Hugmyndir fyrir Sjónlistaverðlaunin

Það var ansi gaman í Ketilhúsinu í gær það sem tilkynnt var um tilnefningar til Sjónlistaverðlaunanna 2007. Það hefði gjarna mátt vera fleiri viðstaddir en það voru ekki allir sem vissu af því að til stæði að tilkynna þetta með formlegum hætti og opnu húsi í gær.

Ljómandi veitingar, óáfengur mysudrykkur frá Friðriki V og smáréttir úr héraði í hádeginu. Ráðherranir voru ekki á staðnum eins og í fyrra enda sennilega mikilvægari fundir á dagskránni hjá þeim en þeirra í stað mættu sponsorarnir.

Þetta eru fínar tilnefningar bæði fyrir hönnun og myndlist eða eins og segir á mbl.is:

Í umsögn dómnefndar um myndlistarmennina segir m.a. að Birgir Andrésson sé tilnefndur "fyrir einstakt framlag til könnunar á íslenskri menningu og sambandi sjónrænnar skynjunar og merkingu texta. List Birgis er allt í senn, hnitmiðuð, einföld og margslungin, eins og glöggt kemur fram í verkunum Black–out og Build sem voru unnin sérstaklega fyrir afar vandaða yfirlitssýningu Listasafns Íslands á verkum hans á síðasta ári. Black-out er málað í gulum litatónum á kolsvartan grunn. Verkið er eitt af textaverkum Birgis, þar sem hann málar setningar með prentletri á einlitan grunn. Black – out er augljóst og beinskeytt og kallar strax fram í huga áhorfandans ákveðna tengingu við íslenska drykkjusiði, þótt merkingin taki á sig flóknari mynd við nánari skoðun. Annað nýtt verk á sýningunni er öllu margræðara við fyrstu sýn, en það er verkið Build, sem samanstendur af sundurskornum pappakössum. Hér liggur alls ekki í augum uppi að verið sé að fjalla um texta, en verkið á sér rætur í persónulegri reynslu Birgis og samskiptum hans við blinda í æsku."

Hrafnkell Sigurðsson fyrir ljósmyndaröðina Áhöfn sem sýnd var fyrst á sýnungunni Eiland í Gróttu og olíuverkin Afhafnasvæði sem sýnd voru í Gallerí Suðsuðvestur.
Úr umsögn dómnefndar
Ljósmyndaröðina Áhöfn og olíuverkin Afhafnasvæði sem varpa nýju ljósi á íslenska sjómenn og karlmennsku. Í ljósmyndaröðinni Áhöfn sem birtist fyrst á sýningunni Eiland í Gróttu síðastliðið sumar dregur Hrafnkell fram nýja og ferska sýn á skærlita íslenska sjómannastakka og þar með íslenska karlmennsku. Litsterkar og glansandi ljósmyndirnar eru nánast „of fallegar“ og grípandi í grófleika sínum en fá aðra vídd þegar þær eru skoðaðar í samhengi við Afhafnasvæði. Síðara verkið samanstendur af kolsvörtu óræðu mynstri á pappír unnið með hjálp áhafnarinnar úr olíu úr tunnum sem voru hluti af sýningu á verkunum í Gallerí Suðsuðvestur síðastliðið haust. Saman mynda þessi tvö verk sterkar andstæður sem styrkja hvor aðra."

Og Hekla Dögg Jónsdóttir fyrir Fossinn, röð verka í skammdegissýnunginni Ljósaskipti og Fire, Fire, Fire. "Fyrir fersk, fínleg og blæbrigðarík verk unnin úr „litlum efnum“ sem er ætlað að lýsa upp umhverfið og skerpa skilningarvitin. Fossinn, röð verka á skammdegissýningunni Ljósaskipti og Fire, Fire, Fire eru dæmi um slík verk. Fossinn er unninn fyrir samnefnda sýningu á Kjavalsstöðum fyrr á þessu ári. Hann er gerður úr fínlegum  plaststöngum með útfjólubláum ljósleiðurum sem tengdir eru við víra og snúrur í sambandi við tölvuviftur sem skapa hljóðmynd fossins. Verkið er svo brothætt á að horfa að það virðist geta hrunið niður á hverri stundu og leiðir hugann að þeirri hættu sem hinir náttúrulegu  fossar landsins eru í. Samt er það ekki síður birtan, útfjólubláa ljósið sem dregur að sér athygli. Birtingarmyndir birtu og ljóss í skammdeginu hafa verið Heklu hugleiknar undanfarið, ýmist í tengingu við vatn og flæði, eins og á sýningunum Foss og Ljósaskipti í Kling og Bang, eða í tengslum við eld og fljúgandi skrautelda í verkinu Fire, Fire, Fire, sem hún sýndi nýverið í Los Angeles, eftir að hafa sýnt það fyrst á Íslandi. Endurtekningin í titli verksins kallast á við flugeldaskotgleði Íslendinga um áramótin en sjálft verkið virkar eins og raunverulegir flugeldar, þar sem marglit ljósin kvikna og slökkna fyrir áhrif frá upptöku af hljóðum af raunverulegum flugeldum. " 

Þetta eru flottir fulltrúar og ég er búinn fyrir mitt leiti að útnefna Bigga Andrésar verðlaunahafa að Heklu og Kela algerlega ólöstuðum.

Fyrir hönnun eru þrjú fyrirtæki tilnefnd; Nikita (Heiða Birgisdóttir) fyrir snjóbrettafatnað, Studio Granda (Margrét Harðardóttir og Steve Christer) fyrir viðbyggingu við Vogaskóla í Reykjavík og íbúðarhús á Hofi á Höfðaströnd og Össur fyrir gervifótinn Proprio Foot. 

Á heimasíðu Akureyarbæjar er nánar sagt frá Sjónlistaverðlaununum  

Annars  er ég með frábæra hugmynd til að hafa aðeins meira fútt í þessum verðlaunum (og til að það séu meiri líkur á að maður verði einhverntíma tilnefndur!)  Það er að hafa þetta eins og á Eddunni og Grímunni, tónlistarverðlaununum og öllum þessum verðlaunum. Það eru gerðar ca. þrjár kvikmyndir á ári hérlendis en samt eru veitt verðlaun í helling af flokkum svo allir fái eitthvað og sumir margar Eddur! Í myndlistinni væri hægt að veita fleiri verðlaun eins og:

Fyrir bestu sýninguna á Íslandi

Fyrir bestu sýninguna erlendis

Fyrir bestu einkasýninguna

Fyrir bestu þátttökuna í samsýningu

Fyrir skemmtilegustu sýninguna

Fyrir bestu sýningarskrána

Fyrir besta gjörninginn

Fyrir besta málverkið

Fyrir besta hljóðverkið

Fyrir besta skúlptúrinn

Fyrir besta grafíkverkið

og svo mætti lengi telja og auðvitað einnig:

Fyrir bestu sýningarstjórnina

Fyrir besta safnstjórann

Fyrir bestu fjölmiðlaumfjöllunina

og svo framvegis og framvegis... Ég sé að þetta getur orðið heil verðlaunanótt með lengri sjónvarpsútsendingu en Óskarinn fyrir westan. Er ekki bara að stökkva á þetta?

Sex tilnefningar til Sjónlistaverðlaunanna 2007

Edda Þórey Kristfinnsdóttir opnar sýninguna VISTASKIPTI á Café Karólínu

Frábært að það verði nóg að gera í Borginni á Sjónlistadegi. Ég ætla að nýta morgundaginn í kröfugöngu og rokk með UVG hérna fyrir norðan. Á laugardaginn verður svo myndlistin í fyrirrúmi. Það opnar ný sýning á Listasafninu á Akureyri og mörg galleríin eru með opnanir. Sýningin hans Jónasar Viðars á Karólínu Restaurant hefur verið framlengd vegna fjölda áskoranna en Edda Þórey Kristfinnsdóttir opnar nýja sýningu á Café Karólínu og tekur við af Aðalsteini Þórssyni. Á heimasíðunni hans eru myndir frá sýningunni á Karólínu.

Edda Þórey Kristfinnsdóttir

Vistaskipti

05.05.07 - 08.06.07   

Velkomin á opnun laugardaginn 5. maí 2007, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---
Laugardaginn 5. maí klukkan 14 opnar Edda Þórey Kristfinnsdóttir sýninguna VISTASKIPTI á Café Karólínu. Café Karólína opnar nú klukkan 10 alla virka morgna en klukkan 12 á laugardögum og sunnudögum.

VISTASKIPTI er uppspretta verka minna sem ég sýni á Café Karólínu. Við mannfólkið erum á eilífu ferðalagi. Hús úr húsi, sveit úr sveit, borg úr borg, land úr landi, úr einni vist í aðra. Vistin getur verið frá því að vera góð til þess að vera nöturleg. Við ráðum ekki alltaf för.
Verkin eru skúlptúrar, lágmyndir, vídeo, textavek og ljósmyndir á striga.

Tilvera okkar er undarlegt ferðalag.
Við erum gestir og hótel okkar er jörðin.
Einir fara og aðrir koma í dag,
því alltaf bætast nýjir hópar í skörðin.
                            Tómas Guðmundsson

Hægt er að nálgast upplýsingar um verk og feril Eddu ásamt myndum á verkum á síðunni http://umm.is/UMMIS/Listamenn/Listamadur/599
Nánari upplýsingar veitir Edda í sima 8994908

Myndin hérna fyrir ofan er af einu verka Eddu sem hún sýnir á Café Karólínu.

Edda verður viðstödd opnunina.
Sýningin á Café Karólínu stendur til 8. júní 2007. Allir eru velkomnir á opnun laugardaginn 5. maí 2007, klukkan 14.

Næstu sýningar á Café Karólínu:

09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Umsjónarmaður sýninganna er Hlynur Hallsson

Sjónlistadagur í Reykjavík

Ómar R. Valdimarsson ætlar að kæra Gauk Úlfarsson

Ómar R. Valdimarsson, talsmaður Impregilo hefur mörg járn í eldinum þessa dagana. Ekki bara að hann sé að hamast uppá Kárahnjúkum heldur er hann einnig afkastamikill bloggari. Síðustu daga hefur hann einbeitt sér með skítkasti að Vinstri Grænum og tekið Paul Nikolov og Sóleyju Tómasdóttur sérstaklega fyrir. Gaukur Úlfarsson skrifaði athugasemd á síðu Ómars sem hann riskoðaði smá og henti út. Gaukur skrifaði þá um málið og Ómar tók upp símann og hringdi í Gauk og hótaði honum málshöfðun. Þetta fer að verða spennandi og dálítið einkennilegt hvað sumir eru hörundsárir þessa dagana. En það er jú mikið að gera hjá Ómari í vinnunni með allt draslið meira en þrjá mánuði á eftir áætlun og ekkert rafmagn komið og borarnir hjakka á sama stað undir Þrælahálsi og svo er líka eitthvert óloft í göngunum og erlendu verkamennirnir alltaf að kvarta. Þetta getur verið erfitt líf.

Beðið eftir sérfræðingum til að meta loftmengunina í aðrennslisgöngunum

Krossfestur súkkulaði Jesú

Myndlistin getur greinilega ýtt við fólki enn í dag og gjarnan eru það fréttir af vettvangi myndlistar í Bandaríkjunum þar sem einhverjar sýningar eru bannaðar sem komast í fréttirnar. Þannig var það með verk myndlistarmannsins Cosimo Cavallaro af súkkulaði líkneski af hangandi manni sem auðvitað er tilvísun í hann Jesú hangandi á krossinum. Í frétt á mbl.is segir: "Í New York varð sýningarhús að hætta við að sýna styttu af Jesús úr súkkulaði, sem ber nafnið My Sweet Lord. Er þar leikur að orðum, þar sem titillinn getur bæði útlagst sem „Minn ljúfi herra“ eða „Minn sæti herra“. Höfundur verksins, Cosimo Cavallaro, sagði laugardaginn síðastliðinn að honum hefðu borist hótanir vegna verksins. Á hinn bóginn hefðu þúsundir tölvupósta borist honum frá fólki sem vildi veita honum stuðning með einum eða öðrum hætti."

Og svo er það myndlistarneminn David Cordero sem heldur betur hefur slegið í gegn með verkinu "Blessing". Þetta er víst stytta úr pappamassa af bandaríska öldungadeildarþingmanninum og forsetaframbjóðandanum Barak Obama, í kufli með bláan geislabaug. Obama er sallarólegur yfir verkinu en talskona Obama, Jen Psaki, segist halda að listamaðurinn hafi ekki ætlað að móðga neinn með verkinu. Obama sé ekki hrifinn af þeirri list yfirleitt sem feli í sér móðgun í garð trúarbragða. Þar höfum við það á föstudaginn langa.

Umdeild pappastytta af Barak Obama í kufli með geislabaug

Aðalsteinn Þórsson opnar sýninguna Mána málverkin á Café Karólínu

Laugardaginn 7. apríl klukkan 14 opnar Aðalsteinn Þórsson sýninguna Mána málverkin á Café Karólínu.
Café Karólína opnar nú klukkan 10 alla virka morgna með morgunmat en klukkan 12 á laugardögum og sunnudögum.

Mána málverkin eru góðar og fallegar myndir eftir myndlistamanninn Aðalstein Þórsson. "Sem með þessari seríu telur sig hafa unnið sigur í hinu eilífa stríði, í höfði sér um listræn gildi og kreddur, sem hefur plagað hann um hríð."

Aðalsteinn er starfandi myndlistamaður. Búsettur í Hollandi, fæddur og uppalinn í Eyjafirðinum. Hann stundaði myndlistanám við Myndlistaskólann á Akureyri, í Finnlandi og Hollandi. Hann sýnir reglulega, Þetta er í þriðja sinn sem  Aðalsteinn sýnir á Café Karólínu.
Um list sína segir Steini “list mín snýst alltaf um samband hinns skapandi einstaklings, gagnvart umhverfi sem hefur ekki þörf fyrir sköpunarverkið”.  

Vefsíða Aðalsteins er http://steiniart.com

Nánari upplýsingar veitir Aðalsteinn: kristnes(hjá)hotmail.com

Aðalsteinn verður viðstaddur opnunina.
Sýningin á Café Karólínu stendur til 4. maí 2007. Allir eru velkomnir á opnun laugardaginn 10. mars 2007, klukkan 14.

Á sama tíma stendur yfir sýning Jónasar Viðars á Karólínu Restaurant.

Næstu sýningar á Café Karólínu:

05.05.07-08.06.07        Edda Þórey Kristfinnsdóttir
09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Umsjónarmaður sýninganna er Hlynur Hallsson

Af hverju ekki slagorð með ZERO óskum?

Auglýsingaholskefla Kók til að selja meira af gosi sem heitir zero er frekar ömurleg. Hér eru hinsvegar nokkrar tillögur að skárri slagorðum en þeim sem ímyndarsérfræðingar gosrisans haf dælt út úr sér:

Af hverju ekki ný ríkisstjórn með ZERO Framsókn?

Af hverju ekki ný ríkisstjórn með ZERO Sjálfstæðisflokki?

Af hverju ekki kvenfrelsi með ZERO misrétti?

Af hverju ekki kynfrelsi með ZERO nauðgunum?

Af hverju ekki jafnrétti með ZERO ofbeldi?

Af hverju ekki náttúruvernd með ZERO landdrekkingu?

Af hverju ekki velferðarkerfi með ZERO einkavæðingu?

En svo er líka aðal spurningin:

Af hverju svölum við ekki þorstanum án ZERO?

Fylgi Sjálfstæðisflokks eykst mikið frá síðustu könnun

Karen Dúa opnar á Karólínu

Það eru sjö opnanir í Gilinu í dag og ég er að verða of seinn á fyrstu opnanirnar sem eru klukkan 14:00. Ætla hér að birta fréttatilkynningu um sýninguna hennar Karenar Dúu og þjóta svo.

Karen Dúa Kristjánsdóttir

Draugurinn - ég

10.03. - 06.04.2007   

Velkomin á opnun laugardaginn 10. mars 2007, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---
Laugardaginn 10. mars klukkan 14 opnar Karen Dúa Kristjánsdóttir sýninguna "Draugurinn - ég" á Café Karólínu.
Karen er fædd á Akureyri 1982 og útskrifaðist úr Myndlistaskólanum á Akureyri 2006. Vinnustofa henner er í Gilinu og rekur hún þar ásamt félögum sínum gallerí BOX.
Karen segir um sýninguna á Café Karólínu:
"Maðurinn er jafnan forvitinn um líf á öðrum tilverustigum, hvort sem við afneitum því eða trúum heitt á það, - þá erum við forvitin. Verkin sem nú eru sýnd á Café Karólínu eru málverk unnin með olíu á striga. Þau eru óræð, minna okkur á drauga og skilja eftir spurningar.
Stundum birtast okkur óljósar myndir af verum sem við vitum ekki hvort að eru raunverulegar. Eru þetta draugar eða spegilmyndir af okkur sjálfum? Eru þetta kannski bara óljósar minningar að láta vita af tilvist sinni? Eða draugurinn af sjálfri mér í mismunandi myndum, hin mörgu andlit sjálfrar mín. Fylgir mér eins og vofa, tilfinningin að vera aldrei ein er góð. Draugurinn ég sem vill stundum bara hverfa, gufa upp út í loftið, vera ósýnileg og týnd í tímanum.  

Eru draugar dáið fólk, eða eru draugar jafnvel ekki til? Ímyndun ein sem lifnar við."

Nánari upplýsingar um verk Karenar eru á síðunni:
http://www.umm.is/UMMIS/Listamenn/Listamadur/625

Karen verður viðstödd opnunina.
Sýningin á Café Karólínu stendur til 6. apríl 2007. Allir eru velkomnir á opnun laugardaginn 10. mars 2007, klukkan 14.

Á sama tíma stendur yfir sýning Jónasar Viðars á Karólínu Restaurant. Sú sýning stendur til 4. maí 2007.

Næstu sýningar á Café Karólínu:

07.04.07-04.05.07        Aðalsteinn Þórsson
05.05.07-08.06.07        Edda Þórey Kristfinnsdóttir
09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Erfðabreytt og eitrað

Það var mikið að eitthvað gerist í þessum málum. Auðvitað eiga neytendur rétt á því að fá að vita hvað er í mætvælunum sem við erum að kaupa. Við erum eina landið í Evrópu sem ekki krefst merkinga á matvæli um erfðabreytingar. Neytendasamtökin fagna því að Jónína Bjartmarz umhverfisráðherra hafi í hyggju að setja reglugerð um merkingu erfðabreyttra matvæla og segjast lengi hafa krafist þessa. Á heimsíðu neytendasamtakanna segir: "Minnt er á að íslenskar landbúnaðarvörur eru markaðssettar sem umhverfisvænar vörur og sem framleiddar eru í sátt við umhverfið. Það er ljóst að ef það myndi spyrjast út að erfðabreytt kjarnfóður sé notað í íslenskum landbúnaði er hætt við að sú ímynd myndi bíða verulega hnekki."

Það á einnig að upplýsa hvaða eiturefni eru notuð við ræktun á grænmeti. Ólöf Ýrr Atladóttir bloggar um þetta í dag. Annars er öruggast að kaupa vottaðar lífrænt ræktaðar vörur. Þær eru hollari og betri en auðvitað dýrari en ef fleiri kaupa þær þá lækkar framleiðslukostnaðurinn. Gott að heimur fer batnandi á þessu sviði.

NS fagna ákvörðun um að merkja erfðabreytt matvæli

Friðrik V. í Gilið

Það er frábært að hinn skemmtilegi og glæsilegi veitingastaður Friðrik V. kemur til með að flytja í Bögglageymsluna í Listagilinu í sumar. Þar með verður síðasta húsið í Gilinu tekið í notkun að nýju og það er kominn tími til. Þessi gullmoli í Gilinu þarf á endurnýjun að halda og með Friðriki V. mun gamla KEA Gilið blómstra sem aldrei fyrr. Það verður hægt að halda uppá 100 ára afmæli hússins í sumar. Frábært að þau Friðrik V. Karlsson og Arnrún Magnúsdóttir ætli að nýta húsið einnig sem sælkeraverslun þar sem áherslur verða með svipuðum hætti og á veitingastaðnum, það er á norðlenskt hráefni s.s. ferskan fisk og fleira. Þetta mun fjölga gestum í Gilinu og hinir veitingastaðirnir munu njóta þess einnig að Bögglageymslan verður gerð upp. Og Akureyri verður dásamlegur rólegheitabær.

Friðrik V. flytur í bögglageymslu KEA á Akureyri

Bjórinn gerður upptækur

Ljómandi gott að löggan mætti á Lækjartorg og stoppaði frjálshyggjudrengina af þegar þeir ætluðu að selja bjór úti á götu. Í fréttinni á mbl.is segir:
"Lögregla kom í veg fyrir sölu á áfengum drykkjum á Lækjartorgi nú kl. 14 en ungir frjálshyggjumenn höfðu boðað sölu á áfengum bjór þar í dag. Lögregla gerði söluvarninginn upptækan og tók forsvarsmann hópsins til yfirheyrslu á lögreglustöð."
Nóg var búið að auglýsa þetta uppátæki frjálshyggliðsins. Minnir mann á árleg mótmæli stuttbuxnadrengjanna í SUS þegar þeir leggjast ofan á álagningarskrár til að fólk geti ekki séð hvað ríka og fræga fólkið reiknar sér í laun. Ég er þeirrar skoðunar að það sé best að selja bjór eins og annað áfengi í Vínbúðunum, þar sem almennilegt eftirlit er með því að krakkar séu ekki að kaupa vín. Algerlega sammála SÁÁ um þetta.

Komið í veg fyrir sölu á áfengi á Lækjartorgi