á Rás 1 um málefni innflytjenda er til fyrirmyndar.

Af gefnu tilefni eru þeir sem skrifa athugasemdir á bloggið mitt eru beðnir um að skrifa undir fullu nafni.

Pólverjar þeir löghlýðnustu

Bjartsýnn á að Ísraelsstjórn fari að lögum

Það ef til vill ofurbjartsýni til en það er alltaf hægt að halda í vonina. Ísraelsstjórn hefur ítrekað þverbrotið alþjóðalög. Óskandi væri að Ísraelar skiluðu landi aftur til Palestínumanna og að friður kæmist á. Það er mikill kraftur í samtökunum Ísland-Palestína og á morgun kemur góður gestur og segir frá ástandinu í landinu. Hér er tilkynning frá samtökunum.

Heimsókn Ali Zbeidat til Íslands
Opinn fundur í Alþjóðahúsinu á morgun - Laugardaginn 5. janúar, kl 14.00


Félagið Ísland-Palestína hefur starfsemi sína á nýju ári með heimsókn blaðamannsins og aktivistans Ali Zbeidat til Íslands og opnum fundi með honum í Alþjóðahúsinu, laugardaginn 5. janúar. Fundurinn hefst klukkan 14:00. Aðgangur er öllum opinn.

Ali Zbeidat er fyrrum pólitískur fangi sem í áraraðir barist fyrir mannréttindum Palestínumanna sem búa innan landamæra Ísraels (stundum kallaðir ísraelskir arabar). Hann hefur ísraelskan ríkisborgararétt og er búsettur í bænum Sakhnin, sem í dag liggur innan landamæra Ísraelsríkis.

Í upphafi fundarins verður sýnd 25 mínútna heimildarmynd um skipulega eyðileggingu á íbúðarhúsum Palestínumanna - en fjölskylda Ali sjálfs hefur átt á hættu að missa heimili sitt eftir að það var úrskurðað ólöglegt af ísraelskum yfirvöldum. Að sýningu lokinni flytur Ali ræðu um Palestínumenn í Ísrael, það er hlutskipti íbúa palestínsku svæðanna sem hertekin voru 1948 og innlimuð í Ísraelsríki. Þá mun hann fjalla um pólitíska fanga í Ísrael, en um ellefu þúsund Palestínumenn; karlar, konur og börn eru nú í ísraelskum fangelsum. Að lokinni ræðu hans verða fyrirspurnir og umræður.

----------------------------------------------------------
Tenglar:

• Apartheid targets Palestinian home-owners inside Israel
  Jonathan Cook fer yfir sögu Ali Zbeidat í mjög góðri grein um hlutskipti Palestínumanna í Sakhnin og annarstaðar innan landamæra Ísraels.
  
  
• The Legal Center for Arab Minority Rights in Israel
  Samtök sem vinna að mannréttindum palestínskra íbúa innan landamæra Ísraels. Beita sér m.a. fyrir jafnrétti til náms og réttindum fanga, veita lögfræðiaðstoð og reka mál gegn lagasetningum sem mismunar fólki á kostnað uppruna þeirra eða trúarbragða.
  
  
• Adameer
  Samtök sem vinna að því að verja mannréttindi palestínskra fanga í Ísrael. Hér má finna margs konar fróðleik og tölfræði, ekki síst um pólitíska fanga.

Bush bjartsýnn á friðarsamkomulag

Joris Rademaker opnar sýningu í Kunstraum Wohnraum á sunnudag

JORIS RADEMAKER

MANNLEG TILVIST

06.01. - 02.03.2008

Opnun sunnudaginn 6. janúar 2008, klukkan 11-13

Opið samkvæmt samkomulagi    


KUNSTRAUM WOHNRAUM           
Hlynur Hallsson • Kristín Kjartansdóttir   
Ásabyggð 2 • IS-600 Akureyri •  [phone]
hallsson(hjá)gmx.net • www.hallsson.de

---

Sunnudaginn 6. janúar 2008 klukkan 11-13 opnar Joris Rademaker sýninguna Mannleg tilvist í Kunstraum Wohnraum á Akureyri. Joris er Hollendingur en hefur fengist við myndlist síðan 1983. Hann var útnefndur bæjarlistamaður Akureyrar árið 2006.
Joris vinnur með blandaða tækni og oft með mismunandi þema í lengri tíma í senn. Þetta er einhverskonar yfirlitssýning inni á heimili þar sem verkin samræmast alvöru og leik heimilisfólksins. Þau eru unnin út frá pússluspilskubbi, og í mismunandi tækni, vatnsliti, veggfóður, sprey, þrykk, málverk, ljósrit, klippimynd og sem objekt eða hlutir.

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Jorisar Rademakers stendur til 2. mars 2008 og er opin eftir samkomulagi og hægt er að hringja í síma 4623744. Nánari upplýsingar um Kunstraum Wohnraum er að finna hér.
 

Joris Rademaker

1977-1983 Myndmenntakennaranám í Tilburg í Hollandi
1983-1986 AKI: Myndlistaskólinn í Enschede í Hollandi
2006 Bæjarlistamaður Akureyrar

Sýningar

1987 Gallery Hooghuis, Arnhem, Holland
1988 Markt 17, Enschede, Noordkunst, Holland
1995 Listasafnið á Akureyri
1995 Slunkaríki, Ísafjörður
1997 Nýlistasafnið í Reykjavík
1997 Deiglan Akureyri, Listasumar 95 á Akureyri
1998 Gallerí+, Akureyri
2002 Slunkaríki, Ísafjörður
2002 Gallerí Skuggi, Reykjavík
2004 Safnasafnið, Svalbarðsströnd
2005 Bókasafn Háskólans á Akureyri
2005 Gallarí gangur, Reykjavík
2005 Gallerí+, Akureyri
2006 Populus Tremula, Akureyri
2006 Karólína Restaurant

Guðrún Vaka opnar sýninguna "Uppgjör" á Café Karólínu

Guðrún Vaka

Uppgjör

05.01.08 - 02.02.08

Velkomin á opnun laugardaginn 5. janúar 2008, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755


Laugardaginn 5. janúar 2008, klukkan 14 opnar Guðrún Vaka sýninguna "Uppgjör", á Café Karólínu á Akureyri.

Guðrún Vaka útskrifaðist frá Myndlistaskólanum á Akureyri 2006 var þar áður eitt ár á myndlistabraut VMA. Hún er meðlimur í Grálistahópnum og hefur tekið þátt í samsýningum en þetta er hennar fyrsta einkasýning. Hún segir um sýninguna á Café Karólínu:

"Tónlist! Hvar værum við án hennar? Það eiga sér örugglega flestir einhverja góða sögu um þeirra upplifun á góðri tónlist, svo ekki sé minnst á lélegri tónlist, lag sem minnir á fyrstu ástina, lag til að gráta yfir, lag sem kemur manni í gott skap eða vont skap og svona mætti lengi telja.

Með þessari sýningu má segja að ég sé að gera upp tónlistasmekk minn frá æsku en hann þótti með eindæmum lélegur, það er hvað jafnaldra mína varðar, og það var ekki oft að ég viðurkenndi hvernig tónlist ég hlustaði á þegar enginn heyrði til.

Þetta byrjaði allt á því að ég komst í plötusafnið hans pabba, en hann átti ógrynni af vínilplötum, litlum, stórum, 45 snúninga og 75 snúninga svo ekki sé minnst á valið á tónlistinni sjálfri, þarna var hægt að finna alla helstu söngvarana frá árunum “60-“80.

Ég kolféll fyrir köllum á borð við Elvis Prestley, Cat Stevens, Simon and Garfunkel og Creedings Clearwater Revivel, ég verð nú að viðurkenna að ég hlusta ekki mikið á Elvis í dag en hinir eldast assi vel. Þegar ég var um 14-15 ára voru strákarnir í Wham og Duran Duran aðalmálið, mér þótti ekki mikið til þeirra koma en reyndi að taka þátt í herleg heitunum. Einhvern tíman þegar umræða opnaðist í bekknum mínum um tónlist var ég spurð með hverjum ég “héldi” þá asnaðist ég til að segja Wham en allur bekkurinn “hélt” með Duran Duran.

Ég hefði alveg eins getað sagt Cat Stevens miðað við umræðuna sem fór af stað í kjölfarið á þessu svari mínu og dauðsá eftir því að hafa ekki gert það því ég var alveg viss um að allavega kennarinn hefði staðið með mér ef ég hefði nefnt hann. Tónlist í dag á það til að fara dálitíð í taugarnar á mér og þá helst textarnir, allt þetta...jejejeje, oooooo og sexsexsex, hvað varð um alla ástina, pólitíkina og áróðurinn sem lituðu tónlistina á hippaárunum?

Í dag hlusta ég enn á þessa kalla mína og þrátt fyrir að tónlista smekkur minn sé talinn vafasamur þá læt ég engan stoppa og mig og hlusta á þá í botni inni í bílskúr eða í Ipodinum mínum. "

Fyrri sýningar:
Samsýning, DaLí, Grálist með smálist              2007
Einkasýning, Staðurinn Akureyri                    2006
Samsýning, Óðinshúsi Eyrarbakka                 2006
Vorsýning Myndlistaskólans á Akureyri           2004, 2005 og 2006
Samsýning, Langi Mangi Ísafirði                    2005-2006
Samsýning, Strikið Akureyri                          2005
Nemendasýning útskriftanema, Deiglan          2005
Nemendasýning útskriftanema, Deiglan          2005
Samsýning, Rex og Pex vinnustofa                2005
Samsýning, Geimstofan                                 2004
Samsýning, Pönk, Deiglan                              2004

Nánari upplýsingar veitir Guðrún Vaka í gvaka(hjá)simnet.is og í síma 8962987

Sýningin á Café Karólínu stendur til 2. febrúar, 2008. Allir eru velkomnir á opnun laugardaginn 5. janúar, klukkan 14.

Á sama tíma stendur yfir sýning Brynhildar Kristinsdóttur á Karólínu Restaurant.

Næstu sýningar á Café Karólínu:

03.02.08-02.03.08     Steinn Kristjánsson
03.03.08-04.04.08     Unnur Óttarsdóttir
05.04.08-02.05.08     Guðmundur R Lúðvíksson
03.05.08-06.06.08     Kjartan Sigtryggsson
07.06.08-04.07.08     Arnar Ómarsson
05.07.08-01.08.08     Vilhelm Jónsson
02.08.08-05.09.08     Margeir Sigurðsson
06.09.08-03.10.08     Sigurlín M. Grétarsdóttir

Umsjónarmaður sýninganna er Hlynur Hallsson

Gleðilegt ár öll - Dagskrá KW 2008-2009

Nokkrar mínútur i að kveikt verði í brennunni hér fyrir norðan. Já, gleðilegt ár öll! Til hamingju Svandís með að vera kosin verðskuldað maður ársins af hlustendum Rásar 2. Myndlistin byrjar af krafti þetta árið og laugardaginn 26. janúar klukkan 16 ætlum við að stofna formlega myndlistarfélagið. Stofnfundurinn verður í Deiglunni hér í Listagilinu. Á sunnudaginn klukkan 11 er opnun heima hjá okkur og allir eru velkomnir meðan húsrúm leyfir. Joris Rademaker byrjar og hér er svo dagskráin í Kunstraum Wohnraum fyrir 2008-2009.

6. janúar 2008 - 2. mars 2008            Joris Rademaker

16. mars 2008 - 22. júní 2008            Ragnar Kjartansson

27. júlí 2008 - 21. september 2008         Alexander Steig

5. okt. 2008 - 21. desember 2008        Arna Valsdóttir 

4. janúar 2009 - 22. mars 2009             Hanna Hlíf Bjarnadóttir

5. apríl 2009 - 21. júní 2009            Huginn Þór Arason   

5. júlí 2009 - 20. september 2009        Vera Hjartardóttir 

4. október 2009 - 20. desember 2009    Aðalheiður Eysteinsdóttir 

 

KUNSTRAUM WOHNRAUM

Opnun sunnudag klukkan 11-13. Opið eftir samkomulagi 4623744

Hlynur Hallsson og Kristín Kjartansdóttir, Ásabyggð 2, 600 Akureyri

Kveikt í brennum í borginni

Benazir Bhutto myrt

Ástandið í Pakistan virðist hanga á bláþræði. Daglega eru gerðar sjálfsmorðsárásir. Ekki beint friðsöm jól þar í landi. Kosningarnar sem eiga að fara fram eftir tvær vikur hljóta að vera í uppnámi eftir að einn helsti frambjóðandi stjórnarandstöðunnar er drepin. Benazir Bhutto var hugrökk kona og hún lét lífið í dag fyrir hugrekki sitt. Lýðræðið hefur enn og aftur beðið hnekki.

Benazir Bhutto látin

50% líkur á hvítum jólum á Norðurlandi og 100% líkur á friðargöngu

Daginn er tekið að lengja og það er bjart á Akureyri þessa stundina, vantar bara snjóinn. En hann gæti komið í kvöld eða á morgun ef allt fer vel. Það verður Blysför í þágu friðar í kvöld. Í höfuðborginni og á  Ísafirði er lagt af stað klukkan 18 en hér á Akureyri klukkan 20.  Um leið og ég óska öllum friðar og gæfu birti ég hér dagskrána:

Hin árlega Blysför í þágu friðar verður gengin á Þorláksmessu á Akureyri.

Gengið verður frá Samkomuhúsinu í Hafnarstræti kl. 20.00 og út á Ráðhústorg.

Það er góður siður að bæta við hinn almenna friðarboðskap jólanna andstöðu  við stríðsrekstur og yfirgang á líðandi stund.

Árásarstríð og hernám þjaka Írak og annað eins fer fram í Afganistan undir forystu NATO.  Hótað er hernaðaraðgerðum gegn Íran. Stuðningur Íslands við stríðsreksturinn í Írak hefur ekki verið afturkallaður.

Sýnum hug okkar um stríðið og friðinn.

Kjörorð eru þau sömu og undanfarin ár:

- Frið í Írak!

- Burt með árásar og hernámsöflin!

- Enga aðild Íslands að stríði og hernámi!

 

Ávarp flytur Hannes Örn Blandon prófastur.

Félagar úr Kór Akureyrarkirkju syngja.

Blys verða seld í upphafi göngunnar.

Aðstandandi: Samtök hernaðarandstæðinga

0,01% líkur á hvítum jólum í Danmörku

Loksins fjármagn til Háskólans á Akureyri

Það eru góð tíðindi að skrifað hafi verið undir samning milli Háskólans á Akureyri og menntamálaráðuneytisins um aukin framlög til skólans. Fjárskortur hefur háð HA lengi og nú er sem betur fer bætt úr því, allavega að hluta til. Mikilvægi Háskólans á Akureyri er ótvírætt og skólinn hefur fyrir löngu sannað sig. Hann ætti því að fá að vaxa enn hraðar enda er eftirspurnin fyrir hendi. Stjórn Vinstri grænna á Akureyri fagnar sérstaklega þessum samningi en í ályktuninni segir:

"Stjórn Vinstrihreyfingarinnar - græns framboðs á Akureyri fagnar auknum fjárveitingum upp á 275 milljónir króna til Háskólans á Akureyri næstu þrjú árin. Þar með er óvissu eytt sem einkennt hefur rekstur Háskólans á Akureyri síðastliðinn ár, einkum hvað varðar möguleika skólans á sviði rannsókna og áframhaldandi uppbyggingar, og til að efla háskólanám á framhaldsstigi. Stjórnendur, starfsfólk og nemendur Háskólans á Akureyri geta nú betur einbeitt sér að því gríðarmikla uppbyggingastarfi sem unnið er bæði innan og utan veggja skólans. Um málefni Háskólans á Akureyri hefur ríkt víðtæk pólitísk samstaða frá upphafi og er mikilvægt að svo verði áfram."

Háskólinn á Akureyri hefur ekki aðeins þýðingu fyrir menntun í landinu öllu, hann hefur einnig styrkt Eyjafjarðarsvæðið sem ákjósanlegan búsetukost og mannlífið er blómlegra. Þess vegna ætti að stofna á Ísafirði Háskóla Vestfjarða sem fyrst að fordæmi Háskólans á Akureyri og sá skóli ætti auðvitað að vera sjálfstæður skóli en ekki útibú. Það skiptir máli.

Tveir mikilvægir samningar fyrir Háskólann á Akureyri

Illvirkjun Power

Sjálfstæðismenn eru komnir í hring. Fyrir nokkrum mánuðum sögðu þeir að ríkisfyrirtæki ættu ekki að vera í áhættufjárfestingum en nú er stofnað "félag" út frá hinu rómaða ríkisfyrirtæki Landsvirkjun sem hefur einmitt þetta markmið. Sjá ekki allir að þetta er fyrsta skrefið í því að einkavinavæða Landsvirkjun? Best að fara inn um bakdyrnar á skítugum skónum fyrst að ekki tókst að vaða inn beint um aðalinnganginn! Auðvitað finnst Geir H. Haarde ekkert athugavert við þetta, þó það nú væri.

Ekkert athugavert við félag

Seyðfirðingar bjarga menningarverðmætum

Pétur Kristjánsson forstöðumaður tækniminjasafnsins á Seyðisfirði og fólkið í bænum á heiður skilinn fyrir að hafa stöðvað niðurrifið á aldargömlum verslunarminjum á Seyðisfirði í dag: „Við sáum að það þýddi ekkert að stöðva þessar framkvæmdir með orðum og við ákváðum að koma í veg fyrir að þeir gætu farið með munina út úr húsinu."

Forsvarsmenn ÁTVR eiga eftir að svara fyrir hver gaf út skipun um að það ætti að rifa niður innréttingarnar og setja þær í gám og senda til Reykjavíkur! Það er frábært að sjá að Seyðfirðingar standa vörð um menningarverðmæti á staðnum og það hefur verið meiriháttar að sjá hvað búið er að gera fallega upp mörg  gömul hús í bænum. En það er nóg verk eftir. Seyðisfjörður er að mínu mati einn fallegasti bær á landinu, Ísafjörður er einnig afar fallegur og svo auðvitað hún Akureyri:)

Hætt við niðurrif verslunar

Er þetta "innlend" frétt?

Stundum eru fyrirsagnirnar á mbl.is dálítið fyndnar og skrítnar. Það á ef til vill við um fyrirsögnina á þessari frétt: "Í kvenmannsföt til að skilja þarfir kvenna". En af hverju er þessi frétt flokkuð sem "innlend" frétt? Það er ekkert innlent við hana. Svona frekar erlent eða það hefði verið tilvalið að setja hana í samsuðudálkinn sem heitir "fólk". Annars er þessi frétt af GM dálítið klisjuleg og eftirfarandi setningar segja okkur ýmislegt:

"Því næst voru mennirnir klæddir í ruslapoka til að líkja eftir pilsum og fengu gúmmíhanska með álímdum gervinöglum. Dagurinn gekk svo út á að fara í gegnum venjulegan dag húsmóður og nota bíla fyrirtækisins án þess að brjóta nögl, rífa pils og þar fram eftir götunum."

Er hér ekki enn og aftur verið að ýta undir staðalímyndirnar. Ég efast um að amerískar húsmæður séu allar í pilsi, í háhæluðum skóm og með langar neglur. En þessir bílar frá General Motors fá allavega verðlaun fyrir að vera hlunkalegustu og ljótustu bensín/díselsvelgir sem fyrirfinnast. Konan á myndinni er ekki dæmigerð amerísk húsmóðir leyfi ég mér að fullyrða (og reyndar ekki heldur "innlend" (íslensk)!)

Í kvenmannsföt til að skilja þarfir kvenna

Gott að losna við herinn - losum okkur einnig við spillinguna

Atli Gíslason á heiður skilinn fyrir að benda á spillinguna sem viðgengst með fasteignabrask upp á Velli. Geir H. Haarde stingur hinsvegar hausnum í sandinn og vill ekki sjá að þar grasserar spillingin sem aldrei fyrr. Það á að fá allt upp á borðið og talið um "viðskiptahagsmuni" og að þess vegna megi ekki segja frá neinu á ekki að líðast.

Það var mikil landhreinsun að losna við herinn. Vinstri græn og hernaðarandstæðingar höfðu lengi bent á það að atvinnulíf á Reykjanesi myndi blómstra þegar herinn hyrfi á brott. Hernaðarsinnar héldu öðru fram og reynast nú hafa rangt fyrir sér. Það er gott

Það er hinsvegar synd að það góða uppbyggingarstarf þurfi að líða fyrir spillingu innan Sjálfstæðisflokksins og einkavinavæðinguna þar á bæ. Burt með spillinguna.

Fleiri störf en hjá varnarliði

Af hverju dró hann þetta ekki til baka fyrir "pabba sinn"?

... eða bara sjálf síns vegna? Kannski af því að hann hefur ekki snefil að sómakennd? Þessi bloggfærsla Egils Einarssonar sem kallar sig víst "Gillzenegger" segir margt um hug þeirra sem kalla þær konur sem eru að berjast fyrir jafnrétti kynjanna "öfgafemínista" og þeir eru ekki fáir. Margir nafnlausir aumingjar sem tjá sig aðallega í athugasemdum á síðum annarra taka sömu afstöðu og Egill og grafa sig niður í eitthvert forarsvað. Leyfum þeim bara að vera þar og drullumalla við vini sína.

Í fréttinni á mbl segir "Færslan sem um ræðir var undir lið sem kallast Fréttastofa Gillz en þar nafngreinir hann fjórar konur, femínista, sem hann segir að hafi verið of áberandi í fjölmiðlum undanfarið og ýjar að því að þeim væri best að verða fyrir kynferðislegu ofbeldi."  

Ég spyr mig hvort pabbi Egils horfi ekki á tíufréttir í Sjónvarpinu? Eða getur Egill ekki bara sleppt því að vera með svona viðbjóðslegar hótanir á síðunni sinni? Samkvæmt fréttinni hefur lögreglu hefði verið send skrifin til rannsóknar. En það var ekki vagna hræðslu við málshöfðun sem Egill faldi færsluna, nei af tillitsemi við mömmu: „Mamma horfir væntanlega á tíufréttir og svona, þannig að ég tók fréttina út út af henni." Litlu mömmustrákarnir kunna þó að skammast sín.

Margir sem skrifa hér á moggabloggið hafa lokað fyrir athugasemdir því í þeim hefur verið ausið óhróðri yfir fólk (gjarnan femínista). Sóley Tómasdóttir hefur til dæmis gripið til þessa neyðarúrræðis og þykir mér það miður en vel skiljanlegt. Af gefnu tilefni vil ég að fólk skrifi undir fullu nafni athugasemdir á síðuna mína, vinsamlega virðið það. 

Gillzenegger tók bloggfærslu út fyrir mömmu