Nýnasistar eru verri náttúruhamfarir

Uppgangur nýnasista er óhugnanlegur. Samanburðurinn við náttúruhamfarir er ef til vill einkennilegur en í raun eru nýnasistar enn verri en náttúruhamfarir. Fullkomin heimska sem hægt væri að koma í veg fyrir er fólk skoðar söguna. En nýnasistum er það fullkomlega fyrirmunað eða þeir vilja það bara ekki.

Brugðist við nýnasistum eins og náttúruhamförum

Fjórir karlar að spjalla saman í Vikulokunum

Mér finnst Hallgrímur Thorsteinsson ágætur útvarpsmaður. Sumar breytingar á hinum ljómandi þætti "Vikulokin" á Rás eitt sem hann hefur gert eru góðar, þátturinn byrjar til dæmis á yfirliti beint úr fréttum. Hinsvegar finnst mér Hallrígrímur ekki mjög fær í að velja sér viðmælendur. Í þættinum í dag eru fjórir karlar sem sitja saman og hlæja. Tveir fallnir þingmenn, Mörður Árna Samfó og Magnús Þór Frjálslyndi og svo er þarna einn frjálshyggjugaur, Ólafur Teitur sjálfstæðismaður. Geisp.

Það að Sharon Stone sé búin að fá sig fullsadda af karlmönnum kemur mér ekki á óvart, þeir eru margir ansi þreytandi, sjálfumglaðir og halda að þeir séu færastir í að stjórna öllu þó að þeir hafi enga hæfileika.

Hefur meiri áhuga á konum en körlum

Borgarstjórnarmeirihlutinn treystir stöðu sína

Það eru ánægjuleg tíðindi að  borgarstjórnarmeirihluti Vinstri grænna, Samfylkingar, Framsóknar og F-listans njóti aukins trausts. Það er samt merkilegt hvað margir myndu kjósa Sjálftökuflokkinn sem klúðraði eftirminnilega meirihlutanum fyrir nokkrum mánuðum og hefur ekki borið sitt barr síðan. Sjálfstæðisflokkurinn er sundurtættur í innbyrðis átökum. Vinstri græn mega vel við una í nýjum meirihluta og Svandís Svavarsdóttir hefur sýnt að hún er réttsýn, öflug og á tvímælalaust framtíðina og nútíðina fyrir sér. Áfram svona!

58,5% styðja borgarmeirihlutann

Árni M. fer úr öskunni í eldinn

Aumingja Árni M. Mathiesen. Það er erfitt af rökstyðja dellu og jafnvel fjármálaráðherra (og settur dómsmálaráðherra í einn dag) getur það ekki. Rökstuðningur Baggalúts er betri en Árna: 

"Árni Mathiesen, settur dómsmálaráðherra, hefur sent frá sér rökstuðning fyrir skipan Þorsteins Davíðssonar, aðstoðarmanns í dómaraembætti við Héraðsdóm Norðurlands eystra.

Rökstuðningurinn, var skrifaður með afar vandvirknislegri rithönd á fallegt bréfsefni. Er hann í sex liðum og svohljóðandi:

1. Steini litli hefur alla tíð verið afar hjálpsamur og duglegur drengur - og skal sérstaklega tekið til þess hve þolinmóður og nærgætinn hann hefur verið við dómsmálaráðherra.
2. Hann er mjög þrifalegur.
3. Hann er sérlega vel upp alinn.
4. Hann hefur unnið ýmis trúnaðarstörf fyrir Sjálfstæðisflokkinn.
5. Hann hefur víðtæka reynslu af dómarastörfum, m.a. á samsýningum Kattavinafélagsins auk þess að hafa skrifað vandaðan bókadóm í barnablaðið ABC á sínum tíma.
6. Hann talar íslensku."

Svo mörg voru þau orð. 

Segir dómnefnd hafa misskilið hlutverk sitt

Hillary Clinton forseti BNA 2008 og "Axarmorðingi í móðurfaðmi"

Ég spái því hér með formlega að Hillary verði forsetaframbjóðandi Demókrata í BNA í nóvember og að hún vinni nauman sigur á frambjóðanda Repúblikana, sem ég hef ekki hugmynd um hver verður, eftir spennandi og rándýra kosningabaráttu. Vonandi verður Barack Hussein Obama varaforseti þó að John Edwards sé ágætur þá er Obama stjarna. Það að Hillary hafi fellt nokkur tár sýnir bara að hún er mannleg eins og við flest (ef ekki öll:)

Það er svo afar athyglisverður fyrirlestur um allt annað mál í AkureyrarAkademíunni á fimmtudag. Hér er tilkynning um það sem verður á boðstólnum í gamla Húsmæðraskólanum:

Við minnum á fyrsta Fimmtudagshlaðborð ársins

Fimmtudaginn 10. janúar kl. 17 flytur Brynhildur Þórarinsdóttir fyrirlesturinn
„Axarmorðingi í móðurfaðmi. Uppeldisfræði Egils sögu Skalla-Grímssonar“.

Fyrirlesturinn fer fram í gamla Húsmæðraskólanum, Þórunnarstræti 99, Akureyri.

Miðaldamenn litu ekki á börn sem sérstakan þjóðfélagshóp heldur „litla fullorðna“, fullyrti franski fræðimaðurinn Philippe Ariés fyrir nokkrum áratugum. Bernskufræðinga greinir nú mjög á um réttmæti fullyrðingar Ariés. Vissulega var íslenska miðaldasamfélagið gjörólíkt því sem við nú þekkjum en engin ástæða er þó til að halda því fram að fólk hafi litið börn öðrum augum en nú er gert. Í erindinu mun Brynhildur ræða um þá „uppeldisfræði“ sem fram kemur í íslenskum miðaldabókmenntum, sérstaklega Egils sögu.

Brynhildur Þórarinsdóttir er íslenskufræðingur og aðjúnkt við Kennaradeild Háskólans á Akureyri. Hún hefur sent frá sér sex barnabækur og eru þrjár þeirra endursagnir á Njálu, Eglu og Laxdælu, en fyrir þær hlaut hún norrænu barnabókaverðlaunin 2007. Í fyrirlestrinum nýtir hún sér reynslu sína af matreiðslu miðaldaarfsins, barnauppeldi, bernskuvísindum, kennslufræði og karlmennskurannsóknum.

Að erindinu loknu verður boðið upp á léttar veitingar að hætti hússins.

Allir velkomnir og aðgangur ókeypis.

Gáfu tárin Clinton byr?

Ég ætla að kaupa Moggann í dag

Ég var að fletta Mogganum á kaffistofunni áðan og hann er bara stútfullur af áhugaverðu efni. Strax á forsíðunni eru tvær frábærar fréttir, önnur af konu sem er til í að endurbyggja Laugarveg 4 og 6 á eigin kostnað, dæmi sem borgarstjórn getur ekki hafnað og hin af frábærum árangri í almenningssamgöngum hér á Akureyri. Inní í blaðinu er ítarleg og vel skrifuð fréttaskýring Skafta Hallgrímssonar um reynsluna af ókeypis strætó frá mörgum sjónarhornum og best finnst mér náttúrulega setning Ninju Rutar nema í VMA sem segir að það sé líka menning að nota strætó, þar hitti maður fólk á leið til vinnu og skóla og að margir félaga hennar skilji bílinn eftir heima og fari frítt í strætó í skólann. Þetta er snilld og nú þarf bara að bæta kerfið og auka tíðni ferða.

Auk þess er hellingur af áhugaverðum fréttum í Mogganum, til dæmis skemmtileg grein Einars Fals um "lista með listamönnum" þar sem hann fjallar um artfacts.net (að vísu smá galli að hann gleymir að benda á hvar ég er á þessum frábæra lista sæti, 6.040 af 180.000 og ofar en Georg Guðni og Hrafnkell sjónlistaverðlaunahafi!).

Svo er einnig áhugaverð grein um Obama og Hillary og meira og meira. Ég veit að þessi pistill minn hljómar eins og ömurleg auglýsing eða allavega kostun frá Mogganum en svo er nú ekki. Leiðararnir eru líka eins og venjulega svo ekki sé nú talað um Staksteina sem ég nenni ekki að lesa þó að hann hafi jafnvel líka litið skár út en venjulega.

Það er greinilegt að það er hellingur af færu fólki að vinna hjá Mogganum þó að topparnir (með undantekningum) séu úti að aka. Stundum kaupum við Moggann á laugardögum með Lesbókinni en nú ætla ég að koma við í Strax og kaupa þetta þriðjudagsblað og ekki bara hanga yfir mbl.is þó að það sé nú einnig ágætt.

Ósátt við rökstuðning ráðherra

Bankarnir finna leið til að smyrja á annað

Íslensku bankarnir sem hafa verið duglegir við að innheimta seðilgjöld, þjónustugjöld og aukagjöld ýmiskonar verða sennilega fljótir að finna leið til að smyrja á eitthvað annað svo neytendur þurfa alltaf að borga brúsann á endanum. Gamli allaballinn hann Björgvin viðskiptaráðherra fær samt prik fyrir að beita sér í þessu máli, já og banna seðilgjöldin illræmdu. Þetta uppgreiðslugjald er einnig glæpsamlegt og samkeppnishamlandi.

Íslenskir neytendur eru með þeim slöppustu í heimi og kominn tími til að við tökum okkur tak og gerum eitthvað í málunum, hættum að kaupa drasl sem verið er að okra á og skiptum um banka þegar okkur er nóg boðið. Ég fagna því til dæmis að þýskur sparisjóðabanki ætlar að bjóða upp á lán með lægri vöxtum hér á landi.

Það þarf að efla neytendavitund og stórefla neytendasamtökin svo þau virki hér eins og í öðrum löndum. Gott ef Björgvin Sigurðsson ætlar að fara í það.

Seðilgjöld heyri sögunni til

Frasarnir um fjölda glæpa útlendinga gerðir afturreka

Af umfjöllun úr fjölmiðlum að dæma eru pólverjar á Íslandi glæpamenn upp til hópa. Nú kemur hinsvegar í ljós að þetta er einn stór "misskilningur" því hið rétta er að pólverjarnir sem hér búa eru löghlýðnastir allra, mun löghlýðnari en íslendingar. Þetta er í raun í samræmi við niðurstöður úr rannsóknum frá öðrum löndum. Útlendingarnir eru í flestum tilfellum miklu löghlýðnari en innfæddir.

Það er hinsvegar vel þekkt að öfgahægriflokkar gera í því að fullyrða allt annað og ala þar með á fordómum. Við höfum nýleg dæmi um þetta frá Sviss, Hollandi, Þýskalandi og Danmörku. Í Þýskalandi var vinsælt slagorð hjá þessu þjóðernissinnuðu flokkum "Burt með útlendinga!". Þegar það var bannað þá breyttu þessir öfgahægriflokkar (nýnasistaflokkar eins og DVU) slagorðinu í "KRIMINELLE AUSLANDER RAUS" sem ef til vill er hægt að þýða "Afbrotaútlendingar burt". Þar er eiginlega farið úr öskunni í eldinn því það er einmitt látið að því liggja að útlendingarnir fremji fleiri glæpi en innlendir. Þetta hefur auðvitað verið hrakið með tölfræði en það dugar ekki til, verstu þjóðernissinnarnir halda áfram að bulla. Alveg eins og mér sýnist nokkrir nafnlausir bloggarar gera í tenginu við þessa frétt hér á moggablogginu.

Formaður samtaka Pólverja á Íslandi Witek Bogdanski bendir á í 24 stundum að í fréttum er gjarnan sagt frá því ef útlendingar séu þeir sem frömdu glæpinn en ekkert minnst á hvaðan maðurinn sé (til dæmis úr Kópavogi) ef hann er Íslendingur. Fjölmiðar þurfa að taka sér tak. Framtak Alþjóðahússins að verðlauna Ævar Kjartansson og Hjálmar Sveinsson fyrir afbragðs þætti á Rás 1 um málefni innflytjenda er til fyrirmyndar.

Af gefnu tilefni eru þeir sem skrifa athugasemdir á bloggið mitt eru beðnir um að skrifa undir fullu nafni.

Pólverjar þeir löghlýðnustu

Bjartsýnn á að Ísraelsstjórn fari að lögum

Það ef til vill ofurbjartsýni til en það er alltaf hægt að halda í vonina. Ísraelsstjórn hefur ítrekað þverbrotið alþjóðalög. Óskandi væri að Ísraelar skiluðu landi aftur til Palestínumanna og að friður kæmist á. Það er mikill kraftur í samtökunum Ísland-Palestína og á morgun kemur góður gestur og segir frá ástandinu í landinu. Hér er tilkynning frá samtökunum.

Heimsókn Ali Zbeidat til Íslands
Opinn fundur í Alþjóðahúsinu á morgun - Laugardaginn 5. janúar, kl 14.00


Félagið Ísland-Palestína hefur starfsemi sína á nýju ári með heimsókn blaðamannsins og aktivistans Ali Zbeidat til Íslands og opnum fundi með honum í Alþjóðahúsinu, laugardaginn 5. janúar. Fundurinn hefst klukkan 14:00. Aðgangur er öllum opinn.

Ali Zbeidat er fyrrum pólitískur fangi sem í áraraðir barist fyrir mannréttindum Palestínumanna sem búa innan landamæra Ísraels (stundum kallaðir ísraelskir arabar). Hann hefur ísraelskan ríkisborgararétt og er búsettur í bænum Sakhnin, sem í dag liggur innan landamæra Ísraelsríkis.

Í upphafi fundarins verður sýnd 25 mínútna heimildarmynd um skipulega eyðileggingu á íbúðarhúsum Palestínumanna - en fjölskylda Ali sjálfs hefur átt á hættu að missa heimili sitt eftir að það var úrskurðað ólöglegt af ísraelskum yfirvöldum. Að sýningu lokinni flytur Ali ræðu um Palestínumenn í Ísrael, það er hlutskipti íbúa palestínsku svæðanna sem hertekin voru 1948 og innlimuð í Ísraelsríki. Þá mun hann fjalla um pólitíska fanga í Ísrael, en um ellefu þúsund Palestínumenn; karlar, konur og börn eru nú í ísraelskum fangelsum. Að lokinni ræðu hans verða fyrirspurnir og umræður.

----------------------------------------------------------
Tenglar:

• Apartheid targets Palestinian home-owners inside Israel
  Jonathan Cook fer yfir sögu Ali Zbeidat í mjög góðri grein um hlutskipti Palestínumanna í Sakhnin og annarstaðar innan landamæra Ísraels.
  
  
• The Legal Center for Arab Minority Rights in Israel
  Samtök sem vinna að mannréttindum palestínskra íbúa innan landamæra Ísraels. Beita sér m.a. fyrir jafnrétti til náms og réttindum fanga, veita lögfræðiaðstoð og reka mál gegn lagasetningum sem mismunar fólki á kostnað uppruna þeirra eða trúarbragða.
  
  
• Adameer
  Samtök sem vinna að því að verja mannréttindi palestínskra fanga í Ísrael. Hér má finna margs konar fróðleik og tölfræði, ekki síst um pólitíska fanga.

Bush bjartsýnn á friðarsamkomulag

Joris Rademaker opnar sýningu í Kunstraum Wohnraum á sunnudag

JORIS RADEMAKER

MANNLEG TILVIST

06.01. - 02.03.2008

Opnun sunnudaginn 6. janúar 2008, klukkan 11-13

Opið samkvæmt samkomulagi    


KUNSTRAUM WOHNRAUM           
Hlynur Hallsson • Kristín Kjartansdóttir   
Ásabyggð 2 • IS-600 Akureyri •  [phone]
hallsson(hjá)gmx.net • www.hallsson.de

---

Sunnudaginn 6. janúar 2008 klukkan 11-13 opnar Joris Rademaker sýninguna Mannleg tilvist í Kunstraum Wohnraum á Akureyri. Joris er Hollendingur en hefur fengist við myndlist síðan 1983. Hann var útnefndur bæjarlistamaður Akureyrar árið 2006.
Joris vinnur með blandaða tækni og oft með mismunandi þema í lengri tíma í senn. Þetta er einhverskonar yfirlitssýning inni á heimili þar sem verkin samræmast alvöru og leik heimilisfólksins. Þau eru unnin út frá pússluspilskubbi, og í mismunandi tækni, vatnsliti, veggfóður, sprey, þrykk, málverk, ljósrit, klippimynd og sem objekt eða hlutir.

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Jorisar Rademakers stendur til 2. mars 2008 og er opin eftir samkomulagi og hægt er að hringja í síma 4623744. Nánari upplýsingar um Kunstraum Wohnraum er að finna hér.
 

Joris Rademaker

1977-1983 Myndmenntakennaranám í Tilburg í Hollandi
1983-1986 AKI: Myndlistaskólinn í Enschede í Hollandi
2006 Bæjarlistamaður Akureyrar

Sýningar

1987 Gallery Hooghuis, Arnhem, Holland
1988 Markt 17, Enschede, Noordkunst, Holland
1995 Listasafnið á Akureyri
1995 Slunkaríki, Ísafjörður
1997 Nýlistasafnið í Reykjavík
1997 Deiglan Akureyri, Listasumar 95 á Akureyri
1998 Gallerí+, Akureyri
2002 Slunkaríki, Ísafjörður
2002 Gallerí Skuggi, Reykjavík
2004 Safnasafnið, Svalbarðsströnd
2005 Bókasafn Háskólans á Akureyri
2005 Gallarí gangur, Reykjavík
2005 Gallerí+, Akureyri
2006 Populus Tremula, Akureyri
2006 Karólína Restaurant

Guðrún Vaka opnar sýninguna "Uppgjör" á Café Karólínu

Guðrún Vaka

Uppgjör

05.01.08 - 02.02.08

Velkomin á opnun laugardaginn 5. janúar 2008, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755


Laugardaginn 5. janúar 2008, klukkan 14 opnar Guðrún Vaka sýninguna "Uppgjör", á Café Karólínu á Akureyri.

Guðrún Vaka útskrifaðist frá Myndlistaskólanum á Akureyri 2006 var þar áður eitt ár á myndlistabraut VMA. Hún er meðlimur í Grálistahópnum og hefur tekið þátt í samsýningum en þetta er hennar fyrsta einkasýning. Hún segir um sýninguna á Café Karólínu:

"Tónlist! Hvar værum við án hennar? Það eiga sér örugglega flestir einhverja góða sögu um þeirra upplifun á góðri tónlist, svo ekki sé minnst á lélegri tónlist, lag sem minnir á fyrstu ástina, lag til að gráta yfir, lag sem kemur manni í gott skap eða vont skap og svona mætti lengi telja.

Með þessari sýningu má segja að ég sé að gera upp tónlistasmekk minn frá æsku en hann þótti með eindæmum lélegur, það er hvað jafnaldra mína varðar, og það var ekki oft að ég viðurkenndi hvernig tónlist ég hlustaði á þegar enginn heyrði til.

Þetta byrjaði allt á því að ég komst í plötusafnið hans pabba, en hann átti ógrynni af vínilplötum, litlum, stórum, 45 snúninga og 75 snúninga svo ekki sé minnst á valið á tónlistinni sjálfri, þarna var hægt að finna alla helstu söngvarana frá árunum “60-“80.

Ég kolféll fyrir köllum á borð við Elvis Prestley, Cat Stevens, Simon and Garfunkel og Creedings Clearwater Revivel, ég verð nú að viðurkenna að ég hlusta ekki mikið á Elvis í dag en hinir eldast assi vel. Þegar ég var um 14-15 ára voru strákarnir í Wham og Duran Duran aðalmálið, mér þótti ekki mikið til þeirra koma en reyndi að taka þátt í herleg heitunum. Einhvern tíman þegar umræða opnaðist í bekknum mínum um tónlist var ég spurð með hverjum ég “héldi” þá asnaðist ég til að segja Wham en allur bekkurinn “hélt” með Duran Duran.

Ég hefði alveg eins getað sagt Cat Stevens miðað við umræðuna sem fór af stað í kjölfarið á þessu svari mínu og dauðsá eftir því að hafa ekki gert það því ég var alveg viss um að allavega kennarinn hefði staðið með mér ef ég hefði nefnt hann. Tónlist í dag á það til að fara dálitíð í taugarnar á mér og þá helst textarnir, allt þetta...jejejeje, oooooo og sexsexsex, hvað varð um alla ástina, pólitíkina og áróðurinn sem lituðu tónlistina á hippaárunum?

Í dag hlusta ég enn á þessa kalla mína og þrátt fyrir að tónlista smekkur minn sé talinn vafasamur þá læt ég engan stoppa og mig og hlusta á þá í botni inni í bílskúr eða í Ipodinum mínum. "

Fyrri sýningar:
Samsýning, DaLí, Grálist með smálist              2007
Einkasýning, Staðurinn Akureyri                    2006
Samsýning, Óðinshúsi Eyrarbakka                 2006
Vorsýning Myndlistaskólans á Akureyri           2004, 2005 og 2006
Samsýning, Langi Mangi Ísafirði                    2005-2006
Samsýning, Strikið Akureyri                          2005
Nemendasýning útskriftanema, Deiglan          2005
Nemendasýning útskriftanema, Deiglan          2005
Samsýning, Rex og Pex vinnustofa                2005
Samsýning, Geimstofan                                 2004
Samsýning, Pönk, Deiglan                              2004

Nánari upplýsingar veitir Guðrún Vaka í gvaka(hjá)simnet.is og í síma 8962987

Sýningin á Café Karólínu stendur til 2. febrúar, 2008. Allir eru velkomnir á opnun laugardaginn 5. janúar, klukkan 14.

Á sama tíma stendur yfir sýning Brynhildar Kristinsdóttur á Karólínu Restaurant.

Næstu sýningar á Café Karólínu:

03.02.08-02.03.08     Steinn Kristjánsson
03.03.08-04.04.08     Unnur Óttarsdóttir
05.04.08-02.05.08     Guðmundur R Lúðvíksson
03.05.08-06.06.08     Kjartan Sigtryggsson
07.06.08-04.07.08     Arnar Ómarsson
05.07.08-01.08.08     Vilhelm Jónsson
02.08.08-05.09.08     Margeir Sigurðsson
06.09.08-03.10.08     Sigurlín M. Grétarsdóttir

Umsjónarmaður sýninganna er Hlynur Hallsson

Gleðilegt ár öll - Dagskrá KW 2008-2009

Nokkrar mínútur i að kveikt verði í brennunni hér fyrir norðan. Já, gleðilegt ár öll! Til hamingju Svandís með að vera kosin verðskuldað maður ársins af hlustendum Rásar 2. Myndlistin byrjar af krafti þetta árið og laugardaginn 26. janúar klukkan 16 ætlum við að stofna formlega myndlistarfélagið. Stofnfundurinn verður í Deiglunni hér í Listagilinu. Á sunnudaginn klukkan 11 er opnun heima hjá okkur og allir eru velkomnir meðan húsrúm leyfir. Joris Rademaker byrjar og hér er svo dagskráin í Kunstraum Wohnraum fyrir 2008-2009.

6. janúar 2008 - 2. mars 2008            Joris Rademaker

16. mars 2008 - 22. júní 2008            Ragnar Kjartansson

27. júlí 2008 - 21. september 2008         Alexander Steig

5. okt. 2008 - 21. desember 2008        Arna Valsdóttir 

4. janúar 2009 - 22. mars 2009             Hanna Hlíf Bjarnadóttir

5. apríl 2009 - 21. júní 2009            Huginn Þór Arason   

5. júlí 2009 - 20. september 2009        Vera Hjartardóttir 

4. október 2009 - 20. desember 2009    Aðalheiður Eysteinsdóttir 

 

KUNSTRAUM WOHNRAUM

Opnun sunnudag klukkan 11-13. Opið eftir samkomulagi 4623744

Hlynur Hallsson og Kristín Kjartansdóttir, Ásabyggð 2, 600 Akureyri

Kveikt í brennum í borginni

Benazir Bhutto myrt

Ástandið í Pakistan virðist hanga á bláþræði. Daglega eru gerðar sjálfsmorðsárásir. Ekki beint friðsöm jól þar í landi. Kosningarnar sem eiga að fara fram eftir tvær vikur hljóta að vera í uppnámi eftir að einn helsti frambjóðandi stjórnarandstöðunnar er drepin. Benazir Bhutto var hugrökk kona og hún lét lífið í dag fyrir hugrekki sitt. Lýðræðið hefur enn og aftur beðið hnekki.

Benazir Bhutto látin

50% líkur á hvítum jólum á Norðurlandi og 100% líkur á friðargöngu

Daginn er tekið að lengja og það er bjart á Akureyri þessa stundina, vantar bara snjóinn. En hann gæti komið í kvöld eða á morgun ef allt fer vel. Það verður Blysför í þágu friðar í kvöld. Í höfuðborginni og á  Ísafirði er lagt af stað klukkan 18 en hér á Akureyri klukkan 20.  Um leið og ég óska öllum friðar og gæfu birti ég hér dagskrána:

Hin árlega Blysför í þágu friðar verður gengin á Þorláksmessu á Akureyri.

Gengið verður frá Samkomuhúsinu í Hafnarstræti kl. 20.00 og út á Ráðhústorg.

Það er góður siður að bæta við hinn almenna friðarboðskap jólanna andstöðu  við stríðsrekstur og yfirgang á líðandi stund.

Árásarstríð og hernám þjaka Írak og annað eins fer fram í Afganistan undir forystu NATO.  Hótað er hernaðaraðgerðum gegn Íran. Stuðningur Íslands við stríðsreksturinn í Írak hefur ekki verið afturkallaður.

Sýnum hug okkar um stríðið og friðinn.

Kjörorð eru þau sömu og undanfarin ár:

- Frið í Írak!

- Burt með árásar og hernámsöflin!

- Enga aðild Íslands að stríði og hernámi!

 

Ávarp flytur Hannes Örn Blandon prófastur.

Félagar úr Kór Akureyrarkirkju syngja.

Blys verða seld í upphafi göngunnar.

Aðstandandi: Samtök hernaðarandstæðinga

0,01% líkur á hvítum jólum í Danmörku

Loksins fjármagn til Háskólans á Akureyri

Það eru góð tíðindi að skrifað hafi verið undir samning milli Háskólans á Akureyri og menntamálaráðuneytisins um aukin framlög til skólans. Fjárskortur hefur háð HA lengi og nú er sem betur fer bætt úr því, allavega að hluta til. Mikilvægi Háskólans á Akureyri er ótvírætt og skólinn hefur fyrir löngu sannað sig. Hann ætti því að fá að vaxa enn hraðar enda er eftirspurnin fyrir hendi. Stjórn Vinstri grænna á Akureyri fagnar sérstaklega þessum samningi en í ályktuninni segir:

"Stjórn Vinstrihreyfingarinnar - græns framboðs á Akureyri fagnar auknum fjárveitingum upp á 275 milljónir króna til Háskólans á Akureyri næstu þrjú árin. Þar með er óvissu eytt sem einkennt hefur rekstur Háskólans á Akureyri síðastliðinn ár, einkum hvað varðar möguleika skólans á sviði rannsókna og áframhaldandi uppbyggingar, og til að efla háskólanám á framhaldsstigi. Stjórnendur, starfsfólk og nemendur Háskólans á Akureyri geta nú betur einbeitt sér að því gríðarmikla uppbyggingastarfi sem unnið er bæði innan og utan veggja skólans. Um málefni Háskólans á Akureyri hefur ríkt víðtæk pólitísk samstaða frá upphafi og er mikilvægt að svo verði áfram."

Háskólinn á Akureyri hefur ekki aðeins þýðingu fyrir menntun í landinu öllu, hann hefur einnig styrkt Eyjafjarðarsvæðið sem ákjósanlegan búsetukost og mannlífið er blómlegra. Þess vegna ætti að stofna á Ísafirði Háskóla Vestfjarða sem fyrst að fordæmi Háskólans á Akureyri og sá skóli ætti auðvitað að vera sjálfstæður skóli en ekki útibú. Það skiptir máli.

Tveir mikilvægir samningar fyrir Háskólann á Akureyri