Krúttlegasta álver í heimi

Hér er frábær mynd af krúttlegu "litlu" álveri sem á að rísa í Helguvík, helst sem fyrst. Það er ótrúlega sætt, mengar lítið, sést varla og geltir ekki. Það eru tré allt í kringum það (að vísu eitthvað daufleg) og fólk að ganga, börn að hlaupa og hellingur af fuglum að dást að því. Þetta er frábært. Jón Sig. stoppformaður og Geir H aðalformaður eru grænir af öfund yfir þessu krúttlega álveri sem stóriðjustefnan þeirra á engan þátt í að koma á koppinn. Þetta er næstum fullkominn heimur sem við lifum í.

Hitaveita Suðurnesja og Norðurál undirrita orkusamning vegna álvers í Helguvík

Krossfestur súkkulaði Jesú

Myndlistin getur greinilega ýtt við fólki enn í dag og gjarnan eru það fréttir af vettvangi myndlistar í Bandaríkjunum þar sem einhverjar sýningar eru bannaðar sem komast í fréttirnar. Þannig var það með verk myndlistarmannsins Cosimo Cavallaro af súkkulaði líkneski af hangandi manni sem auðvitað er tilvísun í hann Jesú hangandi á krossinum. Í frétt á mbl.is segir: "Í New York varð sýningarhús að hætta við að sýna styttu af Jesús úr súkkulaði, sem ber nafnið My Sweet Lord. Er þar leikur að orðum, þar sem titillinn getur bæði útlagst sem „Minn ljúfi herra“ eða „Minn sæti herra“. Höfundur verksins, Cosimo Cavallaro, sagði laugardaginn síðastliðinn að honum hefðu borist hótanir vegna verksins. Á hinn bóginn hefðu þúsundir tölvupósta borist honum frá fólki sem vildi veita honum stuðning með einum eða öðrum hætti."

Og svo er það myndlistarneminn David Cordero sem heldur betur hefur slegið í gegn með verkinu "Blessing". Þetta er víst stytta úr pappamassa af bandaríska öldungadeildarþingmanninum og forsetaframbjóðandanum Barak Obama, í kufli með bláan geislabaug. Obama er sallarólegur yfir verkinu en talskona Obama, Jen Psaki, segist halda að listamaðurinn hafi ekki ætlað að móðga neinn með verkinu. Obama sé ekki hrifinn af þeirri list yfirleitt sem feli í sér móðgun í garð trúarbragða. Þar höfum við það á föstudaginn langa.

Umdeild pappastytta af Barak Obama í kufli með geislabaug

Carsten Höller er flottur

Myndlistarmaðurinn (og íslandsvinurinn) Carsten Höller er lang skemmtilegastur. Þessar rennibrautir eru frábærar og listræn upplifun að taka salíbunu í þeim. Tvær eru í Kunstwerke í Berlín og önnur fer út úr húsinu og aftur inn og það er ansi skemmtilegt að renna sér niður af annarri hæð og enda á jarðhæð í bókasafninu. Mæli eindregið með því að allir sem eru á leið til London komi við í Tate Modern og renni sér nokkrar ferðir. Myndlist getur verið svo skemmtileg.

Listrænar rennibrautir í London

TAKK FYRIR ALLT ÁLIÐ

Nú er Veggverkið klárt og hægt að skoða nýjar myndir á veggverk.org. Ég gekk frá þessu um hádegið í gær rétt áður en við tókum vél til Eyja með stuttu stoppi í Borginni. Lóa Aðalheiður er 10 ára í dag og mikið fjör hjá ömmu og afa. En semsagt ég er afar ánægður með Vegginn og verkið þó að þetta hafi verið mun meiri vinna en ég átti vona á. Viðbrögðin hafa heldur ekki látið á sér standa! Ef einhver hefur áhuga á að skoða önnur og eldri verk þá er tilvalið að skoða heimasíðuna sem ég þarf reyndar að fara að uppfæra:)

Veggverk að verða klárt - spreyjað í dag

 

Þrátt fyrir hávaða rok hér fyrir norðan þá mjakast álklæðningin á (og reyndar einnig smá partur af) og í dag ætla ég að spreyja nokkrar vel valdar þakkir til álrisanna á vegginn.  Hallur Gunnarsson er búinn að uppfæra síðuna veggverk.org og hann tók ansi fína mynd í sólinni í gær. 

ÞaÐ er ekki fallegt að sjá Hljómskálann svona útkrassaðann og ég legg til að lausn verði fundin á málinu og rætt við flottustu graffity listamenn borgarinnar og þau fengin til að koma með hugmyndir. Lúðrasveitin hlýtur að geta fengið smá hluta af þessum 300 milljónum sem Vilhjálmur borgarstjóri ætlaði að setja í "herferð gegn veggjakroti". Bendi á góða grein Ingólfs Jóhannessonar um "stóra veggjakrotsvandann.

„Höfum varla efni á að mála“

Aðalsteinn Þórsson opnar sýninguna Mána málverkin á Café Karólínu

Laugardaginn 7. apríl klukkan 14 opnar Aðalsteinn Þórsson sýninguna Mána málverkin á Café Karólínu.
Café Karólína opnar nú klukkan 10 alla virka morgna með morgunmat en klukkan 12 á laugardögum og sunnudögum.

Mána málverkin eru góðar og fallegar myndir eftir myndlistamanninn Aðalstein Þórsson. "Sem með þessari seríu telur sig hafa unnið sigur í hinu eilífa stríði, í höfði sér um listræn gildi og kreddur, sem hefur plagað hann um hríð."

Aðalsteinn er starfandi myndlistamaður. Búsettur í Hollandi, fæddur og uppalinn í Eyjafirðinum. Hann stundaði myndlistanám við Myndlistaskólann á Akureyri, í Finnlandi og Hollandi. Hann sýnir reglulega, Þetta er í þriðja sinn sem  Aðalsteinn sýnir á Café Karólínu.
Um list sína segir Steini “list mín snýst alltaf um samband hinns skapandi einstaklings, gagnvart umhverfi sem hefur ekki þörf fyrir sköpunarverkið”.  

Vefsíða Aðalsteins er http://steiniart.com

Nánari upplýsingar veitir Aðalsteinn: kristnes(hjá)hotmail.com

Aðalsteinn verður viðstaddur opnunina.
Sýningin á Café Karólínu stendur til 4. maí 2007. Allir eru velkomnir á opnun laugardaginn 10. mars 2007, klukkan 14.

Á sama tíma stendur yfir sýning Jónasar Viðars á Karólínu Restaurant.

Næstu sýningar á Café Karólínu:

05.05.07-08.06.07        Edda Þórey Kristfinnsdóttir
09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Umsjónarmaður sýninganna er Hlynur Hallsson

Veggverkið að verða klárt, álið svínvirkar!

10 stiga hiti, sól og blíða hér á Akureyri í morgunsárið og vonandi ekki of hvasst í Glerárgötunni því ég ætla loksins að klára Veggverkið.Við ætluðum að klára þetta í gærkvöldi en þá var hávaðarok og ekkert hægt að gera. Hér er samt ein mynd sem Hallur tók í gær og seinna í dag verður vonandi komin endanleg mynd á þetta og allir geta skoðað á veggverk.org.

Veðurspámaðurinn Grímur

Grímur Gíslason, fréttaritari Ríkisútvarpsins á Blönduósi er látinn. Hann varð 95 ára og var ern og hress maður. Margir munu sakna veiðipistlanna hans með tölununum úr Blöndu og ánum í Austur-Húnavatnssýslu ásamt öllum skemmtilegu fréttapistlunum. Grímur starfaði sem veðurathugunarmaður í 25 ár og lét af starfinu árið 2003. Hann var fréttaritari Ríkisútvarpsins til síðast dags og lokaorð hans voru ætíð: "Þetta er Grímur Gíslason sem talar frá Blönduósi". Á síðasta ári var honum til heiðurs reist afsteypa af veðurspámanninum eftir Ásmund Sveinsson í miðbæ Blönduósbæjar. Ég kynntist Grími þegar ég vann hjá Ríkisútvarpinu á Akureyri fyrir 15 árum og hann var skemmtilegur heim að sækja. Myndina af veðurathugunarmönnunum fékk ég lánaða af síðu Jóns Sigurðssonar sem er fréttaritari Morgunblaðsins á Blönduósi.

Grímur Gíslason á Blönduósi látinn

Kosningarnar fara vel af stað

Það er ágætis þátttaka í kosningunum í Hafnarfirði og það er vel. Rúmlega 2000 búnir að kjósa utankjörfundar og á fyrsta klukkutímanum í morgun af þeim rúmlega 16.000 sem eru á kjörskrá. Ég hvet alla hafnfirðinga sem hafa kosningarétt til að mæta á kjörstað og segja skoðun sína á þessari fyrirhuguðu risastækkun. Þið getið markað tímamót.

Það er enn hávaðarok hér fyrir norðan en ég ætla samt að halda áfram með álklæðninguna á VeggVerki klukkan hálf fjögur og eitthvað frameftir.

Kosið um framtíð álversins í Hafnarfirði

Góður dagur til að kjósa

Hafnfirðingar fjölmenna vonandi á kjörstað í dag til að kjósa. Ég hef ekki kosningarétt og ætla þessvegna bara að þekja einn húsvegg með áli og spreyja smá á hann. Það er að vísu rok núna hér á Akureyri en lægir vonandi um hádegi og þá geta akureyringar og aðrir fylgst með. Hér er fréttatilkynning um verkið:

Hlynur Hallsson
Drulla - Scheisse - Mud
VeggVerk
31.03. - 25.05.2007
www.veggverk.org

Í dag laugardaginn 31. mars setur Hlynur Hallsson upp verkið "Drulla - Scheisse - Mud" á vegg á mótum Strandgötu og Glerárgötu á Akureyri. VeggVerk sem einnig er hægt er að sjá á slóðinni www.veggverk.org hefur verið starfrækt af Halli Gunnarssyni frá því síðasta haust og er sýning Hlyns sú þriðja í röðinni. Áður hafa Jóna Hlíf Halldórdsdóttir og Werner Berger ásamt Timothy Murphy sýnt á veggnum.

Verk Hlyns Hallssonar er gert í tilefni af því að í dag kjósa Hafnfirðingar um hvort stækka eigi álver Alcoa í Hafnarfirði eða halda því óbreittu. Hlynur mun klæða vegginn með áli og veggfóðra þannig yfir verk þeirra Werner Bergers og Timothy Murphy´s sem er málverk með textatilvitnun í Nelson Mandela eða öllu heldur Marianne Williamson. Hlynur ætlar því næst að spreyja á álið setningarnar:

TAKK FYRIR ALLT ÁLIÐ
VIELEN DANK FÜR DAS GANZE ALUMINIUM
THANKS FOR ALL THE ALUMINIUM

Hlynur segir:
"Verkið er óður til álrisanna og þakklæti fyrir allt álið sem þeir hafa fært okkur, eða kannski öllu heldur súralið frá Ástralíu. Takk fyrir allar einnota umbúðirnar sem eru síðan framleiddar úti í heimi og ameríkanar henda svo án þess að endurvinna. Takk fyrir að kaupa af okkur rafmagn fyrir brot að því sem annar iðnaur þarf að borga, hvað þá almenningur. Takk fyrir alla mengunina. Takk fyrir að skapa deilur í samfélaginu. Takk fyrir stuðla að hárri verðbólgu og háum vðxtum á lánunum okkar og takk fyrir að að því að hrekja önnur fyrirtæki úr landi. Takk fyrir þetta allt. Takk, bara takk."

Hlynur Hallsson hefur gert fjölda af spreyjverkum á undanförnum árum á sýningum í Marfa í Texas, München, Berlín, Kumamoto, Feneyjum, Kaupmannahöfn, Malmö, Reykjavík, Akureyri og nú stendur einmitt yfir sýning á verkum Hlyns á Gráa svæðinu í Þelamerkurskóla þar sem hann hefur spreyjað á vegg skólans. Það verk sem heitir "Skólinn - Die Schule - The School". Hægt er að skoða nokkur þessara verka og mörg fleiri á heimasíðu Hlyns: www.hallsson.de
Hlynur bloggar einnig á www.hlynur.is

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur sett upp um 50 einkasýningar og tekið þátt í um 70 samsýningum. Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2005. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var bæjarlistarmaður Akureyrar árið 2005.
Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, gönguferðir eða snjóhúsbygging geta verið efniviður í verkum hans en einnig landmæri, samskipti fólks og viðhorf okkar.

Sýning Hlyns á VeggVerk stendur yfir til 25. maí 2007 og er öllum opin. Hlynur mun vinna við að setja upp verkið milli 12 og 16 í dag laugardag og fyrir þá sem ekki komast og eru til dæmis staddir í Hafnarfirði er hægt sjá myndir og fylgjast með uppsetningunni og svo fullbúnu verkinu á www.veggverk.org

Úrslit í Hafnarfirði gætu legið fyrir kl. 21 til 22