Redda þessu NÚNA!

Flott hjá barnshafandi konum að mótmæla! Auðvitað á ríkið pening til að greiða ljósmæðrum hærri laun. Allt annað er bara bull í Árna Matt. Það er til háborinnar skammar að ljósmæður skuli þurfa að fara í verkfall og hóta uppsögnum til að fá augljósa leiðréttingu á sínum kjörum. Það á að semja við þær núna strax og ef Árni Matt getur það ekki þá hefur hann ekkert að gera lengur sem ráðherra, segja honum upp og fá einhverja aðra (konu) í starfið. Allavega einhvern sem hefur snefil af sómatilfinningu.

Ég skrifaði smá pistil um þessi mál áður en allt var komið í óefni en nú er manni nóg boðið. Árni Matt varð sér til ævarandi skammar í gær þegar hann svaraði illa fyrirspurn Katrínar Jakobsdóttur á þinginu í gær.

Áfram ljósmæður og feður og mæður!

Þungaðar konur mótmæla

Vinstri græn stærsti flokkurinn í Norðausturkjördæmi

Samkvæmt Gallup könnun yrðu Vinstri græn stærsti flokkurinn í NA-kjördæmi ef kosið væri nú, fengi 26,3%. Sjálfstæðisflokkurinn byði afhroð og færi niður í 25,7%. Þetta eru auðvitað söguleg tíðindi og afar ánægjuleg. Þetta er auðvitað bara könnun en segir heilmikið um að fólki líkar málefnalegur málflutningur VG í efnahagsmálum og umhverfismálum. Álver á Bakka er jú eitt af stóru málunum hér fyrir norðan.

Hér er hægt að hlusta á fréttina í Svæðisútvarpinu.

"Vinstri hreyfingin-grænt framboð hefur nú mest fylgi stjórnmálaflokka í Norðausturkjördæmi, ef marka má nýja könnun Gallup. Flokkurinn hefur bætt við sig tæpum sjö prósentum frá alþingiskosningum vorið 2007. Samfylkingin bætir einnig við sig fylgi í kjördæminu, en Sjálfstæðisflokkur og Framsóknarflokkur tapa fylgi."

Vinstriflokkurinn í Þýskalandi er einnig á mikilli siglingu um þessar mundir og ein aðalfréttin þar í landi í dag er að Die Linke fengi meira fylgi en Kratarnir í SPD í Saarlandi samkvæmt könnun Forsa. Þar verður kosið á næsta ári. Hér er frétt úr Berliner Zeitung.

Upphaf og endir þjóðvegar 1 á Akureyri

Mér finnst það afar gott að hringvegurinn verði ekki lengur hringvegur heldur endi og byrji á henni Akureyri. Reyndar var ein tillagan í hinni ljómandi samkeppni "Akureyri í öndvegi" einmitt þannig að hluti af þjóðvegi 1 var gerður að vistgötu.

En það verður að minnsta kosti mikið fjör á Akureyrarvöku á morgun og hellingur af myndlistarsýningum opnaðar eins og sjá má á síðu Myndlistarfélagsins.

Hringveginum lokað vegna Akureyrarvöku

Höldum áfram í ruglinu

Lengi getur vont versnað. Valdaklíkan í Sjálfstæðisflokkunum er búin að ná nýjum hæðum, á botninum. Þessi farsi sem borgarfulltrúar flokksins bjóða uppá með dyggum stuðningi Davíðs Oddssonar og Geirs H. Haarde er fyrir löngu kominn yfir það að vera broslegur og er bara sorglegur. Og nú er það þriðji maðurinn sem er hækjan. En það þýðir ekkert að fara á bömmer yfir endalausum mistökum annarra og það er jú vont en það venst. Hallgrímur Helgason skrifar skemmtilegan pistil í Fréttablaðið í dag. Kemur manni aftur í gott skap.

Samfylkingin hafnaði nýjum Reykjavíkurlista

Velkomin á opnun í Nýlistasafninu á laugardaginn

Á laugardaginn klukkan 17 opna ég sýningu í Nýlistasafninu á Laugarveginum. Það eru auðvitað allir velkomnir á opnunina eða að koma seinna ef það hentar betur. Það er enginn aðgangseyrir að Nýlistsafninu og hefur aldrei verið! Á síðu myndlistarfélagsins mynd.blog.is er hægt að lesa meira um sýninguna og á síðu Nýlistasafnsins nylo.is eru einnig upplýsingar. Á heimasíðunni minni er einnig hellingur af myndum og textum. Ég hef að vísu ekki getað uppfært síðuna nýlega vegna vesens en það stendur til bóta. Svo bendi ég einnig á síður Kuckie+Kuckei í Berlín og Galerie Robert Drees í Hannover með allskonar upplýsingum. 

Þorvaldur Þorsteinsson tók myndina fyrir veggspjaldið/boðskortið af mér að fremja gjörninginn Sund á sýningunni Equivalence í Lazareti, Galerija OTOK í Dubrovnik í Króatíu í júlí 2008.

Borgum umönnunarstéttum mannsæmandi laun

Hvað er málið í þessu landi? Af hverju þurfa kennarar, hjúkrunarfræðingar og nú ljósmæður alltaf að berjast fyrir því að fá smá hækkun á skammarlega lág laun? Á sama tíma eru einhverjir forstjórar og bankastjórar að skammta sjálfum sér stjarnfræðilega há laun, fyrir ekki neitt. Bera einhverja meinta ábyrgð en þegar þeir eru búnir að setja allt klabbið á hausinn eða svo gott sem þá semja þeir bara um "starfslok" og fá einhverjar hundruðir milljóna fyrir að drífa sig.

Þetta er náttúrulega rugl. Það er fyrir löngu kominn tími til að umönnunarstéttir (í flestum tilfellum þar sem konur eru í miklum meirihluta) fái almennileg laun. Ljósmæður bera raunverulega ábyrgð á lífi og velferð barna og fjölskyldna (en ekki innistæðulausum pappírum). Þær eiga að fá laun á við bankastjórana. 

Það að ítrekað þurfi starfsfólk að hóta uppsögnum eða fara í verkfall til að knýja á um hærri laun er smánarblettur á okkar samfélagi. Ríkisstjórnin var með fagurgala um að leiðrétta laun kvennastétta og nú er komið að því að efna loforðin en... það var ekkert á bakvið þessi loforð Samfylkingarinnar og íhalds frekar en fyrri daginn. Bara plat og lygi.

Myndin er fengin af wimmer-hebamme.at

Heimaþjónusta en engin mæðravernd

Mannréttindi fótum troðin í Kína

Og Þorgerður Katrín og Ólafur Ragnar mæta til að taka þátt í veislunni í boði böðlanna. Það er svartur blettur á utanríkisstefnu Íslands. Birgitta Jónsdóttir hefur staðið vaktina til að benda á óréttlætið sem á sér stað í Kína. Skoðanakúgun, pyntingar, aftökur eftir sýndarréttarhöld. Allt þetta er hluti af ástandinu í Kína þar sem eru stjórnvöld sem kenna sig við kommúnisma en eru í raun svartasta myndin á kapítalisma. Við eigum að mótmæla þessu og það er tækifæri í kvöld fyrir hvert og eitt okkar að gera það úr því að stjórnvöld hafa ekki dug í sér til að gera neitt og taka jafnvel þátt í veislunum. Setjum kerti út í glugga eins og milljónir manna um allan heim, til stuðnings frjálsu Tíbet. Og hér á Akureyri mun fara fram kertafleyting á tjörninni við Minjasafnið til minningar um fórnarlömb kjarnorkusprengja bandaríkjastjórnar. Mætum þar einnig.

Tíbetar mótmæla

Draumalandið komið á YouTube

Kynningin (Trailerinn) af mynd Andra Snæs Magnasonar og Þorfinns Guðnasonar Draumalandið er kominn á YouTube og hér er hægt að sjá hann. Björk flytur kynningarlagið og þessi mynd lofar góðu. Það fer hrollur um mann þegar myndirnar af Alcoa genginu ásamt mestu hryðjuverkamönnum gegn íslenskri náttúru (Geir H. Haarde, Friðrik Sófussyni, Valgerði Sverrisdóttur og félögum) birtast á skjánum, takast í hendur og óska hvort öðru til hamingju yfir því að hafa samþykkt að sökkva landi og fremja óafturkræf náttúruspjöll fyrir risavirkjun sem framleiðir rafmagn fyrir glæpafyrirtækið Alcoa.

FM Belfast rokkar

Frekar fúlt að missa af þessum Innipúka. Vonandi hressist Megas líka. Ég sá á blogginu hennar Helgu Völu frábært myndband með FM Belfast sem er núna uppáhaldshljómsveitin mín. Skelli því hérna inn. Þetta er almennileg stuðgrúppa sem kemur öllum í gott skap. Meira rokk meira stuð!

Megas veiktist

Áfram Magga Blöndal

Það er stórkostlegt hvað hægt er skapa góða stemningu með jákvæðni og bjartsýni. Margrét Blöndal tók verkefnið að sér og stendur uppi sem hetja. Það var allt annar bragur á þessari Verslunarmannahelgi en þeim síðustu hér á Akureyri og það sannaðist að aldurstakmörk á tjaldstæðin voru ekki leiðin til að laga hlutina. Það er hægt að gera kraftaverk með góðu skipulagi, bjartsýni og með því að skapa góða stemningu. Vissulega var fyllirí og einhverjir með læti en sem betur fer var það ekki yfirgnæfandi. Karlahópur femínistafélagsins var áberandi hér á Akureyri og stóð sig afar vel og það var gott að sjá ungt fólk með barmmerkin þeirra. Takk Magga, fyrir að redda heiðri Akureyringa.

Fjölmenni á flugeldasýningu

Verksmiðjan á Hjalteyri opnar laugardaginn 2. ágúst 2008

Verksmiðjan
Menningarmiðstöð á Hjalteyri

Neðst á Hjalteyri // 601 Akureyri // verksmidjan.blogspot.com // 461 1450 // 865 5091


START

02.08. – 23.08.2008

Alexander Steig, Þýskalandi
Arna Valsdóttir, Íslandi
Boekie Woekie, Hollandi
Kristján Guðmundsson, Íslandi
Magnús Pálsson, Íslandi/Bretlandi
Nicolas Moulins, Frakklandi/Þýskalandi
Sigga Björg Sigurðardóttir, Íslandi/Skotlandi

Opið fimmtudaga til sunnudaga klukkan 14:00 - 17:00

Nánari upplýsingar á http://www.verksmidjan.blogspot.com

---
Myndlistarsýningin START opnar í Verksmiðjunni á Hjalteyri, laugardaginn 2. ágúst 2008 klukkan 14:00.
Sýningin stendur til 23. ágúst.
Opið frá fimmtudegi til sunnudags klukkan 14:00 - 17:00

Dagsskrá:

Laugardagurinn 2. ágúst
14:00 Opnun. Þátttakendur eru Sigga Björg Sigurðardóttir, Kristján Guðmundsson, Magnús Pálsson, Alexander Steig, Boekie Woekie, Nicolas Moulin og Arna Valsdóttir.

15:00 Arna Valsdóttir, Sönggjörningur
17:00 Arna Valsdóttir, Sönggjörningur
18:00 Ghazi Barakat, tónlistaratriði

Sunnudagurinn 3. ágúst
14:00 - 17:00 Listasmiðja
fyrir börn og foreldra. Opið öllum.

Laugardagurinn 9. ágúst
10:00 - 15:00 Listasmiðja fyrir börn
15:00 Arna Valsdóttir, Sönggjörningur
18:00 Kammerkórinn Hymnodia

Sunnudagurinn 10. ágúst
10:00 - 15:00 Listasmiðja fyrir börn
Listasmiðjurnar eru fyrir 10 til 14 ára krakka, ekkert þátttökugjald.
Umsjónarmenn: Aðalheiður S. Eysteinsdóttir, Gústav Geir Bollason og Þórarinn Blöndal.
Skráning hjá Aðalheiði í síma 865 5091

Sunnudagurinn 17. ágúst
15:00 Ljóðadagskrá
í umsjón Jóns Laxdal

Sýningin stendur til 23. ágúst.

Stuðningsaðilar eru Menningarráð Eyþings, Impra, Nýsköpunarmiðstöð, Þýska sendiráðið og BYKO.

Nýtt upphaf í Verksmiðjunni á Hjalteyri

Fyrsta sýningin í gömlu verksmiðjunni á Hjalteyri er samansett af ólíkum myndlistarmönnum af þremur kynslóðum sem vinna í sex löndum. Þau vinna með innsetningar, kvikmyndir, myndbönd, hljóð, málverk, teikningar og gjörninga, svo eitthvað sé nefnt. Verksmiðjan sjálf er spennandi útgangspunktur og umgjörð fyrir verkin sem sum eru gerð sérstaklaga fyrir þessar aðstæður en önnur fá nýja merkingu í þessu hráa umhverfi.

Menningarhátíð á Hjalteyri í ágústmánuði

Von okkar listamannanna sem standa að Verksmiðjunni er að Hjalteyrarverksmiðjan og umhverfi hennar verði framtíðarstaður listamanna og þá væri sérstaða hennar í listheiminum veruleg. Hún yrði nokkurs konar frumbýli - listin nemur land - og brúaði með því bil á milli þéttbýlis og landsbyggðar en einnig landsbyggðar og umheims. Hún yrði hvortveggja í senn; svæðisbundin og næði jafnframt til stærri heildar, þar sem hún myndi bæði taka mið af þörfum og áhuga íbúa næsta nágrennis en um leið opna gáttir til umheimsins fyrir tengsl sín og samstarf við erlenda aðila. Umhverfið og húsakynni Hjalteyrar-verksmiðjunnar vekur athygli, hefur áhrif á sköpun og mótar starfsemina. Unnið hefur verið að grunnendurbótum á Verksmiðjunni en tekið tillit til umhverfisins og þess hvernig húsakynni eru í raun. Samspil náttúruafla og mannvirkja hefur verið haft í huga og að leiðarljósi. Verksmiðjan er eitt listaverk út af fyrir sig.
 

Aðstandendur Verksmiðjunnar eru:

Aðalheiður S. Eysteinsdóttir
Arna Valsdóttir
Arnar Ómarsson
Gústav Geir Bollason
Hlynur Hallsson
Jón Laxdal Halldórsson
Jóna Hlíf Halldórsdóttir
Lene Zachariassen
Véronique Legros
Þórarinn Blöndal

Clémentine Roy
Henriette van Egten
Kristján Guðmundsson
Jan Voss
Nicolas Moulin
Rúna Þorkelsdóttir

Margeir "Dire" Sigurðarson opnar sýninguna "Út á lífið / Party n´ bullshit" á Café Karólínu laugardaginn 2. ágúst 2008 klukkan 14

Margeir "Dire" Sigurðarson

Út á lífið / Party n´ bullshit
 

02.08.08 - 05.09.08   
 

Café Karólína // Kaupvangsstræti 23 // IS 600 Akureyri // 4612755

Margeir "Dire" Sigurðarson opnar sýninguna "Út á lífið / Party n´ bullshit" á Café Karólínu laugardaginn 2. ágúst 2008 klukkan 14.

Verkin sem Margeir sýnir á Cafe Karólínu hafa sinn innblástur að sækja til skemmtanalífs. Hann segir um verkin: “Oftar en ekki hef ég fundið sjálfan mig úti á lífinu að stara yfir allan dýragarðinn, öll æðislega vitleysan er svo skiljanleg en samt á sama tíma svo langt frá því. Hvert móment hefur sögu að bera. Hver og einn í mismunandi ástandi en öll eru þau í leit af einhverju nýju og jucy sem virðist vera rétt handann við hornið.”
Verkin eru spreyjuð og máluð með acryl á striga og á blaðgull.

Margeir útskrifaðist úr Myndlistaskólanum á Akureyri í vor en hefur nú þegar tekið þátt í samsýningum og sett um nokkrar einkasýningar.

Nánari upplýsingar veitir Margeir í evoldire(hjá)yahoo.com og í síma 8479303
 

Sýningin á Café Karólínu stendur til 5. september 2008.

Meðfylgjandi er mynd af einu verkanna sem hann sýnir á Café Karólínu.

Næstu sýningar á Café Karólínu:
06.09.08 - 03.10.08    Sigurlín M. Grétarsdóttir
04.10.08 - 31.10.08    Ingunn St. Svavarsdóttir Yst
01.11.08 - 05.12.08    Þorsteinn Gíslason
06.12.08 - 02.01.09    Jóna Bergdal Jakobsdóttir
03.01.09 - 06.02.09    Herdís Björk Þórðardóttir

Umsjónarmaður sýninganna er Hlynur Hallsson

Alexander Steig opnar sýningu í Kunstraum Wohnraum á Akureyri, sunnudaginn 27. júlí 2008 kl. 11-13

ALEXANDER STEIG 

TV TRAINER 

27.07. - 13.09.2008 

Opnun sunnudaginn 27. júlí 2008, klukkan 11-13  

Opið samkvæmt samkomulagi

 

KUNSTRAUM WOHNRAUM             

Hlynur Hallsson • Kristín Kjartansdóttir     

Ásabyggð 2 • IS-600 Akureyri •  [phone] 

www.hallsson.de

Sunnudaginn 27. júlí 2008 klukkan 11-13 opnar Alexander Steig sýninguna “TV-trainer” í Kunstraum Wohnraum á Akureyri.

Verkið er byggt á gjörningi og myndbandsinnsetningu og hefur þegar verið sýnt í Musée d´Art Moderne et Contemporain de Strassbourg, Dartington Gallery í Totnes á Bretlandi og í MoNA í Poznan í Póllandi. Nánari upplýsingar um verk Alexanders Steig er að finna á http://www.alexandersteig.de
Meðfylgjandi mynd er úr verkinu.

 

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Alexanders Steig stendur til 13. september 2008 og er opin eftir samkomulagi og hægt er að hringja í síma 4623744.

Kunstraum Wohnraum er að finna hér 

Yfirlýsing frá Saving Iceland

Það er gott hjá félögum í Saving Iceland að vekja athygli á menguninni frá Norðuráli, Century og Elkem og mannréttindabrotum fyrirtækjanna. Hér er fréttatilkynning frá Saving Iceland.

"Við mótmælum umhverfistengdum og heilsufarslegum afleiðingum námugraftar og súrálsframleiðslu Century á Jamaíka og áætlunum fyrirtækisins um nýtt álver og súrálsverksmiðju í Vestur Kongó. Fyrirhugaðar stækkanir Norðuráls og Elkem hér á landi munu leiða af sér eyðileggingu einstakra jarðhitasvæða og einnig hafa í för með sér losun gífurlegs magns gróðurhúsalofttegunda" segir Miriam Rose frá Saving Iceland (1).

Century í Vestur Kongó
Árið 2007 skrifaði Century undir viljayfirlýsingu við ríkisstjórn Vestur Kongó um byggingu álvers, súrálsverksmiðju og báxítnámu þar í landi (2). Starfsemin verður keyrð áfram af gasi og krefst 500 MW af rafmagni. Century skoðar nú hvar hentugast er að staðsetja báxít-námuna og hyggst hefja byggingu álversins eins fljótt og auðið er (3).

,,Við trúum því að Vestur Kongó hafi allt það hráefni sem þarf til að starfrækja álframleiðslu með hagnaði" segir Logan W. Kruger frá Century.

,,Kruger hefur rétt fyrir sér" segir Snorri Páll Jónsson Úlfhildarson frá Saving Iceland. ,,Transparency International segir Vestur Kongó hafa eitt spilltasta stjórnarfar í heiminum. Og það eru einmitt þannig ríkisstjórnir sem álfyrirtækin vilja helst stunda viðskipti við…" (4)

,,Það er afar ólíklegt að þeir fátæku muni nokkuð hafa upp úr þessari þróun, en munu þess í stað verða fyrir umhverfislegum áhrifum framkvæmdanna. Tekjur frá olíuframleiðslu hafa ekki skilað sér til þeirra, hvers vegna ætti það að vera eitthvað öðruvísi með báxítið?" segir Snorri.

,,Hvað varðar báxít námurnar í Vestur Kongó, er alveg ljóst að Century hyggst starfrækja stærðarinnar opna námu í líkingu við það sem önnur stórfyrirtæki vilja gera í Orissa á Indlandi og á Jamaíka, Guyana og Guinea" segir Samarendra Das, indverskur rithöfundur og sérfræðingur um áliðnaðinn, en Samarendra mun fjalla um menningarleg þjóðarmorð í tengslum við álframleiðslu á ráðstefnu Saving Iceland í Reykjavíkur Akademíunni næstkomandi Miðvikudag (sjá viðbót A).

,,Alls staðar í heiminum þar sem báxítgröftur fer fram á sér stað samhliða eyðilegging umhverfisins, jafnframt sem lifibrauð fólks og heilsa þess eru tekin af þeim. Fólk búsett á Íslandi þarf að átta sig á því hvaðan báxítið sem álið er framleitt úr, kemur" segir Samarendra.

Century á Jamaíka: umhverfis- og heilsufarsógn
Fyrirtækin St. Ann Bauxite og Kaiser í eigu Century, Alcoa, Rio Tinto-Alcan og Rusal (sem á 1/3 í Century) eiga öll aðild að báxítgreftri á Jamaíka og eru sek um umtalsverða eyðileggingu regnskóga og mengun drykkjarvatns (5,6,7). Century vill nú opna nýja námu og súrálsframleiðslu í samstarfi við kínverska fyrirtækið Minmetals, en hið síðarnefnda er þekkt fyrir fangaknúnar verksmiðjur og alvarleg mannréttindabrot í Kína og annars staðar í heiminum (Sjá viðbót B).

Elkem – Íslenska Járnblendifélagið: Mengunarslys í hverri viku
Íslenska Járnblendifélagið vill nú stækka verksmiðju sína á Grundartanga í Hvalfirði, fyrir frekari framleiðslu á kísiljárni fyrir stáliðnaðinn. Verksmiðjan er nú þegar einn mesti mengunarvaldur hér á landi og losar mest magn gróðurhúsalofttegunda; aukin framleiðsla myndi leiða af sér gífurlega mengunar-aukningu (1). Í Júlí 2007 var sagt frá því að Elkem hafi 'fyrir slysni' losað stærðarinnar mengunarský frá verksmiðju sinni. Samkvæmt fréttinni orsakaðist slysið af mannlegum mistökum og haft var eftir Þórði Magnússyni, talsmanni fyrirtækisins, að sams konar slys gerist nokkrum sinnum í viku. Sigurbjörn Hjaltason, hreppstjóri Kjósarhrepps, segir þessi 'slys' yfirleitt eiga sér stað að nóttu til (8).

Um Saving Iceland
Síðasta Laugardag stöðvaði Saving Iceland vinnu í heilan dag á lóð fyrirhugaðs álvers Norðuráls í Helguvík. Sú aðgerð, sem og þessi, er hluti af fjórða sumri beinna aðgerða gegn stóriðju á Íslandi og annars staðar í heiminum. Í júlí 2007 stöðvaði fólk á vegum hópsins einnig vinnu umferð til og frá álverinu á Grundartanga.

Saving Iceland varð til þegar íslenskir umhverfissinnar óskuðu eftir hjálp erlendis frá, til að vernda íslensk öræfi - ein þau síðustu í Evrópu - frá stóriðju. Rétt eins og Norðurál/Century, vilja Alcoa og Rio Tinto-Alcan nú reisa fleiri álver hér á landi. Til þess þarf að eyðileggja öll virk jarðvarmasvæði á landinu auk þess að reisa virkjanir í hverri stórri jökulá (sjá viðbót C).

Í ár hafa fjórðu aðgerðabúðir Saving Iceland verið settar upp á Hellisheiði, nálægt jarðvarmavirkjun Orkuveitu Reykjavíkur en virkjunina er nú verið að stækka, m.a. til að koma til móts við kröfu Norðuráls um aukna orkuframleiðslu.

Nánari upplýsingar:
 http://www.savingiceland.org
 savingiceland at riseup.net

Viðbætur:
A.) Miðvikudaginn 23. júlí kl. 19:30 stendur Saving Iceland fyrir ráðstefnu þar sem indverski rithöfundurinn og sérfræðingur um álframleiðsluna kemur fram ásamt Andra Snæ Magnasyni rithöfundi. Umfjöllunarefni ráðstefnunnar eru áhrif álframleiðslu á þriðja heiminn auk þess sem hugmyndin um einhvers konar 'hreina og græna' álframleiðslu hér á landi verður brotin á bak aftur. Ráðstefnan fer fram í Reykjavíkur Akademíunni, Hringbraut 121. Þeir sem hafa áhuga á að tala við Samarendra, taka við hann viðtal o.sv.fr. geta haft samband við einn af ofangreindum talsmönnum SI.

B.) Árið 2004 hafði Minmentals í huga að taka yfir kanadíska námufyrirtækið Noranda, en var hafnað árið 2005 vegna alvarlegra áhyggja um mannréttindabrot kínverska fyrirtækisins. Þessi skýrsla segir nánar frá mannréttindabrotum Minmetals:

Dhir, Aaron A. (2006). 'Of Takeovers, Foreign Investment and Human Rights: Unpacking the Noranda-Minmetals Conundrum', Banking and Finance Law Review, 22, 77-104.

C.) Fyrir frekari upplýsingar um áætlaðar stóriðjuframkvæmdir á Íslandi, sjá: http://www.savingiceland.org/sos

Heimildir:
(1) Icelandic Ministry of the Environment (2006). Iceland's fourth national communication on climate change, report to the UNFCCC. http://unfccc.int/resource/docs/natc/isl…

(2) AZ Materials News (2007). Century Aluminium to Build Aluminium Smelter in Republic of Congo. http://www.azom.com/News.asp?NewsID=7734

(3 ) Afrique en Ligne (2008). Congo to build aluminium smelter in Pointe-Noire. http://www.afriquenligne.fr/news/africa-…

(4) Transparency International (2006). Corruption Perceptions Index 2006. Transparency International, Berlin.

(5) Zadie Neufville, April 6, 2001, 'Bauxite Mining Blamed for Deforestation'. See http://forests.org/archive/samerica/baux….

(6) Mines and Communities report,'Bauxite Mine Fight Looms in Jamaica's Cockpit Country', 24th October 2006. http://www.minesandcommunities.org/artic….

(7) Al Jazeera (2008). Environmental damage from mining in Jamaica, June 11, 2008 News. Available through http://www.youtube.com/watch?v=vJa2ftQwf….

(8) MBL.is (2007). Reykur frá járnblendiverksmiðjunni Grundartanga. http://mbl.is/mm/frettir/innlent/2007/07…

Mótmælum á Grundartanga lokið

Sumarfrí

Ég ætla í viku sumarfrí frá og með deginum í dag. Þetta er auðvitað löngu planað og allt skipulagt. Dálítið stutt sumarfrí þetta árið samt en það verður bara að hafa það. Nóg að gera. Hafið það gott.