Loksins fjármagn til Háskólans á Akureyri

Það eru góð tíðindi að skrifað hafi verið undir samning milli Háskólans á Akureyri og menntamálaráðuneytisins um aukin framlög til skólans. Fjárskortur hefur háð HA lengi og nú er sem betur fer bætt úr því, allavega að hluta til. Mikilvægi Háskólans á Akureyri er ótvírætt og skólinn hefur fyrir löngu sannað sig. Hann ætti því að fá að vaxa enn hraðar enda er eftirspurnin fyrir hendi. Stjórn Vinstri grænna á Akureyri fagnar sérstaklega þessum samningi en í ályktuninni segir:

"Stjórn Vinstrihreyfingarinnar - græns framboðs á Akureyri fagnar auknum fjárveitingum upp á 275 milljónir króna til Háskólans á Akureyri næstu þrjú árin. Þar með er óvissu eytt sem einkennt hefur rekstur Háskólans á Akureyri síðastliðinn ár, einkum hvað varðar möguleika skólans á sviði rannsókna og áframhaldandi uppbyggingar, og til að efla háskólanám á framhaldsstigi. Stjórnendur, starfsfólk og nemendur Háskólans á Akureyri geta nú betur einbeitt sér að því gríðarmikla uppbyggingastarfi sem unnið er bæði innan og utan veggja skólans. Um málefni Háskólans á Akureyri hefur ríkt víðtæk pólitísk samstaða frá upphafi og er mikilvægt að svo verði áfram."

Háskólinn á Akureyri hefur ekki aðeins þýðingu fyrir menntun í landinu öllu, hann hefur einnig styrkt Eyjafjarðarsvæðið sem ákjósanlegan búsetukost og mannlífið er blómlegra. Þess vegna ætti að stofna á Ísafirði Háskóla Vestfjarða sem fyrst að fordæmi Háskólans á Akureyri og sá skóli ætti auðvitað að vera sjálfstæður skóli en ekki útibú. Það skiptir máli.

Tveir mikilvægir samningar fyrir Háskólann á Akureyri

Athugasemdir

[Gunnar Páll Gunnarsson, 19.12.2007 kl. 21:52]

Til hamingju Akureyringar og Norðanmenn með tíðindin. Mennt er máttur sagði hann afi minn alltaf þegar hann var á lífi.

Kæri Hlynur og Kittý. Gleðileg Jól og farsælt komandi ár. Takk fyrir komuna á liðnu ári og vonandi hittumst við í raunheimum á næsta ári. Ef ekki þá er fægt að gera sæer að góðu með bloggslóðir.

Guni Palli kokkur. 

[Benedikt Sigurðarson, 20.12.2007 kl. 09:30]

Gott að kominn er á samningur milli HA og ráðneytisins - - en fjárskortur sýnist mér nú ekki verði úr sögunni . . . .

Lærdómsríkt fyrir alla sem eru að sýsla í pólitíkinni að bera saman þróun fjárveitinga til Háskólanna allra - síðustu 5-8 árin.    Þá er fljótlegt að sjá að HA fær minni vöxt viðurkenndan en allir hinir skólarnir - - - - og svo má minna á að HR fékk  allan "rekstrarhala Tækniskólans" skorinn af (en það hefur HA ekki ennþá fengið viðurkennt . .  eða hvað?).

Við  þurfum að gera miklu betur Hlynur til að bakka upp vaxtarmöguleika í kring um HA  - og nefni ég sérstaklega Vísindagarða og þekkingarþorpsverkefnið - - með byggingu sérhæfðra bygginga fyrir nýsköpun og þekkingardrifna starfsemi í samstarfi við atvinnulífið.  RES-orkuháskóli verðskuldar t.d. miklu öflugri stuðning en hann virðist vera að fá - héðan á heimavelli

[Jórunn Sigurbergsdóttir , 21.12.2007 kl. 20:20]

Gleðileg jól Hlynur  minn til þín og þinna.

[Kjartan Pétur Sigurðsson, 22.12.2007 kl. 08:07]

Gleðileg jól og takk fyrir skemmtilegt bloggár :)

[Steinunn Helga Sigurðardóttir, 22.12.2007 kl. 12:39]

 Lokaorð mín til þín á þessu ári kæri bloggvinur eru frá Nelson Mandela sem setur sig yfir eigin þarfir og hugsar sig sem heildina. Boðskapur inn í hið nýja ár sem á erindi til okkar allra.

Steina

Okkar dýpsti ótti er ekki að við séum vanmáttug.
Okkar dýpsti ótti er að við erum óendanlega máttug.

Það er ljósið innra með okkur ekki myrkrið sem við hræðumst mest.Við spyrjum sjálf okkur hvað á ég með að vera frábær, yndisfögur, hæfileikarík og mikilfengleg manneskja.

Enn í raun hvað átt þú með að vera það ekki?

Þú ert barn Guðs.

Það þjónar ekki heiminum að gera lítið úr sjálfum sér.
Það er ekkert uppljómað við það að gera lítið úr sjálfum sér til þess að annað fólk verði ekki óöruggt í kringum þig.

Við fæddumst til að staðfesta dýrð guðs innra með okkur, það er ekki bara í sumum okkar, heldur í hverju einasta mannsbarni.Og þegar við leyfum ljósinu okkar að skína, gefum við öðrum, ómeðvitað, leyfi til að gera slíkt hið sama.Um leið og við erum frjáls undan eigin ótta mun nærvera okkar ósjálfrátt frelsa aðra.
 

[Valgerður Halldórsdóttir, 23.12.2007 kl. 12:07]

Til hamingju með það og gleðileg jól