Hvað varð um prentfrelsið?

 

Í nýlegri könnun einhverra frábærra alþjóðlegra samtaka varð niðurstaðan sú að frelsi fjölmiðla væri óvíða meira en einmitt hér á Ísalandi! Það er auðvitað alltaf skilgreiningaratriði hvernig þetta "frelsi" er svo metið. Oft hefur til dæmis verið bent á það að ákveðnir forsætisráðherrar hefðu suma fjölmiðla í vasanum. Sigurjón M. Egilsson flokkast ekki undir þá sem leggjast flatir fyrir valdinu og fyrir það á hann nú að gjalda. Og hvað er málið! Á að banna honum að starfa við fjölmiðla, jafnvel sem sjálfboðaliði næsti sjö mánuðina? Erum við stödd í Kazakstan? Eða kannski Hvíta-Rússlandi? Þetta er einum of ótrúlegt til að gera verið satt. Samt hlustaði ég á útvarpsfréttirnar áðan og þar var þessu hótað. Sigurjón hefur þorað að segja frá þegar aðrir þegja og t.d. bent á ofurvald ráðherranna aftur og aftur. Og nú upplýsir hann okkur um óþolandi tengsl auglýsenda og blaðamanna. Auglýsingadeildin liggur á blaðamönnum til að fá umfjöllun um eitthvert drasl.
Sigurjón sem hefur sett Blaðið rækilega á kortið sem almennilegt dagblað segir frá því að Kristinn nokkur Björnsson hafi ekki verið kátur þegar Sigurjón var ráðinn ritstjóri Blaðsins. Og það er gott að hafa KB á móti sér, það vita allir. Það er hætt við því að íslenskur fjölmiðlamarkaður verði enn einsleitari eftir að búið er að setja Sigurjón M. í bönd. Sjálfstæðisflokkurinn lætur ekki að sér hæða.

Líklegt að farið verði fram á lögbann á störf Sigurjóns á öðrum fjölmiðlum

Jólasveinarnir eru femínistar!

Jólasveinarnir sem Tinna Kristjánsdóttir hefur hannað eru þeir langflottustu. Þeir koma einn og einn í senn eins og aðrir sveinar og birtast á síðu Femínistafélagsins. Það frábæra við þessa jólasveina er að þeir eru afar jafnréttissinnaðir og hörku femínstar, semsagt flottir. Til hamingju Tinna og Femístafélagið að vera með húmorinn í lagi!

Hálka í öllum landshlutum

Nýjar hugmyndir

Það blómstrar allt af sköpunarkrafti og þrá eftir því að finna upp nýja hluti, nýjar leiðir til að fara og spennandi hugmyndir skjóta upp kollinum. Sumar óframkvæmanlegar en samt spennandi og aðra raunsæjar vel framkvæmanlegar strax í dag. Við getum hafist handa núna við að byggja upp þjóðfélag sem er víðsýnt og umburðarlynt og þar sem jafræði ríkir. Þar sem gamalt og nýtt mætist, fólk vinnur saman að því að gera betur, endurvinna, endurnýta og bæta. Þetta eru ekki einhverjir draumórar heldur raunveruleikinn, bara ef við viljum.

Annað
Hinn hliðin er svo að bíða eftir því að eitthvað gerist. Að aðrir komi með hugmyndir. Að álíta að ekkert sé nægilega gott og allt sé í raun ómögulegt. Ekkert sé nægilega stórt eða merkilegt til að geta “bjargað” okkur. Einhverjir aðrir verða að gera hlutina. Frumskógarlögmálið gildir, þeir hæfustu komast af og þeir sem geta ekki keppt eru útundan. Mismunun er sjálfsögð og bara eðlilegur hlutur.
Ef til vill er þetta mikil einföldun en einhvernvegin svona finnst mér íslenskt þjóðfélag stundum vera. Það er staðreynd að hér hefur mismunun aukist hröðum skrefum og þó að flestir hafi það ágætt og sumir mjög gott þá eru það allt of margir sem líða skort. Þannig á þetta ekki að þurfa að vera. Við erum lítil þjóð en rík og höfum vel efni á því að láta öllum líða vel. Við höfum vel efni á því að taka á móti fólki sem hefur það ekki eins gott og við og ættum að setja mun hærri upphæðir í þróunaraðstoð heldur en við gerum í dag. Við eigum að sýna frumkvæði, byggja á því sem við höfum fyrir en ekki bíða eftir því að aðrir komi “færandi hendi”.

Óþrjótandi möguleikar
Hér eru enn þá svo miklir möguleikar á því að gera hlutina vel og enn betur. Við eigum enn hreina náttúru og tært vatn, andrúmsloft sem er heilnæmt og orku sem endurnýjar sig. En á síðasta áratug höfum við gengið á þessi verðmæti. Við mengum meira, breytum náttúrunni og eyðileggjum hana.
Það væri óskandi að þeir sem stjórna landinu hugsuðu lengra en fjögur ár fram í tímann, fram að næstu kosningum og ekki lengra. Hvernig væri að líta hundrað ár fram í tímann? Þó að við verðum sennilega farin héðan, þá munu komandi kynslóðir njóta góðs af því. Ef við tökum okkur til og sköpuðum heim þar sem byggt er á hugviti með umhyggju fyrir verðmætum í huga en ekki græðgi. Værum við ekki sáttari við okkur sjálf og fortíðina? Og þetta er ekki eins flókið og það lítur út fyrir að vera. Auðvitað ekki auðveldasta leiðin en örugglega sú skynsamlegasta. Vilji er allt sem þarf, smá bjartsýni og jákvæðni og okkur mun takast það saman. Byrjum strax í dag og hættum ekki fyrr en markmiðinu er náð, að hafa látið eitthvað gott af okkur leiða og gert þennan heim aðeins betri, ekki bara fyrir okkur sjálf heldur einnig fyrir alla aðra. Okkur tekst það ekki á morgun en enhvertíma mun sá dagur koma að við getum litið um öxl og verið stolt af því að hafa gert hlutina saman og gert þá betri.

Greinin birtist í Norðurstjörnunni, málgagni Vinstri grænna í Norðausturkjördæmi 14.12.2006

Góði hirðirinn er flottasta búð í landinu

þetta er ein besta fréttin á mbl.is í langan tíma. Góði hirðirinn er til fyrirmyndar og langflottasta búðin í landinu. Jólagjafirnar verða keyptar þar og endurnýttar öllum til hagsældar. 

"Góði hirðirinn, nytjamarkaður Sorpu, hefur á þessu ári úthlutað tíu milljónum króna til líknarfélaga. Allur hagnaður af rekstrinum fer til styrktar þeim líknarfélögum sem Góði hirðirinn er í samstarfi við. Í fyrra var fimm milljónum úthlutað.
Anna Jakobsdóttir, verslunarstjóri Góða hirðisins, segir að á hverjum morgni séu tæmdir tveir til þrír stórir gámar af nytjahlutum sem safnast hafa í stöðvum Sorpu. Á mánudaginn voru gámarnir reyndar hvorki fleiri né færri en sex, og hafa aldrei verið fleiri á einum degi.
Líknarfélögin sem Góði hirðirinn er í samstarfi við eru Rauði krossinn, Hjálpræðisherinn, Hjálparstofnun kirkjunnar og Mæðrastyrksnefnd. Fleiri félög hafa fengið úthlutað frá Góða hirðinum: Umhyggja, sem eru regnhlífarsamtök til styrktar langveikum börnum, og mæðrastyrksnefndir á höfuðborgarsvæðinu."

Tíu milljónir til líknarfélaga á árinu

Kristinn Björnsson og félagar í fangelsi

Það var kominn tími til að gefin væri út ákæra á hendur þessum forstjórum. Davíð Oddsson var að vísu búinn að veita þeim syndaaflausn fyrir nokkrum árum. Hann sagði að það ætti ekki að refsa forstjórunum eða olíufélögunum því það myndi aðeins bitna á almenningi! Nú er Davíð kominn í Seðlabankann en skoðanabróðir hans Andrés Magnússon skrifar enn einn undarlega pistilinn á bloggið sitt og tekur upp að hluta til sömu sjónarmið og DO. Maður spyr sig hinsvegar hvenær eigi þá að refsa fyrirtækjum sem svindla ef ekki í þessum tilfellum? Rök Davíðs og Andrésar eru út í hött.

Ég er sammála því að það dugar ekki að sekta þessa olíufursta sem höfðu samráð um að svindla á fólki og fyrirtækjum. Þeir eiga nóg af peningum og munar ekkert um að borga nokkrar milljónir í sekt úr rassvasanum. Auðvitað á að senda þessa menn í fangelsi. Fjögur ár með reynslulausn eftir tvö ár væri hæfilegt. Og ekkert sumarfrí á Kvíjabryggju eins og Árni Johnsen fékk heldur bara Litlahraun. Þeir fá þá að kynnast aðbúnaði fanga og það verður vonandi til þess að vinur þeirra Björn Bjarnason dómsmálaráðherra, tekur við sér og bætir aðbúnað fanga.
En "enginn er sekur fyrr en sekt er sönnuð" er oft sagt en þessir þremenningar eru búnir að viðurkenna sviksamlegt samráð um okur svo lélegar afsakanir eða lögmannaher ættu ekki að duga hér.

 Sjá einnig frétt hjá Ríkisútvarpinu.

Þrír einstaklingar ákærðir vegna samráðs olíufélaganna

Írak er annað Víetnam

 

Það er nú loks að renna upp fyrir Bandaríkjamönnum að þeir geta ekki unnið stríðið í Írak. Bush lýsti yfir sigri nokkrum dögum eftir innrásina 2003 en þar með var stríðið rétt að byrja. Nýliðinn nóvembermánuður var sá blóðugasti frá því Bandaríkjamenn réðust inn í landið 2003! Að minnsta kosti 10 létust og 25 særðust þegar bílsprengja sprakk í úthverfi Bagdad í morgun og í gær dóu í það minnst 70 í tveimur sjálfsvígsárásum í borginni. Það er fyrir löngu hægt að sjá að það geysar blóðugt og viðbjóðslegt borgarastríð í Írak og það eru bara þverhausar sem neita að viðurkenna það.
En þetta á ekki að þurfa að koma á óvart. Stríð leysir aldrei neinn vanda og það er ekki hægt að þröngva "lýðræði" upp á þjóðir. Davíð Oddsson og Halldór Ásgrímsson studdir af Sjálfstæðisflokknum eins og hann lagði og Framsóknarflokknum einnig, bera ábyrgð á þessari slátrun í Írak. Þeir gripu til þess ráðs að segja að ástandið væri nú allavega betra núna þegar það var búið að koma harðstjóranum Saddam Hussein frá völdum. En það er einnig blekking og lygi. Alveg eins og fullyrðingarnar um gereyðingarvopn og sinnepsgas voru. Allt blekking. Þessir menn hljóta ævarandi skömm fyrir að setja land Íslands á lista yfir hina gráðugu og viljugu.
Bandaríkjamenn sökkva dýpra og dýpra í fenið í Írak alveg eins og þeir gerðu í Vietnam fyrir rúmum 30 árum. Meirihluti bandarísku þjóðarinnar er búinn að átta sig á því að það er ekki hægt að vinna þetta viðbjóðslega stríð. Það er bara hægt að tapa enn meira. Og nú frestar Bush ákvörðunum því hann veit ekkert hvað hann á að gera! Þetta er ömurlegt.

10 féllu og 25 særðust í sprengingu í Bagdad

Flottar myndir af Condolezzu og Bússa

Reuters hefur safnað saman þeim ljósmyndum sem fréttastofunni þykja bestar það sem af er árinu 2006. Þarna eru margar flottar myndir og mér finnst þessi mynd af Condolezzu "með afró hárgreiðslu" snilld og svo kemur annað gáfumenni sterkt inn, nefninlega Bush sjálfur með góðan svip, hendandi frá sér barni sem ekki er sátt við kallinn. Það er hægt að skoða fleiri Reutersmyndir hér.

Reuters velur fréttamyndir ársins

Svar við pistli Andrésar Magnússonar

Andrés Magnússon blaðamaður á Blaðinu skrifar pistil um fátæktina á bloggið sitt og ég ákvað að gera smá athugasemd við pistilinn hans sem varð svo aðeins lengri en ég ætlaði. Ég birti svarið því einnig hér á mínu bloggi. Pistil Andrésar er hægt að lesa hér. Og svo kemur athugasemdin mín:

Sæll Andrés,
mér finnst þessi pistill þinn ekki sérlega góður. Byrjar á frekar slöppum og ósmekklegum brandara um "útrýmingu fátækra barna" og svo kemur rullan "það verða alltaf einhverjir fátækir, það er innbyggt í kerfið". Dálítið hártog um aðferðir og skilgreiningar. Aðalatriðið finnst mér hinsvegar vera að fátækt er að aukast þrátt fyrir alla velmegunina. Það á ekki að gera lítið úr því að fólk er fátækt (og þá er ég ekki að meina miðað við einhverja aðra) og það er hlutur sem við ættum að ganga í breyta. Auðvitað er ekki hægt að "útrýma" fátækt miðað við allar skilgreiningar en þegar misskipting eykst hröðum skrefum meðal annars vegna skattaafsláttar til hátekjumanna og fjármagnseigenda á meðan álögur á sjúka og aldraða aukast (komugjöld hækka og verðbólgan étur upp lífeyri, verðlagið er á hraðri uppleið) þá er eitthvað að. Og það sem er að er stefna þessarar ríkisstjórnar. Mín börn eru ekki fátæk en samt eru tekjur fjölskyldunnar ekki háar. Ég skammast mín ekki fyrir það að ganga í fötum sem eru notuð og af öðrum. Það er frekar spurning um viðhorf. En það er staðreynd að sumir í þessu velferðarsamfélagi okkar hafa það mjög skítt og eru í raun fátækir. Ég vil biðja þig að gera ekki lítið úr því. Og að lokum þetta: tal þitt, Andrés, um kommúnisma að kambódískri fyrirmynd er frekar þreytt.
Bestu kveðjur,

Hlynur 

Borgarastríð og kjarnorkuvopn

Nú er það endanlega ljóst að Ísrael hefur yfir kjarnorkuvopnum að ráða. Menn hafa að vísu verið handteknir þar í landi fyrir að halda þessu fram en nú missti forsætisráðherrann Ehud Olmert þetta út úr sér í samtali við þýsku sjónvarpsstöðina N24. Samkvæmt kenningum bandaríkjamanna um "ógnarjafnvægi" væri því eðlilegt að fleiri lönd á svæðinu hefðu yfir þessum "frábæru" gereyðingarvopnum að ráða! En með borgarastyrjöld í Írak og ekki beint áreiðanlegt lið í Íran er ekki víst að ógnarjafnvægiskenningin sé svo frábær!

Olmert sagði Ísrael í hópi kjarnorkuþjóða

Flaggað í hálfa stöng?

Sem betur fer verður ekki lýst yfir þjóðarsorg í Chile og Pinochet (hér eftir kallaður "Pino") fær enga viðhafnarútför. Það er nógu slæmt að það sé flaggað í hálfa stöng hjá chilenska hernum við dauða þessa pyntara og morðingja. Í síðustu færslu sagði ég frá bloggfærslu félaga míns Stefáns Friðriks en hann tengir ógnarstjórn Pinos við þekktar kvikmyndir sem gerðar hafa verið um ógnarstjórn Pinos og um fórnarlömb hans eins og "Missing". Það er því við hæfi að ég tengi dauða hans við tónlistarmaninn Sting sem samdi og söng hið frábæra lag "They dance alone" og ánafnaði lagið baráttu mannréttindasamtanna Amnesty International og heiðri mæðra þeirra 3000 manna og kvenna sem Pino lét myrða og pynta og "hurfu" svo á tímum herforingjastjórnarinnar. Mæðurnar hittust reglulega með myndir af sonum sínum og dætrum og kröfðust þess að réttlætinu yrði fullnægt. Það gerðist aldrei, en nú geta þessar konur þó dansað af gleði yfir því að þessi glæpamaður er kominn undir torfu. Núverandi forseti Chile Michelle Bachelet, fyrsta konan sem er kosin forseti í landinu, var meðal þeirra sem var pyntuð í fangelsi á valdatíma Pinos og faðir hennar Alberto Bachelet Martinez flugliðsforingi var meðal þeirra sem Pino lét pynta og myrða. Það er óskyljanlegt að einhverjir séu til sem syrgi illmennið Pinochet.

Sjá einnig nánar á ruv.is 

Átök í Santiago í kjölfar andláts Pinochet

Dautt Illmenni

Ég get vel skilið að fólk dansi á götum úti í Santiago, höfuðborgar Chile til að fagna dauða manns sem sá til þess að meira en 3000 manns voru pyntuð og drepin í hans eigin landi. Hann var harðstjóri sem komst til valda með stuðningi bandaríkjastjórnar og CIA og kvaldi þjóð sína alltof lengi eða frá 1973-1990. Hann þurfti aldrei að svara fyrir glæpi sína og lifði í ríkidæmi sem hann hafði stolið af þjóðinni. Hann lét drepa réttkjörinn forseta landsins sósíalistann Salvador Allende. Það var tákrænt að Augusto Pinochet dó á alþjóðlegum degi mannréttinda og stuttu áður dó vinur hans Milton Friedmann. "Guð elskar þá sem deyja ungir" á væntanlega við um þá báða.
Hér er tilvitnun í fréttina á mbl.is "Fólk þeytti bílflautur og safnaðist saman á Plaza Italia í miðborg Santiago eftir að fréttir bárust af láti Pinochets. Sumir veifuðu fánum Chile og dönsuðu af gleði. Sögðu margir, að þeir litu þannig á, að landið væri frelsað undan því oki, sem arfleifð Pinochets væri.
Pinochet var einræðisherra í landinu á árunum 1973 til 1990 og á þeim tíma voru þúsundir manna pyntaðar og myrtar. Mannréttindasamtökin Amnesty International sögðu í kvöld, að Chile mætti ekki hætta rannsókn á myrkasta kafla sögu landsins, þar sem mannréttindi hefðu verið fótum troðin, þótt Pinochet væri allur." Ég tek heilshugar undir þessi orð frá Amnesty.
Teikninguna af Pino fékk ég lánaða af síðu bloggvinar míns Stefáns Friðriks.

Íbúar í Santiago dansa á götum úti

Samfylkingin með 8% en Vinstri græn 30%

Nú hafa 143 svarað þessar frábæru skoðanakönnun á síðunni minni. Það er auðvitað ekki stórt hlutfall þjóðarinnar og sennilega ekki alveg marktækt úrtak. En spurningin er einföld: Hvaða flokk ætlar þú að kjósa í vor? Og staðan núna er þannig:
Framsókn 13%
Sjálfstæðisflokkur 40%
Frjálslyndir 2%
Samfylkingin 8%
Vinstri græn 30%
Annað 0%
Skila auðu 2%
Vita ekki enn 5%

Furðulega margir kjósendur Sjálfstæðisflokksins virðast semsagt skoða bloggið mitt og svara en einkennilega fáir kjósendur Samfylkingarinnar. Það kemur svo sennilega ekki á óvart að Vinstri græn eru með heil 30% í þessari vísindalegu könnun. Hún fær að vera nokkrar daga í viðbót og af því að allir hafa svo gaman að svona könnunum þá bæti ég einni við og hvet alla til að taka þátt í henni. Spurningin er: Á að stækka og byggja fleiri álver á Íslandi? Svarmöguleikarnir eru svo hérna uppi í horninu. Hún fær að vera í mánuð eða fram í janúar 2007.

Þingfundum á Alþingi frestað til 15. janúar

Hvað sögðu þingmenn stjórnarflokkanna?

Þuríður Backman á heiður skilinn fyrir að taka málefni Palestínu upp við upphaf þingfundar í dag. Í þessari stuttu frétt á mbl.is segir: "Hvatt var til þess á Alþingi í morgun, að íslensk stjórnvöld leggi Palestínumönnum lið. Þuríður Backman, þingmaður VG, hóf máls á þessu í upphafi þingfundar og vísaði til þess, að hjálparstofnanir Sameinuðu þjóðanna hefðu sent út neyðarkall og beðið þjóðir heims um jafnvirði 30 milljarða króna vegna matarskorts og fátæktar á heimastjórnarsvæðunum.
Fleiri þingmenn stjórnarandstöðunnar tóku undir orð Þuríðar og sögðu að það væri viðeigandi á síðasta fundi Alþingis fyrir jól að stjórnvöld veittu málstað Palestínumanna stuðning."
Fyrst hélt ég að þingmenn stjórnarflokkanna hefðu alls ekki tekið til máls í þessari umræðu. Ég skoðaði umræðurnar á althingi.is en þar eru ræðurnar ekki enn komnar inn en þó sést að tveir þingmenn framsóknar og einn sjálfstæðismaður hafa tekið til máls. En af frétt mbl.is að dæma tóku þau ekki undir málflutning Þuríðar um stuðning við íbúa í Palestínu heldur voru þau að tala um Sundabraut! Ríkisstjórnin ætti að taka sig til og hlýða kalli hjálparstofnanna Sameinuðu þjóðanna og senda 50 milljónir til íbúa Palestínu nú strax fyrir jólin.

Hvatt til stuðnings við Palestínu

Snilldarlegt Hrútaspil

Þetta hrútaspil er algjör snilld. Ég mæli með þessu spili og það er jólagjöfin í ár (ásamt ævisögu Hannesar Hólmsteins Gissurarsonar eftir Óttar Martin Norðfjörð)  Hérna er smá lýsing af heimasíðunni: "Hrútaspilið byggist á því að keppa um eiginleika íslenska hrútsins. Á hverju spili er mynd af hrút, nafn hans og ýmsar upplýsingar sem varða útlit, líkamsburði og aðra eiginleika hans.  Hverjum þykir sinn fugl fagur og það á líka við um hrúta, en þeir geta verið hyrndir, kollóttir, stuttfættir, langir, gulir, kubbslaga, með útstæð horn og svona mætti lengi telja." Ódýrt og gott spil og þeir Stefán Pétur og Sverrir eiga heiður skilinn fyrir að koma þessu ljómandi spili á markað. Til hamingju með það!

Spil um hrúta á leið í verslanir

Kristján Þór á þreföldum launum

Er þetta ekki eitthvað einkennilegt? Var það semsagt Samfylkingin sem sagði bæjarstjóranum upp? En nú er Kristján Þór ekkert að hætta, hann verður forseti bæjarstjórnar. Verður hann þá á tvöföldum launum? Og svo verður hann væntanlega þingmaður eftir þann 12. maí í vor og þá einnig á þingmannslaunum. Verður hann þá á þreföldum launum í maí og júni. Er þetta ekki einum of... eða jafnvel tveimur of.... eða bara þremur of? Talandi um löglegt en siðlaust.

Kristján Þór þiggur biðlaun