Leita í fréttum mbl.is

Færsluflokkur: Fjölmiðlar

ALÞÝÐUSÝNING Í ALÞÝÐUHÚSINU Á SIGLUFIRÐI OPNAR 8. MARS 2014

hlynur_siglo.jpg

HLYNUR HALLSSON
ALÞÝÐUSÝNING Í ALÞÝÐUHÚSINU

8. mars - 6. apríl 2014
Opnun laugardaginn 8. mars kl. 14-17

Alþýðuhúsið á Siglufirði
Kompan, Þormóðsgötu 13, 580 Siglufirði

Hlynur Hallsson opnar sýninguna ALÞÝÐUSÝNING Í ALÞÝÐUHÚSINU í Kompunni í Alþýðuhúsinu á Siglufirði laugardaginn 8. mars kl. 14-17. Hlynur sýnir nokkur alþýðleg spreyverk sérstaklega gerð fyrir Alþýðuhúsið og alþjóðlegan baráttudag kvenna sem er einmitt þann 8. mars.

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur verið nokkuð iðinn við að setja upp sýningar og hann tók þátt í samsýningum í firstlines gallery og Halle50 í München á síðasta ári og síðasta einkasýning hans var Sýning - Ausstellung - Exhibition í Kartöflugeymslunni í Listagilinu á Akureyri.  Hlynur gaf út bókina MYNDIR - BILDER - PICTURES árið 2011 með 33 ljósmynda- textaverkum. Hann hefur einnig verið sýningarstjóri fjölda sýninga eins og TEXT sem sett var upp hjá Kuckei+Kuckei í Berlín haustið 2011. Hann var einnig meðal stofnenda Verksmiðjunnar á Hjalteyri þar sem settar hafa verið upp sýningar undanfarin sex ár. Hlynur er sjálfstætt starfandi sýningarstjóri og myndlistarmaður og einnig listrænn ráðgjafi hjá Flóru á Akureyri.
Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2006. Hann hefur nokkrum sinnum hlotið starfslaun myndlistarmanna og var bæjarlistarmaður Akureyrar árið 2005. Hlynur vinnur með aðstæður, texta, innsetningar, ljósmyndir, gjörninga og hvað eina, allt eftir því sem hentar í hverju tilfelli. Að þessu sinn sýnir Hlynur ný spreyverk gerð fyrir Alþýðuhúsið á Siglufirði auk bókverks sem sýningargestir geta tekið þátt í að skapa. Nánari upplýsingar um Hlyn og verk hans er að finna á heimasíðunni hallsson.de.

Myndlistarkonan Aðalheiður S. Eysteinsdóttir hefur skipulagt fjölmargar myndlistarsýningar og viðburði í Alþýðuhúsinu frá því hún keypti húsið og gerði það upp fyrir nokkrum árum.

Sýningin stendur til 6. apríl 2014 er opin kl. 14-17 daglega, eftir samkomulagi við Aðalheiði í síma 865 5091, eða þegar skilti er úti.
Nánari upplýsingar um sýninguna veitir Hlynur í síma 659 4744.


BLATT BLAÐ #61 er komið út

blatt61_1.jpg

BLATT BLAÐ númer 61 er komið út. 19 höfundar eiga verk í tímaritinu að þessu sinni og það eru þau: Alexander Steig, Anna Mields, Anna Elionora Olsen Rosing, Ásmundur Jón Jónsson, Elísabet Ásgrímsdóttir, Freyja Reynisdóttir, Guðrún Ósk Stefánsdóttir, Heiðdís Hólm, Hlynur Hallsson, James Earl Ero Cisneros Tamidles, Jóna Hlíf Halldórsdóttir, Jónína Björg Helgadóttir, Karólína Baldvinsdóttir, Kolbrún Vídalín, Margrét Kristín Karlsdóttir, Sandra Rebekka, Sigrún Birna Sigtryggsdóttir, Steinunn Steinarsdóttir og Thomas Thiede. Forsíðuna fyrir BLATT BLAÐ #61 gerði Anna Mields í Berlín.

BLATT BLAÐ er tímarit þar sem myndlistarmenn geta sent inn efni til birtingar og er byggt á hugmynd Dieter Roth um “Tímarit fyrir allt” sem hann gaf út um árabil.

Hlynur Hallsson hefur gefið tímaritið BLATT BLAÐ út frá árinu 1994 og forlag höfundanna kemur einnig að útgáfunni. Tímaritið kostar 400 krónur og fæst í Flóru á Akureyri og hjá Útúrdúr í Reykjavík.

Nánari upplýsingar ásamt forsíðum og höfundum í eldri eintökum er að finna á: http://hallsson.de/blattblad.html

BLATT BLAÐ kemur út í 100 tölusettum eintökum og er 21 x15 cm að stærð og tölublað #61 er 28 síður. Alþjóðlegt tímaritanúmer er ISSN 1431-3537.


Dear Iceland, fuck you, yours truly, aluminium

savingiceland.jpgSvona er setningin óritskoðuð sem Saving Icaland hengdi á vinnupalla utan á Hallgrímskirkju í morgun. Eyjan birtir mynd og ritskoðar ekki eins og Mogginn.

RioTinto, Alcan og Alcoa drulla yfir íslenska náttúru á hverjum degi og við niðurgreiðum orkuna til þeirra, þökk sé Friðriki Sófussyni og klíkunni í SjálfstæðisFLokknum og Framsóknarflokknum og því miður stærsta hlutanum úr Samfylkingunni.

Svona aðgerðir skaða engan en vekja athygli á málstaðnum og fara í taugarnar á umhverfissóðunum.


mbl.is Aðgerðarsinnar fóru upp í vinnupalla við Hallgrímskirkju.
Tilkynna um óviðeigandi tengingu við frétt

Reka skilanefnd Kaupþings strax

kaupthing.jpgÞessar skilanefndir bankanna eru skipaðar gæðingum SjálfstæðisFLokksins og eru að vinna í því að sópa skítnum undir teppið. Af hverju er ekki búið að reka þetta lögfræðingastóð fyrir löngu? Það á að afnema bankaleyndina strax. Hagsmuni hverra er verið að verja? Hvað er verið að fela? Hversu djúpt er búið að sökkva þessu landi? Og Bjarni Ben hellir olíu á eldinn.

Pistill Láru Hönnu um málið.


mbl.is Kaupþing fékk lögbann á RÚV
Tilkynna um óviðeigandi tengingu við frétt

Gunnar Birgisson yfir lög og reglur hafinn

gunnar-birgisson.jpg

Gunnar Birgisson bráðum fyrrverandi bæjarstjóri og verktaki í Kópavogi er greinilega langt yfir lög og reglur hafinn að eigin mati. Hann telur því kæru Fjármálaeftirlitsins stórundarlega. Best að bíða eftir úrskurði dómsvalda og þá munum við vonandi sjá hvað er stórundarlegt í þessu máli bæjarstjórans sem er jú lagður í einelti af vinstrimönnum, að eigin sögn.


mbl.is Sjóðsbjörgun kærunnar virði
Tilkynna um óviðeigandi tengingu við frétt

SjálfstæðisFLokkurinn er enn gerspilltur flokkur

501206AÞað er mikið talað um endurnýjun í stjórnmálum og að allt verði að komast uppá borðið en nýjustu fréttir í Kópavogi benda til þess að öll sú umræða hafi þotið eins og vindur um eyru flokkseigendaklíkur FLokksins. Karlarnir þar á bæ geta ekki komið sér saman um eftirmann hins gerspillta bæjarstjóra og hver höndin upp á mót annarri og þá er lausnin bara að halda aðal manninum áfram.

Það er hinsvegar spurning hvað viðhengið (endurnýjaða) Framsókn ætlar að sitja lengur undir þessu rugli. Þau eru svosem vön, hafa verið með FLokknum í 19 á í meirihluta. En er ekki komið nóg?


mbl.is Vilja ekki að Gunnar hætti
Tilkynna um óviðeigandi tengingu við frétt

Spennandi kosningar í Íran

Í dag er kosið um nýjan forseta í Íran. Það væri óskandi að umbótasinninn og myndlistarmaðurinn Mirhossein Mousavi yrði kosinn forseti. Það gæti leitt til þýðu milli landsins og annarra og ekki síður myndi það bæta mannréttindi í Íran. Núverandi forseti Mahmoud Ahmadinejad hefur í raun skaðað Íran á sama hátt og George W. Bush skaðaði Bandaríkin. Báðir hafa þeir rekið fjandsamlega utanríkisstefnu og með því aukið á óvild í garð sinna landa.

Það er ólíklegt að einhver einn frambjóðendanna fjögurra hljóti hreinan meirihluta svo reikna má með því að önnur umferð fari fram og það verður þann 19. júní. Íranska þjóðin á það skilið að fá umbótasinna í stað harðlínumanns sem forseta og vonandi sigrar Mirhossein Mousavi.

Meira í Spiegel

Süddeutsche


mbl.is Kosningarnar hefjast í Íran
Tilkynna um óviðeigandi tengingu við frétt

Sjálfstæðisflokkurinn leggur fram tillögur um að leggja sig niður

494557AÞað væri nú góðverk sem þessi flokkur sem komið hefur Íslandi í klandur gæti gert. Aðeins of seint í rassinn gripið að koma með tillögur um eitthvað annað núna. Er ekki tilvalið að Þorgerður Katrín og Bjarni Ben myndu skammast sín aðeins? Ég veit að þetta er full mikil bjartsýni hjá mér en það má reyna.

Sem betur fer eru aðrir teknir við að bjarga því sem bjargað verður og Sjálfstæðisflokkurinn getur lagt sig niður eða bara verið í stjórnarandstöðu næstu 18 árin.


mbl.is Sjálfstæðisflokkurinn leggur fram efnahagstillögur
Tilkynna um óviðeigandi tengingu við frétt

Systurflokkur Vinstri grænna vinnur stórsigur á Grænlandi

kuupik_kleist.jpgInuit Ataqatigliit (IA) vann stórsigur í þingkosningum, sem fóru fram á Grænlandi í gær. Þetta voru aðrar kosningarnar í röð sem IA vinnur afgerandi sigur og fékk nú 43,7% atkvæða og 14 þingmenn af 31 á grænlenska landsþinginu. Þeim tókst þannig að toppa sigur VG frá því í vor glæsilega.

Spilling hefur einkennt grænlensk stjórnmál líkt og hér á landi og það er ánægjulegt að Inuit Ataqatigliit sé treyst til að taka við og endurvinna traust fólks á stjórnmálum. Þann 21. júní taka gildi lög sem færa Grænlendingum aukna sjálfsstjórn og vonandi hefur Kuupik Kleist, formaður IA þá þegar myndað nýja stjórn á Grænlandi. Það eru að renna upp nýir og spennandi tímar á Grænlandi og ánægjulegt að systurflokkur Vinstri grænna leiði uppbygginguna.

Til hamingju með sigurinn Grænlendingar!


mbl.is Inúítaflokkurinn vann stórsigur
Tilkynna um óviðeigandi tengingu við frétt

19 ára spilling og græðgivæðing á endastöð?

Það kemur í ljós á næstu dögum hvort Framsókn í Kópavogi hafi þann kjark sem þarf til eða öllu heldur þann dug sem þarf til að vera heiðarlegur flokkur sem vill losna úr klóm spillingarinnar. Helmingaskiptin í Kópavogi, einkavinavæðingin, verktakavaldið og bruðlið er það sem hefur einkennt rekstur bæjarfélagsins frá því að Gunnar Birgisson kom þar að. Vonandi er því tímabili lokið en það er í höndunum á Framsókn. Taprekstur bæjarins á síðasta ári ætti að duga til að fella þennan meirihluta en það er ekkert sjálfgefið. Sjálfstæðisflokkurinn er t.d. með hreinan meirihluta í Reykjanesbæ þó að það bæjarfélag sé fyrir löngu tæknilega gjaldþrota.

Það þarf að taka til í Kópavogi, velta við steinum og fletta ofan af spillingunni. Það er kominn tími til. Íbúar Kópavogs eiga það skilið. 

Úr Kastljósi í gær:

"Fyrirtæki sem er í eigu dóttur bæjarstjórans í Kópavogi fékk greiddar þrjár og hálfa milljón króna fyrir afmælisrit bæjarins sem koma átti út árið 2005. Ritið sem er enn ekki komið út liggur óklárað á bæjarskrifstofunum. Fyrirtækið hefur verið í milljónatugaviðskiptum við Kópavogsbæ á þeim tíma sem Gunnar hefur gengt þar æðstu stöðum sem sjaldnast fara fram í kjölfar útboðs. Bæjarstjórinn sjálfur kvartar undan ofsóknum í sinn garð og dóttur sinnar og fagnar frekari skoðun. Þungt er í samstarfsmönnum hans í Framsóknarflokknum í Kópavogi en þeir sitja nú á fundi vegna málsins..."


mbl.is Ræddu hugsanleg meirihlutaslit
Tilkynna um óviðeigandi tengingu við frétt

Næsta síða »

Hlynur Hallsson

Hlynur Hallsson

Myndlistarmaður, umhverfisverndarsinni og sennilega margt fleira. Nánari upplýsingar hér.

Síður

Tónlistarspilari

Air - Ce Matin La
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.