Occupation 101 sýnd í kvöld

Það er áhugaverð heimildarmynd sýnd í Alþjóðahúsinu í kvöld klukkan 20. Í texta um þessa margverðlaunuðu mynd segir:

" Occupation 101 kemur fram með greiningu á staðreyndum og leyndarmálum sem eru umvafin hinni langvinnu deilu um Ísrael og Palestínu. Myndin lýsir líka lífi fólks undir hersetu Ísraels, hlutverki Bandaríkjanna í baráttunni og stærstu hindrununum sem standa í vegi fyrir langvarandi friði. Rætur átakana eru útskýrðar út frá sjónarmiði friðarsinna, fréttamanna, trúarleiðtoga og fræðimanna í málefnum miðausturlanda og mannúðarmála."

Occupation 101 (90 min)
Þriðjudagurinn 5. Febrúar, klukkan 20:00
Alþjóðhúsið, Café Cultura, Hverfisgata 18
Aðgangur ókeypis! - Allir velkomnir!

Félagið Íslands-Palestína mun í vetur standa fyrir sýningum á  athyglisverðum heimildar- og bíómyndum  er hafa  með málefni Palestínu og Ísraels að gera. Sýningarnar verða fyrsta þriðjudag hvers mánaðar í Alþjóðahúsinu og er það hin margverðlauna heimildarmynd Occupation 101 sem er fyrst í sýningarröðinni.

Hér eru meiri upplýsingar um myndina: http://www.occupation101.org

Landamæri Gasasvæðisins opnuð

Steinn Kristjánsson opnar sýninguna "Hugrenningar" á Café Karólínu laugardaginn 2. febrúar 2008, klukkan 14

Steinn Kristjánsson

Hugrenningar

02.02.08 - 29.02.08

Velkomin á opnun laugardaginn 2. febrúar 2008, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---

Laugardaginn 2. febrúar 2008, klukkan 14 opnar Steinn Kristjánsson sýninguna "Hugrenningar", á Café Karólínu á Akureyri.

Steinn Kristjánsson útskrifaðist frá fagurlistadeild Myndlistaskólans á Akureyri 2007. Hann stundar nú nám við kennaradeild Háskólans á Akureyri.  Hann segir um sýninguna á Café Karólínu:

"Umræðan í þjóðfélaginu fer fram á ólíkum stöðum. Mörgum sýnist sem hefðbundið kaffihúsaspjall sé á hröðu undanhaldi fyrir spjallrásum og bloggsíðum. Fólk er að eiga í orðaskiptum  á netinu sem það myndi ekki eiga undir fjögur augu.

Sýningin Hugrenningar er tilraun listamannsins til að færa umræðuna aftur inn á kaffihúsið undir formerkjum bloggsins. Hann setur ekki upp sýningu sem á að hanga vikum saman á staðnum. Heldur er það listamaðurinn sjálfur sem hangir á kaffihúsinu og gerir eitthvað nýtt og spennandi á hverjum degi. Í stað þess að blogga um eitthvað hengir hann upp renning, s.k. hugrenning. Á hann skrifar hann sínar hugrenningar um það sem honum liggur á hjarta hverju sinni, límir á hann teikningar, ljósmyndir og úrklippur. Öllum er heimilt að kommenta á renninginn. Í stuttu máli er þetta tilraun um mannleg samskipti. "

Nánari upplýsingar veitir Steinn í steinn52(hjá)visir.is og í síma 8490566

Sýningin á Café Karólínu stendur til 29. febrúar, 2008. Allir eru velkomnir á opnun laugardaginn 2. febrúar, klukkan 14.

Sýning Brynhildar Kristinsdóttur á Karólínu Restaurant hefur verið framlengd til 29. febrúar 2008. Þann 1. mars opnar Jón Laxdal nýja sýningu á Karólínu Restaurant.

Umsjónarmaður sýninganna er Hlynur Hallsson

Vinstriflokkurinn í Þýskalandi er sigurvegari kosninganna

Vinstriflokknum, Die Linke, tókst að ná takmarki sínu og komst á þing á báðum sambandslöndunum, Hessen og Neðra-Saxlandi þar sem kosið var í gær. Þetta er þvert á skoðanakannanir sem bentu til þess að flokkurinn fengi ekki tilskilin 5% og það var því við ramman reip að draga. Árangurinn er sérstaklega glæsilegur í Neðra-Saxlandi þar sem þessi nýi flokkur fékk 7,1% og 11 þingmenn. Í Hessen fékk Die Linke 5,1% og mátti vart tæpara standa en það skilar 6 þingmönnum sem dugar til að fella íhaldsstjórnina í sambandslandinu.

Kristilegir demókratar undir stjórn Rolands Koch bíða afhroð í Hessen og tapa 12%. Hann byggði kosningabaráttu sína á útlendingahatri og það er gott að ekki er hægt að vinna kosningar á þeim ömurlega áróðri lengur. Það eru einnig góðar fréttir að Græningjar bæta aðeins við sig í Neðra-Saxlandi. Svo maður einbeiti sér að góðu fréttunum þá eru hægri öfgaflokkarnir langt frá því að komast að. Kratarnir vinna sigur í Hessen en tapa í Neðra-Saxlandi.

Það eru söguleg tíðindi að nýr flokkur komst á þessi tvö sambandsþing og skiptir miklu fyrir Vinstriflokkinn sem hér með er búinn að stimpla sig inn, einnig í vesturhluta Þýskalands. Áfram svona!

Berliner Zeitung: Es geht nach Links

Der Spiegel: Úrslitin 

Áfall fyrir Merkel

Af hverju mótmæla íslensk stjórnvöld ekki ofbeldi á íbúum Palestínu?

Framganga Ísraelsstjórnar hlýtur að ganga fram af öllum siðmenntuðum mönnum. Undir því yfirskini að verið sé að stöðva hryðjuverkaárásir HAMAS-liða á að svelta heila þjóð. Þetta er ömurlegt og íslensk stjórnvöld sem sækjast eftir sæti í öryggisráði SÞ ættu að koma fram opinberum mótmælum á þessu framferði Ísraelsstjórnar. Í beinu framhaldi bendi ég á fund á laugardaginn hér á Akureyri:

Samtök hernaðarandstæðinga á Norðurlandi standa fyrir fundi UM PALESTÍNUDEILUNA í Gamla Húsmæðraskólanum við Þórunnarstræti (Akureyrarakademíunni) laugardaginn 26. janúar kl 14:00

Ísrael hefur nú skrúfað fyrir rafmagnið á Gasa. Palestína hefur á 60 árum orðið að tilraunagarði í þjóðarrétti og þjóðarórétti, friðarpólitík stórvelda, heimsvaldastefnu, aðskilnaðarstefnu, þjóðfrelsisbaráttu með grjótkasti gegn skriðdrekum (intifada), sveltistefnu, rasisma, ríkis-hryðjuverkum og hryðjuverkum úr grasrótinni, alþjóðlegri hjálparstarfsemi og miklu fleiru.

Ísrael-Palestína: Ætlar Bush að sjá um málið?
Ísland–-Palestína: Hvað hafa Íslendingar gert og hvað geta þeir gert?

Sveinn Rúnar Hauksson læknir, formaður Félagsins Ísland-Palestína, flytur ræðu, sýnir myndir og svarar fyrirspurnum.

Samtök hernaðarandstæðinga á Norðurlandi

Tugþúsundir mótmæla

Varnir Ingibjargar, eldveggir og heimspekin

Gamli herstöðvarandstæðingurinn Ingibjörg Sólrún Gísladóttir lagði fram "frumvarp um varnarmál" á þinginu í dag. Hún er núna í liði með Birni nokkrum Bjarnasyni sem aldrei hefur verið hernaðarandstæðingur. Gott að eldveggirnir verði reistir en hvað halda þeir lengi? Verður ekki bara hægt að pissa á þá? "Hernaðarlegir öryggishagsmunir" eru frekar óhugnanlegir sérstaklega úr munni Björns.

Ég get hinsvegar mælt með heimspekispjalli á Bláu könnunni á sunnudaginn:

Heimspekikaffihús

um lýðræði og mannréttindi

með Ólafi Páli Jónssyni

Bláa Kannan, Akureyri

sunnudaginn 20. janúar kl. 11:00 fyrir hádegi

Ólafur Páll Jónsson heimspekingur mun standa fyrir heimspeki kaffihúsi þar sem fjallað verður um lýðræði og mannréttindi á Bláu könnunni í Hafnarstræti, klukkan 11:00 fyrir hádegi. Síðastliðið vor gaf Ólafur Páll út bókina Náttúra, vald og verðmæti (Hið íslenska bókmenntafélag 2007) þar sem hann glímir m.a. við ýmsar grundvallarspurningar um lýðræði, eignarrétt og meðferð valds.

Heimspekikaffihúsið er öllum opið og byggist á samræðu viðstaddra um tiltekið efni sem fólk hefur áhuga á að ræða. Fyrir áramót stóð Félag Áhugafólks um Heimspeki á Akureyri og Félagsvísinda- og lagadeild Háskólans á Akureyri fyrir 6 slíkum viðburðum sem allir voru mjög fjölsóttir og urðu kveikja að áhugaverðum umræðum. Félögin ætla því á nýju ári að halda áfram með heimspekikaffihús eftir því sem tækifæri gefast.

* * *

Hugmyndin um heimspekikaffihús á rætur að rekja til morgun fundar heimspekings og nokkurra kunningja hans á kaffihúsi í París árið 1992. Róbert Jack, heimspekingur og höfundur bókar­innar Hversdagsheimspeki (Háskólaútgáfan 2006), stóð fyrir fyrsta íslenska heimspekikaffihúsinu haustið 2005. Heimspeki kaffihús er ekki háfleyg rökræða nokkurra útlærðra heimspekinga heldur heimspekileg samræða á venjulegu mannamáli. Hver sem er getur tekið þátt í henni svo framarlega sem hann er tilbúinn að hlusta á aðra og færa rök fyrir máli sínu.

Á Heimspekivef Háskóla Íslands er grein um heimspekikaffihús:
http://www.heimspeki.hi.is/?greinasafn/annad/cafe_philo

Ólafur Páll er lektor í heimspeki við Kennaraháskóla Íslands

Ísland axli ábyrgð á eigin öryggi

Nýnasistar eru verri náttúruhamfarir

Uppgangur nýnasista er óhugnanlegur. Samanburðurinn við náttúruhamfarir er ef til vill einkennilegur en í raun eru nýnasistar enn verri en náttúruhamfarir. Fullkomin heimska sem hægt væri að koma í veg fyrir er fólk skoðar söguna. En nýnasistum er það fullkomlega fyrirmunað eða þeir vilja það bara ekki.

Brugðist við nýnasistum eins og náttúruhamförum

Fjórir karlar að spjalla saman í Vikulokunum

Mér finnst Hallgrímur Thorsteinsson ágætur útvarpsmaður. Sumar breytingar á hinum ljómandi þætti "Vikulokin" á Rás eitt sem hann hefur gert eru góðar, þátturinn byrjar til dæmis á yfirliti beint úr fréttum. Hinsvegar finnst mér Hallrígrímur ekki mjög fær í að velja sér viðmælendur. Í þættinum í dag eru fjórir karlar sem sitja saman og hlæja. Tveir fallnir þingmenn, Mörður Árna Samfó og Magnús Þór Frjálslyndi og svo er þarna einn frjálshyggjugaur, Ólafur Teitur sjálfstæðismaður. Geisp.

Það að Sharon Stone sé búin að fá sig fullsadda af karlmönnum kemur mér ekki á óvart, þeir eru margir ansi þreytandi, sjálfumglaðir og halda að þeir séu færastir í að stjórna öllu þó að þeir hafi enga hæfileika.

Hefur meiri áhuga á konum en körlum

Borgarstjórnarmeirihlutinn treystir stöðu sína

Það eru ánægjuleg tíðindi að  borgarstjórnarmeirihluti Vinstri grænna, Samfylkingar, Framsóknar og F-listans njóti aukins trausts. Það er samt merkilegt hvað margir myndu kjósa Sjálftökuflokkinn sem klúðraði eftirminnilega meirihlutanum fyrir nokkrum mánuðum og hefur ekki borið sitt barr síðan. Sjálfstæðisflokkurinn er sundurtættur í innbyrðis átökum. Vinstri græn mega vel við una í nýjum meirihluta og Svandís Svavarsdóttir hefur sýnt að hún er réttsýn, öflug og á tvímælalaust framtíðina og nútíðina fyrir sér. Áfram svona!

58,5% styðja borgarmeirihlutann

Árni M. fer úr öskunni í eldinn

Aumingja Árni M. Mathiesen. Það er erfitt af rökstyðja dellu og jafnvel fjármálaráðherra (og settur dómsmálaráðherra í einn dag) getur það ekki. Rökstuðningur Baggalúts er betri en Árna: 

"Árni Mathiesen, settur dómsmálaráðherra, hefur sent frá sér rökstuðning fyrir skipan Þorsteins Davíðssonar, aðstoðarmanns í dómaraembætti við Héraðsdóm Norðurlands eystra.

Rökstuðningurinn, var skrifaður með afar vandvirknislegri rithönd á fallegt bréfsefni. Er hann í sex liðum og svohljóðandi:

1. Steini litli hefur alla tíð verið afar hjálpsamur og duglegur drengur - og skal sérstaklega tekið til þess hve þolinmóður og nærgætinn hann hefur verið við dómsmálaráðherra.
2. Hann er mjög þrifalegur.
3. Hann er sérlega vel upp alinn.
4. Hann hefur unnið ýmis trúnaðarstörf fyrir Sjálfstæðisflokkinn.
5. Hann hefur víðtæka reynslu af dómarastörfum, m.a. á samsýningum Kattavinafélagsins auk þess að hafa skrifað vandaðan bókadóm í barnablaðið ABC á sínum tíma.
6. Hann talar íslensku."

Svo mörg voru þau orð. 

Segir dómnefnd hafa misskilið hlutverk sitt

Hillary Clinton forseti BNA 2008 og "Axarmorðingi í móðurfaðmi"

Ég spái því hér með formlega að Hillary verði forsetaframbjóðandi Demókrata í BNA í nóvember og að hún vinni nauman sigur á frambjóðanda Repúblikana, sem ég hef ekki hugmynd um hver verður, eftir spennandi og rándýra kosningabaráttu. Vonandi verður Barack Hussein Obama varaforseti þó að John Edwards sé ágætur þá er Obama stjarna. Það að Hillary hafi fellt nokkur tár sýnir bara að hún er mannleg eins og við flest (ef ekki öll:)

Það er svo afar athyglisverður fyrirlestur um allt annað mál í AkureyrarAkademíunni á fimmtudag. Hér er tilkynning um það sem verður á boðstólnum í gamla Húsmæðraskólanum:

Við minnum á fyrsta Fimmtudagshlaðborð ársins

Fimmtudaginn 10. janúar kl. 17 flytur Brynhildur Þórarinsdóttir fyrirlesturinn
„Axarmorðingi í móðurfaðmi. Uppeldisfræði Egils sögu Skalla-Grímssonar“.

Fyrirlesturinn fer fram í gamla Húsmæðraskólanum, Þórunnarstræti 99, Akureyri.

Miðaldamenn litu ekki á börn sem sérstakan þjóðfélagshóp heldur „litla fullorðna“, fullyrti franski fræðimaðurinn Philippe Ariés fyrir nokkrum áratugum. Bernskufræðinga greinir nú mjög á um réttmæti fullyrðingar Ariés. Vissulega var íslenska miðaldasamfélagið gjörólíkt því sem við nú þekkjum en engin ástæða er þó til að halda því fram að fólk hafi litið börn öðrum augum en nú er gert. Í erindinu mun Brynhildur ræða um þá „uppeldisfræði“ sem fram kemur í íslenskum miðaldabókmenntum, sérstaklega Egils sögu.

Brynhildur Þórarinsdóttir er íslenskufræðingur og aðjúnkt við Kennaradeild Háskólans á Akureyri. Hún hefur sent frá sér sex barnabækur og eru þrjár þeirra endursagnir á Njálu, Eglu og Laxdælu, en fyrir þær hlaut hún norrænu barnabókaverðlaunin 2007. Í fyrirlestrinum nýtir hún sér reynslu sína af matreiðslu miðaldaarfsins, barnauppeldi, bernskuvísindum, kennslufræði og karlmennskurannsóknum.

Að erindinu loknu verður boðið upp á léttar veitingar að hætti hússins.

Allir velkomnir og aðgangur ókeypis.

Gáfu tárin Clinton byr?

Ég ætla að kaupa Moggann í dag

Ég var að fletta Mogganum á kaffistofunni áðan og hann er bara stútfullur af áhugaverðu efni. Strax á forsíðunni eru tvær frábærar fréttir, önnur af konu sem er til í að endurbyggja Laugarveg 4 og 6 á eigin kostnað, dæmi sem borgarstjórn getur ekki hafnað og hin af frábærum árangri í almenningssamgöngum hér á Akureyri. Inní í blaðinu er ítarleg og vel skrifuð fréttaskýring Skafta Hallgrímssonar um reynsluna af ókeypis strætó frá mörgum sjónarhornum og best finnst mér náttúrulega setning Ninju Rutar nema í VMA sem segir að það sé líka menning að nota strætó, þar hitti maður fólk á leið til vinnu og skóla og að margir félaga hennar skilji bílinn eftir heima og fari frítt í strætó í skólann. Þetta er snilld og nú þarf bara að bæta kerfið og auka tíðni ferða.

Auk þess er hellingur af áhugaverðum fréttum í Mogganum, til dæmis skemmtileg grein Einars Fals um "lista með listamönnum" þar sem hann fjallar um artfacts.net (að vísu smá galli að hann gleymir að benda á hvar ég er á þessum frábæra lista sæti, 6.040 af 180.000 og ofar en Georg Guðni og Hrafnkell sjónlistaverðlaunahafi!).

Svo er einnig áhugaverð grein um Obama og Hillary og meira og meira. Ég veit að þessi pistill minn hljómar eins og ömurleg auglýsing eða allavega kostun frá Mogganum en svo er nú ekki. Leiðararnir eru líka eins og venjulega svo ekki sé nú talað um Staksteina sem ég nenni ekki að lesa þó að hann hafi jafnvel líka litið skár út en venjulega.

Það er greinilegt að það er hellingur af færu fólki að vinna hjá Mogganum þó að topparnir (með undantekningum) séu úti að aka. Stundum kaupum við Moggann á laugardögum með Lesbókinni en nú ætla ég að koma við í Strax og kaupa þetta þriðjudagsblað og ekki bara hanga yfir mbl.is þó að það sé nú einnig ágætt.

Ósátt við rökstuðning ráðherra

Bankarnir finna leið til að smyrja á annað

Íslensku bankarnir sem hafa verið duglegir við að innheimta seðilgjöld, þjónustugjöld og aukagjöld ýmiskonar verða sennilega fljótir að finna leið til að smyrja á eitthvað annað svo neytendur þurfa alltaf að borga brúsann á endanum. Gamli allaballinn hann Björgvin viðskiptaráðherra fær samt prik fyrir að beita sér í þessu máli, já og banna seðilgjöldin illræmdu. Þetta uppgreiðslugjald er einnig glæpsamlegt og samkeppnishamlandi.

Íslenskir neytendur eru með þeim slöppustu í heimi og kominn tími til að við tökum okkur tak og gerum eitthvað í málunum, hættum að kaupa drasl sem verið er að okra á og skiptum um banka þegar okkur er nóg boðið. Ég fagna því til dæmis að þýskur sparisjóðabanki ætlar að bjóða upp á lán með lægri vöxtum hér á landi.

Það þarf að efla neytendavitund og stórefla neytendasamtökin svo þau virki hér eins og í öðrum löndum. Gott ef Björgvin Sigurðsson ætlar að fara í það.

Seðilgjöld heyri sögunni til

Frasarnir um fjölda glæpa útlendinga gerðir afturreka

Af umfjöllun úr fjölmiðlum að dæma eru pólverjar á Íslandi glæpamenn upp til hópa. Nú kemur hinsvegar í ljós að þetta er einn stór "misskilningur" því hið rétta er að pólverjarnir sem hér búa eru löghlýðnastir allra, mun löghlýðnari en íslendingar. Þetta er í raun í samræmi við niðurstöður úr rannsóknum frá öðrum löndum. Útlendingarnir eru í flestum tilfellum miklu löghlýðnari en innfæddir.

Það er hinsvegar vel þekkt að öfgahægriflokkar gera í því að fullyrða allt annað og ala þar með á fordómum. Við höfum nýleg dæmi um þetta frá Sviss, Hollandi, Þýskalandi og Danmörku. Í Þýskalandi var vinsælt slagorð hjá þessu þjóðernissinnuðu flokkum "Burt með útlendinga!". Þegar það var bannað þá breyttu þessir öfgahægriflokkar (nýnasistaflokkar eins og DVU) slagorðinu í "KRIMINELLE AUSLANDER RAUS" sem ef til vill er hægt að þýða "Afbrotaútlendingar burt". Þar er eiginlega farið úr öskunni í eldinn því það er einmitt látið að því liggja að útlendingarnir fremji fleiri glæpi en innlendir. Þetta hefur auðvitað verið hrakið með tölfræði en það dugar ekki til, verstu þjóðernissinnarnir halda áfram að bulla. Alveg eins og mér sýnist nokkrir nafnlausir bloggarar gera í tenginu við þessa frétt hér á moggablogginu.

Formaður samtaka Pólverja á Íslandi Witek Bogdanski bendir á í 24 stundum að í fréttum er gjarnan sagt frá því ef útlendingar séu þeir sem frömdu glæpinn en ekkert minnst á hvaðan maðurinn sé (til dæmis úr Kópavogi) ef hann er Íslendingur. Fjölmiðar þurfa að taka sér tak. Framtak Alþjóðahússins að verðlauna Ævar Kjartansson og Hjálmar Sveinsson fyrir afbragðs þætti á Rás 1 um málefni innflytjenda er til fyrirmyndar.

Af gefnu tilefni eru þeir sem skrifa athugasemdir á bloggið mitt eru beðnir um að skrifa undir fullu nafni.

Pólverjar þeir löghlýðnustu

Bjartsýnn á að Ísraelsstjórn fari að lögum

Það ef til vill ofurbjartsýni til en það er alltaf hægt að halda í vonina. Ísraelsstjórn hefur ítrekað þverbrotið alþjóðalög. Óskandi væri að Ísraelar skiluðu landi aftur til Palestínumanna og að friður kæmist á. Það er mikill kraftur í samtökunum Ísland-Palestína og á morgun kemur góður gestur og segir frá ástandinu í landinu. Hér er tilkynning frá samtökunum.

Heimsókn Ali Zbeidat til Íslands
Opinn fundur í Alþjóðahúsinu á morgun - Laugardaginn 5. janúar, kl 14.00


Félagið Ísland-Palestína hefur starfsemi sína á nýju ári með heimsókn blaðamannsins og aktivistans Ali Zbeidat til Íslands og opnum fundi með honum í Alþjóðahúsinu, laugardaginn 5. janúar. Fundurinn hefst klukkan 14:00. Aðgangur er öllum opinn.

Ali Zbeidat er fyrrum pólitískur fangi sem í áraraðir barist fyrir mannréttindum Palestínumanna sem búa innan landamæra Ísraels (stundum kallaðir ísraelskir arabar). Hann hefur ísraelskan ríkisborgararétt og er búsettur í bænum Sakhnin, sem í dag liggur innan landamæra Ísraelsríkis.

Í upphafi fundarins verður sýnd 25 mínútna heimildarmynd um skipulega eyðileggingu á íbúðarhúsum Palestínumanna - en fjölskylda Ali sjálfs hefur átt á hættu að missa heimili sitt eftir að það var úrskurðað ólöglegt af ísraelskum yfirvöldum. Að sýningu lokinni flytur Ali ræðu um Palestínumenn í Ísrael, það er hlutskipti íbúa palestínsku svæðanna sem hertekin voru 1948 og innlimuð í Ísraelsríki. Þá mun hann fjalla um pólitíska fanga í Ísrael, en um ellefu þúsund Palestínumenn; karlar, konur og börn eru nú í ísraelskum fangelsum. Að lokinni ræðu hans verða fyrirspurnir og umræður.

----------------------------------------------------------
Tenglar:

• Apartheid targets Palestinian home-owners inside Israel
  Jonathan Cook fer yfir sögu Ali Zbeidat í mjög góðri grein um hlutskipti Palestínumanna í Sakhnin og annarstaðar innan landamæra Ísraels.
  
  
• The Legal Center for Arab Minority Rights in Israel
  Samtök sem vinna að mannréttindum palestínskra íbúa innan landamæra Ísraels. Beita sér m.a. fyrir jafnrétti til náms og réttindum fanga, veita lögfræðiaðstoð og reka mál gegn lagasetningum sem mismunar fólki á kostnað uppruna þeirra eða trúarbragða.
  
  
• Adameer
  Samtök sem vinna að því að verja mannréttindi palestínskra fanga í Ísrael. Hér má finna margs konar fróðleik og tölfræði, ekki síst um pólitíska fanga.

Bush bjartsýnn á friðarsamkomulag

Joris Rademaker opnar sýningu í Kunstraum Wohnraum á sunnudag

JORIS RADEMAKER

MANNLEG TILVIST

06.01. - 02.03.2008

Opnun sunnudaginn 6. janúar 2008, klukkan 11-13

Opið samkvæmt samkomulagi    


KUNSTRAUM WOHNRAUM           
Hlynur Hallsson • Kristín Kjartansdóttir   
Ásabyggð 2 • IS-600 Akureyri •  [phone]
hallsson(hjá)gmx.net • www.hallsson.de

---

Sunnudaginn 6. janúar 2008 klukkan 11-13 opnar Joris Rademaker sýninguna Mannleg tilvist í Kunstraum Wohnraum á Akureyri. Joris er Hollendingur en hefur fengist við myndlist síðan 1983. Hann var útnefndur bæjarlistamaður Akureyrar árið 2006.
Joris vinnur með blandaða tækni og oft með mismunandi þema í lengri tíma í senn. Þetta er einhverskonar yfirlitssýning inni á heimili þar sem verkin samræmast alvöru og leik heimilisfólksins. Þau eru unnin út frá pússluspilskubbi, og í mismunandi tækni, vatnsliti, veggfóður, sprey, þrykk, málverk, ljósrit, klippimynd og sem objekt eða hlutir.

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Jorisar Rademakers stendur til 2. mars 2008 og er opin eftir samkomulagi og hægt er að hringja í síma 4623744. Nánari upplýsingar um Kunstraum Wohnraum er að finna hér.
 

Joris Rademaker

1977-1983 Myndmenntakennaranám í Tilburg í Hollandi
1983-1986 AKI: Myndlistaskólinn í Enschede í Hollandi
2006 Bæjarlistamaður Akureyrar

Sýningar

1987 Gallery Hooghuis, Arnhem, Holland
1988 Markt 17, Enschede, Noordkunst, Holland
1995 Listasafnið á Akureyri
1995 Slunkaríki, Ísafjörður
1997 Nýlistasafnið í Reykjavík
1997 Deiglan Akureyri, Listasumar 95 á Akureyri
1998 Gallerí+, Akureyri
2002 Slunkaríki, Ísafjörður
2002 Gallerí Skuggi, Reykjavík
2004 Safnasafnið, Svalbarðsströnd
2005 Bókasafn Háskólans á Akureyri
2005 Gallarí gangur, Reykjavík
2005 Gallerí+, Akureyri
2006 Populus Tremula, Akureyri
2006 Karólína Restaurant