Hvar eru málin?

Þessi sáttmáli er vonbrigði. Hvað um að taka okkur af lista hinna viljugu? Hvað með stóriðjuhléið? Samfó virðist hafa guggnað á öllu. Íhaldið heldur í sína ráðherra og bætir við sig heilbrigðismálum. Staðan er 5-1 fyrir karlana hjá íhaldinu sem er ekki góð byrjun fyrir konurnar. Eru þær vanhæfar að mati Geirs?  Gott að samgöngumálin eru samt komin úr höndum Sturlu. Kristján Möller drífur vonandi í að koma á strandsiglingum, lengingu flugbrautar á Akureyri og bora Vaðlaheiðargöng um leið.  Heilt á litið er þessi stjórn ekki sú framfarastjórn sem var lofað. Frekar óbreytt ástand hjá Sjöllunum og Samfó því miður ekki að standa við stóru orðin. Ég sé ekkert um afnám biðlistana þarna! Átti ekki að fækka ráðuneytum?

Ágreiningur um þjóðareign á náttúruauðlindum verði leiddur til lykta

Athugasemdir

[Guðmundur Örn Jónsson, 23.5.2007 kl. 12:48]

Ég held að engir séu fegnari en Eyjamenn að losna við Sturlu úr samgönguráðuneytinu. En ég er að sama skapi hræddur um að Kristján L. hugsi frekar um sitt bygðalag, frekar en landið í heild.

Rétt hjá þér Hlynur að það er sorglegt að sjá ráðherralistann hjá Sjöllum, en mér lýst ágætlega á hann hjá Samfó. Fer samt ekki ofan af því að D+VG hefði að mörgu leyti verið meira spennandi kostur, jafnvel þó stjórnarmyndurviðræður hefðu tekið lengri tíma. En nú er ég hræddur um að VG hafi nánast dæmt sig sem stjórnarandstöðu flokk Íslands.

[Edda Agnarsdóttir, 23.5.2007 kl. 13:13]

Svona svona strákar mínir! Bara hugsa jákvætt og eitthvað gott hlýtur að koma út úr þessu

[Dofri Hermannsson, 23.5.2007 kl. 14:18]

Svokallað stóriðjustopp Vg fólst í því að stoppa ekki þær framkvæmdir sem væru komnar af stað, klára rannsóknir á verndargildi svæða og byggja ákvarðanir um framhaldið á þeim niðurstöðum. Hver er munurinn á því og þessu sem fram kemur í stjórnarsáttmálanum Hlynur?

Og svo ein aukaspurning í tilefni af því að Vg kom í veg fyrir vinstri stjórn: Hvernig fenguð þið út að 9 vinstri græn + 25 sjálfstæðismenn væri grænni ríkisstjórn en 27 þingmenn Vg og Sf + 7 þingmenn Framsóknar? Ég veit að margt náttúruverndarfólk vill gjarna fá svar við þessari spurningu.

[Hlynur Hallsson, 23.5.2007 kl. 18:59]

Vinstri græn komu ekki í veg fyrir vinstri stjórn Dofri. Þetta er einhver aumasti fyrirsláttur yfir algeru áhugaleysi Samfó á slíkri stjórn. Enda var þetta samstarf krata og íhalds sennilaga planað löngu fyrir kosningar. Vinstri stjórn var alltaf minn fyrsti valkostur. Það þarf að gefa íhaldinu frí. Sorglegt að Samfó skuli klikka á því, nákvæmlega eins og í bæjarstjórn hér á Akureyri fyrir ári. Ég trúði þessu ekki fyrr en núna. Bestu kveðjur,

[Karl Tómasson, 23.5.2007 kl. 22:42]

Ég vona að  500 metra vegakaflinn í Mosfellsbæ verði viðmið Samfylkingarinnar í umhverfismálum næstu fjögur árin.

Þá framkvæmd kallaði Össur Skarp hervirki gegn náttúru landsins í umhvefismálum ásamt fjölda annar félaga úr Samfylkingunni.

 

Bestu kveðjur Hlynur og þið öll úr Mosó.

[Anna Ólafsdóttir Björnsson, 24.5.2007 kl. 00:03]

Því miður er niðurstaðan úr þessari stjórnarmyndun afskaplega mikið í takt við það sem vænta mátti, hægri öflin í Samfylkingunni eru engan veginn horfin, enda var á sínum tíma sagt að Alþýðuflokkurinn væri til hægri við Sjálfstæðisflokkinn og skandinavískir kratar tóku bakföll af hlátri þegar litli Alþýðuflokkurinn var sagður sósíaldemókratískur. Þótt hægri öflin í Samfylkingunni hafi ekki leitt viðræðurnar, þá er vitund Sjálfstæðismanna um tilveru þeirra ágætis veganesti til að þrýsta sínum áherslum að, hljómgrunnurinn er fyrir hendi, eins og sáttmálinn sýnir. 

[Dofri Hermannsson, 24.5.2007 kl. 10:04]

Þú getur ekki boðið fólki sem fylgdist grannt með málum upp á þessa söguskýringu Hlynur. Það er staðreynd sem alþjóð er vitni að og við í Samfylkingunni þó enn betur að formaður þinn, Steingrímur J Sigfússon, afgreiddi út af borðinu öll tilboð frá okkur um vinstri stjórn og gaf það sem ástæðu að þingmenn Vg vildu alls ekki starfa með Framsókn.

Fyrir kosningar, á meðan allt var opið, var slík afstaða e.t.v. verjandi en eftir kosningar þegar ykkur var boðið upp á slíkt samstarf neitaði þitt fólk enn staðfastlega slíku samstarfi.

Til að rifja upp fyrir þér atburðarrásina í megindráttum þá var hún á þessa leið:
Í Silfri Egils daginn eftir kosningar sýndi Ögmundur svo ekki var um villst að starf með Framsókn fannst honum ekki álitlegur kostur. Hann taldi þá tvo kosti til viðbótar vera í stöðunni, Sf+D sem hann taldi versta hugsanlega kostinn og svo Vg+D sem hann taldi mun betri.

Í samtölum við forystu og þingmenn Vg eftir þennan þátt voru skilaboð Vg þau að flokkurinn teldi öll tormerki á að það væri hægt að fara með Sf og Framsókn í stjórn. Það væru bara tveir þingmenn innan Vg sem svo mikið sem ljáðu máls á R-lista módelinu.

Þessa afstöðu Vg staðfesti Steingrímur í tveimur spjallþáttum um kvöldið þar sem hann slátraði mögulegu R-lista módeli með sögulegum hætti.

Eftir þetta var ljóst að vilji til slíks samstarfs var enginn og á næstu dögum varð ljóst, bæði af fjölmiðlum og samtölum við Vg, að Vg ætlaði sér að leggja allt kapp á að komast í stjórn með Sjálfstæðisflokki. Þar feiluðuð þið illilega eins og komið hefur á daginn.

Þið verðið ekki menn að meiri að neita þessu sem er til vandlega dokumentarað í fjölmiðlum, minnisblöðum frá óformlegum fundum og svo á vitorði allra þeirra sem tóku þátt í "þreifingum" á Vg.

Staðreyndin er sú að ykkur stóð til boða ríkisstjórn eins og ISG lýsti þannig í Íslandi í dag 13. maí

"í þessu sambandi þá finnst mér að Steingrímur geti ekki horft framhjá því að í slíkri ríkisstjórn þá yrðu 27 þingmenn sem ekki eru stóriðju- og virkjanaþingmenn."

Held þið ættuð frekar að horfast í augu við þetta og fagna stórum skrefum framávið í náttúruvernd en að hnýta í okkur fyrir að koma því í verk sem ykkur dreymdi um að gera. Þið klúðruðuð sögulegu tækifæri. Punktur.

Hitt er annað mál að ykkur er bæði velkomið og skylt að veita okkur hvatningu og aðhald. Ykkur væri hins vegar sæmra að gera slíkt með réttum rökum í stað þess að misbjóða fólki með endurritun sögunnar gegn betri vitund ykkar sjálfra og þjóðarinnar sem öll veit hvernig atburðarrásin var.

Kv. Dofri.

[Lára Stefánsdóttir, 24.5.2007 kl. 10:28]

Ég tek undir með Dofra, það var gríðarlegt áfall að sjá VG afgreiða eina möguleikann á vinstri stjórn svo harkalega út af borðinu strax á sunnudegi eftir kosningar. Ég hef hitt marga VG menn sem eru afar reiðir og miður sín yfir þessu útspili formanns flokksins ásamt Ögmundi Jónassyni.

Nú má vel vera að ykkur takist með harðfylgi að sannfæra fólk um að það sem gerðist hafi ekki gerst, sérstaklega fólk sem ekki fylgdist náið með atburðarrásinni. Hinsvegar held ég að menn verði af meiri að horfast í augu við hlutina eins og þeir voru og meta aðstæður út frá því. Án Framsóknar var enginn möguleiki á vinstri stjórn, þannig komu kosningarnar einfaldlega út. Því er það ömurlegt að hafa þurft að horfa upp á framkomu VG út í þá eftir kosningar sérstaklega þar sem flokkurinn hafði jú beðið afhroð og það er aldrei til fyrirmyndar að sparka í liggjandi fólk. Ég held að VG ætti bara að standa við það sem þeir sögðu að þeir vildu ekki fara í samstarf við Framsóknarflokkinn það er afstaða sem þeim var frjálst að taka. Afleiðingarnar eru ljósar og ábyrgðina á því þurfa þeir að axla sjálfir.

[Hlynur Hallsson, 24.5.2007 kl. 10:41]

Það er dalítið vandræðalegt að horfa uppá félaga í Samfó reyna að klína sökinni á Steingrím og Ögmund um að ekki hafi verið reynt að mynda vinstri stjórn. En ég trúi því alveg að fólk eins og Dofri og Lára hefðu frekar viljað stjórn Vg, Framsóknar og Samfó en þeir sem ráða innan Samfylkingarinnar höfðu greinilega ekki áhuga á slíku samstarfi. Því eru margir kjósenda Samfó illa sviknir og gera sér vel grein fyrir því. Markmið þeirra var jú ekki að halda íhaldinu við völd. Allar getgátur og lestur úr viðtölum og viðbrögðum er frekar örvæntingfarfull leið til að klína sökinni á Vinstri græn, það sjá allir. Staðreyndirnar tala sínu máli Samfó er jú komin í samstarf við íhaldið án þess að reyna viðræður við Vg og framsókn. Þannig er það bara. Ég hlakka til að veita aðhald og styðja góð mál og hvetja Samfó til dáða en þetta byrjar því miður ekki sélaga vel með sáttmálanum mikla. Ég fagna hinsvegar Þórunni sem umhverfisráðherra og hef fulla trú á henni. Bestu kveðjur,

[Dofri Hermannsson, 24.5.2007 kl. 10:58]

Þessi einbeitti vilji þinn Hlynur, til að endurskrifa atburðarrásina, veldur mér vonbrigðum. Ég hélt að þú værir maður til að viðurkenna að þarna hefði Vg orðið á mistök.

Ég efast ekki um að það sé erfitt, ekki síst vegna þess hve margir kjósendur ykkar hljóta að vera ykkur sárir, en það er mun heiðarlegri leið en yfirklór og rangfærslur.

[Sigurður Þórðarson, 24.5.2007 kl. 13:53]

Ég óska samfylkingarmönnum til hamingju með að vera komnir í ríkisstjórn en ég get ekki óskað þeim til hamingju með að hafa fórnað sjávarútvegsstefnunni.  

Magnús Thoroddsen fyrrverandi hæstaréttardómari sagði að samkvæmt núverandi fisveiðilöggjöf væu fiskimiðin sameign þjóðarinnar. Það ákvæði hefði ve3rið í hættu ef stjórnarskránni hefði verið breytt.   Skv. stjórnarsáttmálanum ætlar ríkisstjornin að tryggja festu í sjávarútvegi les festa kvótakerfið í sessi.

[Hlynur Hallsson, 24.5.2007 kl. 15:48]

Kæri Dofri, þú ættir að lesa frábæra grein Ögmundar. Titillinn er að vísu sennilega ekki alveg að þínu skapi: "SAMFYLKINGIN GEKK Í SJÁLFSTÆÐISFLOKKINN Í GÆR" Bestu kveðjur,

[Jóhannes Ragnarsson, 24.5.2007 kl. 21:23]

... eða öllu heldur: Samfylkingin dó inn í Sjálfstæðisflokkinn, en hinn tilvonandi ,,turn" til grunna hruninn, en upp af rústunum stígur mökkur af fagrurgala og sviknum loforðum. Glæsilegur endir hjá stórflokki jafnaðarmanna, atarna.

Annars fer best á, að Dofri þessi, sem og aðrir samfylkingardindlar, hafi vit á að hafa hægt um sig og láti algjörlega vera að brigsla öðrum stjónmálaflokkum og fyrirsvarmönnum þeirra um svik.

[Dofri Hermannsson, 25.5.2007 kl. 11:55]

Kæri Hlynur.

Búinn að lesa greinina og finnst hún bera súran keim þess flokks sem sveik bakland sitt um heiðgræna vinstri stjórn og var sjálfur kominn á hnén að biðja um samstarf við Sjálfstæðisflokkinn.

T.d. var þitt búið að afskrifa að hægt væri að halda aftur af Helguvíkurframkvæmdum áður en viðræður hófust. Við aftur á móti teljum óþarfi að vera svo eftirgefanleg eins og þú hlýtur að hafa séð á yfirlýsingum Ingibjargar Sólrúnar síðustu daga.

Ögmundur talar um að Vg hafi byrjað í 2% en sé kominn í 15%. Nú liggi leiðin enn upp á við. Ég held að það sé misskilningur. Ég held að nú séu grænu málin, sem var helsta afsökun ykkar fyrir að vera sérstakur flokkur, komin á dagskrá hjá ríkisstjórninni með þeim hætti að leið ykkar liggi rakleitt niður aftur.

Þið hafið hins vegar tryggt ykkur í sessi sem andstöðuflokkur númer eitt en reynslan sýnir að það eru ekki nema svona 5-10% fólks til í að styðja til lengdar flokk sem bara er á móti en kemur engu í framkvæmd.

Óska ykkur samt góðs gengis í stjórnarandstöðunni. Vænti þess að þið haldið okkur við efnið. Þið eruð góð í því.

Bestu kveðjur, Dofri.

[Örvar Þór Kristjánsson, 25.5.2007 kl. 22:00]

Gaman að sjá hvað myndlistamaðurinn er málefnanlegur.  Hreint út sagt ótrúlegt hvernig sumir innan VG reyna að klóra yfir þennan fíflaskap. Sparkið í Framsókn liggjandi og bjóðið þeim svo í sleik undir það síðasta.  Það hefur marg sannað sig að VG er ekki hæfur til þess að stjórna.  Í flokknum eru alltof mikið af stórskemmdum eplum.  Sem betur fer er komin sterk stjórn án VG þjóðinni til heilla.   

[Kristján Logason, 26.5.2007 kl. 14:16]

Það er ömurlegt og í raun nöturlegt til að vita að Samfylkingarmenn skuli enn og aftur ráðast á vinstri græna að loknum kosningum og kenna þeim um ófarirnar. Þetta er ekki í fyrsta skipti sem þeir gera slíkt. Þetta sýnir einungis að hægri kratarnir ráða þar ríkjum og hafa engann áhuga á vinstri stjórn. Það er vont því inn á milli í S leynist fínt fólk en flokknum í heild er ekki hægt að treysta. Það verður fróðlegt að fylgjast með flokknum í umhverfis og iðnaðar málunum. Hvað þá þegar kemur að framtíð heilbrigðismála sem nú eru í höndum einkvæðingarsinnanna.

[Hlynur Hallsson, 28.5.2007 kl. 23:01]

Þetta fer að verða langur athugasemdalisti og færslurnar hans Dofra er miklir bálkar:) "Málefnalegastur" er samt örugglega Örvar nokkur Kristjánsson. Til að koma í veg fyrir misskilning þá hef ég aldrei sparkað í Framsókn hvorki í eiginlegri né óeiginlegri merkingu. Vinstri græn eru mjög hæf til að stjórna og það eru engin "stórskemmd epli" í flokknum. Þetta er reyndar furðulega tekið til orða af Örvari og ekki sérstaklega málefnalegt né gáfulegt. En batnandi mönnum er best að lifa nema þeim versni:) Bestu kveðjur,