Veðurspámaðurinn Grímur

Grímur Gíslason, fréttaritari Ríkisútvarpsins á Blönduósi er látinn. Hann varð 95 ára og var ern og hress maður. Margir munu sakna veiðipistlanna hans með tölununum úr Blöndu og ánum í Austur-Húnavatnssýslu ásamt öllum skemmtilegu fréttapistlunum. Grímur starfaði sem veðurathugunarmaður í 25 ár og lét af starfinu árið 2003. Hann var fréttaritari Ríkisútvarpsins til síðast dags og lokaorð hans voru ætíð: "Þetta er Grímur Gíslason sem talar frá Blönduósi". Á síðasta ári var honum til heiðurs reist afsteypa af veðurspámanninum eftir Ásmund Sveinsson í miðbæ Blönduósbæjar. Ég kynntist Grími þegar ég vann hjá Ríkisútvarpinu á Akureyri fyrir 15 árum og hann var skemmtilegur heim að sækja. Myndina af veðurathugunarmönnunum fékk ég lánaða af síðu Jóns Sigurðssonar sem er fréttaritari Morgunblaðsins á Blönduósi.

Grímur Gíslason á Blönduósi látinn

Góður dagur til að kjósa

Hafnfirðingar fjölmenna vonandi á kjörstað í dag til að kjósa. Ég hef ekki kosningarétt og ætla þessvegna bara að þekja einn húsvegg með áli og spreyja smá á hann. Það er að vísu rok núna hér á Akureyri en lægir vonandi um hádegi og þá geta akureyringar og aðrir fylgst með. Hér er fréttatilkynning um verkið:

Hlynur Hallsson
Drulla - Scheisse - Mud
VeggVerk
31.03. - 25.05.2007
www.veggverk.org

Í dag laugardaginn 31. mars setur Hlynur Hallsson upp verkið "Drulla - Scheisse - Mud" á vegg á mótum Strandgötu og Glerárgötu á Akureyri. VeggVerk sem einnig er hægt er að sjá á slóðinni www.veggverk.org hefur verið starfrækt af Halli Gunnarssyni frá því síðasta haust og er sýning Hlyns sú þriðja í röðinni. Áður hafa Jóna Hlíf Halldórdsdóttir og Werner Berger ásamt Timothy Murphy sýnt á veggnum.

Verk Hlyns Hallssonar er gert í tilefni af því að í dag kjósa Hafnfirðingar um hvort stækka eigi álver Alcoa í Hafnarfirði eða halda því óbreittu. Hlynur mun klæða vegginn með áli og veggfóðra þannig yfir verk þeirra Werner Bergers og Timothy Murphy´s sem er málverk með textatilvitnun í Nelson Mandela eða öllu heldur Marianne Williamson. Hlynur ætlar því næst að spreyja á álið setningarnar:

TAKK FYRIR ALLT ÁLIÐ
VIELEN DANK FÜR DAS GANZE ALUMINIUM
THANKS FOR ALL THE ALUMINIUM

Hlynur segir:
"Verkið er óður til álrisanna og þakklæti fyrir allt álið sem þeir hafa fært okkur, eða kannski öllu heldur súralið frá Ástralíu. Takk fyrir allar einnota umbúðirnar sem eru síðan framleiddar úti í heimi og ameríkanar henda svo án þess að endurvinna. Takk fyrir að kaupa af okkur rafmagn fyrir brot að því sem annar iðnaur þarf að borga, hvað þá almenningur. Takk fyrir alla mengunina. Takk fyrir að skapa deilur í samfélaginu. Takk fyrir stuðla að hárri verðbólgu og háum vðxtum á lánunum okkar og takk fyrir að að því að hrekja önnur fyrirtæki úr landi. Takk fyrir þetta allt. Takk, bara takk."

Hlynur Hallsson hefur gert fjölda af spreyjverkum á undanförnum árum á sýningum í Marfa í Texas, München, Berlín, Kumamoto, Feneyjum, Kaupmannahöfn, Malmö, Reykjavík, Akureyri og nú stendur einmitt yfir sýning á verkum Hlyns á Gráa svæðinu í Þelamerkurskóla þar sem hann hefur spreyjað á vegg skólans. Það verk sem heitir "Skólinn - Die Schule - The School". Hægt er að skoða nokkur þessara verka og mörg fleiri á heimasíðu Hlyns: www.hallsson.de
Hlynur bloggar einnig á www.hlynur.is

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur sett upp um 50 einkasýningar og tekið þátt í um 70 samsýningum. Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2005. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var bæjarlistarmaður Akureyrar árið 2005.
Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, gönguferðir eða snjóhúsbygging geta verið efniviður í verkum hans en einnig landmæri, samskipti fólks og viðhorf okkar.

Sýning Hlyns á VeggVerk stendur yfir til 25. maí 2007 og er öllum opin. Hlynur mun vinna við að setja upp verkið milli 12 og 16 í dag laugardag og fyrir þá sem ekki komast og eru til dæmis staddir í Hafnarfirði er hægt sjá myndir og fylgjast með uppsetningunni og svo fullbúnu verkinu á www.veggverk.org

Úrslit í Hafnarfirði gætu legið fyrir kl. 21 til 22

Til hamingju Hafnfirðingar

Lokaspretturinn fyrir kosningarnar um risatækkun álvers Alcan í Hafnarfirði stendur nú yfir. Í morgunútvarpinu á rás 1 í morgun var ítarleg umfjöllun og ég er alltaf að verða sannfærðari um að Hafnfirðingar hafni þessar stækkun. Öll rök mæla með því. Lang flestir sem ég hef talað við, og það er fólk úr öllum flokkum og utan flokka, vill ekki þessa stækkun. Það er flott hjá ungu fólki í Hafnarfirði að vera með uppákomu og mótmæla þessari stækkun. Ein bloggvinkona mín er Hafnfirðingurinn Ibba Sig. og hún hittir naglann á höfuðið í pistli sem hún skrifaði um daginn og ég vitna í hér:
"Ég er einn þeirra landsmanna sem er svo "heppinn" að fá að taka þátt í kosningu um deiliskipulag í Hafnarfirði. Þessi kosning hefur verið kölluð "kosning um álver í Straumsvík" og talað er um að fólk sé annað hvort að kjósa með eða á móti álveri.

Það upplýsist nú að ég ætla að kjósa með, þ.e. með óbreyttu ástandi. Ég vil sem sagt ekki að álverið verði stækkað. Þeir sem vilja að álverið verði stækkað geta bara tekið á sig hlutverk fúls á móti og kosið á móti... óbreyttu ástandi.

Langar að halda því til haga að málflutningur Alcan hefur breyst dag frá degi sl. vikur, úr því að "við ætlum ekki að loka", yfir í "gæti verið að við myndum loka eftir 14-21 ár" og til þess að Rannveig Rist sagði í Kastljósinu að miklar líkur væri á því að álverið lokaði eftir 6 ár. Hmmm, ætli fólk sé svo skyni skroppið að sjá ekki hvað verið er að gera?

-ég ætla líka að kjósa með íslenskri náttúru sem á undir högg að sækja þessi misserin

-ég kýs líka með minni losun gróðurhúsalofttegunda en eins og almenningur vonandi veit mun losun þeirra aukast úr um 250 þús tonnum í ca 750 þús tonn með stærra álveri. Ég kýs líka með minni svifryksmengun, minni flúormengun og minni losun brennisteinskoldíoxíðs.

-mig langar líka að kjósa með minni þenslu í þjóðfélaginu. Við gleymum alltaf að taka með í reikninginn hvað svona framkvæmdir kosta heimilin. Húsnæðislánið mitt hækkar og hækkar og svo þarf ég að greiða mun hærri vexti en ella. Er einhver búinn að reikna það saman hvað heimili landsins eru að borga með þessum stóriðjuframkvæmdum á þennan hátt? Held það sé slatti af milljörðum.

-ég er líka að kjósa með öðrum atvinnugreinum á landinu, sprotafyrirtækjum og annars konar iðnaði. Af hverju tala stjórnmálamenn ekki lengur um ruðningsáhrifin af svona framkvæmdum. Nú má allt í einu ekki viðurkenna að svona framkvæmdir hefta allar aðrar atvinnugreinar.

- ég kýs með komandi kynslóðum og rétti þeirra til að ráðstafa einhverju af auðlindum landsins, að við verðum ekki búin að fullnýta þær allar fyrir erlenda auðhringi.

-síðast en ekki síst er ég að kjósa með nýjum stjórnvöldum sem ekki leggja ofuráherslu á stóriðju. "

Til hamingju Hafnfirðingar með að hafna risastækkun álvers Alcan.

Myndlistarfólkið Ólafur og Libia eru með flott verk (með viðbættum texta) í tilefni dagsins og hér er heimasíðan þeirra.

Hafnfirsk ungmenni mótmæla álversstækkun

Er ekki tíu ára fangelsi fyrir veggjakrot aðeins of mikið?

Húlla, vesalings Oliver Jufer að vera dæmdur í hlekkjum í 10 ára fangelsi fyrir það eitt að spreyja yfir nokkrar  myndir af konungi Tælands. Ég sé að ég hef sloppið nokkuð vel hingað til! Löggurnar í Feneyjum voru til dæmis afar sáttar við spreyjið mitt þar um árið. Ef ég hefði skrifað eitthvað um Berlusconi getur verið að annað hljóð hafi komið í strokkinn. Félagar Bush voru ekki alveg eins kátir með nokkrar setningar sem ég skrifaði í Marfa, Texas 2002. Ég bendi hér á afar góða grein Ingólfs Jóhannessonar um "Stóra veggjakrotsvandann". Ég er einmitt að fara að spreyja smá um áliðnaðinn á veggverk.org í dag. Því verður örugglega tekið vel og ég slepp með fjögur ár. Hér eru nokkur verk og meira er á heimasíðunni minni.

Tíu ára fangelsi fyrir veggjakrot

Sigmar skúbbaði handtöku Spaugstofunnar

Sigmar Guðmundsson bloggari og Kastljóssmaður átti skúbbið með handtöku Spaugstofunnar. Mbl.is ætti að taka sér Sigmar til fyrirmyndar og í framhaldinu segja hvaðan fréttirnar koma. Það voru auðvitað hæg heimatökin hjá Sigmari en það eru einnig hæg heimatökin hjá mbl.is því hann er jú með mest sóttu síðuna á moggablogginu Það er einnig gott að vita að Íslendingar eru ekki búnir að missa húmorinn, maður var farinn að hafa áhyggjur.

Handtaka átti Spaugstofumenn

Misnotkun á hugtakinu sjálfbær þróun

Valgerður Sverrisdóttir stóriðjuráðherra með meiru fer létt með að misnota hugtakið sjálfbær þróun á fundi á Húsavík í dag. Það er svo sem ekkert nýtt að þetta hugtak sé misnotað en Valgerður ætti að vita betur, eða hvað? Stefán Gíslason skýrir ágætlega hugtakið sjálfbær þróun í Fræðsluriti sem hægt er að nálgast hér. Hann segir:

"Sjálfbær þróun, eða Sustainable Development, eins og hugtakið nefnist á ensku, er venjulega skilgreind sem „þróun sem gerir okkur kleift að mæta þörfum okkar án þess að stefna í voða möguleikum komandi kynslóða á að mæta þörfum sínum”. Hér er með öðrum orðum átt við þróun sem getur haldið áfram, þ.e.a.s. þróun sem er „gerð til að endast“.
Skilgreiningin hér að framan er ættuð úr svonefndri Brundtlandskýrslu sem birt var árið 1987 í bókinni Sameiginleg
framtíð vor. Skýrslan var afrakstur alþjóðlegrar nefndar sem Gro Harlem Brundtland, þáverandi forsætisráðherra Noregs, veitti forstöðu, en hlutverk nefndarinnar var að fara yfir stöðu umhverfismála í heiminum og gera tillögur um aðgerðir til að sporna gegn ofnýtingu og hnignun náttúruauðlinda sem ella myndi fyrirsjáanlega koma niður á velferð mannkynsins."

Þorbjörn Hlynur Árnason skrifar ljómandi grein um Kirkjuna og sjálfbæra þróun sem hægt er að lesa hér og segir meðal annars: "Sjálfbær þróun hefur verið einskonar tískuorð um langan tíma.  Það eru margar skilgreiningar og útgáfur til af þessu hugtaki, sem felur þó  í sér, í grunninn, að ekki sé endalaust hægt að taka af auðlindum jarðar, umfram endurnýjunarmátt þeirra.  Þetta hugtak hefur vitaskuld einnig ríka skírskotun til efnahagsþróunar, einkum í þriðja heiminum - það varðar stjórnmál - það varðar lífið sjálft. 
 
En þetta er gott tískuorð, þótt sjálfbær þróun og vitundin um hana - sé  í sjálfu sér ekkert ny%u0301tt.  Þeir sem hafa lifað af landinu þekkja nauðsyn þess, að taka ekki of mikið, ganga ekki of hart fram - það er ekki nóg að þreyja þorrann og góuna með öllum ráðum - eitthvað þarf að vera eftir fyrir næsta ár og næstu kynslóð."

Valgerður ætti til dæmis að lesa þetta áður en hún gefur fleiri yfirlýsingar um að álver á Íslandi geti " rúmast innan marka sjálfbærrar þróunar" Ég bendi einnig á frábærar glærur frá erindi Bergs Sigurðssonar sem hægt er að sjá hér.

Það eru hinsvegar endalausir möguleikar í atvinnuuppbyggingu í Þingeyjarsýslum t.d. í heilsutengdri ferðaþjónustu eins og fjallað var um hjá rúv í morgun. Margt af því getur fallið undir sjálfbæra þróun. Vinstri græn eru mjög hlynnt virkjunum ef þær eru umhverfisvænar og að orkan úr þeim sé nýtt skynsamlega en ekki seld fyrir slikk til mengandi stóriðju. Það að segja að álver á Húsavík geti "rúmast innan marka sjálfbærrar þróunar" er hinsvegar lélegur brandari og misnotkun hugtakinu sjálfbær þróun. Ögmundur Jónasson skrifar mjög góðan pistil um fundinn á Húsavík undir fyrirsögninni "HVERS KONAR UPPBYGGINGU Á HÚSAVÍK?" Tilvalið að lesa hann hér. (Myndina fínu af Valgerði fékk ég lánaða af síðunni hennar.)

Segir álver við Húsavík rúmast innan marka sjálfbærrar þróunar

Skrifum undir

Ég hvet alla til að skrifa undir sáttmála Framtíðarlandsins sem fyrst. Þegar ég skoðaði áðan voru 3027 búnir að skrifa undir. Hægt er að sjá hvaða þingmenn eru búnir að skrifa undir sáttmálann um framtíð Íslands og það hafa 17 þingmenn gert nú þegar. Þar af eru allir þingmenn Vinstri grænna og tólf þingmenn Samfylkingarinnar. Það var sagt frá því að Jónína Bjartmars væri búin að skrifa undir en hún er ekki merkt græn á listanum. Hætti hún við? Eða var þetta bara della að hún hefði skrifað undir? Það eru engir þingmenn Sjálfstæðisflokks búnir að skrifa undir og ekki heldur Frjálslyndra og án Jónínu ekki heldur neinn þingmaður Framsóknar. Þið getið bæst í hópinn sem vill grænt Ísland en ekki grátt og skrifað undir hér. Hér er svo fréttatilkynningin sem Framtíðarlandið sendi frá sér:

Sáttmáli um framtíð Íslands
--fréttatilkynning 18. mars 2007

Virkja þarf sem nemur orku frá þremur Kárahnjúkavirkjunum á 25-30 nýjum svæðum á Íslandi gangi núverandi áætlanir um stóriðju eftir. Með þessum aðgerðum er verið að skuldbinda orkulindir Íslands til einhæfra nota til langs tíma, takmarka nýtingu á fjölbreyttari og verðmætari tækifærum, fórna gríðarlegum náttúruverðmætum og auka losun gróðurhúsalofttegunda.

Ef fram fer sem horfir verður 85% af orkuframleiðslu Íslands bundin í álverum til langs tíma. Áætlanir um að stækka álverin í Straumsvík ogHvalfirði og byggja ný álver í Helguvík, á Húsavík og hefja álframleiðslu á Reyðarfirði þýða að framleiðsla áls mun aukast úr um 270,000 tonnum á ári (2003) í að minnsta kosti 1,5 milljónir tonna á ári. Ef öll álverin þyrftu í framtíðinni að stækka í samræmi við óskir álversins í Straumsvík verður orkuþörf þeirra meiri en tæknilega möguleg raforkuframleiðsla á Íslandi í dag, jafnvel þótt að Jökulsá á Fjöllum, Gullfoss og laxveiðiárnar séu taldar með. Þar með yrðu aðrir möguleikar á raforkunýtingu landsins útilokaðir.

Átök um um virkjanamál og stóriðju hafa á liðnum misserum rekið fleyg í þjóðarsálina og valdið klofningi milli landshluta, byggðarlaga og jafnvel innan fjölskyldna. Umfang núverandi stóriðjuáætlana er slíkt að ljóst er að deilurnar sem þjóðin hefur fengið nasasjón af á síðustu árum munu aðeins magnast. Því leggur Framtíðarlandið fram sáttmála um framtíð Íslands. Vigdís Finnbogadóttir, fyrrverandi Forseti Íslands er verndari sáttmálans.

1.    Við höfum kjark til að byggja upp fjölbreytt og lifandi samfélag á Íslandi þar sem hugvit og sköpunargleði einstaklinga fær að njóta sín þeim sjálfum og öðrum til heilla.
2.    Við sýnum komandi kynslóðum virðingu með því að láta lögfesta áætlanir um náttúruvernd áður en nokkuð frekar er aðhafst í orkuvinnslu.
3.    Við öxlum ábyrgð á tímum viðsjárverðra loftslagsbreytinga í heiminum með því að fylgja alþjóðlegum skuldbindingum um losun gróðurhúsalofttegunda.

Fyrir stjórnmálamenn þýðir þetta að áður en ráðist verður í nokkrar frekari virkjunar- eða stóriðjuframkvæmdir verði búið að afgreiða og samþykkja fyrsta og annan áfanga Rammaáætlunar um nýtingu vatnsafls og jarðvarma og að Rammaáætluninni í heild verði gefið lögformlegt vægi. Þar til því ferli er lokið verði ekkert frekar aðhafst í stóriðju- og virkjanauppbyggingu. Þetta útilokar ný álver í Helguvík og á Húsavík, sem og stækkun álveranna í Straumsvík og í Hvalfirði á tímabilinu. Á meðan þessu ferli stendur verði ekki leitað hófanna með aðrar virkjanir, hvort sem þær falla í umhverfisflokk A, B eða C samkvæmt núverandi skilgreiningu Rammaáætlunar. Ennfremur verði engum frekari rannsóknarleyfum úthlutað á þessu tímabili. Þá verði íslenska ákvæðið í Kyoto-bókuninni ekki notað frekar en þegar hefur verið gert vegna Kárahnjúkavirkjunar og álvers á Reyðarfirði.
   
Á meðal fyrstu stuðningsmanna sáttmálans má nefna: Sigurbjörn Einarsson, biskup, Ólafur Jóhann Ólafsson, rithöfundur og aðstoðarforstjóri Time Warner, Steingrímur Hermannsson, fyrrverandi Forsætisráðherra, Jón Eiríkssson, bóndi á Vorsabæ, Skeiðum, Tryggvi Guðmundsson, Markaðsráðgjafi og knattspyrnumaður úr FH, Vilhjálmur Árnason, heimspekiprófessor, Sigurjón Sighvatsson, kvikmyndaframleiðandi, Þorsteinn Vilhjálmsson prófessor í eðlisfræði, Orri Vésteinsson, fornleifafræðingur, Bjarni Haukur Þórsson, leikari og leikhúsframleiðandi, Margrét Harðardóttir arkitekt, Sigrún Júlíusdóttir, prófessor  í félagsráðgjöf  við HÍ, Mugison, tónlistarmaður, Hilmar Veigar Pétursson, forstjóri hugbúnaðarfyrirtækisins CCP, Margrét Vilhjálmsdóttir, leikkona, Sr. Örn Bárður Jónsson, sóknarprestur, Guðný Halldórsdóttir Laxness, kvikmyndaleikstjóri, Sr. Gunnar Kristjánsson, sóknarprestur og prófastur, Steinunn Stefánsdóttir aðstoðarritstjóri Fréttablaðsins, Guðrún Agnarsdóttir, læknir og forstjóri Krabbameinsfélags Íslands, Hjálmar H. Ragnarsson, rektor Listaháskóla Íslands, Orri Vigfússon, viðskiptamaður og formaður Verndarsjóðs villtra laxastofna í Norður-Atlantshafi, Sigurður Gísli Pálmason, viðskiptamaður, Dr. Hörður Arnarson, Forstjóri Marels og Ólafur Stefánsson, landsliðsmaður í handknattleik.

Sáttmálann um framtíð Íslands og rök fyrir honum má nálgast á www.framtidarlandid.is

„Óþarfi að drekkja í pósti"

Baráttufundur gegn stríði

Samtök hernaðarandstæðinga, MFÍK, Þjóðarhreyfingin, Ung vinstri græn og Ungir Jafnaðarmenn standa fyrir baráttusamkomu í Austurbæ í kvöld klukkan 20. Það er ástæða til að hvetja alla til að mæta enda er fín dagskrá með tónlist og Bragi Ólafsson les upp og ávörp frá Lilju Grétarsdóttur og Helga Hjörvar. Hér er dagskráin öll og svo er tilvalið að minna á friðarvefinn góða.

Senn eru liðin fjögur ár frá því að innrás Bandaríkjamanna og bandalagsríkja þeirra í Írak hófst, með formlegum stuðningi íslenskra stjórnvalda. Þrátt fyrir ítrekaðar yfirlýsingar ráðamanna í BNA um að friður sé að komast á í landinu, er ekkert lát á óöldinni í Írak og sífellt fleirum verður ljóst hvaða hörmungar stríðið hefur kallað yfir írösku þjóðina.

Mánudagskvöldið 19. mars munu hinir staðföstu stríðsandstæðingar efna til baráttusamkomu í Austurbæ, þar sem hernáminu verður mótmælt og þess krafist að íslensk stjórnvöld axli ábyrgð vegna hins svívirðilega stuðnings við ólöglegt árásarstríð.

Dagskráin hefst kl. 20.

Ávörp flytja:
Guðfríður Lilja Grétarsdóttir og Helgi Hjörvar

Tónlistaratriði:
XXX Rottweilerhundar,
 Ólöf Arnalds
 & Vilhelm Anton Jónsson

Upplestur:
Bragi Ólafsson

Kynnir:
Davíð Þór Jónsson

Hinir staðföstu stríðsandstæðingar eru:

Samtök hernaðarandstæðinga
 MFÍK
 Þjóðarhreyfingin - með lýðræði
 Ung vinstri græn
 & Ungir Jafnaðarmenn 

Írakar svartsýnni en fyrir tveimur árum

Góðar fréttir og frábær grein

Það er afar ánægjulegt að flestir sem svöruðu í könnun Capacent-Gallup vilji ríkisstjórn Vinstri grænna og Samfylkingar. Þetta er mín óskastjórn sem myndi setja velferðarmál og umhverfismálin í forgang. Sjálfstæðisflokkurinn hefur gott af því að fara í stjórnarandstöðu. Ég má til með að benda á frábæra grein eftir Ásbjörn Björgvinsson forstöðumann Hvalasafnsins á Húsavík sem birtist í Morgunpóstinum í dag. Ásbjörn segir meðal annars: "Að undanförnu hafa nokkrir málsmetandi menn lent í því, meðvitað eða ómeðvitað, að tala  niður flest það góða sem gert hefur verið hér í bæ undanfarinn áratug. Spurningar eins og “Á Húsavík framtíð?“ og „Á hverju eigum við að lifa?” hafa sést hér í blaðinu og vefsíðu Skarps að undanförnu, ásamt fullyrðingum á borð við „Sveitarfélagið hefur verið að grotna niður“ og „Atvinnutækifærum hefur farið fækkandi á Húsavík eins og allir vita og ýmislegt af þessu sem  heitir "eitthvað annað" hefur ekki gengið upp.“ Jafnframt hafa þeir sem ekki fagna hugmyndum um álbræðslu við Húsavík verið kallaðir ýmsum nöfnum en vinsælast er þó að kalla þann  stækkandi hóp „kaffihúsaliðið í 101“. Við sem hér búum, verðum að passa okkur á því í umræðunni  um hugsanlegt álver að falla ekki í það drullusvað að upphefja álversframkvæmdir með því að  tala einstaklinga eða aðra tegund atvinnuuppbyggingar niður." Ég hvet alla til að lesa greinina hér.

Katrín: Ljóst að kjósendur vilja VG í ríkisstjórn

Damien Hirst búinn að meikaða

Svo sem ekki alveg nýjar fréttir af poppstjörnu breska myndlistarmarkaðarins, honum Damien Hirst. Hann er fyrir löngu kominn í goða tölu og dálítið gott að hann er ekki alveg "hefðbundinn" myndlistarmaður (málari!) heldur gerir hann allskonar verk þó að það sé bara talað um málverk í frétt mbl.is. Hann er ekki alveg uppáhaldsmyndlistarmaðurinn minn en ég hef nú samt gaman að honum. Myspace síðan hans er til dæmis skemmtileg. Hér er svo fréttin öll af mbl.is

"Hirst farsælasti myndlistarmaður heims

Breski myndlistamaðurinn Damien Hirst er nú sá myndlistarmaður heimsins sem þykir farsælastur, miðað við sölu á verkum eftir hann. Hirst seldi nýverið 28 málverk á sýningu í Los Angeles fyrir 61 milljón dollara og náði með þeirri sölu fyrrgreindu marki, að sögn breska dagblaðsins Independent.

Fram að seinustu helgi var Hirst í öðru sæti, á eftir bandaríska málaranum Japer Johns, en hann seldi grafíkverk fyrir 41 milljón dollara í fyrra. Málverk Hirst hækkuðu gífurlega í verði með fyrrnefndri sýningu, en í þau notar Hirst þurrkuð fiðrildi og húsamálningu.

„Damien Hirst er án efa farsælasti myndlistamaður heimsins í dag,“ segir Cristina Ruiz, ritstjóri listadagblaðsins The Art Newspaper. Hann sé einn af þremur listamönnum sem teljist „vörumerki“ í myndlistarheiminum, en hinir eru þeir Andy Warhol og Pablo Picasso en báðir eru þeir látnir. Með því er átt við að verk þessara manna seljist um allan heim. Hirst geti selt nánast hvað sem er, leggi hann nafn sitt við það."

Hirst farsælasti myndlistarmaður heims