Allt frá fundarsköpum til mótmæla

Ung vinstri græn eru flott. Ég leit við hjá þeim hér á Akureyri á hörkufundi þar sem mætt voru um 30 manns. Þar var verið að ræða um stefnur og strauma í stjórnmálum og það er gott að það er öflugur hópur ungs fólks sem hefur hugsjónir og er tilbúið að taka þátt í lýðræðinu af krafti. Um þriðjungur af félögum í Vinstrihreyfingunni grænu-framboði er yngri en 30 ára og það sýnir að þetta er ung og kröftug hreyfing sem á framtíðina fyrir sér. Það er heldur engin tilviljun að ungt fólk fylki sé um Vinstri græn en ekki einhvern þreyttu flokkanna. Hjartað slær til vinstri!

Laugardaginn 12.apríl standa  Ung vinstri græn á höfuðborgarsvæðinu fyrir "Stjórnmálaskóla" í húsakynnum Vinstri grænna í Hamraborg 1-3 í Kópavogi klukkan 11:00. Þar verður margt skemmtilegt og fróðlegt á dagskránni:

Saga og stofnun VG:
Ögmundur Jónasson, þingmaður VG, flytur erindi og leiðir umræður í kjölfarið.
-Hádegishlé:
Hádegisverður í boði UVG fyrir svanga „nemendur“.
-Stefna VG og UVG:
Katrín Jakobsdóttir varaformaður VG og Elías Jón Guðjónsson varaformaður UVG kynna stefnu VG og UVG og leiða í kjölfarið umræður.
-Fundir og mótmæli:
Kristján Ketill Stefánsson og Þórhildur Halla Jónsdóttir fjalla um allt frá fundarsköpum til mótmæla.
-Ungt fólk í stjórnmálum:
Brynja Björg Halldórsdóttir, formaður Ungra vinstri grænna í Reykjavík, segir frá sinni aðkomu og ungs fólks almennt að stjórnmálum.

Um kvöldið verður róttæk, friðsöm, umhverfisvæn og femínísk skemmtun.

Og svo er útgáfufagnaður í kvöld klukkan 21 á Grand Rokk meira um það hér. 

Áfram UVG! 

Financial Times: Saving Iceland

Það er gott að blaðamenn á Financial Times hafa enn húmorinn í lagi. Þetta er afar skemmtileg grein undir fyrirsögninni Saving Iceland sem er í raun nóg til að fá alla álbræðslusinna til að snúa sér við í gröfinni. En ef til vill er eitthvað til í þessum pælingum Robert Shrimsley.

Af öllum þá eru það semsagt þjóðverjar sem fá að innlima Ísland inn í stærra dæmi, (semsagt hægkvæmni stærðarinnar) þeir munu bjarga okkur!: "As part of the deal Germany gets to annex Iceland for the knockdown price of 2 krona a share - giving it an equity value of $250m - and all but wiping out the country's shareholders"

Baldur nokkur Fjönisson birtir greinina í heild sinni hér.

Íslandi bjargað!

Ágúst Þór Árnason fjallar um mynd mannsins á Amtsbókasafninu

 

Áhugverð fyrirlestraröð heldur áfram á Amtsbókasafninu hér á Akureyri í dag.  Ágúst Þór Árnason hjá HA fjallar um "Mynd mannsins í fræðum laga og réttar" Hér er tilkynning frá Félagi áhugafólks um heimspeki, Amtsbókasafninu, Háskólanum á Akureyri og Akureyrarstofu:

Fyrirlestur fimmtudaginn 27. mars
kl. 17.00 á Amtsbókasafninu á Akureyri

Mynd mannsins –
í fræðum laga og réttar

Hugtakið „mynd mannsins” er þverfaglegt fyrirbæri af þeirri einföldu ástæðu að engin ein grein fræða og/eða vísinda getur gefið viðhlítandi mynd af manninum jafnvel þótt henni sé aðeins ætlað að takmarka sýnina við það hvernig maðurinn birtist í viðkomandi grein. Maðurinn í fræðum laga og réttar getur verið í flestum þeim kringumstæðum sem lífið býður upp á. Hann getur verið foreldri, eigandi, bótaþegi, ráðherra, prestur eða dómari. Í erindi sínu veltir Ágúst Þór Árnason því fyrir sér hvort hægt sé að fá einhverja heildarmynd af manninum sem viðfangsefni laga eða hvort myndin sem við getum lesið út úr lagaverkinu verði aldrei annað en lítið brot af þeirri hugmynd sem við höfum flest um fyrirbærið manninn.

Ágúst Þór Árnason er aðjúnkt við Félagsvísinda- og lagadeild Háskólans á Akureyri þar sem hann hóf störf sem verkefnastjóri árið 2002. Hann hefur m.a. unnið að undirbúningi meistaranámsbrautar í heimskautarétti sem hefst næsta haust. Ágúst var gestafræðimaður við Centre for Advanced Study í Ósló 2001-2002. Hann var við doktorsnám við Johann Wolfgang Goethe-Universität, Frankfurt am Main 1998-2001. Fyrrihlutanám í heimspeki, lögfræði og stjórnmálafræði við Die Freie Universität, Berlin 1985-89; seinni hluti (meistaranám) 1989-91 við sama skóla. Framkvæmdastjóri Mannréttindaskrifstofu Íslands 1994-2001 (náms- og rannsóknarleyfi 1998-2001). Fréttamaður á Ríkisútvarpinu 1991-94. Fréttaritari RÚV í Þýskalandi 1989-1991 og Bylgjunnar 1986-89. Verkefnastjóri á aðalskrifstofu Alþjóðlegra ungmennaskipta í Berlín 1983-85 og framkvæmdastjóri Alþjóðlegra ungmennaskipta (AUS) á Íslandi 1980-83.

Brandaralistinn

Þessi "hagsældar- og stöðugleikalisti" einhvers bresks fyrirtækis er fullkominn brandari. Best er náttúrulega að mesta hagsældin og stöðugleikinn skuli vera í Páfagarði! Það hlýtur að vera bömmer fyrir okkur að vera miklu neðar á listanum en Bretland, voða hægsæld þar í landi síðast þegar ég vissi. Annars eru smáríki áberandi á þessum vinsældalista eins og Gíbraltar og San Marínó sem eru langt fyrir ofan okkur og Samóa, Falklandseyjar, Guam, Anguilla og Montserrat sem lenda aðeins fyrir neðan okkur. Greinilega best að fjölga smáríkjum til að auka hagsæld og stöðugleika.

Já, já og við erum líka hamingjusömust og best í heimi. Það er einhver fyrirsagnahöfundur á mbl.is sem er í stuði með þessa fyrirsögn "Mikil hagsæld og stöðugleiki á Íslandi".  Þetta er ótrúlega gott.

Mikil hagsæld og stöðugleiki á Íslandi

Forsendur kjarasamninga brostnar - verðbólgan á hraðri uppleið

Og þessi ríkisstjórn ætlar bara að horfa á Reykjavík brenna og spila á gítar eða söngla eitthvað á meðan. Þessi efnahagsvandi er heimatilbúinn og sökudólgurinn er stefna Sjálfstæðisflokksins með fjármálaráðherra og forsætisráðherra fremsta í flokki. Árni Matt hvetur að meira segja til þess að hellt sé olíu á eldinn og sullað einu álveri upp í viðbót. En sennilega kýs bara 40% þennan flokk áfram. Af því bara eða til að halda í "stöðugleikann". Og Samfó hjálpar til enda tekið við hlutverki Framsóknarflokksins sem hækjan.

Forsendur samninga að bresta?

KEA kemur áfram að uppbyggingu á Akureyri

Það eru afar ánægjuleg tíðindi að KEA skuli koma að endurbyggingu á Hafnarstræti 98. KEA er ekki óvant slíkum verkefnum því á síðasta ári var Bögglageymslan endurgerð glæsilega og hýsir nú veitingastaðinn Friðrik V.

Það er gott að það tókst að bjarga götumynd Hafnarstrætis þó að það hefði verið á elleftu stundu. Vonandi tekur endurbyggingin skamman tíma og þá mun fólk sjá að enn ein perlan í miðbæ Akureyrar hefur verið fægð. Vissulega vildi ég frekar sjá íbúðir á efri hæðum hússins því það þarf að fjölga íbúum í miðbænum en það er ljómandi að hafa verslanir og þjónustu á jarðhæðinni. Og vonandi verður aðstaða Vinstri grænna áfram á jarðhæðinni. Til hamingju með þetta.

KEA kaupir Hafnarstræti 98

Kolsvört skýrsla frá greiningardeild Listasafnsins á Akureyri

LISTASAFNIÐ Á AKUREYRI KYNNIR

Bæ bæ Ísland
Uppgjör við gamalt konsept
Laugardaginn 15. mars nk. verður opnuð í Listasafninu á Akureyri sýningin „BÆ BÆ ÍSLAND” sem er átaksverkefni tuttugu og þriggja myndlistamanna og fjölmargra annarra sem vilja ræða landsins gagn og nauðsynjar með einum eða öðrum hætti. Höfundur verkefnisins og sýningarstjóri er Hannes Sigurðsson.

Listamennirnir sem eiga verk á sýningunni í Listasafninu eru Ásmundur Ásmundsson, Berglind Jóna Hlynsdóttir, Bryndís Snæbjörnsdóttir & Mark Wilson, Erling Þ. V. Klingenberg, Hallgrímur Helgason, Hannes Lárusson, Hlynur Hallsson, Inga Svala Þórðardóttir & Wu Shan Zhuan, Kolbeinn Hugi Höskuldsson, Libia Pérez de Siles de Castro & Ólafur Árni Ólafsson, Magnús Sigurðarson, Ólafur Sveinn Gíslason, Ólöf Nordal, Ósk Vilhjálmsdóttir, Rúrí, Steingrímur Eyfjörð, Unnar Örn Auðarson & Huginn Þór Arason, Þorvaldur Þorsteinsson og Þórdís Alda Sigurðardóttir.

Sem sjá má er hér smalað saman í öflugan her fólks sem er allt annað en skoðanalaust um „verkefnið Ísland” og hvernig því hefur verið umturnað á síðustu tveimur áratugum. Því Íslandi hefur verið umbylt og í þeirri byltingu eru lykilorðin einkavæðing, kvótakerfi, misskipting, útrás, græðgi, þrælsótti, innflytjendur og stóriðja. Allt gott og blessað en afleiðingin er að nú má segja að landið byggi þrjár þjóðir, þ.e. milljarðamæringar, íslenskt alþýðufólk og innflytjendur.

Heiti verkefnisins, „Bæ bæ Ísland”, vísar í fyrsta lagi til kveðjuhófs eða útfarar um 19. og 20. aldar hugmyndarinnar um Ísland. Það sem í gær var unga Ísland er nú tákn hins liðna. Bless bless (hin kristilega blessun) víkur fyrir hinu ennþá óformlegra bæ bæ og vitnar um leið um það hvernig íslenskan er farin á límingunum. Í öðru lagi hljómar bæ eins og sögnin að kaupa (buy) á ensku og verður því til eins konar undiráróður: „Kaupum kaupum Ísland!” „Bæ bæ Ísland” er þannig uppgjör við hugmyndina um tunguna sem upphaf og endi sögulegrar tilvistar þjóðarinnar, sem og möguleika hennar til að lifa af menningarlega útjöfnun hnattvæðingarinnar.

Verkefninu „Bæ bæ Ísland” tengist fólk sem er óhrætt við að segja meiningu sína í salarkynnum tjáningarfrelsisins. Þetta er fólk sem getur skilgreint sig á báðum vígstöðvum, í hinu gamla sem og hinu nýja, staðbundið og heimsvætt, hvort heldur sem er á sjó eða landi, á leikskólum eða í bönkum. Alvarleiki, sem dottinn er úr tísku, er hér settur á oddinn.

„Bæ bæ Ísland” er einnig uppgjör við atlögu auðmagnsins að landi þjóðarinnar. Ýmsir nútímavæddir „víkingahöfðingjar“ virðast hafa sagt bæ bæ við landið í áþreifanlegri merkingu og fjarstýra nú að miklu leyti efnahagsmálum þjóðarskútunnar utan úr heimi líkt og Danakonungur gerði á sínum tíma. En þegar öllu er á botninn hvolft var það samt ekki kana- eða kommagull sem asninn bar yfir borgarmúrana. Gullið kom úr hirslum okkar sjálfra. Sýningin er eins konar hugmyndafræðileg úför og kveðjuhóf í formi myndlistarsýningar.
Á opnunardegi sýningarinnar kl. 14 verður frumflutt tónverkið „Stjórnarskrá Lýðveldisins Íslands“ í Ketishúsinu á Akureyri, en verkið var unnið í samstarfi myndlistardúósins Libiu Castro og Ólafs Ólafsson og tónskáldsins Karólínu Eiríksdóttur. Libia og Ólafur fóru þess á leit við Karólínu að hún semdi tónverk þar sem allar 81 greinar stjórnarskrárinnar væru sungnar. Verkið er skrifað fyrir tvo einsöngvara, píanó, kontrabassa og blandaðan kór og flytjendur verksins eru: Ingibjörg Guðjónsdóttir (sópran), Bergþór Pálsson (baritón) Tinna Þorsteinsdóttir (píanóleikari), Gunnlaugur Torfi Stefánsson (kontrabassaleikari) og kammerkórinn Hymnódía frá Akureyri undir stjórn Eyþórs Inga Jónssonar.

Föstudaginn 14. mars kl. 15 verður haldið opið málþing um „konseptið Ísland“ í Ketilhúsinu. Ágúst Þór Árnason, Þorvaldur Þorsteinsson og Ósk Vilhjálmsdóttir halda framsöguerindi, en fundarstjóri er Birgir Guðmundsson lektor við félagsvísinda- og lagadeild Háskólans á Akureyri.

Unnið er að því að gefa út viðamikla bók síðar á árinu þar sem tugir ef ekki hundruð Íslendinga gera upp við gamla konseptið Ísland og fyrirhugað er að halda ráðstefnu undir sama nafni. Bókin er hugsuð sem safnrit og jafnframt nokkurs konar leiðarvísir. Í henni verður m.a. tekið á bankakerfinu, þjóðarímyndinni, útlendingum á Íslandi, fjölmiðlum, stóriðju- og náttúruverndarsjónarmiðum og siðferði í stjórnmálum, auk þess sem þar verður einnig að finna umfjöllun um framlag listamannanna á sýningunni og myndir af verkum þeirra.

Ítarlegar upplýsingar um listamennina og inntak sýningarinnar er að finna á vefsíðu Listasafnsins: www.listasafn.akureyri.is. Frekari upplýsingar veitir forstöðumaður safnsins, Hannes Sigurðsson, í síma 899-3386 (netfang: [e-mail]).

Þess má að lokum geta að ekkert fyrirtæki treysti sér til að styrkja verkefnið, sem segir ef til vill sína sögu. Sýningunni lýkur 11. maí og er safnið opið alla daga nema mánudaga frá kl. 12-17.

Alþjóðleg mótmæli gegn stríðinu í Írak verða þann 15. mars

Næstkomandi laugardag, 15. mars, kl. 13, verður útifundur á Ingólfstorgi til að mótmæla stríðinu í Írak og krefjast friðar þar og um heim allan.

Þann 20. mars verða liðin fimm ár frá innrás Bandaríkjanna og bandamanna þeirra í Írak með stuðningi íslensku ríkisstjórnarinnar. Mótmælaaðgerðir verða víða um heim á laugardaginn og í næstu viku undir kjörorðinu „Allur heimurinn gegn stríðinu”!

Ávörp:
Hjalti Hugason prófessor
Steinunn Rögnvaldsdóttir nemi

Tónlistarflutningur:
Hörður Torfason

Tökum höndum saman við almenning um allan heim.
Mótmælum stríðinu! 
Krefjumst friðar!
Stríðinu verður að linna!

Látið þetta berast. Segið vinum, vinnufélögum, nágrönnum.
Fjölmennum!

Nánari upplýsingar á Friðarvefnum, www.fridur.is. Fylgist með honum.

Í dag, 13. mars, munu SHA afhenda utanríkisráðherra og utanríkisnefnd tillögur um leiðir til að benda endi á hernámið og stríðið Írak. Þessar tillögur verða birtar innan skamms á Friðarvefnum.

Laugardaginn 15. mars, kl. 14.00, verða svo kaffiveitingar á Múltikúlti, Ingólfsstræti 8. Tilefnið er að 5 ár eru liðin frá innrásinni í Írak og hvetjum við alla til að mæta fyrst, kl. 13.00 og taka þátt í útifundi af því tilefni. 

Valkyrjur, hórur og heilagar meyjar

 

Fimmtudagshlaðborð AkureyrarAkademíunnar

Valkyrjur, hórur og heilagar meyjar

-    Ímyndir og hlutverk írskra yfirnáttúrlegra kvenna

Helga Einarsdóttir, þjóðfræðingur

 
Fimmtudaginn 13. mars  kl. 17:00

Fyrirlesturinn fjallar um breyttar ímyndir írskra yfirnáttúrlegra kvenna frá heiðnum tíma til nútíma kaþólsks samfélags. Þróun og breytingar þessara kvenímynda verða ræddar í  menningar- og trúarlegu samhengi með áherslu á breytt kynhlutverk við kristnitöku.  Áframhaldandi mikilvægi og áhrif yfirnáttúrlegra kvenna verða sérstaklega skoðuð í ljósi vinsælda  Maríu meyjar í daglegu lífi og trúariðkun Íra.

Helga Einarsdóttir er með MA í þjóðfræði frá University College Cork, Írlandi, auk kennslufræði til kennsluréttinda og BA í þjóðfræði með íslensku sem aukagrein frá Háskóla Íslands. Helga starfar sem safnfræðslufulltrúi við Þjóðminjasafn Íslands.

Fyrirlesturinn er í AkureyrarAkademíunni,

Húsmæðraskólanum, Þórunnarstræti 99, Akureyri og er opinn öllum

AkureyrarAkademían - Félag sjálfstætt starfandi fræðimanna á Norðurlandi
Þórunnarstræti 99 (gamli Húsmæðraskólinn)
600 Akureyri

sími: 461 4006

www.akureyrarakademian.is

Ragnar Kjartansson opnar sýningu í Kunstraum Wohnraum á sunnudag

Sunnudaginn 16. mars 2008 klukkan 11-13 opnar sýning Ragnars Kjartanssonar “Allt er gott að frétta af póesíunni” í Kunstraum Wohnraum á Akureyri.

Sýning Ragnars Kjartanssonar í Kunstraum Wohnraum byggist á ljósmyndum sem Ragnar tók á símann sinn í Parísarborg af þremur listakonunum. Þessi verk eru sönnunargögn fyrir ljóðrænu tilverunnar. Þrjú guðdómleg móment úr hversdagsleikanum. Þetta eru heldur ekki hversdagslegar konur á myndunum.

Úr bréfi til vinar:
 "Jæja allt er gott að frétta af póesíunni...Í dag var ég eithvað að skoða myndirnar sem ég tók á ferðalaginu, fann og prentaði út þrjár myndir sem ég tók af Ásdísi, Heklu og Laufey um helgina.... þú sagðir mér að vera duglegur að taka myndir á símann ...  er eithvað að spá í að sýna þær hjá Hlyni Hallssyni und Familie (er með sýningu þar í mars)  Finnst þér þetta ekki elegant portrett af listakonum í parís... músurnar þrjár   ... ein í monumental augnablikinu klædd gulum sari í barrokkeyðimörkinni, önnur sofandi í módernismanum, ekki alveg að meika heiminn og sú þriðja alveg kreisí í hvirfilvindinum.... allar eru þær að hugleiða mismunandi krystalkúlur... eru í einhverju trans ástandi"

Ragnar Kjartansson

---

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Ragnars Kjartanssonar stendur til 22. júní 2008 og er opin eftir samkomulagi og hægt er að hringja í síma 4623744.
Nánari upplýsingar um Ragnar Kjartansson er að finna á http://www.i8.is og http://this.is/rassi

Kunstraum Wohnraum er að finna á:  http://www.hallsson.de/projects/projects.html

 

RAGNAR KJARTANSSON 

ALLT ER GOTT AÐ FRÉTTA AF PÓESÍUNNI

16.03. - 22.06.2008 

 

Opnun sunnudaginn 16. mars 2008, klukkan 11-13 

Opið samkvæmt samkomulagi       

 

KUNSTRAUM WOHNRAUM             

Hlynur Hallsson • Kristín Kjartansdóttir     

Ásabyggð 2 • IS-600 Akureyri •  [phone] 

hlynur(hjá)gmx.net • www.hallsson.de

Vinstriflokkarnir sigra í Frakklandi og á Spáni

Það eru góð tíðindi að Sósíalistar á Spáni hafi sigrað þingkosningarnar þar í landi svo Spánverjar sleppa við afturhaldssama stefnu hægriflokksins næstu árin. Og sömu sögu er að segja frá fyrrihluta bæjarstjórnakosninganna í Frakklandi. Þar bæta Sósíalistar við sig en hægriflokkurinn tapar. Seinni umferðin verður um næstu helgi og aðal baráttan stendur um borgirnar Marseille, Toulouse og Strassborg. Þar ráða hægri menn nú en Sósíalistar virðast líklegir til að ná völdum.

Nánar um þetta á ruv.is:

Sósíalistar sigra á Spáni

Frakkland: Hægriflokkar töpuðu

Sarkozy spáð tapi

Til hamingju með daginn, konur og karlar!

8. mars er alþjóðlegur baráttudagur kvenna. Til hamingju með það, öll!

Brjóst fyrir eina milljón

Góðar tillögur

Flott hjá þingflokki Vinstrihreyfingarinnar - græns framboðs að koma með almennilegar tillögur í efnahagsmálum því ekki gerir ríkisstjórnin það. Hér má lesa um helstu tillögurnar sem Vinstri græn (ekki "Vinstri grænir" eins og missagt er í fréttinni) koma með:

Tillögur Vinstrihreyfingarinnar - græns framboðs í efnahagsmálum lúta að styrkingu Seðlabankans, auknum sparnaði, stuðningi við nýsköpun og jöfnunaraðgerðum. Fljótlega verður frumvarpi í þessum anda dreift á Alþingi en helstu tillögurnar eru:

Styrking Seðlabankans, skuldabréfamarkaður og aukinn sparnaður

• Að styrkja Seðlabanka Íslands með því að auka gjaldeyrisvaraforðann um allt að 80 milljarða og styrkja eigið fé hans til viðbótar um allt að 40 milljarða með innlendu skuldafjárútboði.
• Að ríkisstjórnin geti boðið út á innlendum markaði sérstök sparnaðarskuldabréf til almennrar sölu að hámarki 2 milljónir króna á hvern einstakling til minnst 5 ára í senn og verði vaxtatekjur undanþegnar fjármagnstekjuskatti.

Bætt fjárhagsstaða sveitarfélaganna og aðgerðir til að draga úr innri ójöfnuði

• Að bæta fjárhagsstöðu illa settra sveitarfélaga með því að verja til þeirra allt að 5 milljörðum króna gegnum Jöfnunarsjóð sveitarfélaga. Tekjuskipting ríkis og sveitarfélaga verði einnig endurskoðuð.
• Að verja allt að 5 milljörðum króna til jöfnunaraðgerða sem beinast einkum að þeim byggðarlögum sem glíma við samdrátt. Sérstaklega verði hugað að aðgerðum sem skapa konum störf, vinna gegn kynbundnum launamun og kyngreindum búferlaflutningum.

Nýsköpun í atvinnumálum og frestun stóriðjuframkvæmda

• Að verja allt að einum milljarði króna til Nýsköpunarsjóðs, einum milljarði til Tækniþróunarsjóðs, allt að 500 milljónum til atvinnuþróunarfélaga, allt að 250 milljónum til aukins markaðsstarfs á sviði ferðamála og allt að 250 milljónum til umhverfisaðgerða og uppbyggingar þjóðgarða.
• Að stöðva um sinn og stjórna síðan tímasetningu stóriðju- og stórframkvæmda með því að kaupa rannsóknarniðurstöður og greiða fyrirtækjum útlagðan undirbúningskostnað. Einnig verði heimilt að stöðva leyfisveitingar innan tilgreindra tímamarka sé það nauðsynlegt til að ná efnahagslegum stöðugleika og varðveita hann. Aðgerðir á svið umhverfismála fái 200 m.kr viðbótarfjármagn.

Þjóðhagsráð og efling fjármálaeftirlitsins

• Að setja á stofn sérstakt Þjóðhagsráð, skipað fulltrúum þingflokka og hagsmunaaðila, sem veitir stjórnvöldum ráðgjöf, metur framvindu og horfur í þjóðarbúskapnum og gefur mánaðarlega álit um stöðu mála. Þjóðhagsráð skoði hvort ástæða sé til að endurreisa Þjóðhagsstofnun eða hliðstæðri fagstofnun og hvernig styrkur lífeyrissjóðanna megi best nýtast innan hagkerfisins, t.d. í samhengi við framtíðarskipan húsnæðismála, þó þannig að lífeyrissparnaður landsmanna sé ætíð tryggður eins og best er mögulegt.
• Að verja allt að 100 milljónum króna til að efla starfsemi Fjármálaeftirlitsins, einkum á sviði áhættugreiningar og áhættuprófana fjármálafyrirtækja.

VG vilja styrkja Seðlabankann

Fátækir indverjar... eða ríkir

Ég gef nú ekki mikið fyrir þennan lista yfir einhverja milljarðamæringa. Vona bara að þeir séu ekki mjög óhamingjusamir eða hræddir um aurana sína. En margur verður jú af aurunum api hvað þá af milljörðum. Þeir ríkustu verða ríkari og þeir fátæku fátækari.

Það er annars merkilegt að í löndum þar sem þjóðartekjur eru ekki tiltakanlega háar og almenningur hefur það skítt séu hellingur af gaurum sem vita ekki aura sinna tal. Hvernig væri nú að vera aðeins gjafmildari og hjálpa meðbræðrum og systrum sínum sem eiga ekki til hnífs og skeiðar? Og það sem verra er: eiga ekki möguleika á að afla sér matar. Bill gamli Gates hefur að vísu stofnað sjóð ásamt eiginkonu sinni sem gefur til góðra málefna og er því í dýrlingatölu hjá sumum. Heimurinn væri samt skárri ef þessu auðæfum skiptust með réttlátari hætti á milli fólks.

Sjálfur þarf ég ekki að kvarta, tilheyri sennilega þeim hópi sem hefur það hvað best í heiminum, svona miðað við allt. Í raun hefur maður það allt of gott. Best að fara og gefa í gott málefni.

Warren Buffet ríkastur

Bush tekinn fastur fyrir stríðsglæpi

Ansi líst mér vel á þessa kjósendur bæjunum Brattleboro og Marlboro í Vermont. Að gefa út handtökuskipun á hendur þeim félögum George W. Bush, forseta og varaforsetanum Dick Cheney á þeim forsendum að þeir hafi brotið gegn stjórnarskrá landsins. Nú er bara að vona að Dick og George mæti á staðinn og verði þá um leið settir í steininn og dregnir fyrir rétt. Það er löngu kominn tími til.

Gefa út handtökuskipun á Bush