Minning um Lilju Guðmundsdóttur

Þann 1. maí 2006 lést Lilja Guðmundsdóttir aðeins 21 árs gömul eftir baráttu við krabbamein. Tónleikarnir sem Ung vinstri græn héldu á Græna hattinum voru til minningar um þessa frábæru baráttukonu og vin. Svavar Knútur sló í gegn og stuðbandið Bloodgroup frá Egilsstöðum og Færeyjum var frábær og meiriháttar skemmtileg. Takk fyrir tónleikana. Hér er grein sem ég skrifaði til minningar um Liju Guðmundsdóttur fyrir ári. 

Í dag kveðjum við unga baráttukonu, Lilju Guðmundsdóttur. Það eru ekki margar manneskjur sem hafa við fyrstu kynni eins mikil áhrif á mann og Lilja gerði. Og eftir því sem maður kynntist henni meira kom enn betur í ljós þvílkur sólargeisli hún var. Lífsgleði hennar og dugnaður er okkur öllum góð fyrirmynd. Það er erfitt að sætta sig við þá staðreynd að þegar ég hjóla niður í Hafnarstræti þá skuli hún ekki koma inn um dyrnar brosandi með kaffi í hendinni með tillögur um hvernig við getum gert hlutina betri.
Ég kynntist Lilju síðastliðið haust þegar Ung vinstri græn voru formlega stofnuð á Akureyri. Auðvitað hafði ég tekið eftir þessari ungu og glæsilegu konu í bænum því allsstaðar sem Lilja kom geislaði af henni. Lilja var komin í stjórn UVG um leið og farin að hafa jákvæð áhrif. Hún tók þátt í forvali fyrir bæjarstjíornarkosningarnar og sóttist eftir sjötta sætinu á lista vinstri grænna og hlaut auðvitað glæsilega kosningu í það sæti. Hún, ásamt félögum sínum skipulögðu tónleika, prentuðu boli, komu að stefnumótunarvinnu og mætti manna best á alla fundi. Þegar framjóðendarástefna VG var haldin í Reykjavík kom Lilja auðvitað með enda vildi hún taka þátt í baráttunni af krafti og afla sér eins mikilla upplýsinga og hægt var og auðvitað hitta félaga sína. Þannig var Lilja, góður félagi, einlæg og bjartsýn og full af baráttuvilja og krafti. Enda vissi hún hvað það var að þurfa að berjast við krabbamein og það þarf kraft og orku til. Þegar ég spurði hana hvort hún vildi ekki skrifa grein sem gæti birst í Vikudegi eða Morgunblaðinu og svo á Netinu, í Morgunpóstinum, tók hún vel í það og nokkrum dögum seinna var greinin tilbúin. Hún hafði lagt mikla vinnu í hana, farið og aflað sér upplýsinga, talað við konurnar hjá Krabbamenisfélaginu á Akureyri og komist að því að sífellt var verið að skera niður framlög til félagsins þrátt fyrir að hægt væri að sýna fram á að fjármagnið nýttist vel þeim sem á þurftu að halda.
Á föstudegi var Lilja hrókur alls fagnaðar í grilli ungra vinstri grænna fyrir utan kosningamiðstöðina okkar. Um kvöldið hittumst við öll heima hjá Stínu til að klára drög að stefnuskránni og Lilja kom með marga góða og mikilvæga punkta um menningarmál og stuðning við öryrkja. Á laugardagsmorgni var hún mætt á fund til ræða jafnrétti og femínisma og hafði þar margt gott til málanna að leggja og hlustaði á umræðurnar af áhuga. Hún hlakkaði til að að taka þátt í 1. maí og fagna Óla og Svandísi sem ætluðu að gifta sig hjá sýslumanni á þessum baráttudegi verkafólks. Um morguninn var fundur hjá Stefnu, félagi vinstri manna, og þar ætlaði Lilja auðvitað að vera. En á fundinn bárust okkur þær fréttir að hún hefði látist um nóttina. Það var verið að syngja maístörnuna og Lilja var maístjarnan okkar sem skín.
Kæra Lilja þin er sárt saknað en það er gott að vita af því að þú verður með okkur áfram í baráttunni. Fjölskyldu Lilju, vinum og öllum aðstandendum votta ég samúð mína við fráfall bjartsýnnar baráttukonu af lífi og sál.

Þrumuræða Ögmundar á Akureyri

Ögmundur Jónasson flutti þrumuræðu í dag í troðfullum Sjallanum á Akureyri. "Þetta er einhver sú besta ræða sem flutt hefur verið" sagði einn félagi minn þegar við gengum út í sólina eftir þennan frábæra fund. Mætingin í 1. maí gönguna á Akureyri hefur ekki verið svona góð í mörg ár og það var kominn tími til. Niðurlagið í ræðu Ögmundar var: "Ég á að gæta bróður miíns og ég á að gæta systur minnar. Það eru skilaboðin 1. maí. Þann dag minnir verkalýðshreyfingin á mátt samkenndar og samstöðu.
Og þegar við segjum að það eigi að verja trúnaðarmann stéttarfélags vestur á Snæfellsnesi sem sagt var upp störfum - þá gerum við það ekki bara fyrir viðkomandi einstakling – konu sem var rekin vegna skoðana sinna - heldur gerðum við það fyrir alla trúnaðarmenn og alla hina sem ekki eru túnaðarmenn og njóta góðs af starfi þeirra sem standa í baráttu fyrir réttlæti og mannréttindum.
Og þegar við verjum erlendu verkamennina við Kárahnjúka þá gerum við það fyrir alla verkamenn – svo allir menn geti gengið uppréttir og hnarreistir.
Allir menn.
Nær og fjær.
Á þetta viljum við minna á baráttudegi verkalýðsins, hinn fyrsta maí.
Sterk verkalýðshreyfing er frjáls verkalýðshreyfing.
Og frjáls verkalýðshreyfing eru frjálsir menn.
Til hamingju með daginn."

Almannahagsmunir ráði för

Til hamingju með baráttudag verkafólks 1. maí

Þetta verður góður dagur með þéttri dagskrá. Hér fyrir norðan er Stefna, félag vinstri manna með morgunfund á Mongó með flottri dagskrá og svo er kröfuganga klukkan 13:30 frá Alþýðuhúsinu (Glitnishúsinu!) að Sjallanum þar sem Ögmundur Jónasson verður aðal ræðumaður, kaffi hjá VG í Göngugötunni og svo tónleikar á Græna hattinum hjá UVG klukkan 20 um kvöldið. Ég hlakka til. Tek Unu Móeiði með mér á fundinn hjá Stefnu og kannski kemur Lóa Aaðalheiður með í kröfugönguna en Huga vantar tvö ár uppá að komast með á tónleikana um kvöldið. Það er frítt inn.

Í Þýskalandi er þetta mikill hátíðisdagur sem byrjar reyndar kvöldið áður þar sem fólk dansar inn í maí. Kúrdarnir voru duglegastir í kröfugöngunni í hverfinu þar sem við bjuggum og voru ekkert að skafa utan af því og svo hittust allir í miðborginni þar sem tugþúsundir komu saman og krefjast bættra kjara fyrir þá lægst launuðu. Það gerum við einnig hér og ný ríkisstjórn hefur það markmið að koma fólki úr fátæktargildrunni. Þessi ríkisstjórn neitar að viðurkenna að það sé til fátækt fólk í landinu. Verkafólk: Gleðilegan baráttudag 1. maí.

Krafan 1. maí að fátækt verði útrýmt á Íslandi

Edda Þórey Kristfinnsdóttir opnar sýninguna VISTASKIPTI á Café Karólínu

Frábært að það verði nóg að gera í Borginni á Sjónlistadegi. Ég ætla að nýta morgundaginn í kröfugöngu og rokk með UVG hérna fyrir norðan. Á laugardaginn verður svo myndlistin í fyrirrúmi. Það opnar ný sýning á Listasafninu á Akureyri og mörg galleríin eru með opnanir. Sýningin hans Jónasar Viðars á Karólínu Restaurant hefur verið framlengd vegna fjölda áskoranna en Edda Þórey Kristfinnsdóttir opnar nýja sýningu á Café Karólínu og tekur við af Aðalsteini Þórssyni. Á heimasíðunni hans eru myndir frá sýningunni á Karólínu.

Edda Þórey Kristfinnsdóttir

Vistaskipti

05.05.07 - 08.06.07   

Velkomin á opnun laugardaginn 5. maí 2007, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---
Laugardaginn 5. maí klukkan 14 opnar Edda Þórey Kristfinnsdóttir sýninguna VISTASKIPTI á Café Karólínu. Café Karólína opnar nú klukkan 10 alla virka morgna en klukkan 12 á laugardögum og sunnudögum.

VISTASKIPTI er uppspretta verka minna sem ég sýni á Café Karólínu. Við mannfólkið erum á eilífu ferðalagi. Hús úr húsi, sveit úr sveit, borg úr borg, land úr landi, úr einni vist í aðra. Vistin getur verið frá því að vera góð til þess að vera nöturleg. Við ráðum ekki alltaf för.
Verkin eru skúlptúrar, lágmyndir, vídeo, textavek og ljósmyndir á striga.

Tilvera okkar er undarlegt ferðalag.
Við erum gestir og hótel okkar er jörðin.
Einir fara og aðrir koma í dag,
því alltaf bætast nýjir hópar í skörðin.
                            Tómas Guðmundsson

Hægt er að nálgast upplýsingar um verk og feril Eddu ásamt myndum á verkum á síðunni http://umm.is/UMMIS/Listamenn/Listamadur/599
Nánari upplýsingar veitir Edda í sima 8994908

Myndin hérna fyrir ofan er af einu verka Eddu sem hún sýnir á Café Karólínu.

Edda verður viðstödd opnunina.
Sýningin á Café Karólínu stendur til 8. júní 2007. Allir eru velkomnir á opnun laugardaginn 5. maí 2007, klukkan 14.

Næstu sýningar á Café Karólínu:

09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Umsjónarmaður sýninganna er Hlynur Hallsson

Sjónlistadagur í Reykjavík

Without The Balls rokka hjá UVG á 1. maí

Fyrsti maí er á morgun og það er þétt dagskrá, sól og hiti og baráttustemning því við fellum ríkisstjórn ójöfnuðar eftir nokkra daga. Hér á Akureyri byrjar ballið klukkan 11 árdegis hjá Stefnu upp í Kaupangi á Mongó (sjá dagskrá hér neðar) og svo er kröfuganga klukkan 13:30 í miðbænum og að Sjallanum þar sem Ögmundur Jónasson er aðalræðumaður. Kaffi og kökur hjá Vinstri grænum í Kosningamiðstöðinni í Göngugötunni og um kvöldið klukkan 20 hefjast frábærir tónleikar sem Ung vinstri græn á Akureyri og Austurlandi standa fyrir og þar er hellingur af atriðum á dagskránni sem ég á að kynna fyrir þéttsetnum Græna hatti. Spenntastur er ég fyrir stúlknabandinu Without the balls frá Egilsstðum en þær slógu í gegn þegar Rás 2 plokkaði hringinn fyrir nokkrum dögum. Umsögnin um þær á heimasíðu Rásar 2 er:

"Síðastar á svið voru heimasæturnar í hljómsveitinni Without The Balls, sem var gestahljómsveit kvöldsins, en hún er skipuð fimm ungum stúlkum frá Egilstöðum og nærliggjandi sveitum. Í gærkveldi var bassaleikarinn reyndar fjarri góðu gamni. Hinar fjórar sem eftir stóðu létu sig samt hafa það að koma fram og vöktu mikla hrifningu tónlistarfólksins að sunnan sem hafði verið í aðalhlutverki fyrr um kvöldið og heimamenn tók þeim einnig með kostum og kynjum. Þær léku á tvo gítara og trommusett með miklum tilþrifum og sungu af innlifun. Það er því óhætt að segja að stúlkurnar hafi komið, séð, sungið og sigrað."

Hei, nákvæmlega eins og Vinstri græn munu gera! Þetta verður frábært. Hér er svo flott dagskrá Stefnu á Mongó:

Morgunfundur Stefnu 1. maí 2007

Mongo sportbar, Kaupangi kl. 11.00
 
Stefna – félag vinstri manna  heldur árlegan morgunfund á baráttudegi verkalýðsins í níunda sinn, á Mongo sportbar, Kaupangi 11.00
 
          Kjörorð Stefnu eru þessi:
 • Kosningar breyta ekki landslaginu – baráttuna út í grasrótina.
 • Vinnu við hæfi handa öllum.
 • Gegn markaðsvæðingu og einkavæðingu.
 • Gegn stóriðjustefnu stjórnvalda.
 • Gegn sölu lands, vatns og sjálfstæðis.
 • Höfnum Evrópusambandsaðild.
 • Gegn félagslegum undirboðum á íslenskum vinnumarkaði.
 • Jafnrétti kynjanna.
 • Írak: Hernámsöflin burt. Ísland úr stríðsliðinu.
 • Ísland úr NATO – segjum herstöðvarsamningnum upp.
 
Ræðumaður dagsins er Björgvin Leifsson, sjávarlíffræðingur á Húsavík.
 
Ávarp um kynjahlutverk og jafnrétti:  Andrea Hjálmsdóttir háskólanemi.
 
Hjónin Kristjana Arngrímsdóttir og Kristján Hjartarson syngja.
 
Framinn verður ýmiss frekari söngur og upplestur í anda dagsins.
        
    Allir velkomnir.

_____________________

Stefna - félag vinstri manna 

Kröfuganga og útifundur

Af hverju er verið að kveikja í sinu?

20 stiga hiti, smá sunnangola, glampandi sól og gleði og svo smám saman leggst reykjarmökkur yfir bæinn og allan Eyjafjörðinn! Og það voru ekki einhverjir brennuvargar á ferð heldur bara skipulögð íkveikja. Ég hélt að það væri búið að sýna fram á að sinubruni er EKKI góður fyrir gróðurinn og langtfrá því að vera góður fyrir umhverfið. Þetta er mengun af verstu tegund og á auðvitað ekki að leyfa. Og ef það eru einhver gömul lög sem leyfa sinubruna þá á auðvitað að breyta þeim hið snarasta. Þetta er rugl.

Fjölmargar kvartanir vegna sinubruna í Eyjafirði

Flott útsýni hjá Jónsa og Ingu á Manhattan

Er þetta ekki annars útsýnið úr íbúð Jóns Ásgeirs og Ingubjargar Pálma? Var ekki Einar Falur í þakíbúðinni þeirra að taka myndir yfir Manhattan og Gramercy Park? Ég hefði líka splæst í þessar tvær hæðir ef ég hefði haft efni á því. En kannski ekki eitt svona miklu í afmælisveisluna mína. Vonandi eru þau með einhverja sem þrífa þessa 650 fermetra því ekki myndi ég nenna að ryksuga og skúra allt. Nóg að skúra stofugólfið hérna á henni Akureyri aðra hvora viku og ryksuga alla stigana. Annars erum við að leita okkur að íbúð til að leigja í Berlín því við vorum að missa herbergið okkar þar í borg. Max leiga er 20.000 á mánuði með hita. Kannski bjartsýni en það þarf ekki að vera svona flott útsýni yfir á Alexanderplatz, Mitte, eða Tiergarten. Við sættum okkur við vegg nágrannana. En ef ég hefði efni á því þá myndi ég kaupa heila hæð, eða bara tvær.

Fjallað um fasteignakaup Jóns Ásgeirs í New York Times

Stjórnin hangir

Þó að Vinstri græn meira en tvöfaldi fylgið samkvæmt þessari könnun dugar það ekki til að fella ríkisstjórnina. En Sjálfstæðisflokkurinn er á niðurleið og það er jákvætt. Íslandshreyfingin er ekki alveg að virka þrátt fyrir ágætis málstað. En raunverulegir umhverfisverndarsinar kjósa auðvitað Vinstri græn. Brettum upp ermar og berjumst fyrir réttlæti og jöfnuði. Það eru tvær vikur til stefnu.

Fylgi Samfylkingar og VG jafnmikið

Björk er lang flottust

Björk Guðmundsdóttir er frábær. Bæði sem tónlistarkona og ekki síður sem talsmaður náttúruverndar. Hún er skapandi einstaklingur sem ráðherrar íhaldsins og bjélistans ættu að hlusta á. Þessi orð hennar eru eins og töluð út frá mínu hjarta:

„Mér finnst, að ef Ísland vilji græða fullt af peningum og hafa starfsemi um allan heim þá sé það síðasta, sem það eigi að gera, að eyðileggja náttúruna. Það þarf ekki snilling til að átta sig á því. Og samt var það fyrsta sem Íslendingar gerðu, eftir að þeir fengu sjálfstæði og peninga að segja: Við skulum eyðileggja landið!"

Hér er frábært viðtal við hana úr Guardian 

Þeir sem einn eru að hugsa um að kjósa stóriðjuflokkana (núverandi ríkisstjórn) ættu að lesa þetta viðtal og átta sig á hlutunum, það er ekki of seint að snúa af rangri braut.

Björk gremst stóriðjuframkvæmdir á Íslandi

Rafael Correa stendur uppí hárinu á Alþjóðabankanum

Rafael Correa er maður að mínu skapi, ekkert aðsafna skuldum heldur hefur hann unnið að því að gera Ekvador skuldlaust frá því að hann var kosinn eða eins og segir í frétt mbl.is: 

"Vinstrimaðurinn Correa, sem kosinn var til forseta í nóvember sl. er hagfræðingur, menntaður í Bandaríkjunum. Hann hefur síðan hann var kosinn til starfa greitt upp skuldir landsins við Alþjóðagjaldeyrissjóðinn og vill að landið sé sem minnst upp á á erlenda lánadrottna komið."

Alþjóðabankinn undir stjórn Wolfowich er hinsvegar ekki ánægtður með þennan vinstrimann og hefur hætt að veita landinu lán til að greiða niður önnur óhagstæð. Kapítalistarnir láta ekki að sér hæða.

Fulltrúi Alþjóðabankans rekinn frá Ekvador

Málþing Möllu

Í tilefni af áttatíu ára afmæli Málmfríðar Sigurðardóttur fyrrverandi alþingiskonu halda Vinstri græn og vinir Möllu málþing um jafnréttismál á kaffistofu Amtsbókasafnsins á Akureyri laugardaginn 28. apríl klukkan 15-17.

Erindi flytja:
Guðfríður Lilja Grétarsdóttir: Jafnrétti hvað þarf til?
Valgerður H. Bjarnadóttir: Að skapa nýja veruleika, heim fyrir konur og karla
Tónlist:   Björn Valur Gíslason og Jón Kristófer Arnarson
Hólmfríður Jónsdóttir: Ávarp úr Mývatnssveit
Jón Hjaltason og Steingrímur J. Sigfússon flytja ávörp.
Fjöldasöngur og léttar veitingar
Fundarstjóri Þuríður Backman alþingiskona

 

Ég hvet alla til að mæta á bókasafnið og fagna með Möllu 80 ára afmælinu og skemmta sér saman. Málmfríður skipar heiðurssætið á lista Vinstri grænna í Norðausturkjördæmi.

Ómar R. Valdimarsson ætlar að kæra Gauk Úlfarsson

Ómar R. Valdimarsson, talsmaður Impregilo hefur mörg járn í eldinum þessa dagana. Ekki bara að hann sé að hamast uppá Kárahnjúkum heldur er hann einnig afkastamikill bloggari. Síðustu daga hefur hann einbeitt sér með skítkasti að Vinstri Grænum og tekið Paul Nikolov og Sóleyju Tómasdóttur sérstaklega fyrir. Gaukur Úlfarsson skrifaði athugasemd á síðu Ómars sem hann riskoðaði smá og henti út. Gaukur skrifaði þá um málið og Ómar tók upp símann og hringdi í Gauk og hótaði honum málshöfðun. Þetta fer að verða spennandi og dálítið einkennilegt hvað sumir eru hörundsárir þessa dagana. En það er jú mikið að gera hjá Ómari í vinnunni með allt draslið meira en þrjá mánuði á eftir áætlun og ekkert rafmagn komið og borarnir hjakka á sama stað undir Þrælahálsi og svo er líka eitthvert óloft í göngunum og erlendu verkamennirnir alltaf að kvarta. Þetta getur verið erfitt líf.

Beðið eftir sérfræðingum til að meta loftmengunina í aðrennslisgöngunum

Krúttlegasta álver í heimi

Hér er frábær mynd af krúttlegu "litlu" álveri sem á að rísa í Helguvík, helst sem fyrst. Það er ótrúlega sætt, mengar lítið, sést varla og geltir ekki. Það eru tré allt í kringum það (að vísu eitthvað daufleg) og fólk að ganga, börn að hlaupa og hellingur af fuglum að dást að því. Þetta er frábært. Jón Sig. stoppformaður og Geir H aðalformaður eru grænir af öfund yfir þessu krúttlega álveri sem stóriðjustefnan þeirra á engan þátt í að koma á koppinn. Þetta er næstum fullkominn heimur sem við lifum í.

Hitaveita Suðurnesja og Norðurál undirrita orkusamning vegna álvers í Helguvík

Næsti forseti Frakklands

Ég ætla rétt að vona að frakkar brjóti blað og kjósi glæsilega konu með hugsjónirnar á hreinu sem næsta forseta. Auðvitað er Segolene Royal ekki fullkomin en hún er miklu miklu frambærilegri en Sarkozy og það væri gæfuspor fyrir Frakkland ef hún yrði kosin forseti í seinni umferðinni. Hún er ekkert að skafa utan af hlutunum þegar hún ávarpaði stuðningsfólk sitt í kvöld og sagði meðal annars: "Mörg okkar, burtséð frá því hvað við kusum í fyrri umferðinni - viljum ekki að Frakklandi sé stjórnað af lögmálum hinna sterkustu eða þeirra ófyrirlitnustu, þeirra samansaumuðustu sem einungis hugsa um fjárhagslegan ávinning og safna valdinu á hendur fárra." og ennfremur: "Ég hvet alla þá sem vilja skipa mannúð ofar verkbréfamarkaðinum, alla þá sem vilja binda enda á óöryggið og forherðinguna til að sameinast." Orð sem eiga einnig við hér á landi.

Royal hvetur andstæðinga peningahyggjunnar til að sameinast

Vinstri græn klikka ekki

Vinstri græn klikka ekki á þessu. Auðvitað á að endurbyggja þessi sögufrægu hús. Það er nóg pláss fyrir steinsteypuháhýsi í næsta nágrenni. Það eru gömlu fallegu húsin sem laða að fólk og ferðamenn. Svo eru komnir flottir bolir til að hressa fólk við. Mæli með því að allir fjárfesti í þessum bolum og allar upplýsingar eru hér og svo fá menn gefins frábæra margnota innkaupapoka úr bómull í leiðinni.

VG hvetur til samstöðu um endurreisn húsanna sem brunnu