Menntamálaráðherra og Sjálfstæðisflokkurinn stjórna Þinginu

 

Sú mæta kona Þorgerður Katrín Gunnarsdóttir, menntamálaráðherra virðist vera að fara af límingunum. Hún varð sér til skammar í Kastljósinu í kvöld. Greip aftur og aftur fram í fyrir Steingrími sem tókst að vera rólegur og yfirvegaður. Menntamálaráðherra er í mikilli geðshræringu þessa dagana og Sólveig Pétursdóttir þorir ekki annað en að fara eftir öllu sem varaformaður Flokksins segir. Sjálfstæðisflokkurinn heldur Þinginu í gíslingu vegna einkavæðingarkrossferðar sinnar, sem að þessu sinni bitnar á Ríkisútvarpinu. Það er sorglegt. Við sem berum mikla virðingu fyrir Alþingi þykir þetta miður og í raun ótækt. Alveg eins og málið um Ríkisútvarpið OHF. Það er ótækt mál. Og best væri að vísa því frá. Málamiðlun væri að fresta gildistöku þess ekki bara til 1. apríl eins og ríkisstjórnin vill heldur til dæmis til 1. júlí. Þá getur ný ríkisstjórn afnumið lögin í vor áður en þau eiga að taka gildi. Þá geta kjósendur kosið um þetta mikilvæga málefni. Við ættum þess í stað að sameinast um að efla Ríkisútvarpið í raun. Efla innlenda dagskrárgerð, minnka pólitísk ítök og svo framvegis. Væri það ekki heillavænlegra fyrir þjóðina, Þorgerður Katrín?

Enn deilt um Ríkisútvarpsfrumvarp í upphafi þingfundar

Athugasemdir

[Jón Valur Jensson, 21.1.2007 kl. 22:27]

Já, ég hef sjaldan eða aldrei séð Steingrím jafn-aumingjalegan og þarna -- eins og hann getur nú verið flottur og reffilegur og var það t.d. í fréttunum í kvöld, þegar hann skeiðaði sem hraðast í ofmælginni og stóryrðunum. Verður þetta annars nýja mottóið ykkar fyrir kosningar, "landráð" vegna Heiðarfjalls og launungar, eða sansizt þið á að ganga í sæng með Sjálfstæðisflokkunum?

En það er rétt hjá þér, Hlynur, ÞKG gekk of langt þarna í frammíköllunum, Þetta var ekki skólabókardæmi um dannaða umræðu. Karlinn hefði þó átt að kunna til verka, að snúa vörn í sókn ... eða þurfti kannski kvenmann til að afvopna hann?

[Hlynur Hallsson, 21.1.2007 kl. 22:58]

Mér fannst Steingrímur nú fyrst og fremst kurteisin uppmáluð í þessum Kastljósþætti. Þegar einhver er að æsa sig við mann er oft best að halda sér bara rólegum, annars hefði þátturinn endað í fullkomnum leiðindum. Móttóið þitt sem þú leggur til hljómar ekki mjög vel, en þú mátt nota það ef þú vilt :) Bestu kveðjur,