Sjálfstæðisflokkurinn er stóriðjuflokkurinn

Það er athyglivert að samkvæmt nýrri könnun Fréttablaðsins eru kjósendur sem hafna stækkun álvers Alcan í Straumsvík í meirihluta innan allra flokka nema Sjálfstæðisflokksins. Meira að segja meirihluti kjósenda Framsóknarflokksins vill ekki þessa stækkun. Það er hinn fölgræni fálki Sjálfstæðisflokksins sem einn allra flokka vill þessa vanhugsuðu stækkun. Það eru ný tíðindi. Umhverfismálin eiga ekki upp á pallborðið hjá 70% kjósenda d-listans. Hér er öll fréttin:

"Meirihluti andvígur stækkun í Straumsvík

Rúm 63 prósent segjast andvíg stækkun álversins í Straumsvík. Konur eru líklegri til að vera andvígar stækkun en karlar. Einungis meirihluti stuðningsfólks Sjálfstæðisflokksins er fylgjandi stækkun.

Meirihluti landsmanna er andvígur stækkun álversins í Straumsvík, samkvæmt nýrri skoðanakönnun Fréttablaðsins. 63,1 prósent þeirra sem afstöðu tóku til spurningarinnar segist andvígt, en 35,9 prósent eru stækkun fylgjandi.
Ef litið er til þess hver afstaða fólks er til álversins eftir því hvaða flokk það myndi kjósa, væri gengið til kosninga nú, kemur fram nokkur munur.
Stuðningsfólk Vinstri grænna er flest mótfallið stækkun álversins og segjast 93,3 prósent þeirra vera andvíg stækkun. Þá eru þrír fjórðu, eða 75,6 prósent stuðningsfólks Samfylkingarinnar, andvíg stækkun álversins í Straumsvík.
Meirihluti stuðningsfólks Framsóknarflokksins og Frjálslynda flokksins er einnig andvígur stækkun, en meðal þeirra er meirihlutinn naumari; 55,0 prósent þeirra sem segjast myndu kjósa Frjálslynda flokkinn og 53,8 prósent þeirra sem myndu kjósa Framsóknarflokkinn.
Það er einungis meðal kjósenda Sjálfstæðisflokksins sem finnst meirihlutastuðningur við stækkun álversins í Straumsvík. 70,5 prósent þeirra sem segjast myndu kjósa Sjálfstæðisflokkinn segjast styðja stækkunina.

Ef litið er til þeirra sem ekki gefa upp hvaða flokk þeir myndu kjósa segist 64,1 prósent vera á móti stækkun, en 35,9 prósent fylgjandi. Af þeim segjast 80,6 prósent þeirra sem ekki myndu kjósa eða skila auðu vera á móti stækkun, 79,3 prósent þeirra sem neita að gefa upp hvað þeir myndu kjósa eru andvíg stækkun og 59,0 prósent þeirra sem eru óákveðnir eru mótfallin stækkun álversins.
Lítill munur er á afstöðu fólks eftir búsetu til stækkunar. Þannig segjast 63,9 prósent íbúa á höfuðborgarsvæðinu vera á móti stækkun, en 62,0 prósent íbúa á landsbyggðinni.
Meiri munur er á afstöðu til stækkunar eftir kyni. 68,0 prósent kvenna eru andvíg stækkun, en 58,3 prósent karla.
Hringt var í 800 kjósendur laugardaginn 24. febrúar og skiptust svarendur hlutfallslega eftir kjördæmum og jafnt eftir kyni. Spurt var; Ertu fylgjandi eða andvíg(ur) stækkun álversins í Straumsvík? 70,9 prósent tóku afstöðu til spurningarinnar."

Athugasemdir

[Þrándur (IP-tala skráð) 28.2.2007 kl. 09:58]

Hún er orðin gatslitin og útþvæld þessi græna skikkja sem VG hefur sveipað sig.  Þeirra umhverfisstefna gengur út á að vera móti erlendum auðhringjum og virkjunum, en ekkert heyrist frá bóndasyninum Steingrími og hans hjörð um ofbeit sauðfjár og uppblásturs lands af þeim sökum.  Ekki orð um skógrækt, en VG vill efla almenningssamgöngur og svo mæta allir besservissarnir á einkabílnum á landsþing, einn í hverjum bíl.  Trúverðugleiki VG í þessum efnum er neðan frostmarks.

Sannleikurinn er sá að VG samanstendur af þremur þáttum:

-Öfgasósíalistum sem eru á móti einkaframtakinu og erlendum auðhringum og vilja endurvekja "dásemdir" ríkisrekstrar.

-Öfgafeministum sem sjá ímyndað karlaveldi í hverju skúmaskoti, allstaðar eru karlar að kvelja konur.  Fóirnarlambavæðingin í þessum hluta þekkir engin landamæri, konur eru fórnarlömb fyrir það eitt að vera kona og undantekningalaust er sökudólgurinn einhver kallpungur sem hið almáttuga ríkisvald þarf að temja og gera heimilisvænt svo aumingja bjargarlausa litla konan geti fengið að njóta sín.

-Öfgaframsóknarmönnum sem vilja ríkisstyrktan landbúnað á kostnað neytenda og landverndar.

Fyrstu tveir þættirnir einkennast fyrst og frems af þeim þráláta sjúkdómi vinstri-öfgamanna að menntaðir félagsfræðingar og sjálfskipaðir besservisserar séu miklu gáfaðri en hinn ómenntaði og aumi alþýðumaður og þurfi því að hafa vit fyrir skrílnum. Framsóknarhlutinn gengur einfaldlega út á það að beita neytendur ofbeldi í krafti stjórnvalds.  Þetta er VG í hnotskurn, aumara gerist það ekki. 

[Sveinn V. Ólafsson (IP-tala skráð) 28.2.2007 kl. 21:22]

Vinstri Grænir hafa sýnt það í verki að þeir vilja vernda útsýni á kostnað vistvænna orkugjafa eins og raforkuverin okkar eru.

Þetta verður allt virkjað á næstu árum .... það stefnir í orkukreppuúm miðja öldina og C02 útblástur eru 0,0 kg per vatnsaflsvirkjun. Sagnfræðingar framtíðarinnar munu klóra sér í hausnum vegna þessarar stefnu VG.

kveðja

Sveinn

[Sverrir (IP-tala skráð) 1.3.2007 kl. 09:09]

Að gefnu tilefni þá er þessi Moggalygi um að allir hafi komið á bílum á landsfund VG (og núna einn í hverjum) orðinn frekar þreytt. Það er ekki hægt að taka fólk alvarlega sem hefur mál sitt á svona uppspuna.

Ég óttast ekki dóm framtíðarinnar um stefnu VG í stórvirkjanamálum, en ég held að þeir sem þykjast geta afgreitt 10 ára umræðu um þau stóru mál með einni fullyrðingu muni seint skora mikið fyrir þeim dómstól.

Annars sendi ég bestu kveðjur og þakka fyrir góðan fund um helgina og fagna þeim mörgu góðu stefnumálum sem þar voru sett á dagskrá.

 Sverrir

[Sveinn V. Ólafsson (IP-tala skráð) 3.3.2007 kl. 01:34]

Mér er nokk sama hvort umræðan er 10, 20 eða 30 ára hún er ekki að skila neinu til framtíðar. Hvernir í ósköpunum ætla VG að taka á CO2 vandanum ?  Hvað gera aðrar þjóðir - leita af möguleikum á að byggja hrein orkuver.  Þetta málefni er grafalvarlegt og þarf að leysa. VG munu ekki leysa nein loftlagsmál eða réttar gera neitt til þess. Minni á að sú umræða er meira en 10 ára. VG gengur svo hart fram í stefnumálum sínum að þeir átta sig ekki á hvert þeir eru raunverulega að fara.  Umhverfismál verða aðeins leyst með framsýni, með því að fórna meiri hagsmunum fyrir minni og sáttargjörð þar sem almenningur, stjórnvöld og atvinnulífið sammælist um lausnir sem duga umhverfinu og hagkerfinu. 

Kennisetningur, forræðishyggja og íhaldsstefna VG er þar vita gangnslaus. Því miður - annars myndi fleirri skrifa upp á hana og taka henni mjög fagnandi. VG virðist trúa því að þá aðeins ef stór hluti þjóðarinnar er ósammála þeim þá séu þeir á einhverri "réttri" leið. Hum....  fólk kaupir skynsemi, rök og lausnir sem duga.

Lausnir þær sem VG eru að bjóða fólki  í umhverfismálum eru gjörónýtar! 

Kveðja

Sveinn