Forvalsreglur fyrir Vinstri græn í Norðausturkjördæmi

Allir félagar í VG í Norðausturkjördæmi fá sendan póst og þrennt í hendur:
1. Kjörseðil eingöngu með nöfnum frambjóðenda ásamt reit fyrir númer fyrir framan hvert nafn og umslög til að senda hann til baka.
2. Kynningarbækling
3. Forvalsreglur

 

1. Kosning:
a) Félagar kjósa frambjóðendur með því að merkja með tölunum 1-8 í ferning fyrir framan nöfn þeirra frambjóðanda, sem þeir vilja sjá í átta efstu sætunum.  Þannig táknar talan 1 fyrsta sætið, talan 2 annað sætið o.s.frv.
b) Heimilt er að merkja við færri en átta en merki félagi við fleiri, þ.e. raði í 9. sæti eða ofar, verða þau sæti ekki talin.
c)  Heimilt er að raða frambjóðendum í önnur sæti en þeir hafa tilgreint.
d)  Raði félagi tveimur eða fleiri frambjóðendum í sama sæti er sú röðun ógild fyrir báða (alla) frambjóðendurna í því sæti.
e)  Ítrekað er að félagar eiga að númera við frambjóðendur í þau sæti, sem þar vilja sjá þá í á endanlegum lista flokksins í kjördæminu.  
Ekki skal merkja við nafn eins eða fleiri frambjóðenda með krossi og verða slíkir krossar ekki taldir.

2.  Úrvinnsla:
a) Atkvæði eru talin í hvert sæti.  Nú býður einhver sig fram í fleiri en eitt sæti og gildir þá sú regla að atkvæðin leggjast saman að sæti með hærri tölu.  Dæmi:  Einstaklingur býður sig fram í sæti 6-8 og fær 15 atkvæði í hvert þeirra.  Þá telst hann með 15 atkvæði í 6. sæti, 30 atkvæði í 7. sæti og 45 atkvæði í 8. sæti.
b) Sá sem fær flest atkvæði í ákveðið sæti fær það sæti að uppfylltum ákveðnum skilyrðum, sem kjörstjórn vinnur eftir:
Í fyrsta lagi mun kjörstjórn tryggja sem jafnasta dreifingu kynja í 8 efstu sætin.  Fái karl t.d. 1. sætið verður kona í 2. sæti.  Fái kona 3. sætið verður karl í 4. sæti, þ.e. dreifingin væri þá orðin karl - kona - kona - karl, o.s.frv.
Í öðru lagi mun kjörstjórn taka tillit til byggðasjónarmiða eins og kostur er.
Í þriðja lagi mun kjörstjórn taka tillit til aldursdreifingar eins og kostur er.
Í fjórða lagi, að framansögðu jöfnu, ræður hlutkesti, falli atkvæði tveggja eða fleiri frambjóðenda jöfn í eitthvert sæti.


Kjörfundur verður svo haldinn 28. febrúar 2009 að Geislagötu 7 á Akureyri og að Kaupvangi 5 á Egilsstöðum kl. 10:00 – 22:00.  Enn fremur geta félagar skilað atkvæði sínu í pósti, sem verður að póstleggja í síðasta lagi 27. febrúar.

Félagar í svæðisfélögum í NA-kjördæmi, sem eru búsettir utan kjördæmisins innanlands, hafi samband við Ólaf Þ. Jónsson í síma 4623463 til að fá send kjörgögn.

Félagar í svæðisfélögum í NA-kjördæmi, sem eru búsettir erlendis hafi samband við undirritaðan í tölvupósti, [e-mail]

Kosningarétt hafi allir félagsmenn í VGNA miðað við 23.febrúar 2009.
Kjörskrá verður lokað kl. 17:00 þann 23. febrúar 2009.

Glæsileg þátttaka í forvali Vg

 

Það eru góðar fréttar að svo margir gefi kost á sér í forvali Vg hér í Norðausturkjördæmi. Hópur af góðu fólki og sérstaklega ánægjulegt hvað margt ungt fólk ætlar að taka þátt. Mér sýnist dreifingin yfir allt kjördæmið sé einnig góð og þetta er fólk úr hinum ýmsu starfstéttum með fjölbreyttan bakgrunn. Það eru vissulega fleiri karlar en konur sem gefa kost á sér en það getur verið að það nýtist konunum betur. Ég ætla að minnsta kosti að kjósa fjórar konur og fjóra karla í átta efstu sætin. Hér er allur listinn.

Þetta er fyrsta forvalið sem fer af stað á landinu og þrátt fyrir skamman aðdraganda eru 21 í framboði. Þeir sem vilja ganga til liðs við Vinstri græn geta skráð sig hér. Það þarf að gera það fyrir mánudaginn 23. febrúar klukkan 17. Þá fær maður kynningarbækling og atkvæðaseðil sendan í pósti og kjörfundur fer fram laugardaginn 28. febrúar klukkan 10-22. 

Ég var að stofna stuðningshóp á Facebook og viðbrögðin eru afar góð. Takk fyrir það og bestu baráttukveðjur!

21 í forvali VG í NA-kjördæmi

Já, við þorum, viljum og VIÐ GETUM!

Ísland er á tímamótum þar sem frjálshyggjan hefur beðið skipbrot og framundan eru krefjandi og erfið verkefni við að endurmóta íslenskt samfélag. Í þeirri vinnu er þörf á skapandi hugsun og nýjum hugmyndum.
Ég er tilbúinn að leggja mitt fram til að byggja upp kraftmikið og réttlátara þjóðfélag. Þess vegna gef ég kost á mér í 1.-3. sæti á lista Vinstrihreyfingarinnar græns framboðs í Norðausturkjördæmi. Þeir sem vilja styðja mig geta gengið til liðs við Vinstri græn fyrir klukkan 17 mánudaginn 23. febrúar 2009 og fá þá sendar upplýsingar um frambjóðendur og kjörseðil þar sem númera skal í sæti 1.-8. Kosningunni lýkur laugardaginn 28. febrúar.

Þetta vil ég sjá:

+ Aukið beint lýðræði, valdið til almennings, þjóðaratkvæðagreiðslur ef 25% kjósenda krefjast þess. 16 ára fái kosningarétt. Auka fræðslu um lýðræði í grunn- og framhaldsskólum.

+ Afnema launaleynd, konur og karlar fái sömu laun fyrir sömu vinnu. Hækka laun umönnunarstétta.

+ Auðlindir landsins séu sameign þjóðarinnar og verði ekki framseldar fyrirtækjum eða einstaklingum. Leggjum áherslu á vistvænar veiðar og fullvinnslu hráefnis.

+ Bjarga heimilum frá gjaldþroti, lækka vexti strax.

+ Ísland verði óháð og friðelskandi ríki utan hernaðarbandalaga.

+ Fólk verði ráðið eftir hæfni og á faglegum forsendum en ekki eftir flokksskírteini. Burt með spillingu og einkavinavæðingu.

+ Hlúð verði að ferðaþjónustu og hún byggð upp allt árið um kring. Beint flug milli Norðausturlands og Evrópu.

+ Efla Háskólann á Akureyri og nýta betur þá þekkingu sem er til staðar til atvinnusköpunar.

+ Stutt verði við vistvæna ræktun, skógrækt, umhverfisvernd, skapandi starfsemi, þekkingariðnað og hugvit. Það er atvinnusköpun.

+ Sjálfbær þróun verði ætíð höfð að leiðarljósi.

Þau sem fólk treystir og treystir ekki

Það er ánægjulegt að sjá hvað ráðherrar í nýrri ríkisstjórn njóta mikils traust meðal fólks. Á þessum erfiðu tímum þar sem þau hafa þurft að taka óvinsælar ákvarðanir. Það kemur ekki á óvart að Jóhanna Sigurðardóttir, Gylfi Magnússon og Katrín Jakobsdóttir njóta mests trausts. Ég er viss um að Ögmundur Jónasson mun vaxa í áliti hjá fólki því hann er að gera góða hluti. Það er til dæmis frábært hjá honum að gefa kost á sér í baráttusætið í kraganum og gefa eftir fyrsta sætið til Guðfríðar Lilju. Það er áhætta en frábær ákvörðun og ég er viss um að hann flýgur inn á þing.

Hér er stöplaritið eftir stuðningsfólki flokkanna.

Flestir bera traust til Jóhönnu

Bæjarstjórnin slekkur ljósin

Það hefur vakið athygli hér á Akureyri að eitt af sparnarráðum meirihluta Sjálfstæðsiflokks og Samfylkingar er að slökkva ljósin á fótboltavöllum við grunnskóla bæjarins. Og reyndar taka einnig hitann af! Ég efast um að þær krónur sem sparast við þessa aðgerð skipti sköpum í hallarekstri bæjarins. Á tímum sem þessum væri vænlegra að horfa til mannlegra gilda og hvetja börn og unglinga og reyndar alla til að stunda líkmsrækt á ódýran og hagkvæman hátt en ekki slökkva ljósin.

Krakkarnir (bæði stelpur og strákar) sem mættu í Ráðhús Akureyrarbæjar eiga heiður skilinn. Hógværar og sanngjarnar kröfur þeirra ættu að eiga hljómgrunn meðal ráðamanna en Sigrún Björk bæjarstýra segist ekki geta lofað neinu. Ég bið þig Sigrún um að lofa því að kveikja aftur ljósin svo að krakkarnir geti spilað fótbolta og leikið sér.

„Kreppan er ekki okkur að kenna“

Byltingin lengi lifi!

Það er gaman að vera til þessa dagana. Við erum að skrifa söguna og það er tími breytinga. Mitt í svartnætti gjaldþrotastefnu Sjálfstæðisflokksins er að rísa nýtt Ísland þar sem kynjajafnrétti verður í fyrirrúmi og það gefur manni von.

En þetta er ekki búið, byltingin er rétt að byrja og varðhundar Sjálfstæðisflokksins munu gelta og bíta sem aldrei fyrr. Þeir eru hamslausir af bræði og það er dálítið sorglegt. Það er svo auðvitað dæmigert að það séu konur sem þurfa að taka til eftir karlana sem klúðruðu hlutunum fullkomlega. Og óskandi væri að þeir myndu hafa vit á því að þegja meðan það er verið að taka til eftir þá.

Klukkan 14:00 – 17:00 í dag laugardag verður málþing á Grand Hótel um framtíð lýðræðis á Íslandi. Þar er hópur frábærra frummælenda og málþingsstýra er Guðfríður Lilja Grétarsdóttir.

Stefán Ólafsson: Farsældarsamfélagið - hvaða leið er best?

Margrét Pétursdóttir: Lýðræði frá rótum

Sigtryggur Magnason: Guð blessi Ísland

Oddný Eir Ævarsdóttir: Frumspeki lýðræðisins


Í kvöld verður svo kvöldverður og ball með Cc Reykjavík, Súpergrúppu Kalla Tomm bæjarfulltrúa Vg í Mósó og bloggfélega. Ég verð að fara norður og missi því miður af ballinu. Það er fúlt en maður getur víst ekki verið á mörgum stöðum í einu.

Til hamingju öll

Öld testósterónsins lokið

Uppbyggilegur fundur á Akureyri

Samtökin Landsbyggðin lifi efna til fundar á Akureyri á laugardaginn. Ég missi því miður af fundinum, verð í 10 ára afmæli Vinstri grænna í höfuðborginni en bendi öllum sem vettlingi geta valdið á að mæta á þennan áhugaverða og uppbyggilega fund. Hellingur af góðu fólki er í pallborði og með framsögur.

Það var heldur fámennt en góðmennt í 18. mótmælagöngunni á Akureyri um síðustu helgi en nú þarf að veita stjórnmálamönnum aðhald og viðhalda búsáhaldabyltingunni. Við megum ekki gleyma eða detta aftur ofan í sama gamla farið. En hér er dagskrá fundarins:

 

Farsæld til framtíðar!

Undir þessu kjörorði skipuleggur Landsbyggðin lifi (LBL) fundi á landsbyggðinni í samvinnu við stofnanir og félagasamtök úr ýmsum greinum atvinnulífsins

Fyrsti fundurinn verður á Akureyri Laugardaginn 7. febrúar 2009 - Kl 12:30- 15:00 í Brekkuskóla v/ Hrafnagilsstræti (fyrir ofan Akureyrarkirkju).

Dagskrá:
Setning 
Ragnar Stefánsson, prófessor og varaformaður LBL setur fundinn og ýtir  fundaherferðinni úr vör.
   
Framsöguerindi 

Framtíð lýðræðis
Páll Skúlason, prófessor í heimspeki við Háskóla Íslands

Ný tækifæri í sjávarútvegi
Hjörleifur Einarsson, prófessor við Háskólann á Akureyri

Framtíð landbúnaðar – lífrænn iðnaður?
Haraldur Benediktsson, formaður Bændasamtaka Íslands

Ný sköpun – Ný framtíð
Þorsteinn Ingi Sigfússon, forstjóri Nýsköpunarmiðstöðvar Íslands

Ferðaþjónusta til farsældar
Guðrún Þóra Gunnarsdóttir,  deildarstjóri ferðamála við Háskólann á Hólum

Pallborðsumræða Í pallborði verða, auk frummælenda:
•    George Hollanders, leikfangasmiður
•    Hreiðar Þór Valtýsson, fiskifræðingur Háskólanum á Akureyri
•    Björn Snæbjörnsson, formaður Einingar-Iðju, Eyjafirði
•    Guðbergur Egill Eyjólfsson, bóndi að Hléskógum
•    Sóley Björk Stefánsdóttir, háskólanemi í fjölmiðlafræði
•    Sigurbjörg Árnadóttir, verkefnisstjóri í nýsköpun í ferðamálum
•    Guðrún Þórsdóttir, nemandi við Myndlistaskólann á Akureyri

Stefnt er að því að framsöguerindi verði stutt, þannig að góður tími gefist til almennrar umræðu
Fundarstjóri er Rafn Arnbjörnsson, frjótæknir
          
Veitingasala 10. bekkjar Brekkuskóla verður opin  

Nánari upplýsingar á www.landlif.is

Mótmælt eftir stjórnarskiptin

Gef kost á mér í 1.-3. sæti í forvali Vinstri grænna

Ég hef ákveðið að gefa kost á mér í forvali Vinstrihreyfingarinnar græns-framboðs í Norðausturkjördæmi sem fram fer fyrir Alþingiskosningarnar í vor og sækist eftir því að skipa 1.-3. sæti listans.

Alþingiskosningarnar sem væntanlega fara fram þann 25. apríl verða sennilega þær mikilvægustu í sögu Lýðveldisins og vil ég leggja mitt lóð á vogarskálarnar til að hugsjónir Vinstri grænna um aukið lýðræði, jöfnuð, kvenfrelsi, umhverfisvernd og sjálfstæða utanríkisstefnu nái fram að ganga.

Á síðustu árum hef ég tekið virkan þátt í starfi fyrir Vinstri græn, tók fimm sinnum sæti á Alþingi sem varamaður á árunum 2003-2007. Þar lagð ég meðal annars fram frumvarp um að kosningaaldur verði 16 ár eins gert hefur verið í nokkrum löndum Evrópu og gefist vel, um leið og aukin fræðsla um lýðræði verði veitt í grunn- og framhaldsskólum. Einnig lagði ég fram þingsályktunartillögu um gerð Vaðlaheiðagangna, beitti mér fyrir auknum framlögum til Háskólans á Akureyri og til menntamála almennt. Talaði fyrir lengingu flugvallarins á Akureyri og beinu millilandaflugi og bættri aðstöðu fyrir ferðamenn á Egilsstöðum og Seyðisfirði sem og að bæta aðstöðu ferðaþjónustunnar á Norður- og Austurlandi. Umhverfismál, atvinnumál, menningarmál, beint lýðræði og byggðamál eru mér afar hugleikin.

Ég er kvæntur Kristínu Þóru Kjartansdóttur félags- og sagnfræðingi og við eigum fjögur börn. Við fluttum aftur til Akureyrar árið 2001 eftir átta ára búsetu í Þýskalandi. Ég fæddist á Akureyri árið 1968, yngstur sjö systkina. Foreldrar mínir eru Aðalheiður Gunnarsdóttir húsmóðir og fyrrverandi verkakona og Hallur Sigurbjörnsson fyrrverandi skattstjóri. Ég lauk stúdentsprófi frá Menntaskólanum á Akureyri 1988 og vann sem leiðbeinandi og á leikskóla, í byggingarvinnu og einnig við Ríkisútvarpið á Akureyri og á Rás 2. Stundaði myndlistarnám við Myndlistarskólann á Akureyri og Myndlista- og handíðaskóla Íslands og framhaldsnám í myndlist í Þýskalandi.

Ég hef kennt við Listaháskóla Íslands og Myndlistarskólann á Akureyri og unnið við sýningarstjórn en fyrst og fremst starfað sjálfstætt sem myndlistamaður. Í starfi mínu hef ég öðlast víðtæka reynslu af félagsmálum, menntamálum og menningarmálum og kynnst fjölda fólks enda snýst myndlist mín að verulegu leiti um samskipti. Ég er formaður Myndlistarfélagsins og sit í stjórn Kynningarmiðstöðvar íslenskrar myndlistar (cia.is) og hef einnig unnið að uppbyggingu Verksmiðjunnar, menningarmiðstöðvar á Hjalteyri. Ég var formaður svæðisfélags Vg á Akureyri frá 2002 – 2004, kosningastjóri Vinstri grænna í bæjarstjórnarkosningunum á Akureyri 2006 og sit nú í stjórn Vg og er formaður kjördæmisráðs Norðausturkjördæmis.

Frestur til að tilkynna um þátttöku í forvalinu er til 16. febrúar og nánari upplýsingar um framkvæmd forvalsins eru á www.vg.is


Hlynur Hallsson, 2509683379, Ásabyggð 2, 600 Akureyri, sími 6594744, hlynur(hjá)gmx.net

Til hamingju með nýja ríkisstjórn!

Þessi nýja stjórn er merkileg fyrir margra hluta sakir. Í fyrsta lagi tekur hún við skelfilegu búi sem 18 ára stjórnaseta Sjálfstæðisflokksins skilar af sér, gjaldþrota þjóðarbú með svimandi milljarða skuldum, atvinnuleysi sem stefnir í 13% og verðbólgu um 18%, himinháum vöxtum og svo mætti lengi telja. Í öðru lagi er þetta fyrsta stjórnin þar sem ráðherrar eru jafn  margir konur og karlar og í þriðja lagi er í fyrsta skipti í sögu landsins kona forsætisráðherra. Það var fyrir löngu kominn tími til. Í fjórða lagi eru tveir ráðherrar utanþings og í fimmta lagi er þetta í fyrsta skipti sem Vinstri græn setjast í ríkisstjórn. Það var einnig löngu tímabært.

Verkefnin eru risavaxin er aðgerðaráætlunin lofar góðu. Aumingja íhaldið hrökklaðist frá völdum í búsáhaldabyltingunni. Og nú fáum við að kjósa þann 25. apríl. Til hamingju með það!

Stjórnarskiptin vekja athygli

Réttur maður í rétt starf

Það er afar ánægjulegt að Ögmundur Jónasson verði heilbrigðisráðherra. Hann er augljóslega besti kosturinn. Umskiptin í þessu mikilvæga ráðuneyti hefðu sennilega ekki getað orðið meiri, frá Guðlaugi Þór niðurskurðar- og einkavinavæðingarráðherra til ráðherra velferðar og heilbrigðrar skinsemi.

Til hamingju Ögmundur og til hamingju Ísland!

Ögmundur verður ráðherra

Nú þarf að taka til

Það er verk að vinna. Eftir 18 ára óstjórn Sjálfstæðisflokksins er þjóðarbúskapurinn í rúst, erlendar skuldir stjarnfræðilegar, fjölda atvinnuleysi er að bresta á og fyrirtæki og heimili að fara á hausinn.
Það er ótrúlegt að hlusta á einhverja Sjálfstæðismenn halda því fram að þeim einum sé treystandi fyrir öllu. Veruleikafirring þessarar manna er algjör, er hægt að fara neðar. Sjálfstæðisflokkurinn er kominn undir botninn eða er enginn botn hjá þessum flokki?
Og þá þarf að taka til, byggja upp og henda út spillingunni, fara í aðgerðir í stað þess að gera ekki neitt. Vinstri græn eru tilbúinn til að fara í aðgerðir strax, það er auðvitað ekki skemmtilegt hlutverk að þurfa að taka til eftir frjálshyggjusukkið en einhver verður að gera það.
Það var bjartsýnn tónn á fundinum í gær en auðvitað einnig raunsær. Við höfum aðeins sér brot af rústunum og ástandið á eftir að versna. En við getum þó hrósað happi að ráðherrar sjálfstæðisflokksins fá ekki tækifæri til að rústa heilbrigðiskerfinu og velferðarkerfinu enn frekar.
Þess vegna verðum við að hafa óbilandi trú á framtíðina og bretta upp ermar. Við erum tilbúin. Þó fyrr hefði verið!

Húsfyllir hjá Vinstri grænum

Tími til að breyta til hins betra

Það er bylting i loftinu. Friðsamleg bylting þar sem þúsundir hafa farið út á götu til að mótmæla vanhæfri ríkisstjórn. Mótmælin eru að skila árangri því jafnvel Ingibjörg Sólrún er að átta sig á því að fólkið sem hingað til hefur stutt Samfylkinguna er búið að fá nóg af þessari ríkisstjórn og 17 ára setu Sjálfstæðisflokksins við völdin. Fólk er búið að fá nóg af spillingunni.

Ég er stoltur af mótmælendum sem hafa mótmælt af krafti og hafnað ofbeldi og skemmdarverkum. Appelsínugulu mótmælin eru frábær og það er stemning um allt land. Þrátt fyrir slagveður mætti fólk á Ráðhústorgið á Akureyri í gær og söng og barði potta og pönnur. Fólk á öllum aldri.

Það þarf ekki táragas og piparúða. Ríkisstjórnin getur farið frá friðsamlega en það verður að gerast núna.

Ég hvet alla til að skoða síðuna Nýtt lýðveldi og skrifa undir áskorun um stjórnlagaþing. Höldum áfram að mótmæla við Valhöll, á Austurvelli, við stjórnarráðið, á Ráðhústorgi, Egilsstöðum, Ísafirði, Selfossi og um allt land. Tímar breytinga eru runnir upp, breytinga til hins betra!

Appelsínugul mótmæli

Útrýmingarbúðir gyðinga á Gaza

Það er óhugnanlegt að standa í útrýmingarbúðum nasista í Bergen Belsen. Það setur að manni hroll. Að manneskjan geti verið svo ill að framkvæma slíka glæpi á saklausu fólki sem hafði ekkert af sér gert annað en það að vera með trúarskoðanir eða stjórnmálsskoðanir eða kynhneigð sem samræmdust ekki hugmyndum fasistanna.

Það er því enn óhugnanlegra að stjórnvöld í ríkinu sem þolendur ofbeldis nasistanna máttu þola skuli nú vera að leika sama leikinn á íbúum Palestínu. Börn og saklaust fólk sem ekkert hefur af sér gert annað en að vera með trúarskoðanir eða stjórnmálsskoðanir sem samræmast ekki hugmyndum stjórnar Ísraelsríkis eru myrt og limlest dag eftir dag.

Sem betur fer er hluti íbúa Ísraels á móti morðum hermanna Ísraelsstjórnar á Gaza en stjórnvöld eru blind af heift og standa auk þess í kosningabaráttu. Fyrirmyndin þeirra er Bush forseti í BNA. Enda eru þau dyggilega studd með vopnum og eiturefnum frá stjórnvöldum í BNA. 

Og menntamálaráðherra Íslands kemur í fréttirnar eins og blaðafulltrúi Ísraelsstjórnar og jafnar saman börnum sem kasta steinum og fullvopnuðum hermönnum. Ingibjörg Sólrún og Geir H. Haarde ljúga bæði því að það sé ekki hefð fyrir því að fordæma svona innrásir en bent hefur verið á tvö nýleg dæmi. Þau biðjast ekki afsökunar á lygunum, þau gera ekki neitt.

Mótmælt við stjórnarráðið

Mótmæli skila árangri

Tryggvi Jónson hætti í Landsbankanum eftir "óvægin mótmæli" að hans mati. Hann reyndi að leika píslarvott en nú er að koma í ljós hvað hann var að gera í bankanum:

"Tryggvi Jónsson, fyrrverandi aðstoðarforstjóri Baugs, hafði bein afskipti af sölum á tveimur fyrirtækjum til fyrirtækja tengdum Baugi á meðan hann starfaði í Landsbankanum."

Spillingin heldur greinilega áfram og nú verður bankastjórn Landsbankans að segja Birnu bankastjóra upptörfum án "starfslokasamnings".

Mótmælin eru að magnast og hætta ekki fyrr en spillingarliðið hefur verið hrakið frá völdum. Við krefjumst kosninga og að þessi ömurlega ríkisstjórn fari frá því hún gerir illt verra á hverjum degi. Ég bendi á afar góðan pistil Láru Hönnu bloggvinkonu hér.

Mætum á mótmæli um land allt í dag því öll friðsamleg mótmæli og borgaraleg óhlýðni skila árangri og við gefumst ekki upp!

Tryggvi hafði bein afskipti

Steingrími tekst það sem ríkisstjórnin getur ekki gert

Það er merkilegt að þegar svokölluð "ríkisstjórn" Sjálfstæðisflokks og Samfylkingar situr aðgerðarlaus og getur ekki gert neitt ekki, einu sinni þrifið skítinn eftir sig, þá er það forystumaður stjórnarandstöðunnar sem gerir það sem gera þarf. Geir H. Gunga segir "við látum ekki kúga okkur!" en lætur Bretana svo kúga okkur.

Það er stórum áfanga náð að framkvæmdastjórn Evrópuráðsþingsins hafi samþykkt í dag beiðni Íslands (Steingríms) um að sú aðgerð breskra stjórnvalda að beita hryðjuverkalögum til að frysta eigur Landsbankans í Bretlandi 8. október sl. yrði tekin til meðferðar bæði í laga- og mannréttindanefnd og efnahagsnefnd Evrópuráðsþingsins.

Það er svona sem menn þurfa að vinna.

Mynd: VB MYND/BIG

Frysting tekin fyrir hjá Evrópuráðsþinginu