Góður dagur til að kjósa

Hafnfirðingar fjölmenna vonandi á kjörstað í dag til að kjósa. Ég hef ekki kosningarétt og ætla þessvegna bara að þekja einn húsvegg með áli og spreyja smá á hann. Það er að vísu rok núna hér á Akureyri en lægir vonandi um hádegi og þá geta akureyringar og aðrir fylgst með. Hér er fréttatilkynning um verkið:

Hlynur Hallsson
Drulla - Scheisse - Mud
VeggVerk
31.03. - 25.05.2007
www.veggverk.org

Í dag laugardaginn 31. mars setur Hlynur Hallsson upp verkið "Drulla - Scheisse - Mud" á vegg á mótum Strandgötu og Glerárgötu á Akureyri. VeggVerk sem einnig er hægt er að sjá á slóðinni www.veggverk.org hefur verið starfrækt af Halli Gunnarssyni frá því síðasta haust og er sýning Hlyns sú þriðja í röðinni. Áður hafa Jóna Hlíf Halldórdsdóttir og Werner Berger ásamt Timothy Murphy sýnt á veggnum.

Verk Hlyns Hallssonar er gert í tilefni af því að í dag kjósa Hafnfirðingar um hvort stækka eigi álver Alcoa í Hafnarfirði eða halda því óbreittu. Hlynur mun klæða vegginn með áli og veggfóðra þannig yfir verk þeirra Werner Bergers og Timothy Murphy´s sem er málverk með textatilvitnun í Nelson Mandela eða öllu heldur Marianne Williamson. Hlynur ætlar því næst að spreyja á álið setningarnar:

TAKK FYRIR ALLT ÁLIÐ
VIELEN DANK FÜR DAS GANZE ALUMINIUM
THANKS FOR ALL THE ALUMINIUM

Hlynur segir:
"Verkið er óður til álrisanna og þakklæti fyrir allt álið sem þeir hafa fært okkur, eða kannski öllu heldur súralið frá Ástralíu. Takk fyrir allar einnota umbúðirnar sem eru síðan framleiddar úti í heimi og ameríkanar henda svo án þess að endurvinna. Takk fyrir að kaupa af okkur rafmagn fyrir brot að því sem annar iðnaur þarf að borga, hvað þá almenningur. Takk fyrir alla mengunina. Takk fyrir að skapa deilur í samfélaginu. Takk fyrir stuðla að hárri verðbólgu og háum vðxtum á lánunum okkar og takk fyrir að að því að hrekja önnur fyrirtæki úr landi. Takk fyrir þetta allt. Takk, bara takk."

Hlynur Hallsson hefur gert fjölda af spreyjverkum á undanförnum árum á sýningum í Marfa í Texas, München, Berlín, Kumamoto, Feneyjum, Kaupmannahöfn, Malmö, Reykjavík, Akureyri og nú stendur einmitt yfir sýning á verkum Hlyns á Gráa svæðinu í Þelamerkurskóla þar sem hann hefur spreyjað á vegg skólans. Það verk sem heitir "Skólinn - Die Schule - The School". Hægt er að skoða nokkur þessara verka og mörg fleiri á heimasíðu Hlyns: www.hallsson.de
Hlynur bloggar einnig á www.hlynur.is

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur sett upp um 50 einkasýningar og tekið þátt í um 70 samsýningum. Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2005. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var bæjarlistarmaður Akureyrar árið 2005.
Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, gönguferðir eða snjóhúsbygging geta verið efniviður í verkum hans en einnig landmæri, samskipti fólks og viðhorf okkar.

Sýning Hlyns á VeggVerk stendur yfir til 25. maí 2007 og er öllum opin. Hlynur mun vinna við að setja upp verkið milli 12 og 16 í dag laugardag og fyrir þá sem ekki komast og eru til dæmis staddir í Hafnarfirði er hægt sjá myndir og fylgjast með uppsetningunni og svo fullbúnu verkinu á www.veggverk.org

Úrslit í Hafnarfirði gætu legið fyrir kl. 21 til 22

Athugasemdir

[Atli Már Egilsson (IP-tala skráð) 2.4.2007 kl. 13:35]

Gerðu okkur öllum greiða og fjarlægðu þetta ógeð af veggnum. Þetta er ekki list Hlynur minn, ég keyrði framhjá þessu áðan og ég var að velta fyrir mér hvaða heilalausu iðnaðarmenn hefðu verið þarna að verki, hvort það ætti  að klæða af listaverkið sem var á veggnum þarna undir. Já Hlynur, það var list.

[Hlynur Hallsson, 2.4.2007 kl. 13:57]

Kæri Atli, þetta er ekki klárt ennþá en ég sérstaklega ánægður með að þú skulir vera uppnumin af því sem komið er. Vona að þú verðir í jafn miklu stuði þegar allt er komið :) Bestu kveðjur,

[Atli Már Egilsson (IP-tala skráð) 2.4.2007 kl. 16:33]

Hehe, you must be the king of understatements, því að "uppnuminn" lýsir á engan hátt hvernig mér leið þegar ég sá þetta. Ég held nú reyndar að ég komi ekkert frekar til með að fallast á heilan vegg  þakinn álklæðningu frekar en hálfan. Það eina sem gæti mögulega bjargað þessu "verki" þínu í mínum huga, væri ef að einhverjir hæfileikaríkir unglingar mættu þarna með úðabrúsa og notuðu þitt "verk" sem striga fyrir sitt verk. En túlkun listar er víst afstæð.