Árni M. fer úr öskunni í eldinn

Aumingja Árni M. Mathiesen. Það er erfitt af rökstyðja dellu og jafnvel fjármálaráðherra (og settur dómsmálaráðherra í einn dag) getur það ekki. Rökstuðningur Baggalúts er betri en Árna: 

"Árni Mathiesen, settur dómsmálaráðherra, hefur sent frá sér rökstuðning fyrir skipan Þorsteins Davíðssonar, aðstoðarmanns í dómaraembætti við Héraðsdóm Norðurlands eystra.

Rökstuðningurinn, var skrifaður með afar vandvirknislegri rithönd á fallegt bréfsefni. Er hann í sex liðum og svohljóðandi:

1. Steini litli hefur alla tíð verið afar hjálpsamur og duglegur drengur - og skal sérstaklega tekið til þess hve þolinmóður og nærgætinn hann hefur verið við dómsmálaráðherra.
2. Hann er mjög þrifalegur.
3. Hann er sérlega vel upp alinn.
4. Hann hefur unnið ýmis trúnaðarstörf fyrir Sjálfstæðisflokkinn.
5. Hann hefur víðtæka reynslu af dómarastörfum, m.a. á samsýningum Kattavinafélagsins auk þess að hafa skrifað vandaðan bókadóm í barnablaðið ABC á sínum tíma.
6. Hann talar íslensku."

Svo mörg voru þau orð. 

Segir dómnefnd hafa misskilið hlutverk sitt

Athugasemdir

[Þorsteinn Sverrisson, 10.1.2008 kl. 21:39]

Já er þetta ekki ágætispiltur hann nafni minn.  Hefur reyndar aldrei verið á sjó svo ég viti.

[Guðjón Sigþór Jensson, 11.1.2008 kl. 13:23]

Einu sinni var mennskælingur nokkur sem tók að sér frægt hlutverk í leikriti nokkru. Ekki fór mörgum sögum af framgöngu hans öðrum en þeim að hann tók sér drullu í hönd og kvað upp orðið drulla, drulla hvað eftir annað. Þetta var víst mikið grín og glens og hlutverkið var tengt einhverri konungstign. Vakti leikurinn mikla kátínu og gleði meðal þeirra sem minna voru sigldir. Ekki sá Mosi leikrit þetta en síðan þessi leiksýning átti sér stað, þá á leikarinn fyrrverandi að hafa fest sig svo vel í hlutverkinu að hann gerðist nokkurs konar hundadagakóngur á Íslandi sem enn stendur yfir. Dýrð sú byrjaði í borgarstjórn Reykjavíkur og Sjálfstæðisflokkinn, þá um þingið og Stjórnarráðið og að lokum endaði ævintýrið í Arnarhólsbankanum þar sem stríðskanónur Jörundar áttu fyrrum að hafa verið í skans niður við sjóinn.

Fjármálaráðherrann sem er dýralæknir að mennt er kominn með forugar hendur ekki af því þarfa verki að lækna hesta, kindur og kýr, heldur af mannaráðningum sem hann virðist ekkert ráða við. Kannski hann ætti að taka aftur hendinni við dýralækningar, verk sem hann hefur betur tök á en að taka að sér íhlaupastörf fyrir Björn Bjarnason.

Mosi

[Jens Guð, 12.1.2008 kl. 01:34]

  Mér varð á að velta þessu máli fyrir mér http://jensgud.blog.is/blog/jensgud/entry/411054/.  Í kjölfarið voru sett inn margar áhugaverðar athugasemdir.  Mestur fengur þótti mér af upplýsingum Steina Briem,  fyrrum blaðamanns Morgunblaðsins,  sem sá í hendi sér yfirburði Árna umfram dómarana í nefndinni er mat hæfni umsækjenda.  Árni er lærður dýralæknir og með gráðu í fisksjúkdómafræði. 

[Jóhannes Ragnarsson, 12.1.2008 kl. 15:39]

Þá var nú annað uppi á teningnum þegar Svavar Gestsson var skipaður í utanríkisþjónustuna af Davíð Oddssyni og Halldóri Ásgrímssyni. Og hvað ætli hafi gert það að verkum að Guðný Dóra, systir framangreinds Svavars og fyrrum ráðsnjall kosningastjóri VG í Kraganum, var skipuð bóndi að Gljúfrasteini ? Mér þætti alveg upplagt að þeir sem hæst láta fyrir munn VG velti þessu og fleiru til fyrir sér, rétt á meðan þeir óskapast af heilagri vandlætingu út af skipun Þorsteins Davíðssonar í stól héraðsdómara. 

[Jens Guð, 13.1.2008 kl. 02:44]

  Jóhannes,  þú telur sem sagt að það sé hægt að afsaka forkastanlega embættisfærslu Árna og hans kjánalegu rök fyrir henni með því að sitthvað sé athugavert við einhverjar aðrar embættisfærslur einhverra annarra.  Þetta er álíka kjánalegt og ef innbrotsþjófur er staðinn að verki en reynt að sýkna hann á þeim forsendum að aðrir hafi komist upp með hitt og þetta.  Hundalógík kallast þetta og er aumleg vörn fyrir forkastanlegri hegðun,  í þessu tilfelli illa lyktandi spilltri embættisfærslu.

  Þó að það komi ekki málinu við þá er ég virkur félagi í Frjálslynda flokknum en hvorki málssvari þess flokks né annarra. 

[Jóhannes Ragnarsson, 13.1.2008 kl. 11:04]

Þú heldur það, Jens, að ég telji að hægt sé að afsaka ráðningu Þorsteins Davíðssonar með því að benda á aðrar ráðningar af sama toga. Hið rétta er, að ég tel embættisfærslu Árna Matt í þessu máli allt í senn, barnalega, ósvífna og fyrir neðan allar hellur. En ég er líka þeirrar skoðunar, að pólitískar mannaráðningar séu hluti af samtryggingu stjórnmálaflokkana þar sem allir eru á einhver hátt sekir þegar upp er staðið - líka VG og Frjálslyndir.