Múrinn fallinn

"Mér sýnist þeir vera 2698, dagarnir sem Múrinn var uppi. Og þegar best lét voru 13 greinar á Múrnum á viku, allar vikur á ári. Það gera um 670 greinar á ári. Seinna fækkaði þeim en heildarfjöldi greina gæti samt verið í námunda við 4000. Þetta er allgóður skammtur af róttæku lesefni. Við þetta tækifæri er því full ástæða til að vekja athygli lesenda á dálkinum Eldra efni. Á þessari stundu er hægt að skoða allt heila klabbið." Svo skrifar Stefán Pálsson á veftímaritið róttæka og frábæra, Múrinn, í gær. Lokaorðin eru einnig Stefáns:

"Það er engin uppgjöf í Málfundafélagi úngra róttæklínga. Félagar munu áfram tjá sig um heimsmálin og íslensk stjórnmál. Einn félaginn er kominn á alþingi. Aðrir hafa fastan dálk í útbreiddum blöðum. Enn aðrir tjá sig á netinu. Sá er þetta ritar er nú hættur reglulegum skrifum um stjórnmál en engan veginn laus við þá áráttu að vilja breyta heiminum til hins betra. Þeirri áráttu deila allir höfundar Múrsins og traustasti lesendahópur hans.

Því er rétt að sleppa kveðjum, við munum öll hittast í baráttunni. Múrinn heyrir sögunni til en þó aðeins sem kafli í lengri sögu sem ekki er lokið: sögunni um þau áhrif sem venjulegt fólk vill hafa, á að hafa og getur haft."

Múrinn lagður niður

Athugasemdir

[Birgitta Jónsdóttir, 1.6.2007 kl. 07:47]

Mér finnst þetta samt ekki góðar fréttir. Ríkisstjórnin á meira og minna alla veigamestu fjölmiðla landsins og alveg á tæru að slíkt hefur áhrif á ritstjórnarstefnu viðkomandi fjölmiðils. Þurfum að finna leið til að koma með miðil sem er einskonar mótvægi við þessi miklu slagsíðu.

Múrinn var frábær og ég mun sakna hans. Frábært að finna slíkt greinasafn á einum stað sem höfðaði til manns, nenni ekki lengur að lesa dagblöð, þau eru öll eins, nenni ekki að horfa á fréttir, þær eru allar eins einna helst að maður heyri gagnlega útvarpsþætti á rás eitt og tvö.

[Bjarni Kjartansson, 1.6.2007 kl. 13:40]

Get nú afmáð Múrinn úr ,,völdu efni" á netinu.

KEm til með að sakna lesningarinnar en svona gengur nú bara lífið.

Miðbæjaríhaldið

[Gústaf Níelsson, 6.6.2007 kl. 01:44]

Það er tjón að Múrinn skuli vera fallinn. Það er jafnan kostur að hafa pólitíska óra samankomna á einum stað. Hér skortir eitthvað á eljusemina. Væri ráð að endurvekja Rétt, sem guðfaðir vinstri sósíalistanna hélt úti áratugum saman, allt fram í andlátið?