Fokk!

En ég trúi því ekki fyrr en á reynir. Það er hvortsemer ekkert að marka svona spár, hehe...

Útgönguspár benda til sigurs dönsku stjórnarflokkanna

Til hamingju húsverndunarfólk!

Þetta eru frábærar fréttir! "Menntamálaráðherra hefur að fenginni tillögu húsafriðunarnefndar ákveðið að friða þrjú hús á Akureyri. Húsin sem um ræðir eru Hafnarstræti 94, Hafnarstræti 96 og Hafnarstræti 98 og nær friðunin til ytra borðs húsanna. Húsin eru öll talin hafa mikið gildi fyrir umhverfi sitt, ýmist sem hornhús eða áberandi kennileiti í miðbæ Akureyrar." 

Myndin er frá Minjasafninu og ég fann hana á bloggsíðu Helga Vilberg og þar má sjá Hamborg, París og svo glittir í Hótel Akureyri vinstra megin við París. Ég skrifaði um málið snemma í sumar sem má lesa hér. Nýja myndin er af vísi.is.

Þrjú hús friðuð á Akureyri

Hasarspenna í Danmörku en SF búin að vinna kosningarnar

Það hefur svona aðeins slegið á bjartsýnina með að þessi leiðinda hægristjórn muni hrökklast frá völdum í kosningunum í dag. Eitt er samt á hreinu: Sigurvegari kosninganna er systurflokkur Vinstri grænna, Sósíalíski þjóðarflokkurinn sem kemur sennilega til með að tvöfalda fylgið og vel það. Það eru útaf fyrir sig tíðindi.

Anders Fogh Rasmussen sem boðaði til kosninga með þriggja vikna fyrirvara og hélt að hann myndi rúlla þessu upp gerði sennilega afdrifarík mistök og flokkurinn hans mun standa í stað eða jafnvel tapa atkvæðum, vonandi mörgum. (Ég vek athygli á því að þetta er ekki alveg hlutlaus fréttaskýring hjá mér:) Það eru einnig góðar fréttir að Einingarlistinn muni ná lágmarkinu til að komast á þing. Rödd þeirra er mikilvæg og þar er upp til hópa ungt og hresst fólk sem hristir upp í stöðnuðum hlutunum á danska þinginu. Við þurfum á þessu fólki að halda. Ég vona innilega að Danir beri gæfu til þess að kjósa til vinstri og þar verði mynduð velferðarstjórn með áherslu á umhverfisvernd og með hag fólksins í huga, manneskjuleg stjórn í stað stríðsherra.

Kjörstaðir opnaðir í Danmörku

Glæsilegur fulltrúi nýrra Íslendinga á Alþingi, til hamingju Paul Nikolov

Það er afar gleðilegt að Paul Nikolov skuli vera kominn á þing. Mbl.is gleymir að benda á að hann er einnig duglegur bloggari hér á moggabloggkommúnunni og þar segir Paul: "Takmark mitt er að koma með rödd innflytjendasamfélagsins beint inn í sali alþingis, að auka flæði hugmynda milli þingsins og fólksins, og að aðstoða við að skapa Ísland framtíðarinnar sem verður betra fordæmi fyrir aðrar þjóðir með hverri kynslóð." Þetta eru glæsileg markmið og eins og hann sagði í Sjónvarpinu í kvöld þá verðu eitt af hans fyrstu málum að beita sér fyrir því að atvinnuleyfi verði afhent einstaklingum í stað fyrirtækjum. Þetta er mikið hagmunamál og í raun mannréttindamál. Ég er pínu ánægður með Paul og skrifaði einmitt þegar ég var að byrja að blogga hér á mogga um framboð hans í forvali VG. Til hamingju Paul!

Fyrsti innflytjandinn á þingi

Verðbólgan 10,3% og Geir H. Haarde segir okkur að slappa af

Hagstjórn Sjálftökuflokksins hefur beðið skipsbrot. Þeir eru með sína menn á öllum stöðum og eru búnir að klúðra efnahagsmálunum endanlega. Svo mætir Geir Haarde í enn eitt drottningarviðtalið að þessu sinni á Morgunvaktina á ruv 1 og segir okkur að hægja á neyslunni. Fólk svarar fyrir sig og stendur í biðröðum við allar leikfangasjoppur sem opna á höfuðborgarsvæðinu og kaupir plastdrasl fyrir 70 milljónir á einu bretti og svo annað eins um næstu helgi og þarnæstu. Hverjir hafa talað upp hið "frábæra" efnahagsástand í landinu? Heimilin og fyrirtækin hafa aldrei verið skuldugri og jafnvel Davíð Oddson er farinn að hafa áhyggjur (af sinni eigin arfleyfð) Þetta er einn stór brandari og heimilin blæða. Og svo kýs fólkið bara Sjálftökuflokkinn aftur "til að koma í veg fyrir glundroða". Það er eitthvað rotið "in the state of Iceland".

Vísitala neysluverðs hækkar um 0,65%

Egill Helga "sjónvarpsmaður ársins", eruði ekki að djóka?

...og "bókmenntaþátturinn Kiljan" Menningar- og/eða lífsstílsþáttur ársins. Múhhaahhaaa... þetta er fullkominn brandari. Fyrsti bömmerinn af þessari Eddu var náttúrulega að Astrópía skildi varla fá eina einustu tilnefningu og svo sá næsti að Veðramót fengu bara eina Eddu af ellefu tilnefningum. Til hamingju Ragnar Bragason fyrir fjórar og flott að Foreldrar hafi fengið verðskulduð verðlaun. En hverjir eru annars í þessari akademíu sem er að velja? Þetta er bráðskemmtilegt...

Kvikmyndin Foreldrar fékk flest Edduverðlaun

Þrjár opnanir á Akureyri í dag

Það verða þrjár myndlistarsýningar opnaðar hér á Akureyri í dag. Ein opnunin er reyndar hafin svo það er best að fara að drífa sig! Klukkan 14 opnaði Gunnar Kr. Jónasson myndlistarsýninguna "Svart" í Populus tremula. Á sýningunni eru splunkunýir skúlptúrar eftir Gunnar Kr. sem vakið hefur verðskuldaða athygli fyrir þrívíða myndlist, auk málverka og teikninga. Sýningin verður einnig opin sunnudaginn 11. 11. kl. 14:00 - 17:00.

Klukkan 15 opnar Lína í Jónas Viðar galleríinu, einnig í Gilinu og svo klukkan 17 opnar Karen Dúa Kristjánsdóttir sýninguna ,,Klippimynd" í DaLí Gallery laugardaginn 10. nóvember. Verk Karenar Dúu er eins og titillinn segir, tilraun með klippimynd á vegg.
Karen Dúa er fædd á Akureyri árið 1982. Hún tók stúdentspróf við Menntaskólann á Akureyri árið 2002 og lauk myndlistarnámi frá fagurlistadeild Myndlistaskólans á Akureyri vorið 2006. Karen Dúa rekur Gallery BOX ásamt fleirum og er vinnustofa hennar staðsett þar á sama stað. Hún hefur tekið þátt í nokkrum samsýningum en sýningin klippimynd í DaLí gallery er þriðja einkasýning hennar að námi loknu. Hún er einnig með sýningu á VeggVerk á sama tíma og ættu sýningargestir að rölta þangað og virða fyrir sér verk hennar þar í leiðinni. 

Auk þessa eru ljómandi sýningar í Listasafninu á Akureyri, í Gallerí + og á Kaffi Karólínu. Semsagt hægt að slá margar flugur í einu höggi í myndlistinni á Akureyri í dag. 

Viðbjóðsleg meðferð á manneskjum

Maður skilur ekki alveg hvað er í gangi hjá bandaríkjastjórn að halda úti þessu fangelsi sem líkist einna mest útrýmingarbúðum nasista. Myndin sem sýnd var í Sjónvarpinu í gær "The road to Guantanamo" var óhugnanleg og hlýtur að hreyfa við öllum þeim sem horfðu. Þegar blásaklausir strákar sem staddir voru á röngum stað á röngum tíma fyrir algera tilviljun eru teknir og meðhöndlaðir eins og skepnur, pyntaðir og hafðir í einangrun mánuðum saman og "yfirheyrðir" á ómannúðlegan hátt, fengu aldrei að tala við lögfræðing eða koma fyrir dómstóla. Og þetta viðgengst enn, sex árum síðar! Eða eins og segir í þessari frétt mbl. "Enn eru um 340 fangar í búðunum grunaðir um að tengjast al-Qaida hryðjuverkasamtökunum eða talibönum. Fæstir þeirra hafa nokkurn tíma verið ákærðir."

15 Sádi-Arabar lausir úr haldi í Guantanamo-fangabúðunum

Loksins, loksins, Landsvirkjun

Halló! Það er greinilega eitthvað að gerast hjá Landsvirkjun. Einhver að átta sig þar á bæ. Eða er maður að fagna of snemma? Er þetta bara eitthvert aumt PR trikk? Netþjónabú er mun skynsamlegra en enn ein álbræðslan hvort sem hún er á aðal þenslusvæðinu á Reykjanesi eða á svæði framtíðarinnar á Húsavík. Netþjónabúið getur til dæmis verið staðsett á Húsavík, mengar sáralítið og skapar störf. Kísilhreinsun fyrir sólarrafala hljómar einnig mjög vel. Það á hinsvegar að mínu mati ekki að virkja meira í Þjórsá fyrir þetta. Ég leyfi mér að vona að það sér virkilega eitthvað að gerast hjá þessu fyrirtæki sem upp á síðkastið til hefur hagað sér skelfilega og átt titilinn Illvirkjun sannarlega skilinn. En vonandi ekki lengur.

Landsvirkjun vill selja raforku til netþjónabúa en ekki nýrra álvera

Stefnir í stórsigur SF, systurflokks Vinstri grænna í Danmörku

Fréttaflutningur hér á Íslandi af aðdraganda þingkosninga í Danmörku er dálítið furðulegur. Rétt áðan var ég að hlusta á hið ágæta morgunútvarp á rás 1 og þar var ljómandi pistill frá kosningunum í Danmörku þar til kom að því að fréttmaðurinn (sem ég náði ekki hvað heitir) kallaði Einingarlistann "Vinstri græna" en Socialistik folkeparti sem er opinber systurflokkur Vinstri grænna kallaði hann bara Sósíalista. Einingarlistinn er vissulega lengst til vinstri í dönsku flokkaflórunni og ágætis flokkur með ungu, hressu og róttæku fólki í forystu en rétt skal vera rétt og ef fréttamaðurinn vill allt í einu ekki lengur nefna flokka með sínum réttu nöfnum þá ætti hann allavega að kalla SF "Vinstri græn". SF hefur reyndar nálgast mjög stefnu VG til dæmis í umhverfismálum og er í raun sá flokkur sem getur talist græni flokkurinn í Danmörku. Það er reyndar ekkert nýtt að nöfnum skuli ruglað af íslenskum fréttamönnum því í einhverjum pistli var nýi flokkurinn hans Nasers Khaders Ny Alliance kallaður Einingarlistinn!

Í þessari frétt á mbl.is er fullyrt: "Í könnunum Jyllands-Posten undanfarið hafa stjórnarflokkarnir mælst með 86 þingmenn en andstaðan 79 þingmenn. Það nýi flokkurinn Ny Alliance og formaður hans Naser Khader sem er í oddastöðu og er það fyrst og fremst fylgi hans sem veldur því að danska stjórnin riðar til falls." Þetta er merkileg fréttaskýring sem ef til vill má teygja og toga þannig að hún passar einhvernvegin en ég myndi nú segja að flokkurinn sem er að tvöfalda fylgið sitt úr 6% í 12,5% sé sá flokkur sem leiðir til þess að stjórnin sé að falla en ekki flokkurinn hans Kahders sem mælist með aðeins 4,1% og er langt undir væntingum. Hér er hægt að sjá þessar kannanir og bera þær saman, flott grafík hjá Politiken. Socialistisk folkeparti færi úr því að vera sjötti stærsti flokkurinn á danska þinginu í það að verða þriðji stærsti flokkurinn (hljómar kunnuglega) og ef það er ekki afgerandi stórsigur þá veit ég ekki hvað er sigur.

Og burtséð frá þessum misskilningi íslenskra fréttmanna þá stefnir í stórsigur Socialistisk folkeparti (F) sem er jú systurflokkur Vinstri grænna og með góðum lokaspretti sjáum við vinstristjórn í Danmörku eftir kosningarnar á þriðjudag. Vinstri græn í Reykjavík eru að skipuleggja kosningavöku til að fagna félögum okkar í Danmörku og mér finnst að einhver sem er með danskar stöðvar í sjónvarpinu hjá sér hér á Akureyri eigi að skrifa hér í athugasemdalistann hjá mér og bjóðast til að halda fögnuð á þriðjudaginn milli 18 og 22 því þá verður þetta komið á hreint. Reyndar væri ég alveg til að skreppa til Köben á þriðjudag til að fagna og myndi örugglega gera það ef IcelandExpress væri byrjað að fljúga beint frá Akureyri til Köben. Koma svo!

Litlu munar á kosningafylkingum í Danmörku

Margrét Blöndal opnar í Listasafni Reykjavíkur

Það verður spennandi að sjá þessa stóru sýningu Margrétar Blöndal sem opnar í dag í Hafnarhúsinu. Ótrúlega falleg og viðkvæm verk sem gerð eru úr fundnum hlutum sem hún hefur safnað um allan heim. Allskonar skemmtilegum hlutum sem við fyrstu sýn eru einhver úrgangur menningarsamfélagsins, plastrusl og afgangar en Möggu tekst að gera þá svo persónulega og einstaka að það er frábært. Natni og virðing fyrir því sem aðrir líta á sem einskis virði er það sem einkennir verkin hennar. Teikningarnar eru einnig mjög spennandi og eitthvað flott við það að nota ólífuolíu til að teikna með. Flestir kannast við að svona fitublettir á pappír séu til trafala en hjá Möggu eru þeir fallegir. Ég hlakka til að sjá þrjár spennandi sýningar í Hafnarhúsinu, Hrein Friðfinnsson, Karlottu Blöndal og Margréti. Hér er tengill á Listasafn Reykjavíkur og hér á heimsíðu Margrétar Blöndal.

Þreifað á himnunni

Ímynd Íslands sem umhverfissóða

Ótrúlegur aulaskapur í Geir H. Haarde að ætla að fara fram á sérákvæði um meiri mengun, svo við getum mengað meira en aðrir. Segir þetta ekki allt um metnað forsætisráðherra í umhverfismálum? Framsókn og Frjálslyndir fagna í kór enda þeir síðarnefndu komnir út úr skápnum sem umhverfissóðar eftir að Margrét Sverrisdóttir sagði skilið við karlana þar á bæ. Og Framsókn er auðvitað bara við sama heygarðshornið. En hvað með Samfó? Heyrðist ekkert múkk úr því horni? Hvað með þeirra "Fagra Ísland"? Ég trúi því ekki að Þórunn umhverfisráðherra ætli að láta Geir rúlla yfir sig á skítugum skónum. Á bara að rýmka til fyrir fleiri álbræðslum og olíuhreinsistöð í leiðinni? Eins og fyrri daginn eru það þingmenn Vinstri grænna sem einir standa í lappirnar þegar kemur að náttúrunni og umhverfisvernd. Frábært að Lilja sé komin á þing fyrir Vinstri græn og Kolbrún klikkar ekki, þvílík gæfa að eiga svona glæsilega málsvara náttúrunnar á Alþingi. Forsætisráðherra er nýbúinn að skipa einhverja nefnd til að bæta ímynd Íslands. Fyrsta verkefni þeirrar nefndar hlýtur að vera að tala um fyrir forsætisráðherra en sennilega fyrir daufum eyrum. En ég kalla eftir viðbrögðum Samfylkingarinnar. Hvar eru þingmennirnir þeirra og hvar er Dofri framkvæmdastjóri og bloggari?

Geir: Eigum að reyna að fá samþykkt nýtt íslenskt ákvæði

Til hamingju með afmælið Trabbi

Skemmtileg frétt af 50 ára afmæli Trabants á mbl. Eiginlega hélt ég að hann væri enn eldri! Þetta er auðvitað orðinn nostalgíu bíll fyrir löngu. Hugi, elsti sonur okkar á einmitt svona lítinn Trabba og búinn að eiga í 15 ár. Lóa Aðalheiður lék sér mikið með bílinn og sennilega á Una Móeiður einnig eftir að gera það. Það er DDR merki á hurðunum á honum og búið að strika yfir D og R þannig að annað D-ið stendur eftir fyrir sameinað Þýskaland. Ég kom nokkrum sinnum til Zwickau til að taka þátt i myndlistarsýningu og þar var nú ástandið frekar dapurt og heilu hverfin hálf yfirgefin. En ef Herpa leikfangaframleiðandinn ætlar að fara að framleiða Trabant í fullri stærð ættu þau auðvitað að gera það í Zwickau og hafa bílinn aðeins umhverfisvænni, ekki kannski upptrekktan eins og þennan sem Hugi á heldur bara rafmagnsbíl eða hjólabíl!

Magga systir átti líka Trabant station sællar minningar. Trabant var auglýstur hér á landi með hinu frábæra slagorði: Skynsemin ræður! Svo er líka frábær íslensk hljómsveit sem tók upp nafnið góða og hér eru nokkrir skemmtilegir tenglar á Trabanta. 

Trabant á Wikipedia 

Saga Trabants

Hljómsveitin Trabant 

Trabantfréttir

Um trabantverksmiðjuna Sachsenring 

Nýr Herpa Trabbi 

Trabant á stórafmæli

Tilraun tvö með Kalla Tomm klukkan tuttuguogtvö

Mín fyrsta tilraun til að stjórna Kalla Tomm leiknum sívinsæla var ekki alveg að virka í gær. Það var að vísu ekki mér að kenna heldur tengingunni við moggabloggið. En það þýðir ekkert að gráta Björn bónda heldur safna liði, núna rétt á eftir eða á slaginu 22:00 (og vona að moggabloggið virki). Þetta verður þungt vona ég en líka skemmtilegt og kannski ekki alveg alltof augljóst! En ég er kominn í stellingar og krossa fingur og vona að mbl.is eða blog.is bregðist mér ekki. Það verður spurt um mann...

Forstjórar Orkuveitunnar segi af sér

Af hverju þola laun þessara manna ekki dagsljósið? Er ekki kominn tími til að þessir menn axli ábyrgð og segi af sér og það án þess að fá feitan starfslokasamning? Eru þeir ekki búnir að klúðra nóg? Ég bendi á ágætan pistil sem Haukur Nikulásson skrifar um þessi mál með yfirskriftinni "Opinber fyrirtæki eru einkavædd til að fela sjálftöku launa og spillingu". Hingað og ekki lengra. Það á allt að vera upp á borðinu og ef afnám launaleyndar hefur einhvertíma átt við þá er það nú. Og hananú.

Launin þola ekki dagsljós