Allt að gerast

Það hrúgast inn kannanir þessa dagana og öllum ber þeim saman um að Vinstri græn verða sigurvegarar kosninganna í vor. Atli Gísla stóð sig frábærlega á Stöð 2 áðan og Alma Lísa bloggvinkona er á leið á þing. Gaman væri ef Heiða einnig bloggvinkona færi með Atla og Ölmu inn. Þetta er frábært.

Stóraukið fylgi VG í Suðurkjördæmi

Biskupinn varar við umhverfisvá - Stjórnarsinnar froðufella

Stundum þegar biskupinn predikar leggja menn við hlustir og nú virðist hann hafa hitt naglann á höfuðið þegar hann talar um umhverfisvá og það að áherslan á endalausar framfarir sé tál og þá tryllast margir stuðningsmenn ríkisstjórnarflokkanna. Maður þarf ekki annað en að lesa bloggfærslur nokkurra froðufellandi stjórnarsinna hér á moggablogginu til að staðfesta þetta. Það skyldi nú ekki felast sannleikskorn í þessum orðum Karls Sigurbjörnssonar? Og það hittir greinilega á veikan blett bloggaranna. Séra Karl segir meðal annars: "Við þurfum að hlusta eftir því og taka mark á, þegar sífellt fleiri upplýsingar benda til að framtíð lífs á jörðu sé ógnað af manna völdum. Við göngum freklega gegn lífríki jarðar með græðgi okkar og yfirgangi og rányrkju. Við erum að uppskera ávexti blindrar og guðlausrar tæknihyggju og manndýrkunar. Engin algild gildi né lögmál virðast lengur virt, allt er falt, rétt og rangt er einungis álitið afstætt. Eða öllu heldur, aðeins aflsmunur. Hinn auðugi og sterki hefur rétt fyrir sér. Þetta er skelfileg lygi sem leiðir til glötunar, upplausnar samfélags og menningar. Boðskapur fagnaðerindisins er köllun til iðrunar og afturhvarfs."

Það er mikið til í þessum orðum og í raun þörf ábending til okkar allra. Séra Karl segir einnig: "Til að hamla gegn aðsteðjandi umhverfisvá þarf samstillt átak hinna mörgu. En umfram allt þurfum við öll að horfa í eigin barm og endurmeta lífsstíl ágengni og sóunar og temja okkur lífsstíl hófsemi og hógværðar. Við verðum að fara að horfast í augu við að draumar okkar og framtíðarsýnir séu ef til vill byggðar á kolröngum forsendum. Að áherslan á endalausar framfarir, sívaxandi auð og velsæld, mátt hins hrausta, sterka og stælta, er tál. Á móti kröfum hátækni og háhraða og hámörkun afkasta og ágóða, þarf að koma vægi alúðar og umhyggju fyrir lífinu, landinu, náunganum, ungviðinu veika og brothætta."

Ég veit ekki af hverju sumir stjórnarsinnar eru svona reiðir yfir þessari ræðu en það er ef til vill skiljanlegt að það sé kominn kosningaskjálfti í menn en samt alger óþarfi að bregðast illa við. Hér er hægt að lesa alla predikun biskupsins og bloggfærslur hinna reiðu bloggara má finna til hægri við fréttina á mbl.is. Gleðilega páska. 

Áherslan á endalausar framfarir er tál

Góður dagur til að kjósa

Hafnfirðingar fjölmenna vonandi á kjörstað í dag til að kjósa. Ég hef ekki kosningarétt og ætla þessvegna bara að þekja einn húsvegg með áli og spreyja smá á hann. Það er að vísu rok núna hér á Akureyri en lægir vonandi um hádegi og þá geta akureyringar og aðrir fylgst með. Hér er fréttatilkynning um verkið:

Hlynur Hallsson
Drulla - Scheisse - Mud
VeggVerk
31.03. - 25.05.2007
www.veggverk.org

Í dag laugardaginn 31. mars setur Hlynur Hallsson upp verkið "Drulla - Scheisse - Mud" á vegg á mótum Strandgötu og Glerárgötu á Akureyri. VeggVerk sem einnig er hægt er að sjá á slóðinni www.veggverk.org hefur verið starfrækt af Halli Gunnarssyni frá því síðasta haust og er sýning Hlyns sú þriðja í röðinni. Áður hafa Jóna Hlíf Halldórdsdóttir og Werner Berger ásamt Timothy Murphy sýnt á veggnum.

Verk Hlyns Hallssonar er gert í tilefni af því að í dag kjósa Hafnfirðingar um hvort stækka eigi álver Alcoa í Hafnarfirði eða halda því óbreittu. Hlynur mun klæða vegginn með áli og veggfóðra þannig yfir verk þeirra Werner Bergers og Timothy Murphy´s sem er málverk með textatilvitnun í Nelson Mandela eða öllu heldur Marianne Williamson. Hlynur ætlar því næst að spreyja á álið setningarnar:

TAKK FYRIR ALLT ÁLIÐ
VIELEN DANK FÜR DAS GANZE ALUMINIUM
THANKS FOR ALL THE ALUMINIUM

Hlynur segir:
"Verkið er óður til álrisanna og þakklæti fyrir allt álið sem þeir hafa fært okkur, eða kannski öllu heldur súralið frá Ástralíu. Takk fyrir allar einnota umbúðirnar sem eru síðan framleiddar úti í heimi og ameríkanar henda svo án þess að endurvinna. Takk fyrir að kaupa af okkur rafmagn fyrir brot að því sem annar iðnaur þarf að borga, hvað þá almenningur. Takk fyrir alla mengunina. Takk fyrir að skapa deilur í samfélaginu. Takk fyrir stuðla að hárri verðbólgu og háum vðxtum á lánunum okkar og takk fyrir að að því að hrekja önnur fyrirtæki úr landi. Takk fyrir þetta allt. Takk, bara takk."

Hlynur Hallsson hefur gert fjölda af spreyjverkum á undanförnum árum á sýningum í Marfa í Texas, München, Berlín, Kumamoto, Feneyjum, Kaupmannahöfn, Malmö, Reykjavík, Akureyri og nú stendur einmitt yfir sýning á verkum Hlyns á Gráa svæðinu í Þelamerkurskóla þar sem hann hefur spreyjað á vegg skólans. Það verk sem heitir "Skólinn - Die Schule - The School". Hægt er að skoða nokkur þessara verka og mörg fleiri á heimasíðu Hlyns: www.hallsson.de
Hlynur bloggar einnig á www.hlynur.is

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur sett upp um 50 einkasýningar og tekið þátt í um 70 samsýningum. Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2005. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var bæjarlistarmaður Akureyrar árið 2005.
Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, gönguferðir eða snjóhúsbygging geta verið efniviður í verkum hans en einnig landmæri, samskipti fólks og viðhorf okkar.

Sýning Hlyns á VeggVerk stendur yfir til 25. maí 2007 og er öllum opin. Hlynur mun vinna við að setja upp verkið milli 12 og 16 í dag laugardag og fyrir þá sem ekki komast og eru til dæmis staddir í Hafnarfirði er hægt sjá myndir og fylgjast með uppsetningunni og svo fullbúnu verkinu á www.veggverk.org

Úrslit í Hafnarfirði gætu legið fyrir kl. 21 til 22

Sigmar skúbbaði handtöku Spaugstofunnar

Sigmar Guðmundsson bloggari og Kastljóssmaður átti skúbbið með handtöku Spaugstofunnar. Mbl.is ætti að taka sér Sigmar til fyrirmyndar og í framhaldinu segja hvaðan fréttirnar koma. Það voru auðvitað hæg heimatökin hjá Sigmari en það eru einnig hæg heimatökin hjá mbl.is því hann er jú með mest sóttu síðuna á moggablogginu Það er einnig gott að vita að Íslendingar eru ekki búnir að missa húmorinn, maður var farinn að hafa áhyggjur.

Handtaka átti Spaugstofumenn

Karen Dúa opnar á Karólínu

Það eru sjö opnanir í Gilinu í dag og ég er að verða of seinn á fyrstu opnanirnar sem eru klukkan 14:00. Ætla hér að birta fréttatilkynningu um sýninguna hennar Karenar Dúu og þjóta svo.

Karen Dúa Kristjánsdóttir

Draugurinn - ég

10.03. - 06.04.2007   

Velkomin á opnun laugardaginn 10. mars 2007, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---
Laugardaginn 10. mars klukkan 14 opnar Karen Dúa Kristjánsdóttir sýninguna "Draugurinn - ég" á Café Karólínu.
Karen er fædd á Akureyri 1982 og útskrifaðist úr Myndlistaskólanum á Akureyri 2006. Vinnustofa henner er í Gilinu og rekur hún þar ásamt félögum sínum gallerí BOX.
Karen segir um sýninguna á Café Karólínu:
"Maðurinn er jafnan forvitinn um líf á öðrum tilverustigum, hvort sem við afneitum því eða trúum heitt á það, - þá erum við forvitin. Verkin sem nú eru sýnd á Café Karólínu eru málverk unnin með olíu á striga. Þau eru óræð, minna okkur á drauga og skilja eftir spurningar.
Stundum birtast okkur óljósar myndir af verum sem við vitum ekki hvort að eru raunverulegar. Eru þetta draugar eða spegilmyndir af okkur sjálfum? Eru þetta kannski bara óljósar minningar að láta vita af tilvist sinni? Eða draugurinn af sjálfri mér í mismunandi myndum, hin mörgu andlit sjálfrar mín. Fylgir mér eins og vofa, tilfinningin að vera aldrei ein er góð. Draugurinn ég sem vill stundum bara hverfa, gufa upp út í loftið, vera ósýnileg og týnd í tímanum.  

Eru draugar dáið fólk, eða eru draugar jafnvel ekki til? Ímyndun ein sem lifnar við."

Nánari upplýsingar um verk Karenar eru á síðunni:
http://www.umm.is/UMMIS/Listamenn/Listamadur/625

Karen verður viðstödd opnunina.
Sýningin á Café Karólínu stendur til 6. apríl 2007. Allir eru velkomnir á opnun laugardaginn 10. mars 2007, klukkan 14.

Á sama tíma stendur yfir sýning Jónasar Viðars á Karólínu Restaurant. Sú sýning stendur til 4. maí 2007.

Næstu sýningar á Café Karólínu:

07.04.07-04.05.07        Aðalsteinn Þórsson
05.05.07-08.06.07        Edda Þórey Kristfinnsdóttir
09.06.07-06.07.07        Björg Eiríksdóttir
07.07.07-03.08.07        Elísabet Jónsdóttir
04.08.07-31.08.07        Dagrún Matthíasdóttir
01.09.07-05.10.07        Stefán Jónsson
06.10.07-02.11.07        Marsibil G. Kristjánsdóttir
03.11.07-30.11.07        Birgir Sigurðsson
01.12.07-04.01.08        Steinunn Helga Sigurðardóttir
05.01.08-02.02.08        Guðrún Vaka  

Erum við föst í Netinu?

Til hamingju með alþjóðlegan baráttudag kvenna! Það var afar fræðandi viðtal við Auði Styrkársdóttur forstöðukonu Kvennasögusafnsins í Laufskálanum á Rás 1 áðan. Ég mæli með að fólk hlusti á þáttinn á Netinu eða á endurflutning í kvöld.

Ung vinstri græn eru svo með opinn umræðufund á laugardaginn 10. mars klukkan 11 í Suðurgötu 3, sem ber yfirskriftina: Erum við föst í netinu - eða er hægt að temja það? Efni fundarins verður Netið í víðum skilningi. Framsögumenn verða: Steingrímur J. Sigfússon, Kristín Tómasdóttir og Pétur Tyrfingsson. Það er reyndar einnig hægt að spyrja: á að temja Netið eða þarf að temja það? Þetta verður örugglega áhugaverður fundur í framhaldi af útúrsnúningnum mikla um "netlögguna".

83% íslenskra heimila tengd netinu

Vinir og opnun á laugardaginn

Ég er afar hlynntur vinabæjum. Hef að vísu ekki komið til Grimsby en er viss um að þar er vingjarnlegt fólk. Mér finnst líka að Hallgrímur Helgason (Grim) ætti að verða heiðursborgari í Grimsby. Annars er ég að opna sýningu á Akureyri í galleriBOXi á laugardaginn og verkið er tilvalið til að vingast við fólk. Það er reyndar hellingur af opnunum á Akureyri þennan dag og ég set meira um það hér á síðuna næstu daga en hér er fréttatilkynningin fyrir BOXið:

Hlynur Hallsson opnar sýninguna LJÓS - LICHT - LIGHT í galleriBOXi, Kaupvangstræti 10, á Akureyri, laugardaginn 10. mars 2007 klukkan 16.

Verkið sem Hlynur setur upp í galleriBOXi samanstendur af borði og sætum sem gerð eru á afar einfaldan hátt úr froðuplastplötum og gæruskinni. Froðuplastið er tilbúið efni sem gjarnan er notað til einangrunar og gæruskinnið er hinsvegar náttúruleg afurð en einnig gjarnan notuð til einangrunar eða öllu heldur sem fóður í ýmsar flíkur. Froðuplastið er framleitt hjá Plastási á Akureyri en gærurnar koma frá Skinnaiðnaði sem var á Akureyri en nú er búið að leggja niður, eða öllu heldur flytja til austurhluta Evrópu. Hlynur hefur sett upp svipuð verk á nokkrum stöðum eins og í Hannover og Vín og nú stendur yfir sýning hans hjá Kuckei+Kuckei í Berlín en þar eru áþekk sæti ásamt fleiri verkum. Sú sýning stendur einmitt til 10. mars, sama dags og sýningin í BOXi opnar.
Sýningargestir geta fengið sér sæti og hvílt lúin bein, spjallað saman eða horft og hvert á annað. Fólk getur blaðað í sýningaskrám frá sýningum sem Hlynur hefur haldið eða tekið þátt í. Einnig er hægt að ferðast í huganum til fjarlægra landa ef mann langar heldur til þess, sitjandi á þessum frumstæðu en hlýlegu bekkjum. Á vegginn hefur Hlynur spreyjað skilaboð sem hægt er að útleggja á ýmsa vegu. Á sama tíma og sýningin í galleriBOXi opnar, opnar Hlynur einnig sýningu á veggverk.org á vegg á mótum Glerárgötu og Strandgötu á Akureyri. Sýningin í GalleriBOXi stendur til sunnudagsins 25. mars 2007.

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur sett upp um 50 einkasýningar og tekið þátt í um 70 samsýningum. Hlynur hlaut verðlaun Kunstverein Hannover 1997 og verðlaun ungra myndlistarmanna í Neðra-Saxlandi 2001 og verðlaun Sparda Bank árið 2005. Hann hefur fengið 6 mánaða listamannalaun 1997, 2002 og 2003 og tveggja ára starfslaun 2006. Hlynur var bæjarlistarmaður Akureyrar árið 2005.
Verk Hlyns eru í eigu Listasafns Reykjavíkur, Listasafns Íslands, Nýlistasafnsins, Listasafnsins á Akureyri, Listasjóðs Dungals, Listasafns Flugleiða, Samlung Howig í Zürich auk nokkurra einkasafna í Evrópu. Hlynur vinnur með ljósmyndir, texta, innsetningar, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, gönguferðir eða snjóhúsbygging geta verið efniviður í verkum hans en einnig landmæri, samskipti fólks og viðhorf okkar. Nánari upplýsingar um Hlyn og verk hans er að finna á heimsíðunni www.hallsson.de
Allir velkomnir, grænmetisréttir að venju.

 
galleriBOX
Kaupvangstræti 10
600 Akureyri
www.galleribox.blogspot.com 

Grimsby vill gera vinabæjarsamkomulag við Akureyri

Ofbeldi í Kaupmannahöfn

Það er óhugnanlegt að horfa uppá það ofbeldi sem átti sér stað í Kaupmannahöfn í gær og heldur sennilega áfram í dag. BT er með myndasyrpu af ástandinu og eins og oft þá segja myndir meira en mörg orð. Það að stjórnmálamenn lofi framgöngu lögreglunnar kemur mér ekki á óvart og ekki ætla ég að verja aðgerðir ungmenna sem kasta steinum í átt að lögreglumönnum en mér blöskrar það ofbeldi sem á sér stað frá báðum hliðum. Það er eitthvað sem hlýtur að vera hægt að koma í veg fyrir með því að tala saman. Hér er mynd sem Uffe Weng tók og það eru fleiri myndir hjá BT, umfjöllun hjá Information og hjá Politeken.

Fjölmiðlar hrósa dönsku lögreglunni

Skel hæfir kjafti

Það er ótrúlegt að hinn aldni repúblíkani John McCain sækist eftir því að verða forseti BNA. Bush er rúinn trausti en sumir segja að það að kjósa McCain sé að fara úr öskunni í eldinn. Róbert Björnsson er með athyglisvert myndband um the Religious Right á bloggsíðunni sinni. Fólk í bandaríkjunum hlýtur að losa hvíta húsið við öfgasinnaða hægrimenn og kjósa vonandi Hillary Clinton á næsta ári.

John McCain sækist eftir tilnefningu

Klámþingið blásið af, til hamingju!

Það eru góð tíðindi að hætt skuli hafa verið við þessa fyrirhuguðu klámráðstefnu. Hótel Saga á heiður skilinn og bændasamtökin einnig. Ferðamannaiðnaðurinn mun einnig uppskera fleiri ferðamenn sem ekki eru komnir hingað til að upplifa klám og rusl í Reykjavík. Þvert á það sem einhverjir hafa haldið fram. Það eru nefninlega margir hafa ekki áhuga á því að ferðast til landa sem hafa á sér vafasamt orðspor í þessum efnum. Niðurstaðan verður hinsvegar til þess að fólk sem ekki hefur áhuga á klámi flykkist til landsins. Samtakamátturinn skiptir máli og andfemínistar geta froðufellt að vild. Það er einnig athyglisvert að bloggið hefur skipt miklu máli við að koma skoðunum fólks á framfæri eins og umræður um þetta fyrrverandi klámþing sýna. Til hamingju aftur.

Hætt við klámráðstefnu hér á landi