Bruðl og kjaftæði á krepputímum

Er það í lagi að símakostnaður 51 þingmanns nemi 25 milljónum á einu ári? Og símreikningurinn er sendur þjóðinni. Það væri einnig fróðlegt að fá að sjá hvort ráðherrarnir fyrrverandi hafi toppað þingmenn í símablaðri. Ef hver þingmaður hefur talað að meðaltali í síma fyrir 40 þúsund á mánuði væri einnig áhugavert að fá að vita hversu miklu þeir sem mest töluðu eyddu. Þessar upplýsingar eiga að koma upp á borðið. Þingmenn í öðrum löndum hafa þurft að segja af sér fyrir símabruðl en hér myndi það aldrei gerast, því miður. Eða eru breyttir tímar?

Það er kominn tími fyrir aðhaldssemi og ráðdeild og tími sóunar er vonandi á enda. Við viljum fá að vita hverjir eyddu peningum almennings í blaður á síðasta ári og fyrir þetta ár á einnig að birta reiknigana. Það myndi veita þingmönnum eðlilegt og greinilega nauðsynlegt aðhald.

Töluðu í síma fyrir 24,6 milljónir

Athugasemdir

[Páll A. Þorgeirsson (IP-tala skráð) 18.5.2009 kl. 09:56]

Góðar ábendingar hjá þér.

Segir þetta ekki töluvert mikið um bruðlið "bak við tjöldin" á þeim bæ.

[Húnbogi Valsson (IP-tala skráð) 18.5.2009 kl. 10:36]

Ég tel víst að mikill hluti af vinnu þingmanna sé upplýsinga öflun og þess vegna er eðlilegt að þeir tali mikið í síma EN þetta finnst mér helst til mikið og ef ég væri sjálfur á þingi af hugsjón og með ábyrgðartilfinningu fyrir þjóðarhag, þá reyndi ég að vera hagsýnn og góð fyrirmynd.

Það virðist eins og þarna séu menn sem er skítsama um allt nema sjálfa sig og bruðla hiklaust og fara yfir strikið í eigin neyslu. Vonandi fáum við að vita hverjir þeir eru. Því miður, þá man fólk allt of lítið eftir svona hlutum þegar kemur að kosningum.

Munið þið eftir þegar Davíð Oddson rak skúringarkonuna fyrir að stelast til að nota síma? Varla var það skúringakonan sjálf sem fór með það í fjölmiðla. Honum tókst að slá sig þar aldeilis til riddara. Á sama tíma og hann hélt hlífiskildi yfir flokkshollum snýkjudýrum, nefni engin nöfn, en einhver slökkviliðsstjóri kemur upp í hugann......

[Ína (IP-tala skráð) 18.5.2009 kl. 13:01]

Auðvitað eigum við að fá að vita þetta ! Við borgum brúsann og þingmenn verða að átta sig á því að þeir eiga að spara rétt eins og við hin. Svo finnst mér að allt eigi að vera upp á borðinu, hverjir fá hvað og svo frv. Eiginlega ætti að vera heimasíða þar sem við gætum séð alla eyðslu ríkisins og eins niðurfellingar bankanna og styrki allskonar. Það er ekkert sjálfsagt að það sé leynd yfir þessum málum. Enda held ég að fólk muni fylgjast með þessum málum sem aldrei fyrr og kalla eftir þessum upplýsingum í tíma og ótíma þar til þetta verður birt jafnóðum á netinu. Nýtt Ísland !

[Hrannar Magnússon (IP-tala skráð) 18.5.2009 kl. 18:07]

Þetta verður nú að teljast vel sloppið, miðað við eðli og umfang starfsins, sem felst fyrst og fremst í samskiptum.

Úr fréttinni má einmitt lesa að þeir sem fari fram úr þessari viðmiðunarfjárhæð greiði mismuninn sjálfir, en séu afar fáir.