Fleiri sem fagna

Það er full ástæða til að fagna sigri Demókrata og ósigri Republikana í kosningunum í Bandaríkjunum. Sérstaklega ánægjulegt að nokkrir nýjir þingmenn með ferska sýn og fjölbreyttan bakgrunn voru kosnir. Það er einnig afar ánægjulegt að Donald Rumsfeld var látinn taka pokan sinn og þó fyrr hefði verið. Ég er sannfærður um að íslenskum skósveinum Bush og félaga verði einnig refsað fyrir fylgisspektina við siðlaust og ólöglegt stríð, í þingkosningunum í vor. Svo bendi ég ykkur á nýjan umæðuvettvang sem var opnaður á netinu í dag hér á Akureyri og heitir pollurinn.net. Og svo fagna ég auðvitað 85 ára afmæli pabba míns Halls Sigurbjörnssonar, í dag. Við komum frá Berlín til Akureyrar með Sterling og IcelandExpress í afmælisveisluna. Til hamingju með þetta allt!

Schwarzenegger fagnar „nýju blóði“ í Washington

Góð þátttaka í forvalinu

Það er afar ánægjulegt að sjá hvað það eru margir sem gefa kost á sér í forvali Vg í Norðausturkjördæmi. Eiginlega vildi maður geta valið fleiri en sex á listann enda er þarna fjöldinn allur af góðu fólki. Hérna er fréttin af vg.is og allir í stafrófsröð:

17 gefa kost á sér í forvali VG í Norðausturkjördæmi

Frestur til að tilkynna um þátttöku í forvali Vinstrihreyfingarinnar græns framboðs í Norðausturkjördæmi rann út  5. nóvember.  Forvalið fer fram með póstkosningu og hafa kjörseðlar nú verið sendir til allra félagsmanna.  Frestur til að skila inn kjörseðlum er til 20. nóvember.  Uppstillinganefnd mun hafa úrslit forvalsins til leiðbeiningar við röðun á framboðslista sem verður lagður fram og endanlega ákveðinn á kjördæmisþingi í desember.

Eftirtaldir aðilar gefa kost á sér til að skipa eitthvert af 6 efstu sætum listans:

Anna Margrét Birgisdóttir, 45 ára kennari, Breiðdalsvík
Ásbjörn Björgvinsson, 49 ára forstöðumaður, Húsavík
Ásmundur Páll Hjaltason, 31 árs vélamaður, Neskaupsstað
Bjarkey Gunnarsdóttir, 41 árs kennari, Ólafsfirði
Björn Valur Gíslason, 47 ára sjómaður, Ólafsfirði
Finnur Dellsén, 22 ára nemi, Akureyri
Hlynur Hallsson, 38 ára myndlistarmaður, Akureyri
Ingibjörg Hjartardóttir, 54 ára rithöfundur, Dalvíkurbyggð
Jóhanna Gísladóttir, 50 ára framkvæmdastjóri, Seyðisfirði
Jón Kristófer Arnarson, 44 ára garðyrkjufræðingur, Akureyri
Jósep Helgason, 31 árs verkamaður Akureyri
Klara Sigurðardóttir, 54 ára skrifstofumaður, Akureyri
Steingrímur J. Sigfússon, 51 árs alþingismaður, Þistilfirði
Trausti Aðalsteinsson, 45 ára framkvæmdastjóri, Húsavík
Þorsteinn Bergsson, 42 ára bóndi, Fljótsdalshéraði
Þórunn Ólafsdóttir, 21 árs nemi, Fáskrúðsfirði
Þuríður Backman, 58 ára alþingismaður, Egilsstöðum

Einnig hafa fjölmargir aðilar haft samband við uppstillinganefnd og lýst áhuga sínum á að skipa eitthvert af neðri sætum listans.

17 gefa kost á sér í forvali VG í Norðaustur-kjördæmi

Fjölmenning og hræðsla

Sem betur fer eru langflestir íslendinga jákvæðir gagnvart fjölmenningu.
Í tilefni af umræðunni um málefni innflytjenda bendi ég á áhugavert erindi sem
Toshiki Toma hélt á dögunum og erindið birtist á Morgunpósti Vg um daginn. Bendi fólki á að lesa það.
Umræðan verður er fljót að fara í hjólför fordóma eins og má sjá á viðbrögðum á síðu Magnúsar Þórs Hafsteinssonar. Það er gott að málefni nýrra íslendinga komist á dagskrá en sú umræða verður að vera fordómalaus og byggð á víðsýni. Við ættum að einbeita okkur að því að skoða hvernig við getum tekið sem best á móti fólki og hvernig þjóðfélagið getur orðið fjölbreyttara og betra með komu nýrra hæfileika og hugmynda en á ekki að snúast um takmörkun eða stýringu.

Það er auðvitað stóriðjustefna ríkisstjórnarinnar sem hefur leitt til þess að hingað koma í miklu mæli erlendir verkamenn. Og stjórnvöld hafa ekki staðið sig í því að lögum um lágmarkslaun sé framfylgt og að komið sé fram við þetta fólk af virðingu. Það bitnar svo aftur á íslensku verkafólki. Það ættu menn að skoða.

Flestir hlynntir fjölmenningu

Lögreglan með byssur?

Það er gott að flestir virðast vera sammála um að það sé ekki gáfulegt að lögreglan á íslandi gangi um með alvæpni. Það myndi einmitt leiða til þess að glæpamennirnir myndu vopnast og alltaf vera skrefi á undan. Jafnvel Björn Bjarnason virðist vera að átta sig á þessu.
Á visir.is segir: "Þeir þingmenn sem tóku til máls voru sammála um það mikilvægt væri að hin almenna lögregla væri óvopnuð áfram og vonandi þyrfti ekki til þess að koma að lögregla þyrfti að vopnast vegna aukinnar hörku glæpamanna."
Annars hafa áherslurnar hjá þessari ríkisstjórn og dómksmálaráðherra verið einkennilegar. Ríkislögreglustjóraembættið hefur bólgnað út á meðan almenn löggæsla er skorin niður.  Það þarf að efla almenna löggæslu, sérstaklega úti á landi og í miðborginni. Annað slagið koma þó jákvæðar fréttir eins og að sérstakt teymi sé í undirbúningi sem á að jafna ágreining og koma í veg fyrir slagsmál. Það er nefninlega oft hægt að koma í veg fyrir átök og glæpi með réttum viðbrögðum lögreglunnar. Þar hjálpa vopn og byssur ekki neitt en almenn lipurð getur gert kraftaverk í samskiptum jafnvel við drukkið fólk.

Almennir lögreglumenn verði áfram óvopnaðir en sérsveitin efld

Sterkar konur í forvali Vg

Það er sérstaklega ánægjulegt að sjá hve margar sterkar og öflugar konur hafa gefið kost á sér í sameiginlegu forvali Vg í Reykjavík og nágrenni. Það gladdi mig sérstaklega að sjá að Guðfríður Lilja Grétarsdóttir, forseti Skáksambands Íslands gefur kost á sér í 2. sætið sem verður örugglega þingsæti ef allt fer eins og það ætti að fara. Og Guðfríður Lilja þekkir innviði Alþingis vel og verður glæsilegur fulltrúi þar, það er ég viss um. Ég las þetta á visi en mbl.is er ekki enn komið með fréttina. Áfram konur!

Stjórnmálamönnum boðið í gönguferð um Ölkelduháls og Hverahlíðar

Eina konan dottin út

Anna Kristín Gunnarsdóttir dettur niður í þriðja sætið á lista Samfylkingar í NV-kjördæmi og hún er nú eina konan sem situr á þingi á móti 9 körlum. Ekki góð tíðindi það. Fyrstu tölur voru mun skárri fyrir konur og Samfylkinguna og Helga Vala vinkona var í þriðja sæti en þegar úrslit liggja fyrir er hún ekki á meðal fjögurra efstu.Allt útlit er fyrir að þrír karlar raði sér upp hjá Sjöllunum svo nú verðum við Vinstri græn að fá öfluga konu í annað sætið á eftir Jóni Bjarnasyni og ná inn að minnsta kosti tveimur fulltrúum og bjarga andliti Norðvesturkjördæmis! Mér skilst að einn þingmaður flytjist úr þessu kjördæmi í Kragann. Þá er bara að bretta upp ermarnar.

Öll atkvæði talin í NV-kjördæmi; Guðbjartur sigraði

7 karlar, 2 konur

Maður verður feginn þegar þetta prófkjör Sjallanna í Borginn verður endanlega afstaðið enda eru fréttir og auglýsingar orðnar dálítið þreytandi. D-flokkurinn er með níu þingmenn í Borginni og samkvæmt þessum tölum eru það sjö karlar og aðeins tvær konur sem skipa þessi sæti. Semsagt enn einn bömmerinn fyrir konur í þessum ójafnaðarflokki. Og kosningaþátttakan er innan við 50% sem hlýtur einnig að vera áhyggjuefni fyrir Flokkinn. Enda reikna menn með að Sjálfstæðisflokkurinn tapi miklu fylgi í Borginni.

Röð efstu manna breytist

Höfuðborgarstefnan

Oft er talað um byggðastefnu hitt og byggðastefnu þetta og jafnvel "landsbyggðarstefnu". Staðreyndin er hinsvegar sú að ríkisstjórn Framsóknarflokks og Sjálfstæðisflokks rekur harða höfuðborgarstefnu.
Lítum á nokkur dæmi: Á tillidögum er gjarnan talað um að "flytja störf út á land". Tölurnar tala hinsvegar sínu máli og á síðustu árum hefur opinberum störfum úti á landi fækkað en hinsvegar fjölgað stórlega á höfuðborgarsvæðinu. Þetta er reyndar í hróplegu ósamræmi við gamalt og þreytt slagorð Sjálfstæðisflokksins um "báknið burt!" enda eru þeir sjálfir báknið og vilja auðvitað "báknið kjurrt". Það væri upplagt að ráða í ný störf á vegum ríkisins utan höfuðborgarinnar til að rétta af hallann en það er ekki gert. Ég benti Halldóri Ásgríms á þetta þegar hann var ennþá forsætisráðherra og var að mæla fyrir frumvarpi um að skella nokkrum stofnunum á sviði mætvæla í eina. Þá var upplagt tækifæri að ákveða að þessi nýja stofnun hefði höfuðstöðvar utan borgarinnar en Halldór tók heldur dræmt í það og sagði að nýr forstöðumaður ætti að ákveða svona nokkuð. Semsagt í Borginni.
Sama má segja um Lýðheilsustöð. Það var ný stofnun sem tilvalið hefði verið að setja á laggirnar til dæmis á Akureyri þar sem allar aðstæður eru kjörnar fyrir þessa heilsutengdu starfsemi. Það vantaði aðeins pólitíska ákvörðun um málið og niðurstaðan varð auðvitað sú að Lýðheilsustöð var staðsett í Reykjavík eins og stjórnarflokkarnir vildu greinilega.

Og enn eitt dæmi eru menntamálin. Háskólinn á Akureyri er fjársveltur. Skólinn getur ekki tekið við nema hluta þeirra nemenda sem sækja um nám. Það hefur þurft að skera endalaust niður. Ef skólinn hefði fengið að vaxa og dafna hefði nemendahalli milli höfuðborgar og landsbyggðar verið réttur af. En það má ekki, HA er haldið í spennitreyju. Það þýðir því lítið fyrir frambjóðendur stjórnarflokkanna hér úti á landi að koma núna og þykjast ætla að breyta einhverju. Þessir flokkar hafa haft 12 og 16 ár til þess að snúa öfugþróuninni við en þeir hafa gert illt verra. Nýjir fulltrúar þessara flokka breyta heldur ekki neinu. Þess vegna er rétt að senda þá í löngu verðskuldað frí og velja hreyfingu sem raunverulega vill rétta af hluta landsbyggðarinnar, Vinstrihreyfinguna grænt framboð.

Prófkjör Sjálfstæðismanna í Reykjavík fer vel af stað

Moggablogg

Það vantar bara í lokin á þessari frábæru frétt að vísa í moggabloggsíðuna mína. Akureyri.net gerir það skilmerkilega en mbl.is gleymdi því svo ég geri það bara hér með :)

Hlynur Hallsson gefur kost á sér í forvali Vinstri grænna

Gef kost á mér í forvali Vinstri grænna í Norðausturkjördæmi

Ég hef ákveðið að gefa kost á mér í forvali Vinstrihreyfingarinnar græns-framboðs í Norðausturkjördæmi fyrir Alþingiskosningarnar vorið 2007. Á síðustu árum hef ég tekið virkan þátt í starfi Vinstri grænna og er viss um að stefna Vg um jöfnuð, kvenfrelsi, umhverfisvernd og sjálfstæða utanríkisstefnu eigi stóraukið fylgi meðal fólks. Við þurfum að hverfa frá einkavinavæðingu Framsóknar- og Sjálfstæðisflokks og snúa við þeirri öfugþróun sem leitt hefur til aukins ójöfnuðar í þjóðfélaginu sem hefur stóraukist í ríkisstjórnartíð þessara flokka. Ég er sannfærður um að stjórnarandstöðunni muni takast að fella þessa flokka ójöfnuðar í kosningunum næsta vor og vil leggja mitt lóð á vogarskálarnar til að svo megi verða. Það er grundvallaratriði að Vinstrihreyfingin grænt-framboð vinni afgerandi kosningasigur í vor.

Ég hef verið varamaður Steingríms J. Sigfússonar og Þuríðar Backman á Alþingi á þessu kjörtímabili og tekið sæti þrisvar sinnum. Á þeim tíma hef ég meðal annars lagt fram þingsályktunartillögu um gerð Vaðlaheiðagangna, lagt áherslu á stóraukin framlög til Háskólans á Akureyri og til menntamála almennt, lengingu flugvallarins á Akureyri og beint millilandaflug frá Egilsstöðum og Akureyri og bætta aðstöðu ferðaþjónustunnar á Norður- og Austurlandi. Umhverfismál, atvinnumál, menningarmál og byggðamál eru mér afar hugleikin.

Ég er kvæntur Kristínu Kjartansdóttur félags- og sagnfræðingi og við eigum þrjú börn, Huga 15 ára, Lóu Aðalheiði 9 ára og Unu Móeiði 1 árs gamla. Við fluttum aftur til Akureyrar árið 2001 eftir átta ára búsetu í Þýskalandi. Ég fæddist á Akureyri árið 1968, yngstur sjö systkina. Foreldrar mínir eru Aðalheiður Gunnarsdóttir húsmóðir og fyrrverandi verkakona og Hallur Sigurbjörnsson fyrrverandi skattstjóri. Ég lauk stúdentsprófi frá Menntaskólanum á Akureyri 1988 og vann sem leiðbeinandi og á leikskóla, en einnig við Ríkisútvarpið á Akureyri og á Rás 2. Stundaði myndlistarnám við Myndlistarskólann á Akureyri og Myndlista- og handíðaskóla Íslands og framhaldsnám í myndlist í Þýskalandi.

Ég hef kennt við Listaháskóla Íslands og Myndlistarskólann á Akureyri, en fyrst og fremst starfað sjálfstætt sem myndlistamaður. Í starfi mínu hef ég öðlast víðtæka reynslu af félagsmálum, menntamálum og menningarmálum og kynnst fjölda fólks enda snýst myndlist mín að verulegu leiti um samskipti. Ég var formaður svæðisfélags Vg á Akureyri frá 2002 - 2004 og kosningastjóri Vinstri grænna í bæjarstjórnarkosningunum á Akureyri fyrr á þessu ári.

Frestur til að tilkynna um þátttöku í forvalinu er til 5. nóvember og nánari upplýsingar um framkvæmd forvalsins eru á vg.is