Bömmer fyrir Repúblikana

Michael R. Bloomberg, borgarstjóri í New York, sagði sig úr Repúblikanaflokknum í gær til að bjóða sig fram sem óháður fulltrúi í forsetakosningunum á næsta ári. Bloomberg er fullkominn tækifærissinni því árið 2000 sagði hann sig úr Demókrataflokknum til að vera fulltrúi Repúblikana í borgarstjórakosningunum í New York. Þetta er mikill bömmer fyrir Repúblikana því það er augljóst að hann mun aðallega taka atkvæði frá forsetaframbjóðenda þeirra. Þetta eykur því líkurnar á því að Hillary Clinton eða Barak Obama verði forseti. Michael Moore sagðist í viðtali ennþá vona að Al Gore verði frambjóðandi Demókrata en það þykir flestum ósennilegt. En þetta skref Bloombergs eykur líkurnar á því að það séu skárri tímar framundan í BNA og var kominn tími til eftir hið svarta Bush tímabil.

Bloomberg segir sig úr Repúblikanaflokknum

Biðlistana burt og málum bæinn bleikan

Könnunin á áhrifum biðlista á eldra fólk er þarft innlegg í umræðuna um stöðu aldraðra og kemur ekki á óvart. Að hverju er Samfylkingin hætt að hrópa "biðlistana burt"? Og var Ingibjörg Sólrún ekki strax farin að draga í land með að útrýma biðlistum og farin að halda því fram að það verði alltaf til biðlistar? En er ekki allavega málið að stytta þá eins og kostur er eða á að halda áfram að búa til fleiri sjúklinga með þessum bilistum? Steinunn Arna Þorsteinsdóttir og Díana Dröfn Heiðarsdóttir eiga þakkir skildar fyrir að vekja áthygli á tengslum þunglyndis og biðlist. Nú þarf bara að vinna í málunum en ekki yppta öxlum. 

Til hamingju með daginn konur og karlar. Ég ætla að fá lánaðan bleik/hvítan arabaklút sem Lóa Aðalheiður skilur helst ekki við sig. Hún á nóg af bleikum flíkum en ég ekki. Þá get ég sagt fólki hér í Berlín að það sé hátíðisdagur á Fróni og allir í bleiku. 

Aldraðir á biðlistum þjást af þunglyndi og kvíða

Veisla í Berlín

Ég veit ekki betur en að 17. júní hátíðarhöldin hafi farið vel fram einnig hér í Berlín. Það voru allavega flestir í sólskinsskapi í veislu í sendiherrabústaðnum og Ólafur Davíðsson ásamt konu sinni Helgu og tveim sonum tóku á móti gestum. Það var fjöldi fólks, íslendinga og þjóðverja og fleiri sem gæddu sér á pylsum og kóki. Svanir, endur og fólk synti framhjá og stemningin var fín. Húsið er flott og á frábærum stað svo það er ekkert skrítið að það hafi kostað eitthvað. En mér sýnist þeim peningum hafi verið vel varið og húsið kemur að góðum notum. Hugi tók mynd af sendiherrabústaðnum og veislugestum og svo er hægt að skoða fleiri myndir sem hann tók í Feneyjum og á tvíæringnum hér. 

Egill Helga missti semsagt af góðri 17. júní veislu hér í Berlín og flaug í staðinn til Grikklands ennþá með einhverjar ranghugmyndir um DIE LINKE og Vinstri græn. En það verður bara að hafa það.

Hátíðarhöld fóru vel fram

17. júní, DIE LINKE og Sendiherrabústaðurinn í Berlín

17. júni heilsar með sól og blíðu hér í Berlín. Þetta er einnig hátíðisdagur hér því þess er minnst að þennan dag fyrir rímlega 50 árum gerðu verkamenn í austurhluta Þýskalands uppreisn sem var barin niður. Í gær var svo sögulegur dagur þegar stjórnmálaflokkurinn DIE LINKE var formlega stofnaður og Oskar Lafontaine kosinn formaður með meira ein 80% atkvæða og einnig Lothar Bisky. Framtíðarformaðurinn hlýtur svo að vera Katja Kipping, ung og hress baráttukona sem setið hefur á þinginu frá 2005 og lagt áherslu á umhverfismál, alþjóðavæðingu og femínisma. Hún fékk glæsilega kosningu sem varaformaður og hefur verið gagnrýnin á gömlu karlana í forystunni. Í gærkvöldi lauk glæsilegum fundi sem blés baráttukrafti í brjóst og bjartsýni á komandi tíma með nýjum fe´lögum sem gengu til liðs við DIE LINKE einnig frá Sósíaldemókrötum og Græningjum.

Við ætlum að skreppa í Grunewalds og heilsa uppá sendiherrahjónin sem bjóða til grillveislu og það verður spennandi að sjá þennan rándýra sendiherrabústað sem olli miklu fjaðrafoki á Íslandi fyrir nokkrum árum. Það verður einnig gaman að hitta þær systur Bjarnheiði og Líneyju Höllu sem eru hér við nám og störf. Þetta verður vonandi góður dagur í góðum hópi og mikill hátíðisdagur.

Dagskrá hátíðarhalda þjóðhátíðardaginn 17. júní á höfuðborgarsvæðinu

Vinstriflokkurinn formlega stofnaður á morgun

Ég er staddur á landsfundi Die Linke.PDS í Berlín sem fulltrúi Vinstrihreyfingarinnar græns framboðs. Það er mikið stuð því það stendur heldur betur mikið til: á morgun verður Vinstriflokkurinn formlega stofnaður og það eru söguleg tíðindi að fólk úr vestri og austri myndar öfluga hreyfingu sem mun hafa mikil áhrif á stjórnmál og þjóðmál í Þýskalandi og í Evrópu.
Die Linke mun hafa öflugan stuðning í austurhluta Þýskalands þar sem flokkurinn myndar meirihluta í mörgum sambandslöndum og borgum með 130 bæjar- og borgarstjóra og um 6500 fulltrúa í bæjar- og borgarstjórnum. Hingað til hefur landið verið erfiðara í vesturhlutanum en það er að breytast til dæmis með tilkomu vinsælla og öflugra stjórnmálamanna á borð við Oskar Lafontain sem er formaður WASG sem kemur til liðs við Vinstriflokkinn.

Formaður DieLinke.PDS Lothar Bisky var að halda þrumuræðu og kveðja PDS nafnið formlega og hefja nýja sókn með nýju fólki og nýjum hugmyndum en sömu hugsjónum um félagslegt réttlæti, frið og velferð fyrir alla.
Aðeins of mikið klappað inní ræðuna hans Lothars en stemningin er þannig að fólk ræður sér ekki fyrir kæti. Það er mikill heiður að fá að vera fulltrúi Vinstri grænna á þessum sögulega landsfundi og verða viðstaddur stofnun Vinstriflokksins hér í Berlín.
Ég hef auðvitað fylgst náið með þýskum stjórnmálum síðustu 15 árin og hallaðist í upphafi mjög að Græningjum en er nú sannfærður um að nýtt upphaf Die Linke og vinstrifólks með áherslu á umhyggju fyrir umhverfinu, og félagslegt réttlæti, kvenfrelsi og friði sé rétt skref.
Það eru mikilvæg verkefni framundan. Barátta gegn uppgangi hægri öfgamanna, nýnasista. Barátta gegn eyðileggingu velferðarkerfisins sem stóra samsteypustjórn krata og íhaldsmanna stendur fyrir. Það er fjöldi landsþingskosninga á næsta ári þar sem Vinstriflokkurinn ætlar að stimpla sig rækilega inn, í Hamborg, neðra-Saxlandi, Hessen og Bæjarlandi sem verður sennilega erfiðasta verkefnið því Bæjaralandi ert kaþólskt og íhaldsamt en sem betur fer er þar einnig skapandi fólk og bjartsýnt sem styður félagslegt réttlæti og því fólki fer fjölgandi og þau munu kjósa Vinstriflokkinn.
Það eru því bjartir tímar framundan og næg verkefni fyrir Vinstriflokkinn "Die Linke" hér í Þýskalandi.

Endurbyggjum Hótel Akureyri

Íbúaþingið "Akureyri í öndvegi" er eitthvað það best heppnaða og jákvæðasta sem gert hefur verið í skipulagsmálum á Akureyri á síðustu árum. Það ber fyrst og fremst að þakka dugnaði og atorku Ragnars Sverrissonar kaupmanns í miðbænum sem hefur óbilandi áhuga á því að auka líf og endurreisa virðingu Miðbæjarins á Akureyri. Það gladdi mig mikið að í þeim gögnum sem stuðst var við i tillögugerð fyrir hönnun Miðbæjarins var húsið við Hafnarstræti 98 (oftast kallað Hótel Akureyri) með í nýrri miðbæjarmynd. Það var afar rökrétt enda síðasta húsið í röð fallegra húsa í heildstæðri götumynd Hafnarstrætisins eða "Göngugötunnar" eins og hún er gjarnan kölluð. Götumynd sem enn er til staðar og sem betur fer hafa nokkur þeirra húsa sem standa austan megin í Hafnarstræti verið gerð glæsilega upp af Hólmsteini Snædal listasmiði og félögum á síðustu árum og hlotið nýtt og verðugt hlutverk.

Hamborg, París og "Kaupmannahöfn"

Endurbyggingin var gerð fyrir tilstuðlan hjónanna Ingu og Sigmundar. Það er ekki langt síðan húsið Hamborg var endurbyggt og þar er nú rekin ljómandi matvöruverslun og norðan við Hamborg er húsið París sem var endurbyggt fyrir allnokkru og þar er nú rekið blómlegt kaffihús, tónleikastaður og falleg blómabúð. Síðasta húsið í röðinni er Hótel Akureyri (sem Hólmsteinn Snædal hefur gert tillögu um að nefnt verði "Kaupmannahöfn"). Húsið má muna sinn fífil fegurri rétt eins og París og Hamborg áður en húsin voru gerð upp. Hótel Akureyri á sér merka sögu en hefur verið látið drabbast niður í áratugi. Þar er nú rekin falleg lítil kaffibúð, bakarí miðbæjarins, skrifstofa Vinstri grænna og fyrir skömmu var einnig barnafataverslun í húsinu. Efri hæðir og kjallari hafa lengi verið ónotuð og yfirgefin. Hótel Akureyri (Kaupmannahöfn) er perla sem þarf að pússa ærlega og þá mun hún skína sem aldrei fyrr. Auðvelt væri að koma fyrir íbúðum á efri hæðunum og hafa skrifstofu, bakarí og kaffihús eða verslanir á jarðhæð. Jafnvel væri hægt að byggja við húsið að aftan og nýtt stigahús til að auka notagildi hússins. Úrtölumenn hafa haldið því fram að húsið sé ónýtt og að of dýrt sé að endurbyggja það, þetta sé auk þess ekki fallegt hús. Þessum fullyrðingum vísa ég til föðurhúsanna enda hafa þeir sem best þekkja sagt að vel sé hægt að endurbyggja húsið á skynsamlegan hátt og fegurð hússins og notagildi mun koma í ljós þegar endurgerðinni er lokið.

Stoppum niðurrifið

Það er því í hæsta máta einkennilegt að nú eigi að rífa húsið og byggja steinsteypuglerhýsi á sama stað. Það er ömurleg skammsýni. Þegar þetta er skrifað er einmitt verið að endurbyggja síðustu perluna í Listagilinu, "Bögglageymsluna" og þar verður opnaður glæsilegur veitingastaður í sumar. KEA á heiður skilinn fyrir að ráðast í þessar endurbætur og óskandi væri að Akureyrarbær sem á stærstan hluta í Hafnarstræti 98 sýndi sömu framsýni og gæfi athafnamönnum kost á því að endurbyggja húsið í stað þessa að rífa það niður. Og vonandi verður það gert því nægilega mörg slysin höfum við þurft að horfa uppá þegar gömul hús eru rifin niður og steypuklumpum komið fyrir í staðinn.

Greinin birtist í Vikudegi 7.júní 2007 

Þarft framtak hjá Framtíðarlandinu

Framtíðarlandið stóð fyrir áhugaverðum morgunfundi í dag þar sem arðsemi Kárahnjúkavirkjunar var til umræðu frá mörgum sjónarhornum. Afar ítarleg og faglega unnin skýrsla með afdráttarlausri niðurstöðu hefur verið gefin út. Eins og við var að búast er fulltrúi Landsvirkjunar á fundinum henni afar ósammála en Landsvirkjun verður nú að gefa skýringar á mismuni sinna útreikninga og Framtíðarlandsins. Ég fagna því að slappast niður eins og sumir aðrir hjá Samfó í þessu máli. Hrós til Þórunnar. Hér er svo skýrslan öll og lokaorðin hljóma svo: 

"Hlutverk hins opinbera er ekki að velja út einstakar atvinnugreinar og leggja almannafé í þær til að fjölga störfum í einstökum byggðarlögum. Hlutverk hins opinbera er að efla grunngerð samfélagsins og beita almennum aðgerðum til þess að hver einstaklingur fái notið sín og einkaframtakið geti blómstrað. Bestu stjórnarhættir voru ekki hafðir að leiðarljósi við undirbúning og ákvarðanatöku tengda Kárhnjúkavirkjun. Viðhorf minnihlutans voru ekki virt né krafa um réttlæti á milli kynslóða. Auk þess fer því fjarri að sýnt hafi verið fram á að Kárahnjúkavirkjun standist arðsemiskröfur sem gera ber til fjárfestinga í atvinnulífi. Verulegt tap verður á framkvæmdinni ef reiknað er með lágmarks afgjaldi fyrir landnotkun og hóflegar bætur greiddar fyrir umhverfisspjöll. Í samningum við hið erlenda álfyrirtæki var ekki litið til þeirra verðmæta sem felast í gjaldi fyrir útblástur gróðurhúsalofttegunda. Áliðnaður er frumframleiðsla sem skilar tiltölulega litlum virðisauka inn í hagkerfið miðað við hinn mikla umhverfis- og virkjanakostnað sem leggja þarf í. Svarið við spurningunni sem lögð var fyrir í upphafi, um það hvort bygging Kárahnjúkavirkjunar og álvers á Reyðarfirði hafi verið rétt og skynsamleg, er án alls vafa nei."

Framtíðarlandið: stóriðjuskattur á almenning rúmir 2 milljarðar árlega

Frá Feneyjum til Berlínar

Afsakið þetta langa blogghlé en það er einmitt tilkomið vegna langdvalar í Feneyjum og án netsambands! Sýningin hans Steingríms Eyfjörð er frábær og vonandi að sem flestir sem koma á tvíæringinn fari einnig á sýninguna hans þó að íslenski skálinn sé að þessu sinni ekki inni á Giardini heldur niður í bæ rétt hjá Rialto-brúnni. Hér eru upplýsingar um staðsetningu og þessháttar af síðu Kynningarmiðstöðvar íslenskrar myndlistar. 

Nú er ég kominn í þetta fína netsamband hér í Berlín þar sem við verðum öll fram í byrjun ágúst og get því bloggað aftur af krafti! 

Mikil aðsókn að íslenska skálanum á Feneyjartvíæringnum

Björg Eiríksdóttir opnar sýninguna "Myndir á vegg" á Café Karólínu laugardaginn 9. júní, 2007, klukkan 14

    

Björg Eiríksdóttir

Myndir á vegg

09.06.07 - 06.07.07   

Velkomin á opnun laugardaginn 9. júní 2007, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755

Laugardaginn 9. júní klukkan 14 opnar Björg Eiríksdóttir sýninguna "Myndir á vegg" á Café Karólínu. Café Karólína opnar nú klukkan 10 alla virka morgna en klukkan 12 á laugardögum og sunnudögum.

Björg segir um verkin: "Hugmyndirnar að verkunum á sýningunni koma úr mínu nánasta umhverfi. Hljóð í prófi í grunnteikningu, birta sem fellur í gegnum trjágreinar og gardínur á vegg og frímínútur. Þetta eru myndbönd, málverk, teikning og texti."

Björg tók B.ed próf frá KÍ árið 1991 og útskrifaðist úr Myndlistaskólanum á Akureyri árið 2003. Hún hefur tekið þátt í nokkrum samsýningum og er þetta þriðja einkasýning hennar.

Hægt er að nálgast nánari upplýsingar um verk og feril Bjargar ásamt myndum af verkum á síðunni http://www.umm.is/UMMIS/Listamenn/Listamadur/615
Nánari upplýsingar veitir Björg í sima 6916681 og netfangið er bjorg(hjá)vma.is  

Meðfylgjandi er myndir af verkum Bjargar sem hún sýnir á Café Karólínu.

Björg verður viðstödd opnunina.
Sýningin á Café Karólínu stendur til 7. júlí 2007. Allir eru velkomnir á opnun laugardaginn 9. júní 2007, klukkan 14.

Sýning Jónasar Viðars á Karólínu Restaurant stendur til loka ágúst 2007.

Næstu sýningar á Café Karólínu:

07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka 

Umsjónarmaður sýninganna er Hlynur Hallsson

Sjómannadagur í skugga kvótakerfis og aflahruns

Til hamingju með daginn sjómenn! Það er sáttatónn í Einari K. í dag. Því ber að fagna. Hann vill jafnvel þverpólitíska samstöðu um aðsteðjandi vanda sjávarútvegsins. Hér á Akureyri var engin formleg dagskrá í tilefni sjómannadagsins. Siglingaklúbburinn Nökkvi stóð samt undir nafni, þó að full hvasst hafi verið fyrir seglbáta á Pollinum.

Sjómannadagurinn á að vera hátíðisdagur og það er til fyrirmyndar hvern staðið er að deginum víða um land: Vestmannaeyjar, Þórshöfn, Ólafsfjörður, Patreksfjörður, Reykjavík, Grindavík, Hafnarfjörður og margir fleiri staðir gera þetta með myndarbrag. En því miður hvorki hér á Akureyri né á Dalvík. Tillögur Hafró ýta vonandi við einhverjum og segja okkur enn og aftur að þetta kvótakerfi er meingallað. Flateyri ætti einnig að vara okkur við. Allt of mörg sjávarplássin hafa liðið vegna stefnu stjórnvalda síðustu áratugi. Vonandi er þessi eyðimerkurganga senn á enda og við getur tekið skynsamleg stjórnun þar sem umhverfi, náttúra og fólk verður fyrirrúmi en ekki aðeins sægreifar.

Sjávarútvegsráðherra: Stöndum frammi fyrir erfiðum ákvörðunum

Raunveruleikaþáttur og Sigurður Kári Kristjánsson

Það létti víst mörgum hollendingum í gær þegar í ljós kom að "raunveruleikaþátturinn" um nýrnargjafa var ekki allur þar sem hann var séður. "Raunveruleikaþáttur um dauðvona konu sem átti að ákveða hver fengi úr henni annað nýrað reyndist þegar til kom vera gabb. Þegar þátturinn fór í loftið í kvöld greindi kynnirinn frá því að umrædd kona væri í rauninni leikkona, og væri alls ekki að deyja af völdum heilaæxlis, eins og látið hafði verið í veðri vaka.
Allt hafi þetta verið til þess gert að þrýsta á hollensk stjórnvöld að gera umbætur á líffæragjafakerfinu í landinu og vekja athygli almennings á brýnni þörf fyrir líffæragjafir.
Sjúklingarnir þrír sem áttu að „keppa“ um nýrað úr gjafanum eru í raun sjúklingar sem þurfa á líffæraígræðslum að halda, en þeir tóku þátt í gabbinu.
Sjónvarpsstöðin hefur verið gagnrýnd harðlega undanfarna daga fyrir að þátturinn væri smekklaus og siðlaus."

Það hefur tekist vel að vekja athygli á líffæragjöfum og nauðsynlegum endurbótum sem þarf að gera á kerfinu. 

Sigurður Kári Kristjánsson ræðst á hinn nýja og glæsilega þingmann Atla Gíslason. SKK gerir þetta í vandræðalegum pistli á bloggsíðunni sinni. SKK segir meðal annars: "Fram til þessa hafa alþingismenn séð sóma sinn í því að virða þessar hefðir (innsk. mæta í messu), hvaða álit sem þeir hafa haft á þeirri persónu sem gegnir embætti forseti, hvort sem þeir eru hlynntir eða andsnúnir ríkisstjórninni eða standa innan eða utan þjóðkirkjunnar.  Atli Gíslason ákvað hins vegar að gera það ekki." Í fyrsta lagi er þetta ekki rétt hjá Sigurði Kára. Það eru sem betur fer mörg dæmi um þingmenn sem sáu ekki ástæðu til að mæta í messu við setningu þings. Atli Gíslason á heiður skilinn fyrir að sýna samstöðu með samkynhneigðum og styðja þá í baráttunni um að prestar megi gefa þá saman í hjónaband.

Það myndi heyrast hljóð úr frjálshyggjuhorni ef þingmenn í Tyrklandi mættu allir í moskuna áður en þing væri sett þar í landi! 

Tímarnir breytast sem betur fer og sumar "hefðir" eiga ekki lengur við. Það á ekki að halda í hefðir hefðanna vegna. Jafnvel Sigurður Kári hlýtur að fatta það. 

SKK heldur því svo fram að Atli Gíslason hafi ekki mætt í messuna "til að vekja athygli á sjálfum sér" Þetta er brandari eins og reyndar málflutningur og pistill Sigurðar Kára í heild sinni.

Niðurlaginu í löngum pistli eyðir Sigurður Kári í skítkast í mig vegna þess að ég vildi ekki vera með bindi í þingsal. Það er merkilegt að sjálfskipaðir varðhundar frelsisins skuli vilja segja öðru fólki hvað það á að gera og hvernig það eigi að vera allt í nafni "hefðanna". Sigurður Kári er búinn að stimpla sig endanlega út. 

„Raunveruleikaþáttur“ um nýrnagjafa reyndist gabb

Múrinn fallinn

"Mér sýnist þeir vera 2698, dagarnir sem Múrinn var uppi. Og þegar best lét voru 13 greinar á Múrnum á viku, allar vikur á ári. Það gera um 670 greinar á ári. Seinna fækkaði þeim en heildarfjöldi greina gæti samt verið í námunda við 4000. Þetta er allgóður skammtur af róttæku lesefni. Við þetta tækifæri er því full ástæða til að vekja athygli lesenda á dálkinum Eldra efni. Á þessari stundu er hægt að skoða allt heila klabbið." Svo skrifar Stefán Pálsson á veftímaritið róttæka og frábæra, Múrinn, í gær. Lokaorðin eru einnig Stefáns:

"Það er engin uppgjöf í Málfundafélagi úngra róttæklínga. Félagar munu áfram tjá sig um heimsmálin og íslensk stjórnmál. Einn félaginn er kominn á alþingi. Aðrir hafa fastan dálk í útbreiddum blöðum. Enn aðrir tjá sig á netinu. Sá er þetta ritar er nú hættur reglulegum skrifum um stjórnmál en engan veginn laus við þá áráttu að vilja breyta heiminum til hins betra. Þeirri áráttu deila allir höfundar Múrsins og traustasti lesendahópur hans.

Því er rétt að sleppa kveðjum, við munum öll hittast í baráttunni. Múrinn heyrir sögunni til en þó aðeins sem kafli í lengri sögu sem ekki er lokið: sögunni um þau áhrif sem venjulegt fólk vill hafa, á að hafa og getur haft."

Múrinn lagður niður

Steingrímur klikkar ekki

Maður er nú kannski ekki alveg hlutlaus en þegar langt er liðið á umræður um "stefnuræðu" Gers H. Haarde þá getur maður ekki annað en verið ánægður með þrjár frábærar ræður sem bera auðvitað af. Steingrímur kom strax á eftir Geir og tók Samfylkinguna í bakaríið og þessa ríkisstjórn yfirleitt. Þetta voru orð í tíma töluð eftir að reynt hefur verið að klína því á Steingrím að það hafi verið hann sem "klúðraði" því að hér yrði mynduð vinstristjórn. Auðvitað var það Samfylkingin með Ingibjörgu og Össur svo á hælum hennar, sem klikkaði. Samfó er jú í stjórn með íhaldinu og gaf aldrei kost á stjórn með Vg og Framsókn. Sorgleg staðreynd sem sumir innan Samfylkingarinnar eiga erfitt með að sætta sig við. 

Hinar tvær frábæru ræðurnar komu frá glæsilegum nýliðum á Þingi: Katrínu Jakobsdóttur og Guðfríði Lilju Grétarsdóttur. Til hamingju með þessar upphafsræður sem lofa svo sannarlega góðu. 

Steingrímur J. Sigfússon: Samfylkingin gafst upp

Odd Nerdrum með skandal

Árið 2002 lýsti norski (íslenski) kitschmálarinn Odd Nerdrum því yfir að hann ætlaði aldrei að veita norskum fjölmiðlum viðtöl framar. Í kjölfarið flutti hann til Íslands og er nú með íslenskan ríkisborgarétt. Nú hefur hann hinsvegar sagt að hann verði viðstaddur blaðamannafund, sem boðað hefur verið til í Ósló í dag í tilefni af bók, sem verið er að gefa út um verk Nerdrums. Semsagt enginn skandall heldur bara ný bók:)

Nerdrum tekur þátt í blaðamannafundi í Ósló

En hvað með kynferðislega áreitni?

Það tók Ómar R. Valdimarsson og félaga hjá Impregilo tvo daga að hamra saman þessari ítarlegu fréttatilkynningu. Þetta kemur í kjölfar ítrekaðra ásakanna um slæman aðbúnað erlendra verkamanna, núna Portúgala, á Kárahnjúkum. En Ómar gleymir að minnast á að engin kynferðisleg áreitni eigi sér stað undir Þrælahálsi. Úr frétt á mbl.is:

"Hrafndís Bára Einarsdóttir, fyrrverandi starfsmaður öryggisdeildar Impregilo, sagði í fréttum Útvarpsins, að illa hafi verið komið fram við portúgalska starfsmenn við Kárahnjúka. Einnig séu dæmi um að konur á vinnusvæðinu sæti alvarlegu kynferðislegu áreiti yfirmanna. 

Og af ruv.is: "Fyrrverandi starfsmenn við virkjunina hafa líkt vinnuaðstæðum þar við þrælahald, þeir séu látnir vinna í vatni sem nái þeim upp að hnjám í göngum þar sem skyggni sé örfáir metrar vegna mengunar. Þá sé maturinn í göngunum nánast óætur og Portúgalar séu látnir vinna lengur en aðrir starfsmenn og fái minna borgað."

Ef ég kallaði Ómar og félaga hjá Imregilo "þrælahaldara" þá myndi hann sennilega kæra mig fyrir meiðyrði svo það hvarflar ekki að mér að gera það. 

Impregilo segist ekki mismuna fólki í launum