LHÍ í Vatnsmýrina

Frábært hvað allt er að gerast þetta vorið. Ég held að það væri gott að hafa kosningar á hverju ári svo ráðherrarnir haldi sér við efnið. Þegar Listaháskólinn flutti í Laugarnesið var það einmitt samþykkt rétt fyrir kosningar. Þetta hefur auðvitað staðið til lengi og náttúrulega ber að fagna því að staðsetningin sé loksins komin á hreint. Svo þarf að koma upp almenningssamgöngum og byggja helling af íbúðum í Vatnsmýrinni svo þar geti myndast Manhattan borgarinnar. Þar getur fólk búið sem þarf ekki að eiga bíl. Þátturinn hans Hjálmars Sveinssonar Krossgötur á Rás 1 áðan um grænu byltinguna í New York var mjög góður og ég mæli með því að fólk hlusti á hann. Til hamingju LHÍ með að vera kominn með annan fótinn í Vatnsmýrina.

Listaháskólinn fær lóð í Vatnsmýri

Athugasemdir

[Auðun Gíslason, 7.5.2007 kl. 17:00]

Get ég líka fengið lóð, t.d. í flugskýli 3? Til hamingju!

[Sverrir Páll Erlendsson, 7.5.2007 kl. 21:17]

Mér finnst að ætti að setja lögbann á allar þessar stofnanir sem er verið að lofa plássi í Vatnsmýrinni. Þetta er aðeins til þess eins að þrengja að flugvellinum okkar og ýta undir þá heimsku að flytja hann í burtu. Af því að hann er gott byggingarland!!! Af hverju ekki að fylla upp Tjörnina og byggja á henni, hún er gott byggingarland og stendur nær miðbæjarkjarna Vestur-Reykjavíkur. Nei, í alvöru. Það á að hætta við þá heimsku að flytja flugvöllinn út í særokið á Lönguskerjum, upp í veðravítið á Hólmsheiði eða klukkutíma í burt frá Reykjavík, suður á herstöðvasvæðið. Þeir eiga eftir að sjá eftir því, Reykvíkingar, síðar.

Svo þykir mér ekkert sniðugt að flytja alla háskólana á sömu torfuna. Hvers vegna er verið að klessa báðum venjulegu Háskólunum saman og draga Kennaraháskólann inn í þetta og Listaháskólann líka? Það færi betur á að flytja þessa skóla fjær, dreifa þeim út í úthverfin. Og ef þetta byggingarland er svona rosalega verðmætt, hvað er þá verið að setja eitthvert flæmi af því undir óarðbærar stofnanir eins og háskóla? Þetta eru tómar þversagnir og bull.

[Lára Stefánsdóttir, 7.5.2007 kl. 23:17]

Mig langar ekki í Manhattan með þá mengun sem því fylgir. Ég tel einnig hættulegt að þétta byggðina út á nesinu í Reykjavík sem gerir það að verkum að útgönguleiðir fyrir borgarbúa eru litlar. Umferðin þarna á morgnana er rosaleg og ekki ljóst hvernig menn ætla að leysa það án þess að leggja veg þannig að Öskjuhlíðin skerðist og upp við kirkjugarðinn, ég er ekki hrifin af því heldur.