Rífandi stemning hjá VG

Það er frábært að vera á Flúðum að fagna góðum árangri úr kosningunum og leggja drög að enn meiri sigrum á næstu misserum. Það skiptir líka miklu máli að veita aðhald og tala áfram fyrir góðum málum. Þessi ríkisstjórn lofar heldur ekki góðu og virðist verða framlenging á fyrri leiðindastjórn. En það verður bara enn skemmtilegra í stjórnarandstöðunni og gott að vera stærsti flokkurinn þar. Það ríkir mikill einhugur í Vinstrihreyfingunni grænu framboði og menn skemmta sér yfir staksteinum (úr glerhúsum). Svo eru sumir auðvitað að vorkenna vinstrisinnunum í Samfó sem hljóta að fara að átta sig.

Það verður rætt saman til ellefu í kvöld og áfram í fyrramálið. Ég hlakka til síðsumarferðar hér á morgun. Þetta verður góð dagsferð um hluta Þjórsár undir leiðsögn Bjargar Evu Erlendsdóttur sem lýkur með grilli.

Steingrímur: Hlutverk VG að vera mótvægi við Sjálfstæðisflokkinn

Athugasemdir

[Jón Ingi Cæsarsson, 1.9.2007 kl. 00:34]

Það er ekki undarlegt þó það sé rífandi stemming...enn ein fjögur árin í stjórnarandstöðu og áhrifaleysi hjá formanninum...til hamingju með það og gott að þið gleðjist :-)

[Ingólfur Ásgeir Jóhannesson, 1.9.2007 kl. 12:02]

Leitt að geta verið með ykkur, Hlynur, vegna pestar sem hefur verið að ergja mig undanfarna daga. Hér hellirignir fyrir norðan, en ég heyrði í spánni að það myndi stytta upp jafnskjótt og vinstri græn væru tilbúin til að ganga. Rigningin hér á Akureyri núna er samt gott veður.

[Hlynur Hallsson, 1.9.2007 kl. 21:13]

Það rættist heldur betur úr veðrinu Ingólfur og þetta var frábær ganga og fjöldi heimamanna bættist í hópinn og svo var okkur boðið í kaffi og móttökur voru stórkostlegar. Fólk sem áður kaus íhaldið ætlar ekki að gera það í framtíðinni því þau vita hverjir standa með þeim þegar á reynir. Bestu kveðjur,

[Jóhannes Ragnarsson, 2.9.2007 kl. 13:19]

Það er fremur sjaldgjæft að ég sé sammála Staksteinum Moggans. En síðastliðinn laugardag bregður svo við, að ég get ekki annað en tekið undir staksteinapistil þar sem félaga Steingrími J. og hans vinum í VG er lýst sem hreinum og beinum glópum varðandi óskiljanlegt stefnuleysi þeirra á sviði verkalýðsbaráttu, sem ætti aða öllu eðlilegu að vera grundvallaratriði hjá stjórnmálaflokki sem kallar sig ,,vinstrihreyfingu" og segist í orði kveðnu vera ,,róttækur vinstriflokkur." En gefum Staksteinum orðið: ,,Steingrímur J. gerði þessu grundvallaratriði engin skil. VG sýnir þessu engan áhuga. Hvað er orðið um hugsjónir þess fólks, sem skipar raðir VG? Er engin tilfinning lengur í þessum flokki fyrir hagsmunum alþýðu manna á Íslandi? Snýst pólitíkin bara um af hverju VG tapaði, hversu vond Samfylkingin er og að VG sé orðinn þriðji stærsti flokkur þjóðarinnar? Vinstri grænir eru ráðvilltur og stefnulaus flokkur. Því miður. Þeir vita ekki hvar þeir eru og hvert þeir eiga að fara. Allra sízt formaðurinn."

[Hlynur Hallsson, 3.9.2007 kl. 08:56]

Ég myndi hafa meiri áhyggjur af því að vera sammála Stakstenum úr glerhúsi Moggans, Jóhannes. Ég bendi þér bara á að lesa góðan pistil Árna Þórs um málið. Bestu kveðjur,

[Jóhannes Ragnarsson, 3.9.2007 kl. 18:16]

Hef lesið og afgreitt pistil Árna Þórs. Sjá: http://joiragnars.blog.is/blog/joiragnars/entry/301860/