Það er komið nóg, útaf með ríkisstjórnina

Geir H. Haarde sagði fyrir mánuði að það væri gott að verðbólgutoppurinn kæmi allur í einu því nú myndi verðbólgan fara að lækka... en hún heldur áfram að aukast! Allt tal um stöðugleika og hagsæld er bull og Geir ætti að axla ábyrgð og segja af sér. Honum hefur mistekist hrapalega að stýra þjóðarskútunni. Aldrei meiri viðskiptahalli og mesta verðbólga í 18 ár. Hversu lengi á þetta að ganga? Er ekki komið nóg? Útaf með ríkisstjórnina, hún hefur gott af því að fara á varamannabekkinn. Þeim er ekki treystandi og gera bara illt verra. Eitt ár af rugli er nóg. Hvað þá þrettán!

"Síðastliðna tólf mánuði hefur vísitala neysluverðs hækkað um 12,3% og hefur ekki verið jafn mikil í tæp 18 ár. Undanfarna þrjá mánuði hefur vísitala neysluverðs hækkað um 6,4% sem jafngildir 28% verðbólgu á ári." 

Mesta verðbólga í tæp 18 ár

Hann getur örugglega sungið lagið á íslensku líka

Þetta var nú afar skemmtileg keppni í gær. Ég skrapp á næsta bar hér í Berlín og fagnaði með frekar alþjóðlegum gestum sigri Rússa. Mér finnst að skautagaurinn hefði átt að fá aðeins stærra svell (eða plast) til að dansa á. Hann Bilan er greinilega mikill tungumálasnillingur og ég er viss um að hann getur sungið þetta lag á íslensku og þýsku líka. Annars var mér samt næstum sama hver myndi vinna. Allir urðu voða glaðir þegar Búlgaría (eða var það Rúmenía?) gaf þjóðverjum 12 stig! Það voru einu stigin sem Þýskaland fékk held ég. Allt tal um einhverja balkanskagamafíu verður að engu þegar litið er á hvernig norðurlöndin gefa hvort öðru stig. Friðrik Ómar og Regína stóðu sig ágætlega. Já, já gaman að þessu.

Bilan söng á spænsku

Saman í eitt ár

Hún á ammæli í dag, ríkisstjórnin. Eins árs. Vel til fundið hjá þeim að bjóða börnum á leikskólanum Tjarnarborg í ráðherrabústaðinn í dag af þessu tilefni. Best væri að afhenda börnunum einnig ráðherraembættin. Þau myndu standa sig mun betur en þessir ráðherrar. Lofum börnunum að taka við. Ég spurði á síðunni minn hvað stjórnin héti og til að byrja með var Þingvallanafnið með meirihluta en vinsældir þess haf nú eitthvað minkað en fleiri og fleiri segja að hún heiti ekki neitt. 22,5% segja að stjórnin heiti viðhaldið. Afar fáir halda því fram að hún heiti sáttastjórn eða framfarastjórn. Hér eru niðurstöðurnar og líkur þar með þessari könnun. Því miður lítur hinsvegar ekki út fyrir að ruglinu á stjórnarheimilinu ljúki í bráð. 

Hvað heitir ríkisstjórnin?

Baugsstjórn 20,6%

Þingvallastjórn 24,3%

Framfarastjórn 8,6%

Viðhaldið 22,5%

Sáttastjórn 5,0%

Ekkert 19,0%

1120 hafa svarað 

Ríkisstjórnin ársgömul

Persepolis í Amnesty-bíói

Kvikmyndin Persepolis eftir Vincent Parronaud og Marjane Satrapi verður sýnd í Amnesty-bíó þriðjudaginn 20. maí kl. 20.00 í Hinu húsinu (Gamla pósthúsið á horni Austurstrætis og Pósthússtrætis).

Myndin er byggð á samnefndri myndasögu eftir Marjane Satrapi þar sem höfundur bregður upp eftirminnilegri mynd af uppvaxtarárum ungrar stúlku á tímum íslömsku byltingarinnar í Íran.

Eftir myndina verða umræður um stöðu kvenna í Íran og ný skýrsla Amnesty International um grýtingar kvenna kynnt. Einnig verður fólki gefinn kostur á að skrifa undir aðgerðabeiðni til stjórnvalda í Íran vegna grýtinga á konum.

Myndin er á ensku með íslenskum texta.

Aðgangur er ókeypis og allir velkomnir.

Veit um skemmtilegri tónleika

 

Gott að það er tekið vel á móti okkar fólki í Belgrad. Ég veit hinsvegar um frábæra tónleika sem Ómar og Regína Ósk missa því miður af. 

Ung vinstri græn standa nefnilega fyrir tónleikunum „Kodd'í sleik - ekki stríðsleik“ næstkomandi föstudag, 23. maí. "Tilgangur þeirra er að rokka fyrir friði, frelsi og kærleika enda ekki vanþörf á - það verður aldrei of mikil ást heiminum.

Með friðar- og ástarkveðju,

Ung vinstri græn"

 

Þar sem ég verð í Berlín og kemst ekki heldur þá hvet ég alla sem vettlingi geta valdið að drífa sig á Organ á föstudagskvöldið. 

Konunglegar móttökur í Serbíu

Marina Abramovic í stuði

Það er gaman að sjá að Marina Abramovic er í banastuði þessa dagana í henni Reykjavík. Með smá gjörning og til að auka spennuna er allt í uppnámi og skammur tími til stefnu. En eins og segir í fréttinni á mbl.is: 

„Þetta er í smá uppnámi en það bara kristallar fegurðina við svona tilraunamennsku,“ sagði Marina í gær. „Ég hitti Dr. Ruth fyrst á fimmtudaginn. Ég kynnti mig og hugmyndina mína en hún tengdi sig ekkert við hana. Skildi ekki hvert ég var að fara. Hugmynd mín var að við sætum báðar við borð með stórum rauðum síma sem hringdi á fimm mínútna fresti. Á línunni áttu að vera frægir listamenn, svo sem Frida Kahlo eða Kafka, að spyrja hana ráða um kynlíf sitt. Hún þvertók fyrir þetta og sagðist ekki hafa neinn áhuga. Hún sagði að sitt starf væri að leysa vandamál. Að hún gæti sagt mér hvaða stelling myndi henta mér best, og ekkert annað.“

Það er synd að missa af þessum gjörningi vinkvennanna. Ég mætti í nokkra tíma hjá Marinu í Hamborg og fékk að vera sérstakur gestur hjá henni í skólanum í Braunschweig fyrir nokkrum árum. Það var líka hressandi.

Kynlífsgjörningur í uppnámi

1,8% stuðningur við borgarstjórann

Ólafur F. Magnússon nálgast botninn. Það hlýtur að vera nýtt met að innan við 2% kjósenda ætli að kjósa sitjandi borgarstjóra. Það athyglisverðast við þessa könnun fyrir utan að hún er birt þremur vikum eftir að hún var gerð er að um 30% ætla að kjósa íhaldið þrátt fyrir að þar standi ekki steinn yfir steini. En sennilega gerir fólk þetta bara af gömlum vana. Vinstri græn geta vel við unað með um 19% en ættu auðvitað að fá enn meira ef kosið yrði núna. Samfó er búin að toppa, til lukku með það.

Fylgi Sjálfstæðisflokks minnkar mikið í Reykjavík

Flott sýning og gjörningur

Maður er kannski alveg hlutlaus en sýningin í Myndlistarskólanum er ansi góð. Sjón (og heyrn) eru sögu ríkari í þessu tilfelli svo að ég mæli með því að fólk fari á sýninguna í dag eða á morgun (mánudag). Það var fullt hús í gær og frábær stemning. Ég er pínu stoltur, viðurkenni það alveg en reyni samt að missa mig ekki. Svo er hægt að sjá sýningu Steins í Populus Tremula, Steina í GalleríVíð8ttu og Veggverkið hennar Línu í leiðinni. Þeir sem ekki komast norður geta látið sig dreyma og skoðað þetta allt og meira til á netinu.

Á myndinni eru Inga Björk Harðardóttir, Margrét Ingibjörg Lindquist, Friðlaugur Jónsson, Karl Halldór Reynisson, Margeir Dire Sigurðsson og Hertha Richardt Úlfarsdóttir. Skapti á mbl tók myndina.

Á heimasíðu Myndlistarskólans á Akureyri og bloggsíðu Helga Vilbergs, skólastjóra er hægt að sjá myndband af gjörningi Margeirs Dire sem hann framdi á opnuninni og er afar flott verk og um leið yfirlýsing um "veggjakrots-" eða veggmálverksmálin í höfuðborginni (og víðar). Mæli með því að þið skoðið það.

Vorsýning í Myndlistaskólanum

Vorsýning Myndlistaskólans á Akureyri

Fastur liður í menningarlífinu á Akureyri er Vorsýning Myndlistaskólans. Það er búið að vinna hörðum höndum að því að undirbúa þessa sýningu síðustu vikurnar og nú er allt klappað og klárt og sýningin verður opnuð á morgun klukkan 14. Það eru sautján nemendur að útskrifast af þremur deildum skólans og ég hef umsjón með þremur nemendum sem útskrifast sem myndlistarmenn af fagurlistadeildinni sem venjulega er bara kölluð myndlistardeildin (eða málaradeildin!) Þetta eru þau Hertha Richardt Úlfarsdóttir, Inga Björk Harðardóttir og Margeir Sigurðsson "Dire". Þau vinna afar ólík og skemmtileg verk, persónuleg og flott og ég hvet alla sem vettlingi geta valdið til að sjá afraksturinn um helgina. Hér er svo fréttatilkynningin frá skólanum:

"Þrítugasta og fjórða starfsári Myndlistaskólans á Akureyri lýkur með veglegri sýningu á verkum nemenda í húsnæði skólans. Sýnd verða verk nemenda fornámsdeildar, listhönnunar- og fagurlistadeildar. Þar gefur að líta sýnishorn af því helsta sem nemendur hafa verið að fást við í myndlist og hönnun á þessu skólaári.

Fjörutíu og fjórir nemendur stunduðu nám í dagdeildum skólans og af þeim munu sautján brautskrást frá skólanum að þessu sinni. Þrír sem grafískir hönnuðir, Friðlaugur Jónsson, Karl Halldór Reynisson og Margrét Ingibjörg Lindquist. Þrír sem myndlistarmenn, Hertha Richardt Úlfarsdóttir, Inga Björk Harðardóttir og Margeir Sigurðsson. Ellefu úr fornámsdeild, Berglind H. Helgadóttir, Bjartur Karlsson, Dagrún Íris Sigmundsdóttir, Guðrún Eysteinsdóttir, Gunnar Rúnar Guðnason, Heiða Erlingsdóttir, Hildur Ása Henrýsdóttir, Sindri Smárason, Unnur Jónsdóttir og Þuríður  Sverrisdóttir

Einnig verða sýnd verk eftir nemendur sem voru á barna- og unglinganámskeiðum á vorönn. Allir eru hjartanlega velkomnir í Myndlistaskólann á Akureyri um helgina. Sýningin verður opin kl. 14:00 til 18:00 laugardag, sunnudag og mánudag, annan í hvítasunnu."

Heimasíða skólans: www.myndak.is

VORSÝNING 2008
Myndlistaskólinn á Akureyri.
Opin helgina 10. - 12. maí kl. 14:00 - 18:00
Sýningarstaður: Kaupvangsstræti 16

Heimskautaréttur á Akureyri

Háskólinn á Akureyri er frábær stofnun og hefur haft meiri áhrif á mannlíf, atvinnulíf og menningu á Eyjarfjarðarsvæðinu en mörgum dettur í hug. Og jafnvel víðar, því starfsemi hans teygir sig ekki bara um allt land heldur langt út fyrir landssteinana.

Nýjasta snilldin hjá HA er nám í heimskautarétti sem hefst í haust eftir mikinn undirbúning. Þetta nám er eitthvað það merkilegasta sem er að gerast í íslenskum háskólamálum nú um stundir. Með námi í heimskautarétti erum við að undirbúa sjálfstæða utanríkispólitík Íslendinga til ókominnar framtíðar.

Á meðal kennslugreina eru inngangur að heimskautarétti, umhverfisréttur og loftslagsbreytingar, þjóðaréttur, frumbyggjaréttur, auðlinda- og umhverfisréttur, réttindafræði og mannréttindalögfræði. Einnig er kenndur venjuréttur samfélaga á norðurslóðum, færeyskur réttur og námskeið í alþjóðaviðskiptum og alþjóðasamvinnu þar sem fjallað er um stjórnskipun og öryggismál. 

Dagana 7. - 9. september 2008 verður svo haldin mikil alþjóðleg ráðstefna í HA um afrakstur heimskautaársins 2007/2008. Hægt er að fræðast um þessa ráðstefnu hér.

Nánari upplýsingar á námið á ensku eru hér http://www.polarlaw.is

Ég mæli með þessu spennandi námi fyrir alla sem hugsa fram á veginn.

Íshokkípeysan mun koma upp um hann

Drengurinn er í einhverju íshokkíliði sýnist mér. Best er samt að nota þyrluna til að finna hann, einkennilegt að það hafi ekki tekist! Lögreglan er ekki að skora mörg stig þessar vikurnar. Það er greinilega þörf á aukavaraliði, óeirðalöggu og víkingasveitum.

Myndir birtar af bankaræningja

"Lágmarksgæsla í öðrum borgarhlutum núna..."

Bíddu... eru þetta skilaboð til annarra bankaræningja og glæpona í borginni? Nú er tækifærið til að ræna og rupla, allir af stað! Er það ekki frekar ábyrgðarlaust af varðstjóra lögreglunnar að lýsa þessu yfir?

"„Það er allt tiltækt lið að leita að ræningjanum, það er bara lágmarksgæsla í öðrum borgarhlutum núna," sagði varðstjóri lögreglunnar á höfuðborgarsvæðinu í samtali við Fréttavef Morgunblaðsins fyrir skömmu."

Vonandi næst bankaræninginn fljótt og vel svo aðrir borgarbúar í "öðrum borgarhlutum" geti verið óhultir.

Enn er leitað að bankaræningja

Einkaskólinn óhagstæður fyrir foreldra og Akureyrarbæ

Hér á eftir er bókunin eins og ég lagði hann fram á fundi skólanefndar Akureyrarbæjar. Haft er eftir Gunnari Gíslasyni fræðslustjóra í þessari frétt á mbl.is að: "Ef foreldrar eru að greiða meira þá er það eitthvað sem samið hefur verið sérstaklega um." Ég get upplýst hér að foreldrar barna í Hólmasól þurfa að greiða 1.900 krónur aukalega á mánuði auk venjulegra gjalda og það er ekki "samið sérstaklega" um það við foreldrana heldur bara rukkað og flestir borga bara með boðgreiðslum og pæla ekkert í þessu. Gjöldin skiptast svona:

Netgjald 500 kr.

Foreldragjald 500 kr. og svo

Annað 900 kr.

Aðalmálið er hinsvegar að samningurinn við Hjallastefnuna ehf er vísitölubundinn og ríkur því upp í 12% verðbólgu meðan aðrir leikskólar sitja eftir og þurfa að herða sultarólina þegar matarkarfan hækkar. Það sitja ekki allir við sama borð og það er ekki í lagi.

Hér er bókunin:

"Nú stefnir í að leikskólinn Hólmasól verði Akureyrarbæ enn kostnaðarsamari en fyrirséð var. Samningur bæjaryfirvalda við "Hjallastefnuna ehf" er vísitölubundinn meðan aðrir leikskólar á Akureyri fá fasta upphæð árið 2008, þrátt fyrir um 12% verðbólgu. Hvert pláss á Hólmasól er nú þegar dýrara fyrir Akureyrarbæ og foreldra en pláss á öðrum leikskólum og ef fram heldur sem horfir mun Akureyrarbær greiða hlutfallslega mun hærri upphæð fyrir Hólmasól en aðra leikskóla í bænum.
Það er því ljóst að einkarekstrarstefna Sjálfstæðisflokks hefur enn og aftur beðið skipsbrot og nú bitnar það á foreldrum barna á Akureyri og Akureyrarbæ. Þessa mismunun þarf að leiðrétta.

Fjölbreytt skólastarf er mikilvægt og Vinstrihreyfingin grænt framboð styður heilshugar frumkvæði foreldra og fjölbreytni í skólastarfi á öllum stigum. Nú þegar er kynskipting eða svokölluð Hjallastefna rekin með góðum árangri í leikskólum hjá Reykjavíkurborg og víðar á mun hagkvæmari hátt en “Hjallastefnan ehf” treystir sér til að gera. Akureyrabær mætti gjarnan beita sér fyrir enn fjölbreyttari stefnu í starfi leikskóla t.d. í samvinnu við foreldra með stefnur eins og Waldorfstefnuna, Rudolf Steiner eða Reggio Emilio svo nokkur dæmi séu nefnd. Leikskólar á Akureyri eru afar fjölbreyttir og leggja áherslu á mismunandi þætti eins og heimsspeki, fjölmenningu og hreyfingu svo dæmi séu tekin. Leikskólar Akureyrar eru afar vel reknir og mannaðir hæfu og menntuðu starfsfólki og til fyrirmyndar. Metnaðarfull símenntunaráætlun þeirra liggur fyrir en því miður hefur skólanefnd Akureyrarbæjar ekki yfirliti yfir símenntunaráætlun fyrir Hólmasól og Hlíðarból sem rekin er af Hvítasunnukirkjunni með samningi við Akureyrarbæ.

Þessi bókun er ekki lögð fram sem gagnrýni á Hjallastefnuna eða leikskólann Hólmasól heldur til að benda á þann aukna kostnað sem einkavæðing hefur í för með sér og að nú stefnir í að sá mismunur muni stóraukast á næstunni sé ekki gripið til viðeigandi ráðstafana.

Hlynur Hallsson
fulltrúi Vinstrihreyfingarinnar græns framboðs í Skólanefnd Akureyrarbæjar"

Tengill á frétt á rúv um málið

Dýrara að reka leikskólann Hólmasól

Plat Tal

Þessi "frétt" um "aukna samkeppni" á símamarkaðinum sýnist mér vera fullkomið plat. Það er í raun verið að draga úr samkeppni og fækka fyrirtækjum á markaði. Þetta nýja Tal verður í meirihlutaeign Vodafone og er varla í mikilli "samkeppni" við móðurfyrirtækið? Það er í raun verið að fjarlægja Hive af markaði, það er málið. Mér finnst framsetning mbl.is ekki nægilega gagnrýnin og þetta er í raun og verum bara birting á "fréttatilkynningu" sem er í rauninni dulbúin auglýsing frá Tali (Vodafone). Ef þetta er rangt hjá mér bið ég ykkur að gera athugasemdir (auðvitað undir fullu nafni!)

Boða 20-30% lækkun fjarskipta

Flott bænakall raskar ró sofandi fólks

Þórarinn Jónsson er greinilega hress náungi og þetta verk hans er ansi gott. Samt pínu grunsamlegt að tölvubilun hafi valdið því að bænakallið fór í gang klukkan fimm að morgni! Ef myndlist truflar fólk er áhugavert að skoða í hvaða samhengi það er og af hverju fólk truflast auðveldlega.

Þórarinn komst heldur betur í fréttirnar í vetur með verkið sitt "This is not a bomb" sem hann kom fyrir á listasafni í Toronto, við lítinn fögnuð starfsfólks og lögreglu. Hann var handtekinn, rekinn úr skólanum og svaka læti en ég veit ekki hvort hann var kærður og þá fyrir hvað. Þetta nýja verk hans "Bænakall" er betra finnst mér en auðvitað leitt að það hafi farið í gang svona snemma dags og raskað ró nágranna. Það var fín umfjöllun um málið í kvöldfréttum ruv.

Kvartað til lögreglu yfir bænakalli