Gullkistan: 20 ára

Gullkistan: 20 ára

Listasafn Árnesinga

19. júlí - 20. sept. 2015

Alda Sigurðardóttir, Jasna Bogdanovska, Linda Buckley, Alfredo De Stéfano, Eygló Harðardóttir, Virginia Griswold, Harpa Árnadóttir, Hjörtur Hjartarson, Hlynur Hallsson, Erica Kremenak, Kristín Reynisdóttir, Kristveig Halldórsdóttir, Keiko Kurita , Catherine Ludwig, Joan Perlman, Raom & Loba, Sara Björnsdóttir, Soffía Sæmundsdóttir, Anika Steppe & Anne Carlinv, Alexandra Strada, Lilian Day Thorpe, Gabrielle Vitollo.

Fyrir tuttugu árum efndu myndlistarmennirnir Alda Sigurðardóttir og Kristveig Halldórsdóttir, til listahátíðar á Laugarvatni þar sem þær voru þá búsettar. Yfir 130 listamenn tóku þátt í þeirri hátíð og þegar þær efndu aftur til hátíðar tíu árum síðar voru listamennirnir að minnsta kosti 145. Út frá þessum hátíðum kviknaði hugmyndin að dvalarstað fyrir skapandi fólk. Þeirri hugmynd hrundu þær líka í framkvæmd og til varð Gullkistan – miðstöð sköpunar, sem í dag hefur sitt aðal aðsetur í gömlu tjaldmiðstöðinni, en starfemin hefur náð til ýmissa staða á Laugarvatni.

Í tilefni þessara tímamóta er nú sett upp sýning í Listasafni Árnesinga á nýlegum verkum 24 listamanna sem tengst hafa Gullkistunni, ýmist sem þátttakendur í listahátíðunum eða dvalið í miðstöðinni. Verkin valdi Ben Valentine sem ráðinn var sem sýningarstjóri sýningarinnar og nálgunin er auga gestsins. Ben Valentine er sjálfstætt starfandi rithöfundur og sýningarstjóri sem kom hingað frá NY, en er nú að flytjast búferlum til Kambódíu þar sem hann mun stýra spennandi listamiðstöð. Á sýninguna hefur hann valið nýleg verk eftir níu íslenska listamenn og fimmtán erlenda þar sem sjá má áhrif frá Íslandsdvöl þeirra. Til hliðar við sýninguna verða aðgengilegar ýmsar heimildir um hátíðirnar tvær, miðstöðina og einnig er skapandi aðstaða fyrir gesti.

Sýningin, sem er samstarfsverkefni Listasafns Árnesinga og Gullkistunnar, er styrkt af uppbyggingarsjóði Suðurlands og mun standa til og með 20. september.

100 Kápur á Frakkastíg

Listamennirnir Hallgrímur Helgason, Helga Þórsdóttir, Hildur Hákonardóttir, Hlynur Hallsson, Jóna Hlíf Halldórsdóttir, Ragnheiður Jónsdóttir, Libia Castro og Ólafur Ólafsson eru ekki óvön því að vinna á pólitískum nótum í verkum sínum. Hér vinna þau útisýningu þar sem kosningaþátttaka kvenna í 100 ár er þema sýningarinnar. Undirtónninn er nokkuð dimmur, ekki allir á einu máli um það hvar við stöndum í dag. Liðin hafa hundrað ár, heil öld, standa kynin jafnfætis í dag þegar kemur að stjórnun og ákvarðanatöku í samfélagslegu samhengi? Eða er þetta baráttan endalausa?

Í portinu á Frakkastíg 9, á húsveggjum og í garðinum skapa listamenn verk í rýmið, ákall til umræðunnar um jafnrétti kynjanna. Sýningarstjóri er Rakel Steinarsdóttir.

Við opnun 14. maí syngur Kvennakórinn Hrynjandi. Sýningin stendur til 7. júní 2015.

Sýningin er hluti af Listahátíð í Reykjavík / Reykjavík Art Festival.