Hálendisbjörn, Hlass og gagneldflaugar

Mér finnst liggja beint við að fá fagmann í það að svæfa bangsa ef hann er þá á svæðinu. Til dæmis íslendinginn í Noregi sem var á Stöð 2 í gær. Búið að klúðra nóg í ísbjarnamálum í bili.

Svo vil ég bara bjóða öllum, líka ísbjörnum, í Öxnadalinn í kvöld klukkan 18 á opnun á Hlass sýningunni í hlöðunni við Halastjörnuna. Meira hér.

Og svo skora ég á alla að skrifa undir áskorun um að ekki verði settar upp einhverjar gagneldflaugar í Tékklandi. Hér er áskorun frá samtökum hernaðarandstæðinga:

Næstkomandi sunnudag, 22. júní, verður alþjóðlegt átak til stuðnings baráttunni gegn fyrirhugaðri uppsetningu gagneldflauga í Tékklandi í tilefni af hungurverkfalli baráttumanna í Tékklandi. Í Reykjavík verður sett upp tjald á Lækjartorgi milli klukkan 12 og 6 á sunnudaginn til að minna á þessa baráttu. Samtök hernaðarandstæðinga hvetja félaga sína og allan almenning til að sýna þessari baráttu stuðning, láta sjá sig á Lækjartorgi. Ennfremur er undirskriftalisti á netinu: http://petice.nenasili.cz/?lang=en. Mikilvægt er að sem flestir skrái sig þar. Setjum metnað okkar í að þar verði sem flest íslensk nöfn. Látið berast áfram til vina og kunningja. Nánari upplýsingar á www.dagurfostu.net og Friðarvefnum, www.fridur.is. Væntanlega koma nánari upplýsingar á næstunni á Friðarvefnum um baráttuna gegn gagnflugaáætluninni og annarri baráttu hernaðarandstæðinga í Evrópu, m.a. í tilefni af 60 ára afmæli NATO á næsta ári. Fylgist með Friðarvefnum! Við bendum líka á Evrópska samfélagsvettvanginn (European Social Forum) í Malmö í Svíþjóð 17.-21. september, en þangað munu evrópskir friðarsinnar og hernaðarandstæðingar fjölmenna auk annarra sem vilja öðruvísi heim. Þeir sem leið eiga um sunnanverða Skandinavíu á þeim tíma eru hvattir til að koma við í Malmö. Sjá http://www.esf2008.org og http://www.europeanpeaceaction.org.

Hálendisbjörn er hugsanlegur

Allir velkomnir á opnun í bæjarstjórnarsal Ráðhússins á Akureyri

Ég var að klára að spreyja og lofta út úr bæjarstjórnarsalnum í Ráðhúsinu hér á Akureyri. Sigrún Björk bæjarstjóri leit við og var hin kátasta. Það eru allir velkomnir á opnunina á morgun og hér er tilkynningin sem Jóna Hlíf sýningarstjóri sendi út:

Hádegisopnun, fimmtudaginn 19. júní klukkan 12:15
Gallerý Ráðhús
Geislagötu 9
600 Akureyri


Hlynur Hallsson
Allskonar kræsingar, fjall án kinda, fleiri myndir og sprey

Hlynur Hallsson opnar sýninguna "Allskonar kræsingar, fjall án kinda, fleiri myndir og sprey" í bæjarstjórnarsal ráðhúss Akureyrar fimmtudaginn 19. júní klukkan 12:15

Þar gefur að líta sex ljósmynda/textaverk úr myndröðinni "MYNDIR - BILDER - PICTURES" ásamt nýju spreyverki sem Hlynur hefur gert sérstaklega fyrir bæjarstjórnarsalinn.
Hlynur vann myndirnar á árunum 2002-2007 og í sumar kemur einmitt út bók með allri myndröðinni "MYNDIR - BILDER - PICTURES" hjá forlagi höfundanna. Hlynur hefur gert spreyverk síðustu ár, það fyrsta í Texas 2002 og nú síðast á sýningunni "Bæ, bæ Ísland" í Listasafninu á Akureyri. Þann 16. ágúst verður opnuð yfirlitssýning á verkum Hlyns í Nýlistasafninu.

Brot úr texta eftir Claudiu Rahn úr bókinni "MYNDIR - BILDER - PICTURES":
"Frásagnir Hlyns, sem eru samsettar úr einföldum aðal- og aukasetningum, ná í einfaldleika sínum samstundis til áhorfandans. Áhrifamáttur frásagnarinnar byggist fyrst og fremst á þeirri miðlunarleið sem listamaðurinn velur. Til dæmis segir Hlynur frá loftbelgsferð sem Hugi sonur hans fékk í tíu ára afmælisgjöf. Sagan byrjar sem saklaus frásögn en breytist fljótt í harmsögu og tapar þar með léttleika sínum þegar listamaðurinn minnist bókarinnar "Eilíf ást" eftir Ian McEwan. En í þeirri bók endar loftbelgsferðin jú ekki vel."

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur á síðustu 10 árum sett upp um 60 einkasýningar og tekið þátt í um 80 samsýningum. Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2006. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var útnefndur bæjarlistarmaður Akureyrar árið 2005. Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, sprey, gjörninga og hvað eina, allt eftir því sem hentar í hverju tilfelli. Nánari upplýsingar um Hlyn og verk hans er að finna á heimsíðunni www.hallsson.de.

Allir velkomnir
Léttar veitingar

Verkefnastjóri Jóna Hlíf Halldórsdóttir
sími 6630545

Rétti andinn

Þetta er rétti andinn. Ekkert að vera pirra sig yfir einhverri seinkun heldur slá þessu bara uppí fjör og hringdans. Færeyingar frændur okkar kunna þetta og geta kennt okkur líka eitt og annað. Gott að öryggisverðirnir voru ekki með nein læti þarna í Toronto, það er aldrei að vita hvað má og hvað má ekki á flugvöllum. Annars tók ég smá hringdans með 20 ára samstúdentum mínum í gærkvöldi og það var nú mikið fjör á Kaffi Akureyri. Svo heldir fjörið áfram í Höllinni í kvöld. Vonandi með smá hringdansi líka.

Stigu hringdans í flugstöðinni

Fjórir íslenskir sjálfboðaliðar á herteknu svæðunum í Palestínu

Fjórir Íslendingar héldu til Palestínu í síðustu viku til starfa sem sjálfboðaliðar á herteknu svæðunum á vegum Félagsins Ísland-Palestína. Anna Tómasdóttir, hjúkrunarnemi við Háskóla Íslands, verður í Palestínu til 18. ágúst og starfar með samtökunum Project Hope, m.a. við skipulagningu og þróun á skyndihjálparnámskeiðum. Einar Teitur Björnsson og Stefán Ágúst Hafsteinsson, sem leggja stund á læknisfræði við Háskóla Íslands, munu næsta mánuðinn starfa með Palestínsku læknahjálparnefndunum (Palestinian Medical Relief Society - PMRS) í Nablus og víðar um Vesturbakkann. Yousef Ingi Tamimi, nemi við Kvennaskólann í Reykjavík, er að kenna ungmennum ensku og starfa við félagsmiðstöðvar PMRS fyrir ungt fólk í Ramallah og Nablus.

Palestínsku læknahjálparnefndirnar (Palestinian Medical Relief Society - PMRS) voru stofnaðar árið 1979 af palestínskum læknum og heilbrigðistarfsmönnum. Samtökin annast heilsugæslu og læknisþjónustu víðsvegar á herteknu svæðunum. Meðal annars í flóttamannabúðum, þorpum og sveitum, sem eru innilokaðar vegna vegatálma hernámsliðsins, með færanlegum læknastöðvum (mobile clinics). PRMS rekur jafnframt læknastofur víðsvegar á herteknu svæðunum og félagsmiðstöðvar fyrir ungt fólk í Bethlehem, Hebron, Nablus, Ramallah og Gaza. Félagið Ísland-Palestína hefur síðustu ár stutt starfsemi PMRS með fjárframlögum og starfsemi íslenskra sjálfboðaliða.

Project Hope halda úti fræðslu- og tómstundastarfsemi fyrir börn og ungmenni, einkum í Nablus á Vesturbakkanum og flóttamannabúðnum Balata og Askar skammt frá borginni. Sumardaginn fyrsta léku Víkingur Heiðar Ólafsson og Bryndís Halla Gylfadóttir á tónleikum til styrktar tónlistarstarfi samtakanna í Balata flóttamannabúðunum. Fyrir nokkrum árum lögðu Mugison, KK, múm og fleiri íslenskir tónlistarmenn æskulýðsstarfi Project Hope í sömu flóttamannabúðum lið á geislaplötunni Frjáls Palestína.


Hlekkir
Palestinian Medical Relief Society (PMRS) - http://www.pmrs.ps
Palestinian Medical Relief Society (PMRS) Youth Centers - http://www.pmrs.ps/last/etemplate.php?id=29
Project Hope - http://www.projecthope.ps
Anna Tómasdóttir bloggar frá Palestínu; http://www.anna-palestina.blogspot.com
Félagið Ísland-Palestína - http://www.palestina.is

Arnar Ómarsson opnar sýninguna "Með eigin augum" á Café Karólínu

 

Arnar Ómarsson

Með eigin augum 

14.06.08 - 04.07.08

 

Café Karólína // Kaupvangsstræti 23 // IS 600 Akureyri // 4612755

 

Arnar Ómarsson opnar sýninguna "Með eigin augum" á Café Karólínu laugardaginn 14. júní 2008.

Arnar er búsettur í Freyjulundi í Eyjafirði. Hann varð stúdent frá MA 2007 og starfaði sem umbrotsmaður og ljósmyndari hjá DV 2007-2008. Arnar er nemandi í Dieter Roth Akademíunni og er á leið í ljósmyndanám til London í haust. Hann segir um verkin sem hann sýnir á Café Karólínu: "Þessi sýning er tilraun til að sýna daglegt líf í Íran með mannlífsmyndum. Allar myndirnar eru frá ferð um Íran á síðasta ári."

Nánari upplýsingar um Arnar Ómarsson er að finna á http://freyjulundur.is og netfangið er [e-mail] og í sima 8238247

Sýningin á Café Karólínu stendur til 4. júlí, 2008.

Næstu sýningar á Café Karólínu: 

05.07.08-01.08.08    Vilhelm Jónsson
02.08.08-05.09.08    Margeir Sigurðsson
06.09.08-03.10.08    Sigurlín M. Grétarsdóttir
04.10.08-31.10.08    Ingunn St. Svavarsdóttir Yst
01.11.08-05.12.08    Þorsteinn Gíslason
 

Umsjónarmaður sýninganna er Hlynur Hallsson

Svarthöfði... góður!

Þessi mynd Golla fer í flokkinn skemmtilegustu myndir ársins. Það er ekki hægt að segja annað en að félagar Vantrúar hafi beittan húmor, þetta er snilldar búningur á réttum stað. Prestarnir hljóta að hafa haft gaman að þessu líka. Góður félagskapur þar á ferð! Þessi mynd hefði reyndar átt að fara á forsíðuna á Mogganum (betri en plastálft að fá sér kríu!)

Svarthöfði á vegum félagsmanna í Vantrú

Margrét Lindquist hlýtur evrópsk hönnunarverðlaun

Margrét Lindquist hlaut gullverðlaun samtaka fagfélaga grafískra hönnuða í Evrópu sem veitt eru til nemenda. Margrét útskrifaðist frá Myndlistarskólanum á Akureyri í vor og hlaut reyndar einnig verðlaun þar fyrir framúrskarandi námsárangur. 

Á bloggsíðu Helga Vilberg skólastjóra Myndlistarskólans á Akureyri er einnig sagt frá þessum verðlaunum.

Til hamingju með þetta Magga!

Hvar eru sólgleraugun?

Það vantar eitthvað á þessa mynd af Bubba! Ekki fimm atriði, heldur bara eitt. Það er varla að maður kannst við þennan mann sem stendur þarna í rokinu með eitthvað grátt bundið um hálsinn. Til lukku með þetta kæru hjón. Vonandi farnast ykkur vel og gengur allt í haginn. Fjórir naglar er líka gott nafn á plötu. Platan verður samt ekki eins góð og þegar Bubbi var uppá sitt besta: á Ísbjarnarblús. Erfitt að toppa svoleiðis snilld.

Bubbi Morthens gekk í það heilaga

Betra að borga fólki mannsæmandi laun

Er ekki kominn tími til að meta störf kennara að verðleikum og borga þeim almennileg laun? Það sama gildir um umönnunarstéttir. Það er ekki til neins að steypa "hátæknisjúkrahús" ef ekki fæst starfsfólk til að vinna þar störfin. Stjórnvöld eiga að hætta þessu rugli og þessari nísku og fara að borga laun sem fólk getur lifað af. Þetta eru mikilvæg störf. Áfram kennarar og starfsfólk sjúkrahúsa!

Fara kennarar í haust?

Síðan hvenær var bannað að hlaupa um með fána?

Það ætti frekar að vera bannað að plata fólk og grafa holur og þykjast vera að taka einhverjar "skóflustungur" (að rugli). Ef til vill hefur það farið sérstaklega í taugarnar á laganna vörðum eða öllu heldur yfirmönnum þeirra að maður kallaði "No more Kárahnjúkar" Það er auðvitað brot gegn valdstjórninni og alvarlegur glæpur sem á ekki að líðast og þess vegna best að handjárna fólk og færa það af hinu heilaga svæði. Eða kannski höfðu ráðherrar Samfylkingar og Sjálfstæðisflokks bara áhyggjur af því að vera ekki einir í sviðsljósinu ásamt álbræðslukörlunum? 

"Viðstödd undirritunina voru m.a. Björgvin G. Sigurðsson, viðskiptaráðherra, Árni M. Mathiesen, fjármálaráðherra, John P. O Brien, stjórnarformaður Century Aluminum, móðurfélags Norðuráls, Ragnar Guðmundsson, forstjóri Norðuráls, Árni Sigfússon, bæjarstjóri Reykjanesbæjar og Oddný Guðbjörg Harðardóttir, bæjarstjóri sveitarfélagsins Garðs. Tóku þau öll skóflustungu á álverslóðinni."

Frábært lið þessir skófluráherrar íhalds og Samfó. Sem saman eru að grafa niður "Fagra Ísland" á þessari mynd.

Mótmæli á álverslóð

Bannað að tjalda fyrir yngri en 20 ára

Fyrirsögnin á þessari frétt á mbl.is er góð. Nú er það orðið frétt að: "Tvítugir og eldri mega tjalda á Akureyri". Þetta þýðir að það er búið að lækka bannaldurinn úr 23 árum í 20 ár, aldurstakmörkin lækkuð. Það stefnir þá sem sagt í það að yngra gengið sem mætir á "bíladaga" þessa helgi á Akureyri verður að sofa í bílunum sínum! Já, eða bara aka inn á Hrafnagil og gista þar. Er það betra? Ég er ekki viss um að íbúar í Eyjarfjarðarsveit séu kátir yfir því en einhversstaðar verða "vondir" (og  ungir) að vera.

Tvítugir og eldri mega tjalda á Akureyri

Kvikyndi stendur fyrir grískri veislu

Kvikmyndaklúbburinn Kvikyndi á Akureyri stendur fyrir mikill kvikmyndaveislu með myndum sem maður fær ekki tækifæri til að sjá á hverjum degi. Og nú er komið að grísku myndinni "Mia aioniotita kai mia mera" (Ein eilífð og einn dagur/Eternity and a day) frá árinu 1998. Hún verður sýnd sunnudaginn 8. júní kl. 16:00 í Sambíóinu á Akureyri.

Myndin Mia aioniotita kai mia mera/Ein eilífð og einn dagur/Eternity and a day (1998) er eftir gríska leikstjórann Theo Angelopoulos. Dómnefndin í Cannes var einróma sammála um að veita þessari mynd Gullpálmann 1998. Hún fjallar um gamlan rithöfund sem hefur fengið að vita frá lækni sínum að hann eigi aðeins stuttan tíma ólifaðan. Daginn eftir á hann að leggjast inn á sjúkrahús og ekki eiga afturkvæmt en þá hittir hann ungan strák sem hann ákveður að rétta hjálparhönd.

Lengd 132 mínútur

Miðaverð er aðeins 500 krónur. Allir að mæta!

Af dómaraskandal

Það er ágætt að loksins sér fyrir endann á þessu furðulega Baugsmáli. Dómurinn í öðru máli sem var felldur í gær er hinsvegar skandall. Þar voru Geira í Goldfinger dæmdar himinháar bætur. Sem betur fer hefur dómnum verið áfrýjað til Hæstaréttar. (Myndin er tekin af dv.is)

Í tilefni af þessum dómi Héraðsdóms Reykjavíkur í máli Ásgeirs Þórs Davíðssonar gegn Jóni Trausta Reynissyni og Ingibjörgu Dögg Kjartansdóttur hefur  Femínistafélag Íslands sent frá sér eftirfarandi ályktun:

Femínistafélag Íslands lýsir undrun og vonbrigðum vegna nýfallins dóms Héraðsdóms Reykjavíkur en í dómnum er stefndu gert að greiða stefnanda 1,7 milljónir króna í miskabætur og málskosntað vegna ærumeiðandi ummæla.

Femínistafélagið telur ljóst á dómi Héraðsdóms að litið hafi verið fram hjá alþjóðlega viðurkenndri skilgreiningu á mansali. Hugtakið mansal er almennt skilgreint sem verslun með fólk, með eða án samþykkis þess, ef salan byggist á varnarleysi viðkomandi. Samkvæmt rannsókn sérfræðinga á samningum íslenskra nektarklúbba við nektardansmeyjar hefur sannast að konur sem starfað hafa á nektarklúbbum hafi verið seldar mansali. Því er ljóst að Héraðsdómur lítur fram hjá sérfræðiþekkingu á málaflokknum.

Þá þykir Femínistafélagi Íslands sýnt að dómurinn endurspegli virðingu fyrir æru íslenskra karla umfram virðingu fyrir erlendum konum, og virðingu fyrir peningum á kostnað mannréttinda.

Ljóst er að jafnrétti kynjanna á undir högg að sækja á Íslandi.

Dómur í Baugsmáli kveðinn upp í dag

Til hamingju Barack Obama

Ég óska einnig honum Barack Obama til hamingju og vona innilega að hann verði næsti forseti BNA. Og það væri nú líka gott ef Hillary yrði varaforseti. Obama var hógvær í fögnuðinum og sáttatónn í Hillary Clinton. Vonandi rúlla þau yfir McCain og Repúblikana. Það er kominn tími fyrir skynsemi og breytingar í BNA.

Óskaði Obama til hamingju

Verðlaunum ísbjörninn

Mér finnst að það eigi að verðlauna þennan ísbjörn. Hann hefur ekki gert neinum mein svo best er að gefa honum eitthvað af þessu hvalkjöti sem enginn vill éta áður en það rotnar. Svo á að senda hann aftur til Grænlands þar sem hann mun hafa það betra en hér. Til dæmis í heiðursfylgd á varðskipi. Alls ekki að skjóta björninn. Hann er búinn að synda yfir hafið. Þetta er dugnaðarforkur, sem ætti að verðlauna.

Ísbjörn við Þverárfjall