Réttur maður í starfið

Ég sé að starf forstjóra nýrrar Varnarmálastofu er eins og sniðið fyrir Stefán Pálsson. Hann er náttúrulega snillingur og þvert á báknflokkana Samfó og íhald þá ætlar Stefán að stefna að "...því að halda umsvifum hennar (Varnarmálastofu) í algjöru lágmarki og minnka allan rekstrarkostnað eins og mögulegt er."

Þetta nýja bákn sem Ingibjörg Sólrún ætlar að setja á stofn mun blása út eins og embætti Ríkislögreglustjóra hefur gert á kostnað almennrar löggæslu í landinu. Það er hægt að nota einn og hálfan milljarð í margt betra. Stefán er því réttur maður í starfið og mun koma góðu til leiðar með aðhaldssemi og hagsýni. Áfram Stefán!

Formaður SHA sækir um forstjórastarf Varnarmálastofu

Athugasemdir

[Ingólfur Ásgeir Jóhannesson, 2.5.2008 kl. 13:01]

Mér líst vel á að fá sagnfræðing í starfið og held að utanríkisráðherra sem er sagnfræðingur hljóti að ráða Stefán. Aftur á móti verður Stefán að segja af sér sem formaður í SHA fái hann þetta starf því að það er ekki hægt að vera formaður andstæðinga hernaðar og vera í forsvari fyrir stofnun sem virðist eiga að vera hernaðarstofnun. Markmið Stefáns í ríkisrekstri þessarar stofnunar hlýtur að vera mjög þóknanlegt frjálshyggjufólki!

[Guðjón Sigþór Jensson, 2.5.2008 kl. 15:45]

Ætli verði ekki einhver kontóristi valinn sem sótt hefur einhvers konar nám í þessum hernaðar og vopnafræðum. Mér finnst það mun raunhæfari sýn á þessi mál sem eru mér þó mjög framandi enda hef aldrei haft áhuga fyrir byssum og slíkum ófögnuði. Auðvitað væri akkur í að fá yfirlýstan andstæðing hernaðarhyggju í starf sem forstjóri Varnarmálaskrifstofu. Honum væri mjög vel treystandi að hafa kontórinn eins lítinn, ódýran og hagkvæman í rekstri fyrir okkur skattgreiðendur. Við þurfum hins vegar að veita meira fé í heilbrigðismálin og menntamálin þó svo ríkisstjórnin sé ekki á sama máli.

Mosi