Joris Rademaker ræðir um verk sín í Kunstraum Wohnraum á sunnudag

Sunnudaginn 9. mars 2008 klukkan 11:00 ræðir Joris Rademaker um verk sín á sýningunni “Mannleg tilvist” í Kunstraum Wohnraum í Ásabyggð 2 á Akureyri. Joris er Hollendingur en hefur fengist við myndlist síðan 1983. Hann var útnefndur bæjarlistamaður Akureyrar árið 2006. 

Joris Rademaker vinnur með blandaða tækni og oft með mismunandi þema í lengri tíma í senn. “Mannleg tilvist”  er einskonar yfirlitssýning inni á heimili þar sem verkin samræmast alvöru og leik heimilisfólksins. Þau eru unnin út frá pússluspilskubbi, og í mismunandi tækni, vatnsliti, veggfóður, sprey, þrykk, málverk, ljósrit, klippimyndir og sem objekt eða hluti. 

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sunnudagurinn 9. mars 2008 er lokadagur sýningar Jorisar Rademakers en þann 16. mars opnar Ragnar Kjartansson nýja sýningu í Kunstraum Wohnraum.

 

JORIS RADEMAKER 

MANNLEG TILVIST 

06.01. - 09.03.2008 

Listamannaspjall sunnudaginn 9. mars 2008, klukkan 11:00
      

 

KUNSTRAUM WOHNRAUM             

Hlynur Hallsson • Kristín Kjartansdóttir     

Ásabyggð 2 • IS-600 Akureyri •  [phone] 

hlynur(hjá)gmx.net • www.hallsson.de

Mannleg tilvist 

Joris Rademaker flutti 1991 til Íslands og varð skömmu síðar faðir. Hann kom í haustmyrkrinu og reyndi að fóta sig í nýju umhverfi og í föðurhlutverkinu. Þessi mikla breyting á lífinu kom fljótt fram í hans list. Í Hollandi hafði allt hans líf snúist eingöngu um myndlist. Á Íslandi varð hún að víkja fyrir launavinnu og varð frístundaiðja. Viðbrigðin að verða allt í einu faðir og í framandi landi var samblanda af gleði og einsemd. Hinu þéttbýla, frjósama og velræktaða Hollandi með aldagamla þróaða evrópska menningu var skipt út fyrir hrjóstrugt, fremur harðbýlt, kalt, einangrað land með fáum en kraftmiklum einstaklingum og unga listmenningu, fyrir utan fornbókmenntir.

Fyrir tilviljun rakst Joris dag nokkurn á barnaleikföng frá því um 1960 sem tengdamóðir hans hafði fundið undir rúmi á hótelherbergi sem hún þreif í sumarvinnu. Þetta voru marglit plastleikföng ódýr og fjöldaframleidd sem bæði gátu verið gestaþraut og púsluspil. Joris heillaðist af margbreytileika fígúranna og valdi sér eina rauða á litinn og fór að þróa hana áfram í mismunandi myndform og í margvísleg efni. Hún minnti hann á teikningu Leonardós daVinci sem stendur eins og fimmarma stjarna þar sem höfuð og útlimir vísa í mismunandi áttir. Myndverk Jorisar með þessari fígúru fjalla um einstaklinginn í alheiminum - stundum aleinan og stundum í félagslegu samhengi, mis nánu. Stundum í skipulögðum munstrum - eins og samfélagsstrúktúrinn. Í þessari fígúru tjáir Joris alvöru og gleði lífsins - einstaklingsins og heildarinnar.

Joris sýndi mismunandi seríur af þessari fígúru á árunum 1994-97 en er núna að nýju að endurbæta og loka þessu þema. Þetta er því einskonar yfirlitssýning - inni á heimili þar sem verkin samræmast alvöru og leik heimilisfólksins. 

Skrifað á nýjársdag 2008 á Akureyri af G. Pálínu Guðmundsdóttur

Joris Rademaker

1977-1983 Myndmenntakennaranám í Tilburg í Hollandi

1983-1986 AKI: Myndlistaskólinn í Enschede í Hollandi

2006 Bæjarlistamaður Akureyrar 

Sýningar

1987 Gallery Hooghuis, Arnhem, Holland

1988 Markt 17, Enschede, Noordkunst, Holland

1995 Listasafnið á Akureyri

1995 Slunkaríki, Ísafjörður

1997 Nýlistasafnið í Reykjavík

1997 Deiglan Akureyri, Listasumar 95 á Akureyri

1998 Gallerí+, Akureyri

2002 Slunkaríki, Ísafjörður

2002 Gallerí Skuggi, Reykjavík

2004 Safnasafnið, Svalbarðsströnd

2005 Bókasafn Háskólans á Akureyri

2005 Gallarí gangur, Reykjavík

2005 Gallerí+, Akureyri

2006 Populus Tremula, Akureyri

2006 Karólína Restaurant, Akureyri

2008 Kunstarum Wohnraum, Akureyri

Blóðbað í Palestínu - heimildarmynd í Alþjóðahúsinu

Framferði Ísraelshers í Palestínu er óhugnanlegt. Búið að drepa yfir hundrað manns, marga saklausa borgara, síðustu daga.

Ég vek athygli á sýningu félagsins Ísland-Palestína á heimildarmyndinni Goal Dreams - A Team Like No Other þriðjudagskvöld 4. mars klukkan 20 í Alþjóðahúsinu:

"Hvernig getur fótboltalið, sem hefur ekki viðurkennt heimaland, engan stað til að þjálfa á og býr við hörmulegar aðstæður, keppt í knattspyrnu á alþjóðavettvangi? Félagið Ísland-Palestína mun í vetur standa fyrir sýningum á athyglisverðum heimildar- og bíómyndum er hafa með málefni Palestínu og Ísraels að gera, fyrsta þriðjudag hvers mánaðar í Alþjóðahúsinu. Að þessu sinni verður á boðstólum heimildarmyndin 'Goal Dreams - A Team Like No Other'.

Í myndinni er fylgst með landsliði Palestínu í knattspyrnu undirbúa sig og leika í undankeppni fyrir Heimsmeistaramótið (World Cup) í Þýskalandi árið 2006, eftir að Ísraelar gerðu loftárás á æfingarsvæði liðsins á Gaza. The Palestinian Football Association (PFA) var stofnað árið 1928 og er eitt elsta knattspyrnusamband í Arabaheiminum. Eftir að Alþjóðknattspyrnusambandið FIFA viðurkenndi PFA árið 1998 hefur Palestínska liðið hækkað um 70 sæti á styrkleikalista sambandsins.

Hernám Palestínu hefur þó haft sín áhrif á landsliðið og liðsmenn þess. Í lok síðasta árs urðu möguleikar Palestínu um að komast á Heimsmeistaramótið í Suður-Afríku árið 2010 að engu þegar hernámsyfirvöld neituðu landsliðsönnunum um leyfi til að ferðast frá Vesturbakkanum og Gaza til að leika í undankeppni mótsins í Singapore. Síðan heimildarmyndin var gerð hefur einn liðsmaður liðsins fallið fyrir kúlum ísraelskra hermanna á meðan hús annars hefur verið lagt í rúst."

---------------------------------------------------------
Goal Dreams - A Team Like No Other (86 min)
Þriðjudagurinn 4. mars, klukkan 20.00
Alþjóðhúsið, Café Cultura, Hverfisgata 18
Aðgangur ókeypis!

---------------------------------------------------------
Vefsíða: http://www.goaldreams.com/
Um Palestínska landsliðið: http://en.wikipedia.org/wiki/Palestine_national_football_team
--------------------------------------------------------- 

Ísraelar yfirgefa Gaza

Menntasmiðjunni úthýst

Sjálfstæðisflokkur og Samfylking segja að það sé engin einkavæðingarstefna í gangi en samt er allt á fullu í einkavæðingu í félagslega geiranum og einnig í heilbrigðismálum. Sennilega er þetta "stefnulaus" einkavæðing en hún er komin með allskonar dulnefni eins og "úthýsing", "einkarekstur" og "sjálfstæður rekstur". 

Í fréttum í gær var sagt frá því að það á að "bjóða út" rekstur á heilli sjúkradeild á Landspítalanum. Þetta er einkavæðing. Og nú er það Menntasmiðjan hér á Akureyri sem er á úthýsingarlistanum. Það hefur verið unnið frábært starf með Menntasmiðju kvenna og einnig Menntasmiðju unga fólksins en það er ekki nóg finnst meirihluta íhalds og Samfó hér í bæjarstjórn. Einn fulltrúi meirihlutans sagði í umræðum um málið að það þyrfti að fjölga úrræðum fyrir ungt fólk sem hefði dottið úr námi og vinnu. Þetta er hárrétt, en er þá ekki einkennilegt að ætla að fækka þeim?

Fyrir réttri viku skrifaði ég um niðurskurð bæjarins á fyrirfram ákveðnu uppbyggingarfjármagni til Siglingaklúbbsins Nökkva. Þar sá bærinn að sér og samdi um málið eftir að það var komið í fjölmiðla. Vonandi sér meirihlutinn í bæjarstjórn einnig að sér í þessu máli og eflir starfsemi Menntasmiðjunnar í stað þess að úthýsa henni.

Menntasmiðjan slegin af

Mislæg mistök

Það er einkennilegt að hinn "umhverfisverndarsinnaði" borgarstjóri sé nú að dusta svifrykið af einhverjum tillögum um "mislæg" gatnamót á þessu horni í höfuðborginni. Vandamálið er að það eru of margir bílar á götunum. Í öllum borgum í Evrópu er það hagstæðara að taka strætó eða metró (neðanjarðarlestir) en bílinn á álagstímum og þannig ætti það einnig að vera í Reykjavík. Sem sagt forgang fyrir strætó og fólk mun flykkjast í hann því þá verður fólk fljótara í förum en að sitja í umferðarteppu. Eða viljum við enda í einhverri amerískri bílaborg með mislægum gatnamótum á sjö hæðum?

Ég styð íbúasamtökin heilshugar og óskandi væri að borgarstjórinn gerði það líka.

Vilja umferðarmengunina í göng

Ung vinstri græn á Akureyri

Á laugardaginn halda Ung Vinstri Græn stjórnmálaskóla fyrir ungt fólk á Akureyri og nágrenni. Sérstakt erindi heldur Steingrímur J. Sigfússon, formaður Vinstrihreyfingarinnar græns framboðs. Allir eru velkomnir.

Tími: 11-15, laugardaginn 1. mars.

Staður: Hótel KEA

Dagskrá:
Saga og stofnun VG: Steingrímur J. Sigfússon, formaður VG
Hádegishlé frá 12 til 13 með pítsum í boði UVG fyrir svanga fundarmenn
Stefna VG og UVG: Finnur Dellsén og Huginn Freyr Þorsteinsson
Fundir og mótmæli: Auður Lilja Erlingsdóttir og Þórhildur Halla Jónsdóttir
Ungt fólk í pólitík: Birna Pétursdóttir og Jan Eric Jessen

Jón Laxdal Halldórsson opnar sýninguna “Úr formsmiðju” á Karólínu Restaurant

Jón Laxdal Halldórsson

Úr formsmiðju

01.03.2008 - 05.09.2008     

Velkomin á opnun laugardaginn 1. mars 2008, klukkan 14
 

Karólína Restaurant // www.karolina.is 

Kaupvangsstræti 23 // IS 600 Akureyri // 4612755 

 

ÚR FORMSMIÐJU

Laugardaginn 1ta mars kl.14.00 verður skipt um myndir á Karólínu Restaurant. Í stað mynda Brynhildar Kristinsdóttur hengir Jón Laxdal Halldórsson upp nokkur klippþrykk eða þrykkklipp frá árinu 1992 þegar formsmiðja hans var hvað afkastamest.
Á skörinni hanga svo þrjár ögn stærri gamaldags klippimyndir sem eru frumgerðir formanna niðri. Auk þess verða, gestum til gamans og umþenkingingar, borin fram nokkur spakmæla og teiknimyndatrog alveg ný á nálinni.

Allir hjartanlega velkomnir

Sýningin á Karólínu Restaurant stendur í sex mánuði eða til 5. september 2008.

Laugardaginn 1. mars  klukkan 14 opnar einnig sýning Unnar Óttarsdóttur á Café Karólínu.

Umsjónarmaður sýninganna er Hlynur Hallsson 

Eitthvað að rofa til í BNA

Það er greinilega smá von um að æðstu menn í BNA séu að átta sig á loftslagsmálunum. Tilbúnir í bindandi markmið og hvað eina. Það er full ástæða til að fagna þessari stefnubreytingu. En ástæðan er auðvitað ekki langt undan eins og segir í fréttinni: "Fréttaskýrendur telja ljóst að ríkisstjórn George W. Bush vilji að öflug þróunarríki á borð við Kína, Indland og Brasilía skrifi undir einhverskonar bindandi samkomulag."

Gott að BNA ætlar ekki að vera síðasta landið sem viðurkennir að það stefnir í óefni hvað varðar mengun andrúmsloftsins.

Bindandi markmið samþykkt?

No Country For Old Men er ansi góð

Maður hefur í gegnum tíðina ekki alltaf verið sammála þessari Kvikmyndaakademíu en það er greinilega eitthvað að birta til (annaðhvort hjá mér eða akademíugenginu:)

Það er líka einhver Evrópustemning í Hollywood þessi misserin. En ég mæli eindregið með því að fólk skelli sér á No Country For Old Men ef fólk er ekki búið að sjá hana. Það voru sex í bíó þegar ég fór í síðustu viku!

Þessi setning úr frétt mbl.is finnst mér samt best: "Efhan og Joel Coen þökkuðu bandaríska kvikmyndaiðnaðinum fyrir að leyfa sér að ,,leika sér í sínu horni í sandkassanum" en Bardem, sem er nýgræðingur í Hollywood þrátt fyrir að eiga að baki farsælan feril á Spáni, þakkaði bræðrunum fyrir að vera nógu brjálaðir til að veita sér hlutverkið."

Talandi um brjálæði. 

Coen bræður sigursælir

Unnur Óttarsdóttir opnar sýninguna "Póstkona", á Café Karólínu, laugardaginn 1. mars 2008, kl. 14

Unnur Óttarsdóttir

Póstkona

01.03.08 - 04.04.08 

Velkomin á opnun laugardaginn 1. mars 2008, klukkan 14 

Café Karólína // www.karolina.is

Kaupvangsstræti 23 // IS 600 Akureyri // 4612755

---

Laugardaginn 1. mars 2008, klukkan 14 opnar Unnur Óttarsdóttir sýninguna "Póstkona", á Café Karólínu á Akureyri.

Unnur Guðrún Óttarsdóttir útskrifaðist frá Myndlistarskólanum á Akureyri 2007. Hún er meðlimur í Grálistahópnum. Unnur hefur tekið þátt í nokkrum samsýningum en þetta er önnur einkasýning hennar.

Póstur og póstmódernismi koma við sögu á sýningunni „Póstkona”. Í póstmódernismanum er oft vitnað í eldri verk og þau sett í nýtt samhengi. Hið gamla og hið nýja mætist og kallast á þar sem sígildum verkum og nýjum er skeytt saman. Voru konurnar sem sátu fyrir hjá klassískum listmálurum fyrir nokkur hundruð árum e.t.v. sáttari við líkama sinn en við nútímakonurnar sem margar viljum vera svo grannar að við næstum hverfum?

Verkin á sýningunni voru send með pósti sem er ein leið til að senda skilaboð á milli manna. Nú á tímum hefur veraldarvefurinn opnað ótal leiðir til samskipta. Hvaða áhrif hefur netið á tengsl okkar hvert við annað og eigin líkama? Ein samskiptaleiðin á netinu er bloggið.
Hluti af sýningunni er bloggsíðan www.unnurottarsdottir.blogspot.com þar sem tækifæri gefst til að sjá sýnishorn af sýningunni. Einnig eru öllum frjáls tjáskipti þar með bloggi um sýninguna, sjálfsmynd nútímakonunnar, konulíkamann, list í nútíð og fortíð og tilveruna almennt.
 

Nánari upplýsingar veitir Unnur í ugo(hjá)mmedia.is
 

Sýningin á Café Karólínu stendur til 4. apríl, 2008. Allir eru velkomnir á opnun laugardaginn 1. mars, klukkan 14.  

Á sama tíma opnar Jón Laxdal nýja sýningu á Karólínu Restaurant.

Næstu sýningar á Café Karólínu: 

05.04.08-02.05.08    Guðmundur R Lúðvíksson

03.05.08-13.06.08    Kjartan Sigtryggsson

14.06.08-04.07.08    Arnar Ómarsson

05.07.08-01.08.08    Vilhelm Jónsson

02.08.08-05.09.08    Margeir Sigurðsson

06.09.08-03.10.08    Sigurlín M. Grétarsdóttir

04.10.08-31.10.08    Ingunn St. Svavarsdóttir Yst

01.11.08-05.12.08    Þorsteinn Gíslason

Umsjónarmaður sýninganna er Hlynur Hallsson

Dálítið stoltur

Ég verð að viðurkenna það að ég meira en dálítið stoltur yfir því að Brynjar Gunnarsson bróðursonur minn fékk verðlaun Blaðaljósmyndarafélags Íslands fyrir bestu myndröð ársins, sem nefnist  66°12´97”N og fjallar um daglegt líf Pólverja í fiskiþorpi úti á landi, nánar tiltekið Suðureyri við Súgandafjörð. Billi er í ljósmyndanámi í London og hefur unnið fyrir nokkur dagblöð hér á landi síðustu ár.

Þessi myndröð er ótrúlega flott og næm. Hluti af henni birtist í 24 Stundum 8. desember 2007.

"Um myndröðina segir, að í mörgum íslenskum sjávarþorpum séu innflytjendur næstum helmingur íbúanna og oft meirihluti vinnufærs fólks. Flestir innflytjendanna séu Pólverjar sem setjast að í þorpunum vegna þess að húsnæði þar er ódýrt og vegna þess að þeir bera umtalsvert meira úr býtum en í heimalandinu.

Anna kom til Íslands 6. mars 1998 og Jarek í september sama ár. Í Póllandi lærði Anna viðskiptafræði en Jarek er úr sveit. Þau kynntust á Suðureyri. Anna er í fæðingarorlofi og hugsar um soninn Piotr. Þar sem Jarek vinnur við beitingar og hefur sveigjanlegan vinnutíma á hann auðvelt með að vera heima og gæta sonarins á meðan Anna sinnir erindum. Fyrir eiga þau soninn Pawel sem er í leikskóla. Annað foreldri að minnsta kosti helmings barnanna á leikskólanum er af erlendum uppruna.

Dómnefnd segir, að myndröðin sé verðug heimild í yfirstandandi skráningu lífs í íslenskum þorpum á 21. öld. Vonandi að fréttablöð og tímarit á Íslandi veiti sögum sem þessari stuðning."

Það er góð tilfinning að vera stoltur frændi. 

Hér er heimasíða Brynjars: Billi.is

og hér er Flickr-síðan hans

og hér er svo bloggsíða hans og Hlínar, sem er í framhaldsnámi í arkitektúr í London. 

„Sláandi fyndin pólitísk mynd"

"Kannaðist ekki við málið"

Það er eins og fulltrúar Sjálftökuflokksins séu hættir að tala saman. Þeir kannast að minnsta kosti ekki við neitt. Það er kannski best þannig. Hjá þeim sem "lendir bara í hlutunum" og "axlar svo ábyrgð".

Vilhjálmur Þ. Vilhjálmsson víkur ekki

Frábær ræða Katrínar Jakobsdóttur

Auðvitað á ísland að vera frjálst, óháð og fullvalda ríki og utan hernaðarbandalaga. Við höfðum ekkert með herinn að gera og það kom best í ljós þegar hann yfirgaf landið að við vorum ekki "varnarlaus" fyrir vikið. Þessi fundur í dag var góður, fín stemning og kraftur í Vinstrihreyfingunni grænu framboði. 

Í fyrramálið kemur Turid Leirvoll, framkvæmdastýra Socialistisk Folkeparti í Danmörku og segir frá kosningabaráttu dönsku félaga okkar. Danir gengu að kjörborði 13. nóvember síðastliðinn en þá tvöfaldaði SF fylgi sitt og var ótvíræður sigurvegari kosninganna. Flokkinum tókst einkar vel að ná til ungs fólks og kom áherslum sínum vel til skila í snarpri kosningabaráttu. Allir eru velkomnir á Hótel Loftleiði klukkan 10:30. Greta Björg Úlfsdóttir bloggvinkona mín bendir einnig á jákvætt framlag ungliðahreyfingar SF til málanna sem valdið hafa ólgu í dönsku samfélagi að undanförnu. Ég mæli með því að þið lesið um málið hér.

Svo er hægt að lesa frábæra upphafsræðu Katrínar Jakobsdóttur varaformanns á vg.is en hún sagði meðal annars:

"Það hefur sýnt sig þau níu ár sem Vinstrihreyfingin – grænt framboð hefur starfað að hugmyndalega endurnýjunin hefst hér. Aðeins hér hugsa menn gagnrýnið um það samfélag sem Sjálfstæðisflokkurinn hefur komið hér á og héðan koma breytingarnar: græn hugsun, róttækur femínismi, sjálfstæð friðarstefna og gagnrýni á alræðis-kapítalismann og kreddur hans. Oft hefur það verið svo að við ein höfum þorað þegar á reynir og við höfum yfir mörgu að gleðjast. Margar hugmyndir okkar eru komnar á dagskrá, eru orðnar viðurkenndar sannleikur. Það á að blása okkur kapp í brjóst til að halda áfram og vera áfram framsækið og djarft forystuafl í íslenskum stjórnmálum."

Síðasta skrefið að fullri inngöngu Íslands í NATO

Ég missi aftur af tilraunastofu Kristjáns Ingimarssonar

Ansi fúlt en maður verður stundum að bíta í súr epli og það er ekki hægt að vera á tveim stöðum samtímis, ekki ennþá allavega. Þess vegna missi ég af annarri tilraunastofu Kidda vinar míns í Deiglunni á föstudagskvöld. Ég fékk smá innsýn í stofuna í dag þegar ég kíkti í heimsókn á vinnustofuna hans fyrir ofan Listasafnið og get lofað góðu kvöldi.

Ég ætla hinsvegar að skella mér á fund hjá Vinstrihreyfingunni grænu framboði í höfuðborginni og af því þetta er tveggja daga fundur þá er útilokað að sjá tilraunstofuna. En ég hlýt að komast næst, þá er líka síðasti séns. En fyrir alla sem þyrstir í fyrsta flokks tilraunaleikverk þá er tilkynningin hér: og muna að taka með myndavélar með flassi!

Tilraunastofa Kristjáns Ingimarssonar og Gilfélagið kynna:

Hvað er það sem gerir það að verkum að eitthvað nýtt verður til? Eitthvað sem enginn veit hvað er en allir eru sammála um að þetta eitthvað er einstaklega hrífandi, skemmtilegt, óhugnanlegt eða upplífgandi, með athygli sinni og undrun gefa því líf. Í tilefni af byrjun á vinnslu nýrrar sólóleiksýningar sem ber vinnuheitið SKÖPUN er dyrunum hrundið upp til viðburðar sem vonandi kollvarpar öllum hugmyndum um heilbrigða skynsemi.

Allir velkomnir - Aðgangur ókeypis í Deiglunni á Akureyri föstudagskvöldið 22. febrúar klukkan 20:30
Vinsamlegast takið með ykkur myndavél með flassi!
Þetta er annar viðburðurinn af þremur sem Gilfélagið og Kristján Ingimarsson standa fyrir í tengslum við SKÖPUN - ALLIR VELKOMNIR

Kristján Ingimarsson leikari nýtur aðstoðar Jónu Hlífar Halldórsdóttur og Brynhildar Kristinsdóttur.
Kristján Ingimarsson s.8643131
http://www.neander.dk

Ætla bæjaryfirvöld á Akureyri að svíkja siglingafólk?

Þessi litla frétt á mbl.is kemur mér verulega á óvart. Þar segir að meirihluti Sjálfstæðisflokks og Samfó á Akureyri ætli að skera niður framlag til Siglingaklúbbsins Nökkva, framlag til framkvæmda sem búið var að ákveða. Rúnar Þór Björnsson, formaður Nökkva hefur ásamt öflugu liði lagt á sig ómælda vinnu, allt í sjálfboðavinnu auðvitað og ef það er svona sem meirihlutinn ætlar að verðlauna menn þá er auðvitað best að pakka saman og hætta þessu. Rúnar segir líka orðrétt: „Ef þetta fer á þann veg sem lítur út núna sér stjórn Nökkva ekkert annað í stöðunni en skila inn lyklunum að aðstöðunni, hætta endalausri sjálfboðavinnu fyrir annarra manna börn og horfa á margra áratuga vinnu fjölda fyrrverandi stjórnarmanna verða að engu vegna loforða sem virðast endalaust geta frestast.“

Það stefnir í að þetta mál verði enn ein skömmin í hatt þessa meirihluta sem er með allt niður um sig í skipulagsmálum eins og landsþekkt er. En svona gera menn ekki!

(Myndin er tekin af heimasíðu Nökkva)

Segjast skila lyklum og hætta sjálfboðavinnu

Kristján Kristjánsson með fyrirlestur um mynd mannsins

Félag áhugafólks um heimspeki á Akureyri hefur staðið fyrir fjölda fyrirlestra og heimspekikaffihúsa. Nú er ný röð í uppsiglingu og það er Kristján Kristjánsson sem ríður á vaðið. Hér er tilkynning um þessa fyrirlestra:

Félag áhugafólks um heimspeki,
Amtsbókasafnið,
Háskólinn á Akureyri,
& Akureyrarstofa

Fyrirlestur fimmtudaginn 21. febrúar
kl. 17.00 á Amtsbókasafninu á Akureyri

Mynd mannsins –
í fræðum og vísindum

Það er eilífðar viðfangsefni mannsins að lýsa og skilgreina veröldina. Það hefur löngum verið talið sérsvið heimspekinnar að takast á við manninn sjálfan með þessum hætti. Þegar betur er að gáð má þó sjá að allar greinar fræða og vísinda hafa innibyggða ákveðna hugmynd um fyrirbærið manninn eða mynd mannsins. Í fyrsta erindi fyrirlestrarraðar um mynd mannsins í fræðum og vísindum ræðir Kristján Kristjánsson, heimspekingur, um stöðu mannsins innan vestrænna heimspekikerfa og ber saman við austurlensk viðhorf til þess sem heimspekingar kalla "sjálf" mannsins.

Á næstu vikum verða fyrirlesarar auk Kristjáns Kristjánssonar þessir:

Margrét Harðardóttir, arkitektúr
Hans Jakob Beck, læknisfræði
Ragnhildur Sigurðardóttir, vistfræði
Ágúst Þór Árnason, lögfræði
Sigurður J.Grétarsson, sálfræði
Arna Schram, fjölmiðlar

Á skírdag talar Kristinn Ólafsson um mannskilning kristinnar trúar.

Fyrirlestrarnir verða haldnir alla næstu fimmtudaga kl. 17.00 í Amtsbókasafninu á Akureyri.