Gunnar Birgisson yfir lög og reglur hafinn

Gunnar Birgisson bráðum fyrrverandi bæjarstjóri og verktaki í Kópavogi er greinilega langt yfir lög og reglur hafinn að eigin mati. Hann telur því kæru Fjármálaeftirlitsins stórundarlega. Best að bíða eftir úrskurði dómsvalda og þá munum við vonandi sjá hvað er stórundarlegt í þessu máli bæjarstjórans sem er jú lagður í einelti af vinstrimönnum, að eigin sögn.

Sjóðsbjörgun kærunnar virði

Er nauðsynlegt að skjóta þá?

Bubbi Morthens söng fyrir nokkrum árum um hvort það væri nauðsynlegt að drepa þessar stóru skepnur og svarið er auðvitað nei, það er ekki nauðsynlegt og reyndar frekar heimskulegt. Öll rök segja okkur að á þessum tímum er það afar óhagstætt fyrir þjóðfélagið að skapa okkur enn meiri óvild en orðið er.

- Markaðir fyrir fisk eru í hættu.

- Þetta bitnar á ferðamannaiðnaðinum.

- Hvalveiðar eru ekki skynsamlegar fyrir hvalaskoðun sem hefur blómstrað á síðustu árum.

- Það er enginn markaður fyrir þetta kjöt, ekki einu sinni í Japan.

Skoðum hval en skjótum þá ekki. Sá eini sem græðir á hvaladrápi er Kristján nokkur Loftsson og félagar hans.

Ég hef auðvitað fullan skilning á því að fólk fái vinnu við að skera hval og reyndar eru þarna góðir vinir mínir þarna í forsvari eins og Þórarinn Blöndal og fleiri ljómandi myndlistarmenn. Reyndar var skemmtilegt að það voru einmitt tveir myndlistarmenn og hvalskerar, þeir Þórarinn Blöndal og Gunnar Andrésson sem voru fengnir í viðtal í sjónvarpsfréttum á ruv í gær þar sem þeir biðu eftir fyrstu hvölunum.

Risavaxinn morgunverður

Frjálsi fjárfestingarbankinn

Frelsið er dásamlegt, ég má gera það sem ég vil. Frjálsi fjárfestingabankinn er öflugur í innheimtunni, sigar lögfræðingum og innheimtufyrirtækjum, sem fitna í kreppunni, á fólk sem á ekki fyrir myntkörfulánunum sínum. Frjálshyggjan er dásamleg, bara ekki nóg af henni segir Hannes Hólmsteinn og sporgöngdrengirnar hans í Heimdalli og SUS.

Örvænting mannsins sem rústaði fyrrverandi húsinu sínu og gróf bílinn á táknrænan hátt á þjóðhátíðardaginn 17. júní er mikil. Hann fer sennilega á sakaskrá fyrir og fær dóm en bankanum er alveg sama um okkur. Sérstaklega "Frjálsa" fjárfestingarbankanum.

Ég mæli með Naomi Klein sem skrifar um aðferðir frjálshyggjunnar við að rústa þjóðfélög.

Nei er besta blaðið!

Bankinn fékk ekki lyklana

SjálfstæðisFLokkurinn er enn gerspilltur flokkur

Það er mikið talað um endurnýjun í stjórnmálum og að allt verði að komast uppá borðið en nýjustu fréttir í Kópavogi benda til þess að öll sú umræða hafi þotið eins og vindur um eyru flokkseigendaklíkur FLokksins. Karlarnir þar á bæ geta ekki komið sér saman um eftirmann hins gerspillta bæjarstjóra og hver höndin upp á mót annarri og þá er lausnin bara að halda aðal manninum áfram.

Það er hinsvegar spurning hvað viðhengið (endurnýjaða) Framsókn ætlar að sitja lengur undir þessu rugli. Þau eru svosem vön, hafa verið með FLokknum í 19 á í meirihluta. En er ekki komið nóg?

Vilja ekki að Gunnar hætti

Spennandi kosningar í Íran

Í dag er kosið um nýjan forseta í Íran. Það væri óskandi að umbótasinninn og myndlistarmaðurinn Mirhossein Mousavi yrði kosinn forseti. Það gæti leitt til þýðu milli landsins og annarra og ekki síður myndi það bæta mannréttindi í Íran. Núverandi forseti Mahmoud Ahmadinejad hefur í raun skaðað Íran á sama hátt og George W. Bush skaðaði Bandaríkin. Báðir hafa þeir rekið fjandsamlega utanríkisstefnu og með því aukið á óvild í garð sinna landa.

Það er ólíklegt að einhver einn frambjóðendanna fjögurra hljóti hreinan meirihluta svo reikna má með því að önnur umferð fari fram og það verður þann 19. júní. Íranska þjóðin á það skilið að fá umbótasinna í stað harðlínumanns sem forseta og vonandi sigrar Mirhossein Mousavi.

Meira í Spiegel

Süddeutsche

Kosningarnar hefjast í Íran

Piparúða beitt í óhófi

Sem betur fer fór búsáhaldabyltingin að mestu leiti friðsamlega fram. Það tókst að steypa vanhæfri ríkisstjórn með mótmælum fólks sem átti ekkert sökótt við lögregluna. Reyndar brást fólk hárrétt við þegar einhverjir byrjuðu að henda steinum í lögreglumenn með því að mynda skjaldborg um þá og stilla sér upp milli grjótkastaranna og löggunnar. Það var upphafið á appelsínuguluborðunum.

Sú stefna lögreglunnar að beita ekki ofbeldi og taka mjúklega á mótmælendum bjargaði því að ekki urðu slys á fólki, bæði lögreglumönnum og fólki sem var að mótmæla. Björn Bjarnason hvatti til aukinnar hörku "til að verja valdstjórnina" en sem betur fer kom ekkert slíkt til framkvæmda. Það má þó halda því fram að piparúða hafi verið beitt í óhófi og á rangan hátt þegar meðal annars var sprautað beint í augu ljósmyndara og fólks sem var ekkert að gera annað en að mótmæla friðsamlega. Það að svara ofbeldi með ofbeldi leiðir aðeins af sér meira ofbeldi. Það hefði farið mun verr ef lögreglan hefði beitt meiri hörku í vetur, við getum þakkað fyrir að svo fór ekki.

Piparúði á þrotum þegar átökin náðu hámarki

Sjálfstæðisflokkurinn leggur fram tillögur um að leggja sig niður

Það væri nú góðverk sem þessi flokkur sem komið hefur Íslandi í klandur gæti gert. Aðeins of seint í rassinn gripið að koma með tillögur um eitthvað annað núna. Er ekki tilvalið að Þorgerður Katrín og Bjarni Ben myndu skammast sín aðeins? Ég veit að þetta er full mikil bjartsýni hjá mér en það má reyna.

Sem betur fer eru aðrir teknir við að bjarga því sem bjargað verður og Sjálfstæðisflokkurinn getur lagt sig niður eða bara verið í stjórnarandstöðu næstu 18 árin.

Sjálfstæðisflokkurinn leggur fram efnahagstillögur

Systurflokkur Vinstri grænna vinnur stórsigur á Grænlandi

Inuit Ataqatigliit (IA) vann stórsigur í þingkosningum, sem fóru fram á Grænlandi í gær. Þetta voru aðrar kosningarnar í röð sem IA vinnur afgerandi sigur og fékk nú 43,7% atkvæða og 14 þingmenn af 31 á grænlenska landsþinginu. Þeim tókst þannig að toppa sigur VG frá því í vor glæsilega.

Spilling hefur einkennt grænlensk stjórnmál líkt og hér á landi og það er ánægjulegt að Inuit Ataqatigliit sé treyst til að taka við og endurvinna traust fólks á stjórnmálum. Þann 21. júní taka gildi lög sem færa Grænlendingum aukna sjálfsstjórn og vonandi hefur Kuupik Kleist, formaður IA þá þegar myndað nýja stjórn á Grænlandi. Það eru að renna upp nýir og spennandi tímar á Grænlandi og ánægjulegt að systurflokkur Vinstri grænna leiði uppbygginguna.

Til hamingju með sigurinn Grænlendingar!

Inúítaflokkurinn vann stórsigur

Til hamingju Kristján Guðmundsson

Það eru gleðitíðindi að Kristján Guðmundsson hljóti Carnegie verðlaunin í ár. Hann er framúrskarandi myndlistarmaður og á þau svo sannarlega skilin. Það var líka ef til vil kominn tími til að íslendingur hlyti aðalverðlaunin. Það er hægt að sjá verk Kristjáns núna á sýningu í Listasafni Íslands. Hann var líka einn listamannanna sem tók þátt í opnunarsýningu Verksmiðjunnar á Hjalteyri síðasta sumar og býr hann að hluta til enn á Hjalteyri. Skemmtilegt að hugmyndalistamaður hljóti þessi verðlaun sem eiginlega eru kennd við málverk en sem betur fer hafa dómnefndirnar verið afar víðsýnar hvað það varðar þegar kemur að því að velja verðlaunahafa. Til hamingju Kristján.

Kristján fær Carnegie verðlaunin

Ímynd Íslands hefur beðið hnekki

Þrátt fyrir að misvitrir stjórnmálamenn og útrásarvíkingar hafi svert ímynd Íslands er ekki þar með sagt að það sé ekki hægt að bæta ímyndina. Það er einmitt nauðsynlegt og aldrei brýnna en einmitt nú.

Ég veit ekki alveg hversu mikið mark er takandi á þessum David Hoskin hjá Eye-for-Image því samkvæmt mbl.is segir hann að Ísland sem vörumerki hafi fyrir hrunið ekki verið sérlega þekkt eða sterkt og nefnir máli sínu til stuðnings að í huga flestra tengist Ísland nú annars vegar fiskveiðum og hins vegar fjármálum. „Fyrir utan þetta tvennt vita menn á heimsvísu afar lítið um Ísland." Þessa ályktun mannsins dreg ég stórlega í efa og samkvæmt könnun sem Útflutningsráð og Ferðamálastofa létu gera í þremur löndum, Bretlandi, Danmörku og Þýskalandi er það náttúran fyrst og fremst sem Ísland er þekkt fyrir. Hagkerfið er langt fyrir aftan í öðru sæti yfir það sem upp kemur í hugann hjá fólki þegar Ísland er nefnt og þar á eftir kemur landafræði og menning.

Það er einmitt náttúran og menningin sem getur bjargað ímynd Íslands á ný. En þá megum við ekki eyðileggja náttúruna eins og fyrri ríkisstjórnir D og B lista unnu ötullega að. Tónlist, myndlist, leiklist og bókmenntir geta svo áfram byggt upp til jákvæða ímynd af Íslandi og þar er fjársjóður sem við eigum að nýta og við þurfum ekki að eyðileggja neitt.

 

Ímynd Íslands er sterk

19 ára spilling og græðgivæðing á endastöð?

Það kemur í ljós á næstu dögum hvort Framsókn í Kópavogi hafi þann kjark sem þarf til eða öllu heldur þann dug sem þarf til að vera heiðarlegur flokkur sem vill losna úr klóm spillingarinnar. Helmingaskiptin í Kópavogi, einkavinavæðingin, verktakavaldið og bruðlið er það sem hefur einkennt rekstur bæjarfélagsins frá því að Gunnar Birgisson kom þar að. Vonandi er því tímabili lokið en það er í höndunum á Framsókn. Taprekstur bæjarins á síðasta ári ætti að duga til að fella þennan meirihluta en það er ekkert sjálfgefið. Sjálfstæðisflokkurinn er t.d. með hreinan meirihluta í Reykjanesbæ þó að það bæjarfélag sé fyrir löngu tæknilega gjaldþrota.

Það þarf að taka til í Kópavogi, velta við steinum og fletta ofan af spillingunni. Það er kominn tími til. Íbúar Kópavogs eiga það skilið. 

Úr Kastljósi í gær:

"Fyrirtæki sem er í eigu dóttur bæjarstjórans í Kópavogi fékk greiddar þrjár og hálfa milljón króna fyrir afmælisrit bæjarins sem koma átti út árið 2005. Ritið sem er enn ekki komið út liggur óklárað á bæjarskrifstofunum. Fyrirtækið hefur verið í milljónatugaviðskiptum við Kópavogsbæ á þeim tíma sem Gunnar hefur gengt þar æðstu stöðum sem sjaldnast fara fram í kjölfar útboðs. Bæjarstjórinn sjálfur kvartar undan ofsóknum í sinn garð og dóttur sinnar og fagnar frekari skoðun. Þungt er í samstarfsmönnum hans í Framsóknarflokknum í Kópavogi en þeir sitja nú á fundi vegna málsins..."

Ræddu hugsanleg meirihlutaslit

Gömlu mennirnir á Alþingi

Fulltrúar gamla tímans á Alþingi eru formenn sinna flokka. Þeir heita Bjarni Ben sem er formaður SjálfstæðisFLokksins (sem ætti að heita "Sjálftökuflokkurinn") og svo Sigmundur Davíð formaður Framsóknarflokksins (sem réttnefndur væri "Afturhaldsflokkurinn"). Ræður þessara gömlu manna voru ótrúlegar, frekar leiðinlegar og illa fluttar en aðallega ótrúlegar. Reyndar svo ótrúlegar að málflutningur þeirra verður sprenghlægilegur.

Þeir eru varðhundar gamals tíma, kvótaeigenda, útrásarvíkinga og bruðlsins. Við þurfum ekki ung gamalmenni á þing við þurfum skapandi fólk með framtíðarsýn og hugsjónir. Sem betur fer voru þau einnig með ræður á þingi í gær. Guðfríður Lilja, Birgitta, Þór Saari, Margrét og Ásmundur eru dæmi um fólk sem bar af og þau eru ekki föst í fortíðinni. Það er gott að vita af þeim á þingi en bara grátbroslegt að hugsa til Bjarna og Davíðs.

Vara við að spila upp væntingar

Bruðl og kjaftæði á krepputímum

Er það í lagi að símakostnaður 51 þingmanns nemi 25 milljónum á einu ári? Og símreikningurinn er sendur þjóðinni. Það væri einnig fróðlegt að fá að sjá hvort ráðherrarnir fyrrverandi hafi toppað þingmenn í símablaðri. Ef hver þingmaður hefur talað að meðaltali í síma fyrir 40 þúsund á mánuði væri einnig áhugavert að fá að vita hversu miklu þeir sem mest töluðu eyddu. Þessar upplýsingar eiga að koma upp á borðið. Þingmenn í öðrum löndum hafa þurft að segja af sér fyrir símabruðl en hér myndi það aldrei gerast, því miður. Eða eru breyttir tímar?

Það er kominn tími fyrir aðhaldssemi og ráðdeild og tími sóunar er vonandi á enda. Við viljum fá að vita hverjir eyddu peningum almennings í blaður á síðasta ári og fyrir þetta ár á einnig að birta reiknigana. Það myndi veita þingmönnum eðlilegt og greinilega nauðsynlegt aðhald.

Töluðu í síma fyrir 24,6 milljónir

Mjög gott hjá Ögmundi

Tannlækningar barna eru í algjöru lamasessi eftir 18 ára stjórnarsetu Sjálfstæðisflokksins. Íslendingar þamba þjóða best að sykruðu gosi. Það er því mjög jákvætt skref að skattleggja sykur og nýta peninginn í forvarnir og að greiða niður tannlækningar. Vælið í framkvæmdastjóri Samtaka iðnaðarins er dæmigert. Hér er afar fróðlegur pistill um málið.

Ögmundur Jónasson er einhver besti heilbrigðisráðherra sem við höfum haft frá upphafi. Áfram Ömmi!

Tillaga um sykurskatt ótrúleg

Flott hjá Siðmennt

Það er til fyrirmyndar að Siðmennt félag siðrænna húmanista á Íslandi bjóði alþingismönnum að koma á Hótel Borg þar sem flutt verður hugvekja um mikilvægi góðs siðferðis í þágu þjóðar. Það er trúfrelsi á Íslandi og óþarfi að hefja Alþingi á því að allir þingmenn mæti í messu. Gott að hafa val.

Birgitta Jónsdóttir hefur lýst því yfir að hún ætli að vera á Austurvelli meðan aðrir eru í Dómkirkjunni. Birgitta er einn af uppáhaldsþingmönnunum mínum, fer sínar eigin leiðir og lætur úreltar hefðir og venjur ekki hafa áhrif á sig. Það er einnig til fyrirmyndar.

Alþingi sett á morgun