Kjartan Sigtryggsson opnar sýninguna "Í framan - In the face" á Café Karólínu laugardaginn 3. maí 2008

Laugardaginn 3. maí 2008, opnar Kjartan Sigtryggsson sýninguna "Í framan - In the face", á Café Karólínu á Akureyri.
Kjartan Sigtryggsson stundaði nám við Myndlistarskólann á Akureyri og Listaháskóla íslands og útskrifaðist þaðan 2006. Hann segir um verkin sem hann sýnir á Café Karólínu:

"Þetta er afrakstur vinnu minnar upp á síðkastið, ég blanda saman málverkum og teikningum þar sem andlitið er aðalviðfangsefnið, þá aðallega á huglægum grundvelli fremur en formlegum og bókstaflegum”

 

Kjartan Sigtryggsson

Í framan - In the face

03.05.2008 - 13.06.2008  

Café Karólína // www.karolina.is

Kaupvangsstræti 23 // IS 600 Akureyri // 4612755

Nánari upplýsingar veitir Kjartan í kjartansigtryggss(hjá)gmail.com

Sýningin á Café Karólínu stendur til 13. júní, 2008.

Meðfylgjandi er mynd ef einu verkanna sem Kjartan sýnir á Café Karólínu.

Sýning Jóns Laxdal “Úr formsmiðju” á Karólínu Restaurant stendur yfir til 5. september 2008.

Næstu sýningar á Café Karólínu:
14.06.08-04.07.08    Arnar Ómarsson
05.07.08-01.08.08    Vilhelm Jónsson
02.08.08-05.09.08    Margeir Sigurðsson
06.09.08-03.10.08    Sigurlín M. Grétarsdóttir
04.10.08-31.10.08    Ingunn St. Svavarsdóttir Yst
01.11.08-05.12.08    Þorsteinn Gíslason

Umsjónarmaður sýninganna er Hlynur Hallsson

Réttur maður í starfið

Ég sé að starf forstjóra nýrrar Varnarmálastofu er eins og sniðið fyrir Stefán Pálsson. Hann er náttúrulega snillingur og þvert á báknflokkana Samfó og íhald þá ætlar Stefán að stefna að "...því að halda umsvifum hennar (Varnarmálastofu) í algjöru lágmarki og minnka allan rekstrarkostnað eins og mögulegt er."

Þetta nýja bákn sem Ingibjörg Sólrún ætlar að setja á stofn mun blása út eins og embætti Ríkislögreglustjóra hefur gert á kostnað almennrar löggæslu í landinu. Það er hægt að nota einn og hálfan milljarð í margt betra. Stefán er því réttur maður í starfið og mun koma góðu til leiðar með aðhaldssemi og hagsýni. Áfram Stefán!

Formaður SHA sækir um forstjórastarf Varnarmálastofu

Ráðherrar á Íslandi og í Englandi eru rúnir trausti

Krataflokkurinn í Bretlandi fékk rassskell í kosningunum í gær og greinilegt að ríkisstjórnin er rúin trausti. Það hefur áhrif á sveitarstjórnarkosningarnar þar í landi. Gordon Brown tekur líka við ömurlegu búi frá heræsingamanninum og lýðskrumaranum Tony Blair. (Myndin er tekin af Guardian)

En ráðherrarnir hér á landi eru einnig rúnir trausti. Geir H. Haarde hefur fallið í áliti hjá þjóðinni samkvæmt Gallup könnun. Og Þorgerður "vinsæla" Gunnarsdóttir sagði í útvarpinu áðan að búast mætti við óvinsældum meðað tekið er á efnahagsvandanum. Hér er  ef til vill komin skýringin á því af hverju stjórnin tekur ekki á vandanum, hún er hrædd við að verða enn óvinsælli. Þetta eru slæm tíðindi fyrir Árna Matt því það eru ekki margir eftir sem treysta honum, eða aðeins 8%! og samt segjast 37% ætla að kjósa flokkinn hans. 92% kjósneda treysta ekki manninum.

Góðu fréttirnar eru þær að Vinstri græn eru með byr í seglin enda með einu raunhæfu tillögurnar og lausnir á efnahagsvandanum og kynntu þær fyrir 2 mánuðum. Er ekki kominn tími til að Samfó hætti að vera næst sætasta stelpan á ballinu og segi upp þessum hrokagikk, Sjálfstæðisflokknum?

Verkamannaflokkurinn tapaði