Frábær fjárlög

Þessi kosningafjárlög stjórnarflokkanna sem betur fer verða að öllum líkindum þau síðustu eru alveg dásamleg. Mikill velferðarpakki þar á ferð í pakkaflóðinu fyrir jólin. Ég er nú þegar næstum búinn að fyrirgefa dé- og bélista allt.
Það er til dæmis alltaf gott að hækka barnabæturnar sem búið var að skerða fyrir mörgum árum. Framsókn og íhaldi verður þakkað sérstaklega fyrir að skera fyrst niður og taka af fólki en skila svo hluta af því rétt fyrir kosningar og þykjast vera góðu gæjarnir.
Það á líka að bæta kjör aldraðra þó að tillögur stjórnarandstöðunnar um aukinn stuðning þeim til handa hafi verið felldar! Skattalækkanir sem koma þeim best sem hafa það ágætt eru einnig frábærar. Og þó að láglaunafólk kvarti þá tekur því ekki að hlusta á svoleiðis nöldur. Gaman að því að forskeytið "stór-" í sambandinu "stórhækkað og  stóraukið" virðist vera á topp tíu yfir uppáhalds forskeyti hjá stórmenninu Birki Jóni. Og lækka skuldir..., bíðum nú við, var ekki verið að taka stærsta lán íslandsögunnar um daginn.
Gott að stjórnin fái samt að kveðja með svona góðverkum.

Fjárlög samþykkt með rúmlega 9 milljarða afgangi

Bilaður bor undir Þrælahálsi

Dálítið sorglegt að allir boðsgestirnir sem ætluðu að skála á kampavíni undir Þrælahálsi þurftu frá að hverfa eftir þriggja tíma bið. Borinn bilaði. Það rigndi víst ótæpilega ofan í hálsmálið á gestunum í míglekum göngunum. Líka dálítið sorglegt. En nú er þessi risbor búnn að hjakka sig í gegnum síðasta meterinn en þá voru gestirnir farnir heim. Pínu sorglegt. Þrælalháls hefur hlotið alveg nýja merkingu og það er eins og menn hafi verið forspáir þegar nafn var fundið á staðinn. Einhvernveginn sorglegt líka. Eins og öll þessi Kárahnjúkavirkjun. Bara sorgleg.

Borað í gegn um aðrennslisgöng Kárahnjúkavirkjunar

Berlingske sýknað - Dönsk stjórnvöld fá á baukinn

Það eru góðar fréttir frá danaveldi að aðalritstjóri og tveir blaðamenn blaðsins Berlingske Tidende voru sýknaðir af ákæru vegna skrifa blaðsins um skýrslur öryggisþjónustu danska hersins. Skýrslunum var lekið til blaðsins og fréttir upp úr þeim þóttu grafa undan stefnu danskra stjórnvalda um þátttöku í Íraksstríðinu.
Í fréttinni á mbl.is segir:  "Í skýrslunni, sem skrifuð var áður en innrásin í Írak hófst 2003, komst Grevil (leyniþjónustumaður) að þeirri niðurstöðu að engin gereyðingarvopn væru í Írak.  Grevil var dæmdur í fjögurra mánaða fangelsi í fyrra fyrir að hafa lekið upplýsingunum til blaðamannanna.
Í niðurstöðu dómsins í dag segir, að hagsmunir almennings, að fá upplýsingar um málið hafi vegið þyngra en hagsmunir stjórnvalda."
Það er því ljóst að dönsk stjórnvöld lugu að fólki og þau vissu vel að það voru engin gjöreyðingavopn í Írak. Það sama má segja um íslensk stjórnvöld. Upplýsingarnar lágu fyrir löngu fyrir innrásina. Dönsk stjórnvöld reyndu svo að fá blaðamenn dæmda fyrir að segja sannleikann. En nú hafa þau sem betur fer fengið á baukinn.

Nánar um þessa frétt "Sigur fyrir lýðræðið" á vefsíðu Berlingske Tidende.

Berlingske Tidende sýknað af ákæru vegna Íraksfrétta

Paul F. Nikolov talar íslensku

Það hefur verið mikil umræða um það í bloggheimum að einn af hinum glæsilegu sigurvegurum í forvali Vinstri grænna á höfuðborgarsvæðnu, Paul F. Nikolov, tali ekki íslensku. Og að það sé voða bömmer að hafa þingmann sem tali ekki íslensku. Þessi orðrómur er ef til vill kominn frá Össuri Skarphéðinssyni þar sem hann er eitthvað að leggja úf af forvalinu á heimasíðunni sinni. Þetta er hinsvegar á misskilningi byggt því Paul talar ágæta íslensku. Hann velur hinsvegar gjarnan að tala ensku enda er hann þar á heimavelli. Ég fagnaði einmitt framboði Pauls á blogginu mínu í október. Guðmundur Magnússon byggir hinsvegar á þessum misskilningi pistli á blogginu sínu og er búinn að gera vísindalega leit að því hvort að einhverjar reglur eða lög segja til um hvort maður verði endilega að tala Íslensku á Alþingi og hann hefur fundið út að svo er ekki. Ég hvet alla til að skoða síðuna hans Pauls því það eru ljómandi pistlar, skrifaðir hvorutveggja á íslensku og ensku og það er til fyrirmyndar.

„Öflugur hópur að koma fram á sjónarsviðið“

Spennandi forval - Ungt fólk áberandi

Það er frábært hversu vel hefur gengið með forval Vinstri grænna á höfuðborgarsvæðinu. Ég bloggaði einmitt um hversu margt frambærilegt fólk ákvað að gefa kost á sér og nú eru fyrstu tölur komnar og þetta lítur vel út. Ármann Jakobsson skrifar ljómandi pistil í Fréttablaðið í dag um "það sem átti ekki að vera hægt" og það er hægt að lesa hann á vísi. Ármann segir meðal annars: "Litprentuðu bæklingarnir hafa fengið frí. Vissulega hefur fólk reynt að vekja athygli á sér og sínum málum, en ekki með fjáraustri eins og tíðkaðist meðal annarra flokka. Samt var engum beinlínis bannað að auglýsa; frambjóðendur gerðu einfaldlega með sér heiðursmannasamkomulag um að gera það ekki." Ég mæli með því að fólk lesi þenna pistil.
Það er ljóst að nýtt og ungt fólk verður ofarlega á listunum þremur og það er afar jákvætt. Guðfríður Lilja Grétarsdóttir er til dæmis að fá glæsilega kosningu í annað sætið sem er öruggt þingsæti samkvæmt nýustu Gallupkönnuninni. Þetta er frábært.

Ögmundur með flest atkvæði í fyrsta sæti hjá VG

Ríkisstjórnin kolfallin - Margréti sagt upp

Það athyglisverðasta við nýja könnun Gallup á fylgi flokkanna er hrun Sjálfstæðisflokksins og fylgisaukning Frjálslyndra. En niðurstaðan er sú að þessi ríkisstjórn er kolfallin. Það er spurning hvort það sé Árna Johnsen að þakka að fylgi Sjálfstæðisflokksins hrynur eða hvort þjóðernissinnar innan flokksins halla sér til Frjálslyndra. Annars bendir allt til þess að ólgan innan raða Frjálslyndra eigi eftir að halda áfram samkvæmt nýustu fréttum af uppsögn Margrétar Sverrisdóttur. Ríkisútvarpið er með betri fréttir af þessari könnun. Það er ánægjulegt að fylgi Vinstri grænna virðist vera nokkuð stöðugt um 20%.

Margréti Sverrisdóttur sagt upp hjá Frjálslyndum

Mannúðaraðstoð Geirs og félaga

Ögmundur Jónasson hóf umræðu á alþingi um ummæli iðnaðarráðherra og formanns Framsóknarflokksins um að aðild Íslands að innrásinni í Írak hafi verið mistök. Það kemur þá í ljós að Geir H. Haarde er enn við sama heygarðshornið og réttlætir aðild Íslands að lista "hinna staðföstu". Geir reynir að vísu nú að gera hlut Íslands  sem minnstann í málinu og segir að um "mannúðaraðstoð" hafi verið að ræða. Steingrímur J. Sigfússon benti á að formaður Framsóknarflokksins hefði nú gert tvær tilraunir til að þvo af flokknum óþægileg mál. Fyrsta tilraunin hefði verið að reyna að þvo af flokknum stóriðjustefnuna og nú væri gamla Framsókn komin með skottið niður og byrjuð að mjaka sér í stjórnarandstöðu þrátt fyrir 12 ára ríkisstjórnarsetu.
Ögmundur sagði, að með orðum sínum hefði Jón Sigurðsson tekið undir þann málflutning stjórnarandstöðunnar, að ákvörðun formanna stjórnarflokkanna að styðja hernaðaraðgerðir í Írak árið 2003 hefði verið ólögmæt og spurði hvort Jón og Framsóknarflokkurinn myndu styðja tillögu um að stofna rannsóknarnefnd um málið. Það bólar hinsvegar ekkert á vilja til að gera það hjá formanni Framsóknar. Það bendir semsagt allt til þess að ræða Jóns hafi einmitt verið yfirklór í aðdraganda óþægilegra kosninga fyrir Framsóknarflokk og Sjálfstæðisflokk.

Rætt um ræðu Jóns í upphafi þingfundar

Ferðamannaparadísin

Þessa grein skrifaði ég fyrir umræðuvettvanginn pollurinn.net og þar er hægt að koma með viðbrögð og gera athugasemdir við greinar.

Ferðamannaparadísin Akureyri, Eyjafjörður, Norðurland

Í síðustu viku var tilkynnt að IcelandExpress hefði ákveðið að hefja beint flug milli Egilsstaða og Kaupmannahafnar næsta sumar. Þetta er afar ánægjuleg þróun og verður örugglega til þess að fleiri ferðamenn koma á Austur- og Norðurland beint, auk þess sem við íbúar á svæðinu eigum auðveldara og með að komast til Evrópu fyrir minni pening. Það væri hinsvegar óskandi að IcelandExpress hefði úthald til að halda áfram beinu flugi einnig yfir vetrartímann til Kaupmannahafnar frá Akureyri. Það tekur tíma að vinna slíku flugi sess þó að Akureyringar og Norðlendingar hafi tekið fljótt og vel við sér, þá þarf lengri tíma til að kynna flugið erlendis.

En vonandi hefur IcelandExpress þolinmæði og það áræði sem þarf til að fylgja þessu flugi eftir. Samgönguyfirvöld með ráðherra Sjálfstæðisflokksins, Sturlu Böðvarsson í farabroddi hafa hinsvegar dregið lappirnar í því að efla flugstöðvarnar á Egilsstöðum og Akureyri til að þessir vellir geti talist fullgildir millilandaflugvellir. Sturla hefur sagt að "300.000 manna þjóð hafi bara efni á einum millilandaflugvelli"  sem eru ótrúleg ummæli frá sjálfum samgönguráðherra landsins. Þessu viðhorfi yfirvalda þarf að breyta og vonandi skapast þverpólitískur vilji til að laga það sem laga þarf svo að getum boðið uppá þrjá fullgilda millilandaflugvelli. Ef ekki strax þá í kosningunum í vor. Akureyri, Eyjafjörður og Norðurland hefur nefninlega uppá svo margt að bjóða á sviði ferðamennsku og það allan ársins hring. Það eru til dæmis ekki margir staðir í Evrópu sem bjóða uppá flugvöll í 20 mínútna akstursfjarlægð frá stórkostlegu skíðasvæði.

Ásókn ferðamanna í óhefðbundnar ferðir utan álagstíma á eftir að aukast svo og þeirra sem koma til að leita að norðurljósum, kyrrð og myrkri sem er eitthvað sem margir vilja upplifa. Uppbygging ferðaþjónustu á Húsavík með hvalaskoðun og Hvalasafn í öndvegi hefur verið stórkostleg. Jarðböðin við Mývatn eru einstök á sínu sviði. Eyjafjörðurinn, Grímsey og Hrísey eru einnig perlur og það eru margir sem vilja koma og dvelja í alvöru sjávarþorpi eða á sveitabæ í faðmi fjalla. Veitingastaðir á heimsmælikvarða sem bjóða uppá úrvalsrétti úr hráefni úr heimabyggð eins og Friðrik V, Halastjarnan og Karólína eru staðir sem við getum státað af. Við höfum uppá svo margt að bjóða og sumt á enn eftir að uppgötva. Við eigum því framtíðina fyrir okkur á þessu sviði og möguleikarnir eru óþrjótandi. Það þarf bara smá velvilja, áræði og þolinmæði og þá getum við gert kratftaverk.

Kjördæmisþing 10. desember

Þá liggja úrslitin í hinu leiðbeinandi forvali okkar hér í Norðausturkjördæmi fyrir. Það voru margir sem gáfu kost á sér eða 17 en hver og einn félagsmaður átti að skrifa 6 nöfn á lista en ekki númera í sæti. Endanleg ákvörðun um listann verður tekin á kjördæmisþingi sem fram fer þann 10. desember og þá leggur uppstillingarnefnd fram tillögu að lista. Ég vona að þriðja sætið verði baráttusætið hjá okkur. Það styttist svo í forval Vinstri grænna á höfuðborgarsvæðinu og upplýsingar um þau 30 sem eru í framboði eru hér.

Steingrímur J. efstur í leiðbeinandi forvali VG í NA-kjördæmi

Samtök hernaðarandstæðinga

Það er ánægjulegt að búið sé að breyta nafni Samtaka herstöðvaandstæðinga í Samtök hernaðarandstæðinga. Ekki mikil breyting en afar táknræn útvíkkun á starfseminni. Þetta er einnig afar eðlilegt skref og tímabært, nú þegar eitt af baráttumálum friðarsinna er komið í höfn og herinn farinn af landinu. Samtökin halda úti öflugum vef um friðarmál og þar má meðal annars lesa ályktun samtakanna frá því um helgina. Það er kraftur í  Samtökum hernaðarandstæðinga, nýútkomið glæsilegt tímarit, Dagfari og Friðarhúsið blómstrar. Til hamingju íslenskir friðarsinnar!

Samtök herstöðvaandstæðinga heita nú Samtök hernaðarandstæðinga

Sorglegur Framsóknarflokkur

Maður getur ekki annað en fyllst meðaumkun þegar maður horfir uppá hvernig komið er fyrir Framsóknarflokknum. Alger örvænting breiðir úr sér þar á bæ og í stað þess að líta í eigin barm þá eru bara allir aðrir svo vondir. Það að uppgötva að stríð sem þeir vörðu með kjafti og klóm, var röng ákvörðun 44 mánuðum seinna er dapurlegt. Og talandi um öfgar þá hittir þessi "nýji" fornmaður flokksins naglann á höfuðið. Jón Sig. ekki meir, ekki meir!

Ákvarðanir stjórnvalda um Írak byggðust á röngum upplýsingum og voru því rangar eða mistök

Skelfilegt ástand í Írak

Það er óhugnanlegt að horfa uppá daglegar limlestingar í Írak. Það ætti öllum að vera ljóst að borgarastyrjöldin í landinu fer stigvaxandi. Það vissu allir sem vildu eitthvað vita að svona myndi þetta fara. Það var því ömurlegt að lesa svör frambjóðenda Sjálfstæðisflokksins i Reykjavík þar sem þau studdu öll ólöglega ákvörðun Davíðs Oddssonar og Halldórs Ásgrímssonar um að setja okkur á lista innrásarþjóðanna með Bandaríkjamönnum og Bretum. Við skulum muna eftir því þegar við kjósum okkur fulltrúa á þing í vor.

Fórnarlömb sprengjuárásanna í Bagdad borin til grafar; tala látinna komin yfir 200

Ólík staða ríkisstjórna

Á meðan ný ríkisstjórn hægriflokkanna hefur tapað trausti meirihluta almennings í Svíþjóð, eins og ég fjallaði um á blogginu um daginn, er ástandið allt annað í nágrannalandinu Noregi. Þar tók við vinstristjórn fyrir nokkru og norðmönnum líkar vel við áherslur vinstristjórnarinnar. Systurflokkur Vinstri grænna í Noregi SV skipar mörg mikilvæg ráðuneyti og hefur komið góðum málum til leiðar og Kristin Halvorsen þykir hafa staðið sig með sóma.
Framfaraflokkurinn sem er öfgahægriflokkur, fjandsamlegur útlendingum, er enn furðulega stór en bót í máli að hann tapar fylgi þrátt fyrir að vera í stjórnaandstöðu og er ekki lengur stærsti flokkurinn. Þetta eru góðar fréttir frá Noregi og hægt að sjá meira á nrk.no

Verkamannaflokkurinn aftur orðinn stærstur í Noregi

Stórsigur Sósíalista

Kosningarnar í Hollandi fóru fram í gær og það er merkilegt að sagt er í fréttum að Kristilegir demókratar hafi unniið sigur þegar þeir töpuðu 3 þingsætum! Þetta er sennilega einn af hinum frægu "varnarsigrum" sem Framsókn er þekkt fyrir. Hinir raunverulegu sigurvegarar kosninganna eru hinsvegar Sósialistar sem nær þrefalda fylgið (úr 9 í 26) og eru nú þriðji stærsti flokkurinn á Hollenska þinginu. Sósíalistar eru eini flokkurinn sem stendur heill með fjölmenningarstefnunni og kjósendur umbuna þeim fyrir sem er afar jákvætt miðað við alla umræðuna um innflytjendur síðustu ár þar í landi. Frjálslyndiflokkurinn VDD biður afhroð og ríkistjórnarflokkarnir fá aðeins um 60 þingsæti af 150 og eru langt frá því að ná meirihluta. Það er því della að Balkenende sé einhver sigurvegari þó að flokkur hans hangi í því að vera stærstur. Og vonandi verður mynduð vinstrigræn stjórn í Hollandi.
Sjá nánar í Süddeutsche Zeitung.

Balkenende lýsir yfir sigri í hollensku kosningunum

Það munar ekkert umþa!

Meirihluta fjárlaganefndar er aldeilis rausnarlegur: 9,6 milljarða króna hækkun frá fjárlögum! Þetta eru sennilega allt hin brýnustu mál og þrátt fyrir þenslu á höfuðborgarsvæðinu þá þarf vonandi ekki að skera áfram niður útgjöld á landsbyggðinni. Það eru jú kosningar framundan og þá eru menn venjulega örlátir (og skera svo bara niður þess á milli) Hér eru annars tillögur meirihlutans á einu bretti og mér sýnist þetta í fljótu bragði vera upp til hópa hin mætustu mál.  Það vantar að vísu í fréttina hverjar tillögur minnihlutans eru en þær eru að öllum líkindum ennþá betri.

Tillögur um að hækka útgjöld fjárlaga næsta árs um nærri 9,6 milljarða