Byltingin lengi lifi!

Það er gaman að vera til þessa dagana. Við erum að skrifa söguna og það er tími breytinga. Mitt í svartnætti gjaldþrotastefnu Sjálfstæðisflokksins er að rísa nýtt Ísland þar sem kynjajafnrétti verður í fyrirrúmi og það gefur manni von.

En þetta er ekki búið, byltingin er rétt að byrja og varðhundar Sjálfstæðisflokksins munu gelta og bíta sem aldrei fyrr. Þeir eru hamslausir af bræði og það er dálítið sorglegt. Það er svo auðvitað dæmigert að það séu konur sem þurfa að taka til eftir karlana sem klúðruðu hlutunum fullkomlega. Og óskandi væri að þeir myndu hafa vit á því að þegja meðan það er verið að taka til eftir þá.

Klukkan 14:00 – 17:00 í dag laugardag verður málþing á Grand Hótel um framtíð lýðræðis á Íslandi. Þar er hópur frábærra frummælenda og málþingsstýra er Guðfríður Lilja Grétarsdóttir.

Stefán Ólafsson: Farsældarsamfélagið - hvaða leið er best?

Margrét Pétursdóttir: Lýðræði frá rótum

Sigtryggur Magnason: Guð blessi Ísland

Oddný Eir Ævarsdóttir: Frumspeki lýðræðisins


Í kvöld verður svo kvöldverður og ball með Cc Reykjavík, Súpergrúppu Kalla Tomm bæjarfulltrúa Vg í Mósó og bloggfélega. Ég verð að fara norður og missi því miður af ballinu. Það er fúlt en maður getur víst ekki verið á mörgum stöðum í einu.

Til hamingju öll

Öld testósterónsins lokið

Athugasemdir

[Ár & síð, 7.2.2009 kl. 12:16]

Til hamingju með daginn. Góður jakki!
Matthías

[Hlynur Hallsson, 7.2.2009 kl. 12:37]

Takk fyrir það sömuleiðis kæri Matthías Kristiansen. Jónas Hallgrímsson og Jón Sæmundur Auðarson eiga heiðurinn af jakkanum:)

Bestu baráttukveðjur,

[Guðmundur Ásgeirsson, 7.2.2009 kl. 12:59]

Já, hamingjuóskir til íslenskra jafnréttissinna!

Hinsvegar verð ég að minna á fyrst talað er um gjaldþrotastefnu, þá er hún fyrst og fremst bundin við þá galla sem eru innbyggðir í peningamálakerfið, og hafa lítið með kynjahlutföll að gera. Það sem ég er í raun að segja er að við erum ekkert betur sett með konur við stjórnvölinn, ef þær afnema ekki þetta meingallaða peningakerfi sem við búum við og innleiða sjálfbæra hugsun í stjórn peningamála. Almennt er ég samt mjög hlynntur því að kvenleg vinnubrögð fái að móta þjóðfélagið meira í framtíðinni en hingað til hefur verið.

[Hlynur Hallsson, 7.2.2009 kl. 13:39]

Takk fyrir hamingjuóskirnar Guðmundur Ásgeirsson.

Þetta er rétt hjá þér. Það breytist ekkert af sjálfu sér. En konurnar í ríkisstjórninni eru líklegar til að koma  hlutunum í lag, innleiða sjálfbæra hugsun í stjórn peningamála og afnema spillinguna. Þeirra tími er kominn!

Muna að skrifa fullt nafn:)

Bestu kveðjur,

[Þór Ludwig Stiefel TORA, 7.2.2009 kl. 14:05]

Þetta er ekki komið enn. Seðlabankastjórar neita að víkja og hunsa vilja ríkisstjórnarinnar.

Mætum á mánudaginn og mótmælum fyrir framan Seðlabankann.

Lifi byltingin!

[Páll Jóhannesson, 7.2.2009 kl. 15:02]

,,Og óskandi væri að þeir myndu hafa vit á því að þegja meðan það er verið að taka til eftir þá" Ég geri ráð fyrir því að þú eigir við sjálfstæðismennina, sé svo þá held ég að gamla máltækið ,,það er erfitt að kenna gömlum hundi að sitja" eiga hér vel við, því miður.

[Hlynur Hallsson, 7.2.2009 kl. 15:13]

Hárrétt Páll, ég á við sjálfskipaða varðhunda valdsins. Sennilega er ekki hægt að kenna þeim að sitja, því miður.

Tek einnig undir með þér Þór, það þarf að mótmæla áfram við Seðlabankann, svo lengi sem Davíð Oddsson skammast sín ekki og biður þjóðina afsökunar á öllum mistökunum sem hann gerði og stuðlaði að.

Bestu baráttukveðjur,

[Arinbjörn Kúld, 8.2.2009 kl. 10:11]

Rétt Hlynur, þeir eru hamslausir af bræði og munu grípa til miður geðslegra aðferða á næstunni. Reyndar býst ég við hinu versta frá frá þessum flokki því margt miður gott á eftir að koma í ljós en vona hið besta.

[Steinunn Helga Sigurðardóttir, 12.2.2009 kl. 15:47]

til hamingju !!!

kær kveðja tll ykkar fyrir norðan

steina