Valgerður með 79% og Höskuldur reykvíkingur með 34%

Valgerður Sverris sem var ein í framboði í fyrsta sætið hjá Framsókn en hafði samt fyrir því að opna kosningaskrifstofu á besta stað á Akureyri með stanslausa dagskrá en fámenni, vinnur nú ekki stórsigur með 79% fylgi. Slatti kaus ekki og enn fleiri hafa skilað auðu eða kosið einhvern sem var ekki í framboði eða bara gert ógilt! Gaman væri auðvitað að fá hlutföllin á þessu og allar tölur uppá borðið en á því er nú varla von frá Framsóknarflokknum:)
Þá stendur Birkir Jón sig betur. Það var allavega einhver sem bauð sig fram á móti honum! Höskuldur var svo í hörku baráttu um þriðja sætið sem verður vara-varasæti Framsóknar samkvæmt nýjustu spá Gallup. Hann fær heldur ekki nema 34% og 39% greiddra atkvæða. Menn vilja gjarnan vita hversu afgerandi þessi sigur er úr því að ekki er kosið aftur milli tveggja hæstu manna. Hvað fékk Hlörleifur Hallgríms t.d. mörg atkvæði? Höskuldur Þór er hörkuduglegur og halar örugglega inn nokkur atkvæði sem koma ef til vill til með að nýtast Birki Jóni til að slefast inn sem uppbótarmaður en því miður varla Höskuldi sjálfum. Höskuldur er annars fyrrverandi akureyringur og möðruvellingur og núverandi reykvíkingur í 104 Reykjavík, samkvæmt símaskrá og þjóðskrá. Nokkur ár síðan hann flutti suður og ekkert á leiðinn norður skilst mér. óþarfi af Mogganum og Framsókn að hamast á því að hann sé "akureyringur".
Austfirðingar ríða ekki feitum hesti hjá Framsókn í þessu stóra kjördæmi því Huld (ekki Hulda eins og mbl skrifar) frá Kópaskeri er í fjórða sætinu með aðeins fleiri atkvæði en Hössi en samt langt frá því að ná helmingi atkvæða. Til hamingju með það fyrrverandi bekkjarfélagi úr MA.

Valgerður í fyrsta sæti á lista framsóknar í NA-kjördæmi

Er ekki hægt að spila körfu uppá þetta?

Ég sé að "Aukakjördæmisþing Framsóknarflokksins í Norðausturkjördæmi" er haldið í íþróttasal í Mývatnssveit. Er ekki bara hægt að spila körfu uppá sætin: "one on one" til dæmis. Ekki víst að Valgerður sé til í það því þá hjólaði Hjörleifur Hallgríms bara í hana í fyrsta sætið og splæsti í endurbætur á húsi dómarans. Það væri nú mun framsóknarlegra. Alltaf í bullandi sókn!

Raðað á lista Framsóknarflokksins í NA-kjördæmi í dag

Skipulagsmál í ólestri á Akureyri

Sundfélagið Óðinn er eitt öflugasta íþróttafélagið á Akureyri og var nýlega valið fyrirmyndarfélag ÍSÍ. Félagið barðist af krafti gegn því að skipulagi við Akureyrarsundlaug væri skyndilega breytt þannig að leyft yrði að stækka enn eina líkamsræktarstöðina í bænum. Og það á kostnað sundlaugargarðsins sem er afar vinsæll meðal barna og foreldra sem og ferðafólks. Um 1400 bæjarbúar skrifuðu undir mótmælin og eru þetta einhver fjölmennustu mótmæli sem borist hafa bæjarstjórninni. En hvað gerir meirihluti Sjáflstæðisflokks og Samfylkyngar:  Hunsar réttmætar ábendingar og kröfur íbúanna!
Fyrrverandi bæjastjóri, Kristján Þór Júlísson var líka búinn að semja við líkamsræktareigandann Sigurð Gestsson nokkrum dögum fyrir kosningar í vor. Hann sagði bara engum frá því. Fréttir herma að Samfylkingin hafi átt erfitt með að kyngja þessu máli og einn bæjarfulltrúi þeirra hafi kallað inn varamann til að samþykkja breytinguna fyrir sig.
Sundfélagið Óðinn benti á ótal málefnaleg rök gegn því að skipulaginu væri breytt og hægt er að sjá það hér. Og hér er einnig ályktun stjórnarinnar þar sem meirihlutinn í bæjarsjórn er harðlega gagnrýndur.

Nú á að byggja húsið sem verið er að hanna með hraði og taka það í notkun í árslok! Furðuleg er einnig fullyrðing vaxtarræktarmannsins í Mogganum í dag: "Sigurður kveðst ósáttur við gagnrýni sem fram hefur komið, m.a. í bæjarstjórn, að einkaaðila sé færð svo dýrmæt lóð. "Ég er ekki hver sem er í bænum; mér finnst ég hafa unnið mér rétt umfram aðra. Ég hef verið með íþróttafélögin í bænum meira og minna inni á gafli hjá mér í 20 ár – að mestu leyti endurgjaldslaust – og mér finnst að forráðamenn þeirra hefðu átt að styðja mig í þessu máli. Þeir hafa þagað þunnu hljóði og ég er mjög ósáttur við þá," sagði Sigurður í gær. "
Þetta eru enn eitt skipulagsslysið hér í bænum og svo á ekki einu sinni að fara eftir vilja fólksins sem kom fram á glæsilega íbúaþinginu Akureyri í öndvegi. Samfylkingin hefur sannað sig sem hækja Sjálfstæðisflokksins á Akureyri.

Stefnir að því að taka heilsuræktarhúsið í notkun fyrir árslok

Svanasöngur Tony B-lair´s

Ferlegt hvað völd fara illa með suma. Tony Blair eða Tony B-liar eins og hann hefur einnig verið nefndur er sorglegt dæmi um þetta. Var hann ekki búinn að lofa að segja af sér? Hvenær losnum við við vininn? Það er eins og Bush sé með hann í bandi. Bush pissar upp við staur og svo kemur Tony litli Blair á eftir og gerir eins. Að setja meira fé til hermála er bara að hella olíu á eldinn. Þetta stríð þeirra gegn hryðjuverkum er mistök frá upphafi til enda. Þeir einu sem fagna eru Haukarnir í Washington og hergagnaframleiðendur sem fitna sem aldrei fyrr. Guardian skrifar meira um þetta hér og ég er búinn að setja upp þennan fína tenglalista um fjölmiðla, myndlist, náttúruverndarsamtök og fleira hérna vinstra megin.
Það er komið nóg af slæmum stjórnmálamönnum sem virðast bara gera illt verra. Bless Tony, bless Blair.

Blair: Meira fé veitt til hernaðarmála

Alcan tilbúið til að gera allt

   

Merkileg sinnaskipti hjá Alcan. Um daginn vildu þeir ekki einu sinni tala við starfsmennina sem fyrirtækið sagði upp, en nú nú er búið að semja, eða allavega leggja fram frábært tilboð um starfslok! Og þessi setning er best: "Hrannar Pétursson, upplýsingafulltrúi Alcan, segir ljóst að tíma fyrirtækisins sé betur varið á næstunni í annað en að standa í málaferlum." Það var einmitt það. Ímyndarstríðið heldur áfram og þá er ekki gott að hafa málaferli vegna umdeildra uppsagna hangandi yfir sér. Betra að verja tímanum í að villa um fyrir Hafnfirðingum ýmist með gjöfum eða hótunum. Starfsmennirnir fyrrverandi eru heppnir að það á að kjósa um álverið, annars hefði Alcan aldrei viljað semja við þá. En það hljóta allir að sjá í gegnum þetta. Alcan getur ekki breyst í einhver góðmenni á einni nóttu með endalausar gjafir og smjaður. Hafnfirðingar fatta alveg hvað er í gangi og hljóta að hafna þessari stækkun.

Samið við þrjá starfsmenn Alcan sem sagt var upp störfum

Lokum Guantánamo

Fólk kom saman um allan heim í gær og mótmælti fangabúðum Bandaríkjanna við Gunatanámo-flóa á Kúbu. Það eru fimm ár frá því að þessar fangabúðir voru opnaðar. Amnesty Interntional stóð fyrir mótmælunum hér á Íslandi. Á síðunni þeirra er hægt að fræðast um starfsemi BNA þarna og taka þátt í því að skora á bandarísk stjórnvöld að loka fangelsinu. Þar hefur fólki verið haldið á dóms og laga í fimm ár og fólk pyntað og beitt ofbeldi. Hinn nýji aðalritari Sameinuþjóðanna Ban Ki Moon skorar á stjórnvöld að loka búðunum og hætta mannréttindabrotunum strax. Nokkrir bandarískir mannréttindafrömuðir fóru sérstaklega til Kúbu til að mótmæla fangabúðunum og á það fólk yfir höfði sér ákæru þegar þau koma aftur til Bandaríkjanna.

Fangabúðunum við Guantánamo-flóa mótmælt

Hugo Chaves er lang flottastur

Mér líst alltaf betur og betur á Hugo Chaves. Maðurinn er auðvitað ekki fullkominn en ég held að hann sé á réttri leið. Flott að þjóðnýta olíuvinnsluna því þessir olíurisar hafa verið að arðræna fólk í Venesúela nógu lengi. Þeir geta snúið sér að olíunni í Írak núna, þökk sé Bush og félögum. Það eru fleiri og fleiri í Suður Ameríku að átta sig á að misskiptingin sem BNA hefur leitt yfir álfuna gengur ekki lengur. Hugo Chaves getur breytt þessu.

Chavez biður um samþykki á lögum um þjóðnýtingu orku- og fjarskiptaiðnaðar

BNA með yfirþjóðlegt vald?

Ótrúlegt hvernig bandarísk yfirvöld vaða uppi og nú á skítugum skónum í Noregi. Þetta viðskiptabann þeirra gegn Kúbu er brandari en dálítið þreytandi þegar þetta er farið að virka líka í Evrópu. Er ekki hægt að koma vitinu fyrir þetta gengi? Maður verður bara að vona að Demókratar séu aðeins skárri en últrahægriliðið í kringum Bush sem er búinn að missa meirihlutan i báðum deildum þingsins vestra. Norðmenn eru auðvitað gáttaðir á þessu og flott hjá norska alþýðusambandinu að krefjast þess að norsk stjórnvöld grípi til aðgerða gegn fyrirtækjum sem starfi samkvæmt ólöglegu viðskiptabanni Bandaríkjanna gegn Kúbu en ekki stefnu norskra yfirvalda. Í fréttinni á mbl segir einnig: "Samtök sem berjast gegn kynþáttamisrétti hafa höfðað mál á hendur Edderkoppen, framkvæmdastjóra Hilton-hótelkeðjunnar, sem nú á Scandic-keðjuna, og Scandic í Noregi á grundvelli laga sem banna að þjónustu sé neitað á grundvelli ríkisborgararéttar eða af kynþáttabundnum ástæðum." Hárrétt ákvörðun. Það er komið nóg af yfirgangi bandarískra yfirvalda sem halda að þau geti ráðið öllu allsstaðar. Það var einnig fjallað um málið á morgunvaktinni hjá rúv í morgun og hér hjá Afenposten.

Scandic-hótelkeðjan í Noregi neitar að hýsa Kúbumenn

Sjálfstæðisflokkur lækkar í 37% og Vinstri græn í 28%

Hin æsispennandi könnun á síðunni minni hefur heldur betur hlaðið utan á sig og nú hafa 319 svarað hvaða flokk þau ætla að kjósa í vor. Það vekur ef til vill sérstaka athygli að enginn merkir við að hann ætli að kjósa eitthvað annað en flokkana fimm, þrátt fyrir nýja Flokkinn og eldri borgara sem virðast vera í miklum ham. Sjálfstæðisflokkurinn er á góðri niðurleið en að öðru leiti eru nú ekki miklar breytingar sjánlegar. Merkilegt samt hvað fáir sem lesa síðuna mína ætla að kjósa Samfylkinguna.
Þetta er annars gósentími skoðanakannana og úttektin á Gallupkönnuninni hjá rúv er áhugaverð og einnig hjá bloggfélaga mínum Stefáni Fr.
Annars er ferillinn og könnuninni á þessari síðu svona:

Framsókn úr 13% í 11% og núna 12%
Sjálfstæðisflokkur úr 40% í 41% og núna 37%
Frjálslyndir úr 2% í 3% og núna 3%
Samfylkingin úr 8% í 10% og núna 12%
Vinstri græn úr 30% í 29% og núna 28%
Annað 0%
Skila auðu úr 2% í 3% og núna 3%
Vita ekki enn úr 5% í 4% og núna 4%

Sjálfstæðismenn fengju meirihluta í borginni samkvæmt nýrri könnun

Alcan að klúðra ímyndinni

Gleðilegt ár kæru lesendur!
Gleðilegt ár í herstöðvarlausu landi sem vonandi verður einhverntíman einnig álbræðslulaust land!

Flott hjá enskum íslandsvinum að halda áfram baráttunni fyrir umhverfinu. Halldór Baldursson á einn besta vinkilinn á múturgjafir Alcan með teikningunni sinni í Blaðinu um áramótin. Ég birti myndina hér og fékk hana lánaða af síðunni hans. Bendi einnig á góðan pistil Ögmundar Jónassonar á heimasíðunni hans um vandræðalega "kostun" Alcan á Kryddsíldinni. Alcan á eftir að eyða hundruðum milljóna á næstu vikum í ímyndarhernað sem þeir eru nú þegar búnir að tapa. Ef þetta fyrirtæki hefur einhverntíma átt séns þá er það búið að fyrirgera honum núna. Ég treysti á Hafnfirðinga að þeir hafni stækkun á þessari mengandi verksmiðju svo það verði hægt að byggja upp blómlegt atvinnulíf í bænum í staðinn. Samtökin Sól í Straumi eiga heiður skilinn fyrir málefnalega baráttu gegn álverinu. Tilvalið að skoða heimasíðuna þeirra.
Þetta verður gott ár og við losum okkur loksins við þreytta og leiðinlega ríkisstjórn!

Álversframkvæmdum á Íslandi mótmælt í Lundúnum