Ég ætla að kaupa Moggann í dag

Ég var að fletta Mogganum á kaffistofunni áðan og hann er bara stútfullur af áhugaverðu efni. Strax á forsíðunni eru tvær frábærar fréttir, önnur af konu sem er til í að endurbyggja Laugarveg 4 og 6 á eigin kostnað, dæmi sem borgarstjórn getur ekki hafnað og hin af frábærum árangri í almenningssamgöngum hér á Akureyri. Inní í blaðinu er ítarleg og vel skrifuð fréttaskýring Skafta Hallgrímssonar um reynsluna af ókeypis strætó frá mörgum sjónarhornum og best finnst mér náttúrulega setning Ninju Rutar nema í VMA sem segir að það sé líka menning að nota strætó, þar hitti maður fólk á leið til vinnu og skóla og að margir félaga hennar skilji bílinn eftir heima og fari frítt í strætó í skólann. Þetta er snilld og nú þarf bara að bæta kerfið og auka tíðni ferða.

Auk þess er hellingur af áhugaverðum fréttum í Mogganum, til dæmis skemmtileg grein Einars Fals um "lista með listamönnum" þar sem hann fjallar um artfacts.net (að vísu smá galli að hann gleymir að benda á hvar ég er á þessum frábæra lista sæti, 6.040 af 180.000 og ofar en Georg Guðni og Hrafnkell sjónlistaverðlaunahafi!).

Svo er einnig áhugaverð grein um Obama og Hillary og meira og meira. Ég veit að þessi pistill minn hljómar eins og ömurleg auglýsing eða allavega kostun frá Mogganum en svo er nú ekki. Leiðararnir eru líka eins og venjulega svo ekki sé nú talað um Staksteina sem ég nenni ekki að lesa þó að hann hafi jafnvel líka litið skár út en venjulega.

Það er greinilegt að það er hellingur af færu fólki að vinna hjá Mogganum þó að topparnir (með undantekningum) séu úti að aka. Stundum kaupum við Moggann á laugardögum með Lesbókinni en nú ætla ég að koma við í Strax og kaupa þetta þriðjudagsblað og ekki bara hanga yfir mbl.is þó að það sé nú einnig ágætt.

Ósátt við rökstuðning ráðherra

Athugasemdir

[Steinunn Helga Sigurðardóttir, 8.1.2008 kl. 13:03]

kæri hlynur ætla að kíkja á moggan !

knús og ljós til þín

steina 

[Gísli Baldvinsson (IP-tala skráð) 8.1.2008 kl. 14:11]

Þú lánar mér svo Moggann Hlynur. Ekki er ég áskrifandi og verð ekki úr þessu. Hreifst einnig af ungu stúlkunni sem fór á fund borgarstjóra og vildi frítt í strætó í Reykjavík. Löngu komið hér á Akureyri og ég boða verulega lækkun eða frían aðgang að sundstöðum bæjarins.

[Júlíus Valsson, 8.1.2008 kl. 15:27]

Ertu virkilega ekki áskrifandi? Hvernig er hægt að  lifa án Moggans?

[Hrafnhildur Ýr Vilbertsdóttir, 8.1.2008 kl. 15:28]

Enginn tími til að liggja yfir mogganum....svo mikið að gera, skólinn, fjölskyldan, skólinn útréttingar, skólinn og fleira og fleira, spurning um að lesa valdar greinar fyrir nemendur klukkan 9 á morgnana

[Heimir Lárusson Fjeldsted, 8.1.2008 kl. 16:04]

Þér er ekki alls varnað. Búinn að uppgötva Morgunblaðið

[Ísleifur Egill Hjaltason, 8.1.2008 kl. 22:05]

"Ninju Rutar"

 Ég verð að hafa orð á því að þetta er það svalasta íslenska nafn sem að ég hef heyrt! Ninja! Hvaða snillingi datt í hug að skíra hana þessu nafni?

Skemmtilegt að segja frá því að ég tók líka eftir þessu og hafði á orði í skólanum í dag umtalaða strætógrein. Held ég byrji bara að kaupa blaðið ef þeir halda áfram með svona greinar! 

[Hlynur Hallsson, 9.1.2008 kl. 15:26]

Takk fyrir fínar athugasemdir. Mér finnst Ninja Rut flott nafn og hefur ekkert beint með samuraimyndir að gera. Eitt sinn bar ég út Moggann, frá 10 ára aldri til 14 minnir mig. Var eitt sinn áskrifandi en hef ekki í hyggju að gerast aftur áskrifandi því nóg er nú af pappír í póstkassanum á hverjum morgni! Ekki beint uppgötvun semsagt:)

Gísli þú mátt fá Moggann minn, komdu bara og náðu í hann. Komdu fagnandi með fréttir af lækkun aðgöngumiða í sund í dýrustu laug á landinu, hér í "öllum lífsins gæðum". Múhhaahaaah...

Bestu kveðjur, 

[Gunnar Th. Gunnarsson, 12.1.2008 kl. 01:17]

Þessi kona hefði aldrei boðist til að gera þessar kassafjalir upp nema af því hún veit að þetta verður rifið úr þessu. Nema hún sé eitthvað vanheil á geði náttúrulega.